skatarnir

Stefnan tekin á Skátaþingi

Wed, 29 Apr 2026 15:52:49 GMT

Skátaþing var haldið í Brekkuskóla á Akureyri 10.-12. apríl síðastliðinn. Harpa Ósk Valgeirsdóttir, Skátahöfðingi setti þingið og ávarpaði þingheim en um 120 manns sóttu setninguna.

Í ávarpi sínu lagði Harpa áherslu á að skátastarf sé einkar viðeigandi og mikilvægt fyrir ungmenni í tækniveröld nútímans og þá aðför sem æskulýðsfélög finna fyrir þar sem verið er að strika þau út úr skipuritum stjórnvalda sem virðast í auknum mæli einblína eingöngu á íþróttir. Skátahreyfingin þarf að standa saman, vera sýnileg og segja frá gildum sínum. Þá hvatti Harpa þingheim til að taka virkan þátt í dagskrá þingsins og kynnast svæðinu en Landsmót skáta verður haldið á Hömrum í sumar.

Þá voru einnig góðir gestir viðstaddir og skemmtilegar kynningar í pontu. Kosningar í stjórn og ráð voru með nokkuð einföldu sniði þetta árið þar sem sjálfkjörið var í öll embætti og fagnað var með lófaklappi. Vegna frestunar á Skátaþingi vegna veðurs var brugðið á það ráð að prufukeyra rafræna þátttöku sem tókst nokkuð vel til. Örlitlir tæknilegir hnökrar áttu sér stað en það verður að teljast eðlilegt svona í fyrstu tilraun.

Laugardagurinn hófst á hefðbundnum fundarstörfum þar sem farið var yfir ársskýrslu BÍS, starfsáætlun, ársreikninga og fjárhagsáætlun. Þá var komið að lagabreytingum en aðeins ein slík barst fyrir þingið og var það því afgreitt fljótt ásamt ályktun um að breyta heiti aldursbilsins Eldri skátar í Vættarskátar. Góðar og gagnlegar umræður áttu sér þó stað og góður andi var á þinginu.

Eftir hádegi á laugardegi var boðið upp á smiðjur um nýja stefnu BÍS en undirbúningsvinna hefur verið í gangi allt frá síðasta Skátaþingi. Lagt var til yfirheitið Öll börn á Íslandi hafi kost á framúrskarandi skátastarfi og að grunnstoðir stefnunnar verði aðgengileiki, stuðningur og gæði.

Boðið var upp á þrjár smiðjur þar sem markmiðið var að veita fólki innblástur um hvað skátar vilji sjá gert í undirflokkum stefnunnar. Rætt var um aðgengileika í skátastarfi, hver grunnur skátastarfs er og hvaða áhrif skátastarf getur haft í samfélaginu. Góð þátttaka var í smiðjunum og verður gaman að vinna úr þeim hugmyndum sem þarna komu fram í nýrri stefnu næstu árin.

Á sunnudeginum var haldið á Hamra þar sem Skátagildið Kvistur, mótsstjórn og starfsfólk Hamra tóku vel á móti hópnum. Hópurinn gekk um svæðið í snjókomu, fékk kynningu á svæðinu og hvernig því verður skipt á Landsmóti. Óvænt snjókast brast út á miðri leið og má sjá að fólk skemmti sér konunglega. Endað var í pylsupartý áður en fólk hélt heim á leið.

Skátaþing sett í gærkvöldi

Sat, 11 Apr 2026 09:47:36 GMT

Skátaþing sett á Akureyri

Skátaþing var sett í gærkvöldi með hátíðlegri setningarathöfn en um 120 manns sóttu setninguna. Skátaþing fer fram í Brekkuskóla á Akureyri og eru gestgjafar þingsins skátafélagið Klakkur. Harpa Ósk Valgeirsdóttir, skátahöfðingi, setti þingið og ávarpaði þingheim.

Ávörp fluttu einnig Hlynur Jóhannsson, bæjarfulltrúi Akureyrarbæjar, Jóhann Malmquist, félagsforingi Klakks og Guðni Gíslason, landsgildismeistari.

Veitt voru heiðursmerki og skipunarbréf nýkjörinna félagsforingja. Þá var tilkynnt um nýjan alþjóðafulltrúa BÍS gagnvart WOSM, Hildi Bragadóttur úr skátafélaginu Kópum. Valur Kári Óskarsson, skátafélaginu Skjöldungum, hefur verið skipaður ambassador hjá KISC, alþjóðlegu skátamiðstöðinni í Kandersteg.

Skemmtileg verkefni voru kynnt þingheim. Staða Hringferðarinnar var kynnt en það er átaksverkefni Bandalags íslenskra skáta um fjölgun skáta og skátafélaga á landsbyggðinni. Þá var kynning frá Skíðasambandi skáta um vetrarskátun og mótsstjóri Landsmóts sagði frá nýjustu vendingum í undirbúningi.

Kosið var í hluta stjórnar eins og lög BÍS kveða á um og einnig var kosið í fastaráð BÍS. Harpa Ósk Valgeirsdóttir var kjörin skátahöfðingi Íslands til næstu tveggja ára, með lófaklappi.

Sólskin, sjóstökk og skátagleði

Tue, 24 Mar 2026 13:17:50 GMT

Dróttskátadagurinn var hreinasta veisla!

Hvílíkur dásemdardagur sem þetta var! Dróttskátadagurinn var nýverið haldinn með miklum glæsibrag af Heiðabúum og það var hreinasta unun að fylgjast með því lífi og fjöri sem einkenndi viðburðinn frá upphafi til enda. Rúmlega 60 galvaskir og glæsilegir dróttskátar mættu fullir tilhlökkunar í skátaheimili Heiðabúa í Keflavík, tilbúnir í ævintýri dagsins. Dagskráin hófst á slaginu 12:00.

Þessi flotti dagur var skipulagður að öllu leyti af öflugu Rekkaskátasveitinni okkar. Þau stóðu sig svo sannarlega vel í öllu utanumhaldi og skipulagningu, og sýndu svo um munaði hvað í þeim býr með þessu glæsilega framtaki. Það var hvetjandi og dásamlegt að sjá unga fólkið okkar taka stjórnina af svona miklu öryggi og skapa ógleymanlegar minningar fyrir aðra skáta. Slík forysta og sjálfboðaliðastarf er félaginu og samfélaginu okkar til mikils sóma.

Dagskráin var fjölbreytt og spennandi en hún var unnin í frábæru samstarfi við Björgunarsveit Suðurnesja og Skotdeild Keflavíkur. Þar voru settar upp vandaðar stöðvar þar sem skátarnir fengu fræðslu um skotfimi og fengu svo að spreyta sig á því að skjóta úr loftbyssum, sem vakti gífurlega lukku. Fyrir þau sem þráðu spennu og adrenalín var boðið upp á að hoppa beint í svalan sjóinn eða skella sér í fjörugan rúnt á hraðskreiðum slöngubát.

Keflavík skartaði sínu allra fegursta þennan dag; sólin skein skært og blíðan lék við hvern einasta mann. Það gæti hreinlega ekki verið betra veður fyrir útivist og samveru. Eftir að hafa verið á þönum allan daginn og notið alls þess sem í boði var, endaði þessi magnaði dagur aftur í skátaheimili Heiðabúa. Þar var slegið upp pulsupartýi þar sem allir gátu fyllt á tankinn, hlegið saman og spjallað um daginn.

Við hjá Heiðabúum vorum í sjöunda himni með hvernig til tókst! Við þökkum öllum kærlega fyrir komuna og erum óendanlega þakklát fyrir að hafa fengið að halda þennan stórkostlega dag. Þetta var dagur sem við munum lengi minnast með mikilli hlýju og gleði í hjarta. Áfram skátarnir!

Skátaþingi frestað

Wed, 18 Mar 2026 14:02:10 GMT

Skátaþing 2026 - frestun

Vegna vályndra veðurskilyrða og ráðleggingar frá veðurfræðingum, hefur stjórn BÍS ákveðið að fresta Skátaþingi fram til 10. - 12. apríl næstkomandi.

Við áttum okkur á því að þetta er ekki óskastaða en við teljum óráðlegt að stefna fjölda skáta í langferð norður á Akureyri þegar útlit er fyrir mjög mikilli röskun á færð og hugsanlega ófærð yfir heiðarnar, sem skapar þannig óþarfa hættu fyrir ferðalanga. Við stefnum brött á Akureyri í apríl, með hækkandi sól og vonandi betra veðri.

Opnað verður aftur fyrir skráningu fyrir þau félög sem vilja bæta við þingfulltrúum en afskráningar þurfa að sendast með tölvupósti á Skátamiðstöðina . Skráning lokar viku fyrir þing, þann 3. apríl klukkan 20:30.

Aðrir lögbundnir frestir haldast óbreyttir enda þegar liðnir og eingöngu um breytingu á dagsetningu að ræða.

Ef breyting á þingfulltrúum hefur áhrif á kjörbréf félaga sem þegar hafa skilað því inn biðjum við ykkur að fylla út nýtt á heimasíðunni .

Þurfi félögin aðstoð vegna breytinga á gistingu og þess háttar, þá endilega hafið samband við Skátamiðstöðina sem mun aðstoða eftir fremsta megni.

Hulda og Ragnar bætast í hóp starfsmanna

Wed, 18 Mar 2026 11:41:05 GMT

Hulda Lárusdóttir hóf störf hjá Skátamótum þann 11. mars síðastliðinn og tekur við verkefnum fráfarandi viðburðarstjóra, Heiðdísi Snorradóttur. Hulda er tölvunarfræðingur og hefur áratuga reynslu af foringjastörfum og stjórnarsetu, ásamt framkvæmdum skátamóta. Hulda mun vera mótsstjórn Landsmóts skáta á Hömrum innan handar ásamt því að sinna þeim fjölmörgu viðburðum sem Skátamót standa fyrir.

Ragnar Auðun Árnason hóf störf hjá Bandalagi íslenskra skáta og Skátamótum þann 11. mars síðastliðinn. Starf hans deilist á Skátamót og skrifstofu BÍS. Ragnar tók virkan þátt í skátastarfi á yngri árum, sem foringi og svo starfsmaður á námskeiðum ásamt því að hafa haldgóða rekstrar- og viðburðastjórnunarreynslu. Ragnar er stjórnmálafræðingur og mun leiða matarúthlutun Landsmóts skáta á Hömrum og síðar sinna verkefnum hjá Skátamiðstöðinni.

Við bjóðum Huldu og Ragnar innilega velkomin til starfa hjá okkur í Skátamiðstöðinni og hlökkum til samstarfsins á sama tíma og við þökkum Heiðdísi fyrir samstarfið.

Nýr alþjóðarfulltrú BÍS hjá WOSM

Thu, 12 Mar 2026 15:45:57 GMT

Nýr alþjóðarfulltrúi bís hjá wosm

Hildur Bragadóttir, skátafélaginu Kópum, hefur tekið við sem alþjóðarfulltrúi BÍS hjá WOSM næstu tvö ár. Hún tekur við af Berglindi Lilju sem mun þó vera Hildi innan handar fyrst um sinn.

Hlutverk alþjóðarfulltrúa, e. International Commisioner (IC) , er að sjá um samskipti vegna og fylgjast með því starfi sem fer fram á vegum evrópusviðs og heimssviðs alþjóðlegu skátabandalaganna, WAGGGS og WOSM. Þau eru líka í teymi Norrænu skátanefndarinnar, NSK - Nordisk speiderkomité, sem sinnir sérstöku samstarfi milli Norðurlandanna. Alþjóðarfulltrúarnir starfa líka náið með alþjóðaráði við að stuðla að því að stefna BÍS fylgi stefnum WAGGGS og WOSM, nýta erlenda viðburði og stuðningsefni, annars samskipti við erlend skátabandalög, kynna erlent skátastarf á Íslandi og kynna íslenskt skátastarf erlendis.

,,Ég hef verið skáti allt mitt líf. Beið spennt eftir að komast í 3 bekk því þá mátti ég verða drekaskáti hjá Kópum (2008). Á þessum 18 árum og þar á undan hef ég gert ótalmargt í skátastarfi en alþjóða hlið starfsins hefur síðast liðin ár verið mest áberandi í mínu starfi. Hef farið á skátamót, viðburði og ráðstefnur víða um heiminn. Lengst að heiman var Róvermoot í Ástralíu en áhrifaríkasti viðburðurinn var helgi í skátaskála Norðmanna fyrir unga talsmenn skátahreyfinga Norðurlandanna. Ég hlakka mikið til verkefna næstu ára sem annar alþjóðafulltrúi BÍS. Ég hvet alla rekka-og róverskáta sem hafa áhuga á alþjóðastarfi um að heyra í mér eða alþjóðaráði og við getum skoðað saman þau ýmsu tækifæri sem þessi hreyfing bíður uppá" - Hildur ( Hildur@skatarnir.is )

Fararstjórar undirbúa sig

Tue, 03 Mar 2026 12:09:52 GMT

Um helgina var haldið vel heppnað fararstjóranámskeið þar sem farið var yfir allt sem þarf til að undirbúa skemmtilegt og vel heppnað Landsmót. Dagskráin var fjölbreytt og fræðandi og fengu þátttakendur góða innsýn í helstu þætti sem skipta máli við undirbúning og framkvæmd móts.

Meðlimir í mótsstjórn sáu um námskeiðið.

María Dýrfjörð fjallaði um grunnþarfir og velferð skáta og mikilvægi þess að skapa öruggt og styðjandi umhverfi. Ingibjörg mótsstjóri og Védís kynningarstjóri Landsmóts, ræddu um samskipti og viðbrögð í krísum. Kynnt var nýtt efni frá Svissneskum skátum sem hægt er að nota til að eiga uppbyggilegt og fyrirbyggjandi samtal í óþægilegum aðstæðum sem geta komið upp á mótinu. Andrea Dagbjört tók fyrir aðgengismál og mikilvægi þess að öll geti tekið þátt á eigin forsendum. Þá fór hún einnig yfir hlutverk Skjólsins og stuðningskjóðuna sem verður afhent öllum félögum fyrir mótið.

Anna, tæknistjóri mótsins, fór yfir öryggismál í tjaldbúð og helstu atriði sem þarf að hafa í huga til að tryggja öryggi þátttakenda. Katrín Kemp kynnti viðbragðsáætlun mótsins og samstarfið við æskulýðsvettvanginn. Jóhann Malmquist dagskrárstjóri og Halldóra Hinriksdóttir fóru yfir skipulag dagskrár, skráningu í dagskrárliði og fyrirkomulag opnu dagskrárinnar.

Í lok námskeiðsins sköpuðust góðar umræður þar sem meðal annars var rætt um fyrirkomulag í fjölskyldubúðum og matinn. Að lokum voru grunnupptökur af tveimur nýjum mótslögum spiluð. Þar með lauk vel heppnuðu og uppbyggilegu námskeiði.

Stefnt er á að hitta fararstjórnahópinn aftur þegar nær dregur móti á fjarfundi.

Útkall: Agora

Tue, 03 Mar 2026 00:00:00 GMT

Agora er:

alþjóðlegur viðburður þar sem róverskátar skipuleggja og keyra viðburð fyrir aðra róverskáta. Viðburðurinn einkennist af því að efla alþjóðleg tengsl milli þáttakenda þar sem að nokkrir fulltrúar frá hverju Evrópulandi taka þátt. Megininntak viðburðarins er að fræðast um og læra um skáta- og róverstarf í öðrum löndum.

Hvar og hvenær:

Í ár verður viðburðurinn haldinn í Verónu á Ítalíu dagana 15.-19. apríl 2026.

Hverjir geta sótt um:

Bandalag íslenskra skáta fær eitt til tvö sæti á Agora 2025. Skátar á aldrinum 16 - 24 ára sem eru skráð í Bandalag íslenskra skáta geta sótt um að vera þátttakendur fyrir hönd Íslands með því að fylla út umsóknareyðublaðið hér að neðan.

Þátttakendur þurfa að geta tjáð sig um rekka- og róverskátastarf á Íslandi og vera virk, áhugasöm og tilbúin að læra nýjar og mismunandi aðferðir sem nota má í skátastarfi. Mikill kostur er að þátttakendur hafi áhuga á umhverfinu og sjálfbærni. Aðaltungumál viðburðarins er enska og er því mikilvægt að þátttakendur geti tjáð sig og skilið umræður á ensku.

Verð:

Þátttökugjaldið á Agora 2026 er 100 evrur.

Þátttakendur þurfa að greiða flug og ferðakostnað sjálf en hægt er að sækja um ferðastyrk upp að 160 evrum.

Frekari upplýsingar má finna á heimasíðu Agora . Endilega hafið samband við Alþjóðaráð

Umsóknarfrestur er til 8. mars 2026.

Umsókn á Agora 2026

Thank you for contacting us.
We’ll get back to you as soon as possible.

We got it.

That didn’t work.

The form wasn’t sent. Please try again.

Nýjir Gilwell skátar

Thu, 26 Feb 2026 13:27:24 GMT

Helgina 6.-8. febrúar útskrifuðust 9 skátar úr Gilwell leiðtogaþjálfuninni og fengu einkennin sín afhent við hátíðlega stund í Gilwell skálanum. Skátarnir eru á aldrinum 22-46 ára og koma úr 3 félögum en að þessu sinni var stór hópur frá skátafélaginu Hraunbúum að útskrifast. Hópnum var skipt í flokka í upphafi þjálfunarinnar sem héldust út alla þjálfunina og hjálpuðust að við að leysa hin ýmsu verkefni sem á vegi þeirra varð.

Gilwell leiðtogaþjálfunin er fyrir fullorðna skáta sem vilja efla sig sjálf sem leiðtoga og halda áfram að leiða skátastarf í landinu. Hópurinn hefur lokið 10 daga leiðtogaþjálfun, sem er skipt í 3 hluta, og unnið að metnaðarfullu lokaverkefni. Fyrsti hluti ævintýrisins var í júní þegar tjaldbúð var reist á Úlfljótsvatni í 5 daga, næst hittist hópurinn yfir helgi í nóvember og var svo síðasti hlutinn haldinn í upphafi febrúar. Hápunktur helgarinnar var þegar skátarnir kynntu lokaverkefnin sín fyrir hópnum en þau hafa unnið að þeim allt frá fyrsta hluta í júní.

Um helgina var einnig hópur af skátum sem taka þátt í framhalds Gilwell leiðtogaþjálfuninni til að fá þriðju eða fjórðu perluna sína. Framhalds Gilwell hópurinn var á annari helgi í sinni þjálfun en gert er ráð fyrir lengra ferli fyrir þau þar sem verkefnin þeirra eru stærri og þurfa að ná til skátahreyfingarinnar allrar. Stefnt er að útskrift framhalds Gilwell hópsins á komandi ári og hlökkum við til að fylgjast með þeim klára sína vegferð.

Til hamingju með áfangann öll!

Ungmennaþing

Thu, 26 Feb 2026 10:24:38 GMT

Afmælisþing

Helgina 6.–8. febrúar var Ungmennaþing 2026 haldið. Að þessu sinni var ferðinni heitið til Hveragerðis, í Skátaheimilið Strók, og var þingið haldið með afmælisþema. Þar var bæði gist, borðað og sjálft þingið haldið. Mæting var á föstudaginn klukkan 20:00 og var þingið sett hálftíma síðar. Skátarnir komu sér fyrir í skátaheimilinu og fóru síðan saman í ísbúð. Eftir gómsætan ís var haldið í bólið.

Ræs og morgunmatur var klukkan 9:00 á laugardagsmorgni. Eftir smá samvinnu var heimilinu breytt úr svefnlofti í þingsal. Ungmennaráð hélt því næst stutta fræðslu um hvernig þingstörf fara fram og að henni lokinni hófust þingstörf. Hádegishlé var gert um klukkan 13:00 og síðan var tekið fyrir áskoranir og lagabreytingartillögur. Í ár komu fram margar góðar áskoranir og nokkrar lagabreytingartillögur, til dæmis um að hafa viðburði á vegum BÍS ódýrari, stofna skátakór fyrir yngri skáta og áskorun til Ungmennaráðs um að leggja meiri áherslu á fræðslu, og margt fleira. Allt þetta mun koma nánar fram á Skátaþingi. Þinginu var slitið stundvíslega klukkan 18:00.

Í kvöldmat voru ljúffengir hamborgarar og að honum loknum var haldið upp á Ungmennaþingið með köku og grænmetisspjótum. Skátunum var frjálst að fara út, en margir ákváðu að vera inni og spila Just Dance.

Ræs var með svipuðu sniði á sunnudeginum en síðan var farið beint í frágang. Í hádeginu var boðið upp á ostaslaufur og pizzasnúða. Að lokum var þinginu slitið formlega og þeir sem þurftu að fara með strætó í bæinn gerðu það, en einnig var í boði að fara í sund. Á hverju ári er kosið í Ungmennaráð og í embætti áheyrnarfulltrúa ungmenna í stjórn BÍS.

Í ár var ráðið endurnýjað að fullu með fimm nýjum meðlimum. Einn þeirra hafði þó áður gegnt embætti áheyrnarfulltrúa, Einar Tryggvi Petersen úr Árbúum. Aðrir meðlimir ráðsins eru Lára Margrét Hermannsdóttir úr Heiðabúum, María Rakel Clausen úr Árbúum, Sigrún María Einarsdóttir úr Garðbúum og Una Signý Sigurðardóttir úr Landnemum. Áheyrnarfulltrúi ungmenna var einnig kosinn. Hörð barátta var um embættið en að lokum stóð Edda María Einarsdóttir úr Garðbúum uppi sem sigurvegari og var kjörin í embættið

Aðalfundur Útilífsmiðstöðvar skáta Úlfljótsvatni

Fri, 20 Feb 2026 14:42:13 GMT

Aðalfundur Útilífsmiðistöðvar skáta á Úlfljótsvatni (ÚSÚ) verður haldinn miðvikudaginn 18. mars 2026 kl. 20:00 í sal Skátamiðstöðvarinnar, Hraunbæ 123.

Á dagskrá eru hefðbundin aðalfundarstörf.

1. Kosning fundarstjóra og fundarritara

2. Skýrsla stjórnar lögð fram

3. Reikningar lagðir fram til samþykktar

4. Lagabreytingar

5. Samþykktir Úlfljótsvatns

6. Önnur mál

Hér er hlekkur á fjarfund.

Vetrarmót Reykjavíkurskáta 2026

Fri, 13 Feb 2026 09:38:23 GMT

Helgina 23.-25. janúar var haldið tíunda Vetrarmót Reykjavíkurskáta í Útilífsmiðstöð skáta á Úlfljótsvatni. Þema mótsins var Ólympíuleikarnir og snerist helgin að miklu leiti um keppnir í allskyns skátaþrautum. Mótið var skipulagt og haldið í sameiningu Reykjavíkurfélaganna og voru þau sex skátafélög sem sendu fulltrúa í ár frá Árbúum, Garðbúum, Landnemum, Skjöldungum, Vogabúum og Ægisbúum. 130 Skátar tóku þátt í helginni og voru um 30 af þeim sjálfboðaliðar sem gerðu helgina ævintýralega. Þátttakendur sem tóku þátt í mótinu voru á aldursbilunum fálkaskátar, dróttskátar og rekkaskátar.

Skátarnir mættu hressir á föstudagskvöldi og skelltu sér beint í það að koma sér fyrir í herbergjum og tjöldum. Merkilegt var þó að í JB þar sátu nokkur tóm herbergi því um 30 skátar gistu úti í tjaldi og aldrei hafa jafn margir gist úti á vetrarmóti. Veður aðstæður voru mjög góðar fyrir tjöldun með engum snjó og kringum frostmark alla helgina. Haukur Landnemi hannaði nýtt merki sem gefið var fyrir alla þá sem gistu úti á mótnu. Merkið heldur áfram næstu ár og er um að gera fyrir alla skáta að reyna á tjaldgistingu á komandi vetrarmótum. Á setningu mótsins kom Jón Andri hlaupandi með kyndla til þess að kveikja á Ólympíska eldinum.

Guðjón Orri og Kjartan Árbúar tóku að sér vekja tjaldsvæðið með pott, sleif og sírenum á laugardagsmorgni.

Fálkaskátar mættu á svæðið í dagsferð á laugardagi og fóru beint í klassíska Víkingaleika, eftir hádegi tóku þau göngu upp að krossi og byrjaði svo liða keppni þar sem þau kepptu í klifri, bogfimi og skátadulmáli. Þau tóku þátt í dagskrá fram að kvöldvöku þar sem sigurvegarar voru tilkynntir.

Dróttskátar tóku þátt í liðakeppni þar sem keppt var í hraða og hæfnisþrautum allan daginn. Dagskráin innihélt meðal annars klifur, bogfimi, að súrra, drumba drátt og hvaða flokkur er fljótastur að kveikja bál. Allir flokkarnir stóðu sig með prýði og geta skátafélögin verið stolt af sínum skátum á Ólympíuleikum vetrarmóts.

Rekkaskátar tóku þátt í liðakeppni skipulögð af Daníel Þresti, Árbúa sem gaf hverjum flokki gott frelsi til þess að njóta og gera allt sem þeim langaði til. Dagskráin innihélt blað með fullt af áskorunum meðal annars göngu í kringum Úlfljótsvatn, gista upp á fjalli og elda kjötsúpu á opnum eldi. Rekkaskátarnir nutu þess mjög vel og kláruðu margar af erfiðustu þrautunum með sóma.

Þórir Snær stýrði kvöldvöku sem haldin var í lautinni við KSÚ með opnum varðeldi. Fullt af skemmtilegum skemmtiatriðum frá öllum aldursbilum voru tekinn. Túri gerði sína vinsælu kökur, snúða og kakó sem kláruðust alveg. Um kvöldið tók við kvöldleikur sem Laura skipulagði og stýrði. Leikurinn bætti töfrum inn í Ólympíuleikana þar sem krakkarnir gerðu þrautir til þess að fá til baka kunnáttu sína í því að kveikja eld eftir að töframaður bæði stal eldinum og lét okkur öll gleyma hvernig maður á að kveikja eld.

Kvöldmaturinn á laugardagskvöldi var í raun hátíðarkvöldverður þar sem Túri eldaði hamborgarhrygg sem var í uppáhaldi hjá öllum.

Á sunnudeginum var vaknað og pakkað öllu í tæka tíð fyrir stórskemmtilega flaggaðu trönufánann (capture the flag með trönum) skipulagt og stýrt af Rafnari og Aroni sem sló svo sannarlega í gegn. Aldís og Samúel eldhús snillingar skelltu í svakalegt pylsupartý með tónlist og dansi. Eftir pylsur tók við skemmtilegur bolta leikur sem Rafnar stýrði og kallar Ultimate brennó. Sá leikur var svo skemmtilegur að erfitt var að stoppa þann leik fyrir slit. Jón Andri vildi ekki einu sinni hætta. Á slitum var tilkynnt sigurvegara dróttskáta og rekkaskáta keppnanna svo fengu allir þátttakendur mótsmerkið sem Haukur Landnemi hannaði. Þeir sem gistu í tjaldi fengu afhent sitt nýja merki. Hvert félag fékk svo þátttöku viðurkenningu sem fararstjórar tóku við.

Helgin gekk stórkostlega og fá allir sjálfboðaliðar stórt hrós frá mótstýru sem hefði ekki geta þetta án þeirra. Stórt hrós á Daða Má sem tók glæsilegar myndir. Stórt hrós á Jón Andra sem hljóp um alla helgina að græja allt sem græja þurfti.

Umsókn sjálfboðaliða (IST) á alheimsmót skáta í Póllandi 2027

Mon, 02 Feb 2026 11:56:59 GMT

Rúmlega þúsund skátar eldri en átján ára koma á alheimsmótskáta sem sjálfboðaliðar. Þau bera ábyrgð á daglegu lífi og almennum rekstri mótssvæðisins og framkvæmd dagskránnar yfir mótið. Aðalhlutverk sjálfboðaliðanna er því að sjá til þess að allt skipulag og framkvæmd mótsins gangi örugglega upp. Eru sjálfboðaliðarnir því lykillinn að árangursríku móti og án sjálfboðaliðanna er ekki hægt að halda alheimsmót.

Við hverju máttu búast sem sjálboðaliði mótsins?

Þau sem vilja skrá sig sem IST liða á alheimsmót þurfa að vera tilbúin til þess að sinna öllum þeim verkum sem þarf að sinna fyrir mót af þessari stærð. Sum hlutverk geta krafist langs vinnudags eða vinnu á nóttunni og einnig geta sum fengið hlutverk að aðstoða íslenska fararhópinn sérstaklega á mótinu. Að auki verða IST liðar að vera skráðir meðlimir Bandalags íslenskra skáta og verða hluti af íslenska fararhópnum á mótið.

Sjálfboðaliðarnir gista á sér sjálfboðaliðasvæði með öðrum sjálfboðaliðum og fararteymum. Á þessu sérsvæði er einnig að finna ýmsir dagskrámöguleikar fyrir sjálfboðaliðanna ásamt eigin matartjaldi þar sem eldað er fyrir sjálfboðaliðanna morgunmat og kvöldmat en hádegismaturinn verður yfirleitt nestirpakki sem þau taka með á sitt vinnusvæði.

Skilyrði fyrir sjálfboðaliða

Vera orðin 18 ára þegar mótið hefst, 30. júlí 2027.
Mæting á mótssvæðið fyrir sjálfboðaliðana er 27./28. júlí 2027 og brottför er 10. ágúst 2027.
Geta séð um sig sjálf við fjölbreyttar og krefjandi aðstæður.
Hafa getu til þess að vera þrjár vikur í tjaldútilegu við frumstæðar aðstæður og taka þátt í tjaldbúðalífi.

Reynsla sjálfboðaliða

Reynsla af allskonar aðstæðum, t.d. ólíku hitastigi, svefnvenjum, matarvenjum o.fl.
Vera tilbúin til þess að vinna ólík störf og hafa opinn huga gagnvart því að prófa eitthvað nýtt.
Hæfni og jákvætt viðmót gagnvart samvinnu með fjölbreyttum, ólíkum og alþjóðlegum hópi fólks.
Kostur að hafa verið sjálfboðaliði á skátamóti eða í stjórn skátamóts, starfað í vinnuhópi BÍS, unnið í hóp við krefjandi verkefni eða viðburð.

Fræðsla og þjálfun sjálfboðaliða

Sjálfboðaliðar mótsins þurfa að fá viðeigandi þjálfun fyrir sín hlutverk og verkefni sem mótið sjálft sér um. Einnig eru ákveðin námskeið sem öll yfir átján ára og koma á einhvern hátt að mótinu þurfa að sækja og geta sýnt fram á vottun eða viðurkenningu um að hafa staðist þau námskeið, eins og t.d. Safe from Harm.

Sumar fræðslur og námskeið munu sjálfboðaliðarnir geta nýtt sér áfram eftir Alheimsmótið í eigin lifi og starfsframa. Mótið vonar að sjálfboðaliðarnir nýti sér þá þjálfun og fræðslu sem er í boði til þess að styrkja eigin kunnáttu og getu.

Hér er gróf tímalína fyrir sjálfboðaliðana til að miða við fyrir mótið.

Mars 2026 – Verkefnalisti fyrir IST gefinn út
Maí 2026 – Opnað fyrir almenna fjar-fræðslu fyrir sjálfboðaliða
Maí 2026 – Um miðjan maí geta skráðir sjálfboðaliðar byrjað ferlið við að velja sér verkefni
Febrúar 2027 – Lokað fyrir umsóknir í að velja verkefni
Apríl 2027 – Opinberað hvaða hlutverk sjálfboðaliðarnir fengu. Fjarþjálfun hefst fyrir hlutverkin frá apríl til júní
Júlí 2027 – Þjálfun á staðnum þegar sjálfboðaliðarnir mæta á staðinn

Skemmtileg og þroskandi upplifun sjálfboðaliða

Þrátt fyrir að sjálfboðaliðarnir eru að koma á mótið til þess að gefa frá sér vinnu þá á þessi reynsla líka að vera skemmtileg! Mótið vill tryggja að sjálfboðaliðarnir fái líka tækifæri til að njóta sín og hafa gaman á meðan þau stuðla að velgengni mótsins.

IST- upplifunin er hönnuð til að efla, styðja og fagna hverjum sjálfboðaliða og tryggja að tíminn á Jamboree snúist ekki einungis um að sinna skyldum, heldur einnig um að vaxa, læra og skapa minningar. Til að tryggja jákvæða upplifun sjálfboðaliðanna mun mótið leggja áherslu á eftirfarandi þætti:

Virk þátttaka

Hver sjálfboðaliði fær tækifæri til að velja hlutverk sem fellur að sínu áhugasviði og hæfni. Til að tryggja að öll séu vel undirbúin fyrir hlutverkið verður bæði rafræn fræðsla fyrir mótið og þjálfun þegar komið er á staðinn. Einnig mun mótið senda frá sér gagnleg ráð, mikilvægar upplýsingar og hlýjar móttökur fyrir hvert hlutverk svo öll séu örugg og tilbúin fyrir sín verkefni þegar kemur að mótinu.

Stuðningur

Á meðan að mótinu stendur verður sífellt boðið upp á tækifæri til náms í gegnum fjölbreyttar fræðslur, vinnustofur og smiðjur. Sem getur nýst sjálfboðaliðunum langt umfram mótið sjálft.

Mótið mun vera með sérstakt endurmats kerfi sem gerir sjálfboðaliðunum kleift að deila hugmyndum sínum, áskorunum og koma ráð eða úrbætur til að tryggja að raddir sjálfboðaliðanna fái að heyrast.

Viðurkenning

Sérstök sjálfboðaliða dagskrá verður til staðar svo sjálfboðaliðar geta skapað sína eigin persónulegu leið í gegnum Jamboree. Sú leið mótast af áhuga þeirra, áskorunum og þekkingu og gerir IST kleift að velja og skapa hluta af sinni eigin upplifun. Fá IST-liðar tækifæri til að uppgötva skemmtilegar, ævintýralegar og gagnvirkar athafnir sem auðga Jamboree-upplifunina, hvort sem þetta er í fyrsta skipti eða í tíunda sinn sem þeir taka þátt sem IST.

Hægt er að vinna tvö sjálfboðaliðamerki annars vegar the IST Experience Award sem viðurkennir vinnu, þjálfun og framlag sjálfboðaliða á einstakan hátt. Svo hins vegar The Thank You Programme sem veitir hverjum sjálfboðaliða stafrænt viðurkenningarskírteini, og þeir sem ganga lengra en ætlast er til fá aukið skírteini sem undirstrikar framúrskarandi þjónustu þeirra.

Þátttökugjöld IST

535.000,- kr ISK

Innifalið í verði:

Þátttökugjöld til mótsins - 201.600,-
Eftirmótsupplifun í Kraká - 110.500,-
Einkenni - 32.000,-
Annar kostnaður - 190.900,-
Sameiginlegur búnaður og flutningur búnaðar til og frá móti
t.d. tjöld fyrir allan fararhópinn, sem hefur ekki verið síðustu mót
Fararstjórn og undirbúningsferðir fararstjóra til Póllands
Skrifstofu- og ófyrirséður kostnaður

LANGAR ÞIG AÐ KOMA MEÐ Á ALHEIMSMÓT SKÁTA Í PÓLLANDI SEM ÞÁTTTAKANDI?

Umsókn þátttakenda á Alheimsmót skáta í Póllandi 2027

Mon, 02 Feb 2026 11:34:05 GMT

Opið er fyrir umsóknir á biðlista þátttakanda á alheimsmóti skáta í Póllandi 2027.

Hvað felst í því að vera þátttakandi á Alheimsmóti ?

Þátttakendur á alheimsmóti verða vera á aldrinum 14 – 17 ára þegar mótið byrjar 30. júlí 2027 (fædd á bilinu 30. júlí 2009 – 30. júlí 2013). Níu skátum er raðað saman í einn skátaflokk með einum foringja og fjórir flokkar saman mynda eina sveit.

Íslenski fararhópurinn mun fara út með 5 sveitir og því einungis 180 pláss fyrir íslenska þátttakendur. Fararhópurinn mun hittast fyrir ferðina á undirbúningsfundum og í sveitarútilegum þar sem hópnum er hristað saman og einnig verður farið yfir ferðalagið og dagskrá mótsins til að undirbúa þátttakendurna sem best.

Hér eru drög af ferðafyrirkomulagi hópsins með fyrirvara á breytingum þegar nær dregur ferðinni.

27. júlí 2027 - IST flýgur út
29. júlí 2027 - Aðalhópurinn flýgur út
30. júlí 2027 - Mótssetning
8. ágúst 2027 - Mótsslit
9.-13. 2027 - Mótsslit

Hvað kostar ?

Verðið fyrir þátttakanda er 572.000 kr. Athugið að þetta er verð án flugs.

Innifalið í verði:

Þátttökugjöld til mótsins - 224.000,-
Eftirmótsupplifun í Kraká - 110.500,-
Einkenni - 32.000,-
Annar kostnaður - 205.500,-
Sameiginlegur búnaður og flutningur búnaðar til og frá móti
t.d. tjöld fyrir allan fararhópinn, sem hefur ekki verið síðustu mót
Sveitarstarf fyrir mót
Fararstjórn og undirbúningsferðir fararstjórnar til Póllands
Skrifstofu- og ófyrirséður kostnaður

Þau sem vilja taka þátt eru beðin um að lesa vel skilyrðin hér að neðan og fylla síðan út umsóknareyðublaðið. Umsóknarfresturinn var til og með 31. mars 2026 en nú er opið fyrir umsóknir á biðlista. Ef skátar óska eftir afskráningu munum við hafa samband við þá skáta á biðlista og bjóða þeim plássið.

Ef það eru einhverjar spurningar um hlutverkið þá hvetjum við ykkur til að hafa samband við fararstjórana á netfangið jambo2027@skatarnir.is.

Skilyrði fyrir þátttakendur

Vera orðin 14 ára og ekki orðin 18 ára þegar mótið hefst, 30. júlí 2027
Hafa farið á a.m.k. fjögurra nátta skátaviðburð og gist í tjaldi allan tímann
Hafa unnið sér inn færnimerkin:
Skyndihjálp
Hnífur
Útieldun
Vegna víðáttumikils mótsvæðis þarf þátttakandi að vera í góðu líkamlegu formi og geta fengið a.m.k. 10 kílómetra á dag (nema ef um sérstök frávik er að ræða)
Meðmæli frá sveitarforingja og einum úr félagaþrennunni þar sem hún er starfandi í félaginu, annars félagsforingja
Góð heilsa þar sem að á mótinu er mikil útivera og dagskrá sem krefst mikillar hreyfingar í +25°C hita og því mikilvægt að þátttakendur séu líkamlega hraustir
Þekki skátalögin og geti haft þau að leiðarljósi í allri vegferðinni í kringum mótið og í samskiptum við aðra.
Hafa kynnt sér siðareglur Æskulýðsvettvangsins
Hafa kynnt sér samskipta – og siðareglur þátttakanda mótsins sem allir þátttakendur þurfa að lesa yfir og samþykkja áður en þau fara á mótið
Hafa kynnt sér 2. grein reglugerðar Bandalags íslenskra skáta um utanferðir skáta .
Taka þátt í undirbúningsfundum og/eða útilegum sveitarinnar og fararhópsins til að tryggja að þátttakandi sé vel upplýstur og undirbúinn fyrir ferðina t.d.:
Hittingur fararhópsins á Landsmóti skáta á Hömrum 2026
Sveitarútilegur
Undirbúningsfundir sveitarinnar
Geta borið allan farangurinn sinn í einum bakpoka (18-20 kg) með minni dagspoka í u.þ.b. 30 mínútur (möguleg ganga frá rútunni að tjaldsvæðinu)
Hafa andlega burði til að búa þétt við frumstæðar aðstæður í fjölbreyttri mannflóru og miklu áreiti í þrjár vikur fjarri foreldrum/forráðafólki
Hafa jákvætt viðhorf gagnvart nýjum reynslum, ólíkum menningarheimum og að kynna íslenskt skátastarf á alþjóðlegum vettvangi

LANGAR ÞIG AÐ KOMA MEÐ Á ALHEIMSMÓT SKÁTA Í PÓLLANDI SEM ÞÁTTTAKANDI?

Útkall: Alþjóðafulltrúi WOSM

Thu, 29 Jan 2026 22:17:48 GMT

Stjórn Bís leitar nú að nýjum alþjóðafulltrúa WOSM til tveggja ára

“Að starfa sem Alþjóðafulltrúi fyrir BÍS síðustu fjögur árin er það skemmtilegasta og lærdónsríkasta sem ég hef gert í mínu skátastarfi. Ég hef kynnst yndislegu fólki allstaðar að úr heiminum, haft áhrif á evrópu og heimshreyfingar WOSM með því að taka til orðs og kjósa á þingum og lært svo margt af vinum okkar úr norðurlöndunum. Það er mikil vinna sem fylgir því að vera alþjóðafulltrúi en því fylgja líka ótal ævintýri. Í gegnum starfið hef ég séð píramídana í Egyptalandi, farið í bingó í Færeyjum og tekið norðurlandatrúnó í Finnskri sánu svo eitthvað sé nefnt! Það er líka gaman að fá að starfa með Alþjóðaráðinu heima, halda smiðjur um alþjóðastarf og styðja við fararhópana okkar á erlend skátamót!” segir Berglind Lilja fráfarandi alþjóðafulltrúi WOSM.

Skyldur og ábyrgð
Að sjá um samskipti vegna og fylgjast með því starfi sem fer fram á vegum evrópusviðs og heimssviðs WOSM ásamt því að vera hluti af því teymi sem sinnir sérstöku samstarfi á milli norðurlandanna á vettvangi NSK. Að vinna í samstarfi við stjórn BÍS, alþjóðaráð og Skátamiðstöðina að nýta viðburði og stuðningsefni til að efla skátastarf á Íslandi. Alþjóðafulltrúinn skal þekkja  siðareglur og viðbragðsáætlun ÆV ,  forvarnarstefnu BÍS  og  reglugerð BÍS um utanferðir skáta .

Hæfni
Reynsla af alþjóðlastarfi í skátunum er kostur. Gott vald á ensku er krafa en viðkomandi þarf að vera í miklum munnlegum og skriflegum samskiptum á tungumálinu, góð kunnátta í fleiri tungumálum er kostur, sérstaklega í tungumálum annarra norðurlanda. Alþjóðafulltrúinn þarf að búa yfir góðri samskiptahæfni, vera samvinnufús og góður í tengslamyndun.

Aðbúnaður, þjálfun og stuðningur frá félagi
Alþjóðafulltrúinn fær netfang frá skátunum og microsoft aðgang. Alþjóðafulltrúi mun fyrst um sinn starfa með forvera sínum Berglindi Lilju Björnsdóttir og fá innsýn og þjálfun í starf frá henni. Alþjóðafulltrúinn mun taka þátt í næsta Scout-Academy samevrópskri foringjaþjálfun og smiðjum sem fer fram í Belgíu haustið 2026 fyrir hönd BÍS. Fær reglulegan samráðsfund með alþjóðafulltrúa WAGGGS, Egle Sipaviciute og stjórn BÍS til að fara yfir verkefnin sem snúa að alþjóðastarfi. Viðkomandi fær einkenni frá BÍS eftir þörfum.

Sérstakar áskoranir
Þarf að að fylgjast reglulega vel með fréttabréfum og upplýsingum sem koma frá WOSM og miðla áfram til stjórnar, Skátamiðstöðvar, alþjóðaráðs og annarra sjálfboðaliða eftir því sem við á hverju sinni svo að upplýsingar komist þangað sem þær eiga að rata. Hlutverkinu fylgja talsvert af ferðalögum og fundarhaldi sem ákvarðast af tímabelti annarra landa.

Markmið og mælikvarðar
Að BÍS starfi í takt við stefnur alþjóðahreyfinga og að verkefni á vegum alþjóðahreyfinga skili sér inn í starf skátafélaga á Íslandi. Að íslenskir skátar fái tækifæri á skátastarfi á alþjóðavettvangi. Að mynda og viðhalda tengslum við alþjóðafulltrúa WOSM frá öðrum löndum sem við eigum í samstarfi við.

Umbun
Hlutverkið er gríðarlega gott tækifæri til persónulegs vaxtar. Viðkomandi fær tækifæri til að mynda vinskap við fólk hvaðanæva að úr heiminum. Viðkomandi fær tækifæri á að fá styrki til að ferðast til annarra landa.

Umsóknarfrestur er til 11. febrúar 2026

Nordic Adventure Race 2026

Mon, 26 Jan 2026 11:53:00 GMT

Alþjóðaráð leitar að bæði þátttakendum og foringjum til að taka þátt í Nordic Adventure Race á vesturströnd Noregs, 10-16. júlí 2026! Tilvalið tækifæri fyrir drótt- og rekkaskátaflokka og foringja þeirra en Nordic Adventure Race er skátakeppni þar sem skátarnir ganga ákveðna vegalend, leysa þrautir og keppa í ýmsum skátaáskorunum. Þemað í þetta skipti er ævintýri og þjóðsögur!

Hvað er Nordic Adventure Race (NAR) ?

Nordic Adventure Race er spennandi viðburður sem flakkar á milli norðurlandanna. Færeyjar héldu viðburðinn fyrst 2022 og er nú komið að Noregi.

Á viðburðinum munu 50 skátar frá hverju landi vera skipt upp í nýja 6 skáta flokka og fá þar að leiðandi að kynnast skátum frá hinum norðurlöndunum. Flokkarnir fara síðan að stað í vikulanga göngu um norska fjallalendið þar sem þau munu fá tækifæri til að keppa í ýmsum þrautum á leiðinni til að safna inn stigum til að sigra keppnina. Á viðburðinum er lögð áhersla á skapandi hugsun, samvinnu og krefjandi útivist.

Almennar upplýsingar fyrir þátttakendur og sjálfboðaliða

Dróttskáta og rekkaskáta, skáta fædd á bilinu 10. 07. 2008 – 17. 10. 2013
Rekkaskátar eldri en 18 ára geta farið með sem foringjar eða sjálfboðaliðar, skátar fædd 10. 07. 2008 eða fyrr.
Skátafélag sendir inn eina umsókn fyrir alla sína skáta ásamt foringjum og sjálfboðaliðum
Einungis 50 þátttakendapláss og 10 foringja/sjálfboðaliðapláss
Sjálfboðaliðar og foringjar aðstoða við dagskrá mótsins og ólíklegt er að þau verði með sínum skátum á meðan á viðburðinum stendur.

Hér er hægt að lesa nánari upplýsingar um viðburðinn

Þátttökugjald

Þátttökugjaldið fyrir skátanna er 4.000 NOK ( u.þ.b. 50.000 kr.)

Gjaldið fyrir foringja / sjálfboðaliða er 1.5000 NOK (u.þ.b. 19.000 kr.)

Annar kostnaður er í höndum fararhópsins en fluggjaldið og sameiginleg einkenni er ekki innifalið í þátttökugjaldinu. Það sem er innifalið í þátttökugjaldinu er allur matur þegar viðburðurinn hefst, ferðalagið til og frá Oslo/Gardermoen að staðsetningu viðburðar, mótsmerki, öll dagskrá ásamt einhverjum sameiginlegum búnaði sveitarinnar.

Skráningin

Skátafélagið fyllir út umsóknareyðublaðið hér að neðan fyrir hönd skátaflokksins. Alþjóðaráð fer svo yfir allar skráningar og hefur samband við hópinn um næstu skref. Skátaforingjar hópanna mynda svo saman fararstjórn fyrir íslenska fararhópinn.

Skráningafrestur er til 31. janúar

Ertu með einhverjar spurningar? Endilega sendu á althjodarad@skatarnir.is

Houens Odde Spejdercenter – Danmörku

Tue, 20 Jan 2026 22:05:35 GMT

Houens Odde er stærsta skátamiðstöð í Norður-Evrópu, staðsett í Danmörku. Houens Odde er skagi staðsettur í hjarta Danmerkur, umkringdur vatni. Á skaganum eru 15 tjaldsvæði, sum inni í skógi en önnur á opnum svæðum.

Hægt er að skipuleggja sína eigin ferð með skátasveitinni sinni, og skipuleggja dagskrá innan- og utandyra. En einnig er hægt að taka þátt í skipulagðri dagskrá miðstöðvarinnar.

Danskir sjálfboðaliðar kallast „Houmen“ og sjá um að skipuleggja dagskrá og fleira fyrir skáta og skátaforingja bæði frá Danmörku og allstaðar að úr heiminum.

Hægt er að gerast sjálfboðaliði frá 2 – 12 mánuðum í senn ef þú ert á aldrinum 18 – 30 ára. Einnig er hægt að gerast sjálfboðaliði í styttri tíma yfir sumarið. Til að fá nánari upplýsingar er hægt að skoða þessa síðu hér.

KISC – Sviss

Tue, 20 Jan 2026 22:04:26 GMT

Alþjóðlega skátamiðstöðin í Kandersteg, í Sviss, var stofnuð af Baden Powell með það að markmiði að allt árið um kring væri í boði að taka þátt í skátastarfi. Skátamiðstöðin hefur vaxið og dafnað í gegnum árin og er í dag frábært tækifæri fyrir skáta að prófa að vinna í skátamiðstöð sem sjálfboðaliði.

Í KISC er hægt að sækja um að vera “Pinkie” en það eru þriggja mánaða sjálfboðaliðastarf sem eru í boði fyrir allar árstíðir. Þau verkefni sem Pinkies taka að sér eru fjölbreytt, skemmtileg og lærdómsík. Þar má nefna útivistatengda dagskrá, kvöldvökur, þrif og matreiðsla og vinna á tjaldsvæði svo eitthvað sé nefnt. En hér má finna nánari upplýsingar um KISC.

Kusafiri – Afríku

Tue, 20 Jan 2026 22:03:02 GMT

Kusafiri er ein af alþjóðlegu skátamiðstöðvum WAGGGS. Kusafiri þýðir á Swahili, „að ferðast“. Dagurinn sem haldið er upp á sem stofndag Kusafiri er 15. júlí 2011, en hér má lesa nánar um stofnun Kusafiri.

Ef þú hefur áhuga á að gerast sjálfboðaliði í Kusafiri getur þú haft samband við þau hér!

Nuestra Cabaña – Mexico

Tue, 20 Jan 2026 22:01:41 GMT

Nuestra Cabaña er ein af 5 alþjóðaskátamiðstöðvum WAGGGS og er staðsett í Mexico. Þann 22. febrúar 1956 gaf Lady Baden-Powell miðstöðinni bláa hurð sem tekur á móti öllum þeim sem koma í Nuestra Cabaña. Skátamiðstöðin var svo formlega opnuð í júlí 1957. Í Nuestra Cabaña er að finna, svefnálmur, fundaraðstöður, sundlaug, eldstæði, tjaldsvæði, blakvelli og tennisvelli og margt fleira. Ef þú hefur áhuga á að kynnast Nuestra Cabaña betur þá getur þú skoðað það hér.

Hér getur þú nálgast nánari upplýsingar til að gerast sjálfboðaliði hjá þeim.

Our Chalet – Svissnesku Alparnir

Tue, 20 Jan 2026 22:00:24 GMT

Our Chalet er ein af 5 skátamiðstöðvum WAGGGS og er staðsett í Alpaþorpinu Adelboden í Sviss.
Svæðið samanstendur af nokkrum skálum með mismunandi magni af svefnplássum og þægindum. Hægt er að gista í rúmum og vera í fullu fæði en einnig er hægt að gista í minni skálum á dýnum og koma með eigin mat, allt eftir því hversu mikið fjármagn hópurinn hefur á milli sín. Það eru mismunandi dagskrár möguleikar eftir því hvenær á árinu staðurinn er heimsóttur og það eru mismunandi erfiðleikastig í boði.

Einnig er hægt að sækja um sem tímabundin sjálfboðaliði frá 2 vikum í allt að 6 mánuði við 18 ára aldur. Það er bæði hægt að sækja um ákveðnar stöður en einnig sem almennur sjálfboðaliði þar sem viðkomandi fær tækifæri til þess að takast á við ýmis verkefni tengd rekstri og dagskrá. Öllum kynjum óháð búsetu er velkomið að sækja um stöður í Our Chalet. Frekari upplýsingar er að finna á heimasíðu Our Chalet.

Pax Lodge – London

Tue, 20 Jan 2026 21:59:00 GMT

Pax Lodge er ein af 5 skátamiðstöðvum WAGGGS og er staðsett í London. Pax Lodge er í senn farfuglaheimili, þjálfunar- og ráðstefnustaður með skátaandann í fyrirrúmi.

Hægt er að gerast sjálfboðaliði hjá Pax Lodge en þau bjóða upp á 3-6 mánaða leiðtogaupplifun frá 18 ára aldri, þar sem þú býrð á svæðinu og sinnir sjálfboðastörfum sem efla leiðtogahæfni þína. Á þessum tíma muntu efla sjálfstraustið þitt, læra nýja hluti, fá aðra sýn á heiminn og verða hvetjandi leiðtogi.

Ef þú ert að leita að spennandi ævintýrum og langar að fara út í heim að vinna, gerast sjálfboðaliði eða bara hafa gaman þá ættir þú að kíkja á heimasíðuna hjá Pax Lodge í London.

Sangam – Indlandi

Tue, 20 Jan 2026 21:57:29 GMT

Sangam er ein af 5 alþjóðlegu skátamiðstöðvum WAGGGS. Sangam þýðir „að koma saman“. Hægt er að skipuleggja ferðir til Sangam og fá þar gistingu og mat, synda í sundlauginn eða slaka á í heita pottinum, skreppa svo út og skoða nærumhverfið. Hér er hægt að fræðast meira um Sangam.

Sangam er ávallt til í að fá fólk til liðs við sig, hvort sem um ræðir starfsfólk eða sjálfboðaliða í styttri og lengri tíma.

ung i norden

Tue, 20 Jan 2026 21:46:11 GMT

What is Ung I Norden?

Ung I norden is an event organized by one of the countries within the NSK (Nordic scout association). The event is for young people ages 16-21 from the following countries: Denmark, Faroe Island, Finland, Iceland, Norway or Sweeden. The aim of the event is to encourage youth to learn more about each years theme that would benefit them in scouting within their home region. Ung I Norden is also a great opportunity to meet like minded people in the Nordic countries and learn about different ways of scouting. For registration please contact our association.

Basic Info

When: 16. – 19. october 2025
Where: Úlfljótsvatni
For who: 16-21 year olds from Denmark, Faroe Island, Finland, Iceland, Norway and Sweeden.

Price

Included in the price this year is the full program and food from 17:00 on the 16th of October until 12:00 on the 19th of October.

That includes the following:

One night stay at a local scout home in Reykjavík
Dinner in Reykjavík
Golden circle tour on the 17th (Þingvellir national park, Gullfoss waterfall and Geysir). Beginning in Reykjavík and ending at Úlfljótsvatn.
Food and 2 nights stay in cabins with beds and beddint at Úlfljótsvatn scout center. From friday evening to sunday morning.
Program at Úlfljótsvatn scout center
Bus ride from Úlfljótsvatn to BSÍ bus terminal/Keflavík International airport on sunday. (Those who have a later flight and would like to spend some tima in the capital area are welcome to get off at BSÍ bus terminal and pay for a bus to the airport themselves).
All other travel is not included in the price (from the airport to BSÍ bus terminal, flights and such). Participants must pay for that themeselves.

Price is 48.000 ISK per participant.

Location

This year the event will be held in Iceland, from the 16th to 19th of october. The theme is Enviromental Sustainability. One evening is dedicated to getting to know the participants followed by a day tour of the Golden circle before heading to Úlfljótsvatn scout center where 1 day will be spent in workshops that connect to why and how we build Enviromental Sustainability.

In Iceland most scout groups have a Scout home. There they have weekly meetings. You will get the opportunity to stay in one of those houses for an overnight stay and see how one of the groups use their facilities to host their scout meetings.

Úlfljótsvatn scout center is located in the southern part of Iceland. It is an hour drive from Reykjavík capital area. Situated by the lake Úlfljótsvatn offers great outdoor facilities as well as accommodation. By choosing this location for this years theme we want to ensure that participants can experience the nature and environment around them that needs our protection to keep looking onwards.

JOTA-JOTI 2025

Tue, 20 Jan 2026 21:41:02 GMT

Hvað er JOTA-JOTI?:

Alheimsmót skáta í loftinu og á netinu er stærsti stafræni skátaviðburðurinn og fer fram á ári hverju þar sem meira en 2 milljónir skáta skemmta sér saman og fá tækifæri til að kynnast betur tækni, samskiptum, tilveru skáta um allan heim, sjálfu sér og hvoru öðru.

Fyrir hverja er JOTA-JOTI:

Mótið er fyrir skáta á öllum aldri!

Dróttskátar og eldri geta tekið þátt sjálf en ætlast er til þess að skátar 12 ára og yngri geri það með stuðningi fullorðinna skátaforingja eða aðstandenda.

Hvar fer JOTA-JOTI fram?:

JOTA-JOTI á sér fyrst og fremst stað á heimasíðu viðburðarins . En þú getur tekið þátt hvaðan sem er!

Hluti dagskrár sem fengist er við á mótinu fer fram í raunheimum og hluti á netinu. Því skiptir bara máli að velja staðsetningu þar sem aðstaða er góð fyrir skátastarf og með nettengingu.

Hvernig tekur þú þátt?:

Það eru margar leiðir færar til að taka þátt.

Taka þátt sem stærri hópur:
Hægt er að taka þátt í stærri hópi skáta, það má t.d. fara í útilegu eða mæta einhvertímann yfir umrædda helgi saman í skátaheimilið með þinni skátasveit eða öllu skátafélaginu. Þetta er besta leiðin til að taka þátt fyrir skáta 12 ára og yngri.
Taka þátt sem flokkur:
Þú og aðrir áhugasamir skátar getið tekið þátt sem flokkur og fengið þá jafnvel afnot af skátaheimilinu yfir vissan tíma eða mælt ykkur mót heima hjá einhverju ykkar. Þetta er frábær leið fyrir dróttskáta og eldri. Ef skátar 12 ára eða yngri ætla að fara þessa leið til þátttöku er mikilvægt að fullorðinn skátaforingi eða aðstandandi sé með hópnum og styðji þau.
Taka þátt sem einstaklingur:
Dróttskátar og eldri geta tekið þátt á einstaklings grundvelli. Nóg er af dagskrá sem þarfnast þess ekki að vera í hóp. Þetta er góð leið fyrir dróttskáta og eldri en ekki er mælt með þessu fyrir skáta 12 ára og yngri.

1. skref – Heimsækja heimasíðu mótsins

Þú getur skráð þig, skáta yngri en 12 ára og/eða hópinn þinn strax í dag. Þetta er gert með að heimsækja heimasíðu mótsins jotajoti.info . Þar blasir við blár hnappur með titlinum „Register now“ sem þú smellir á.

2. skref – Stofnaðu aðgang eða skráðu þig inn

Næsta skref fyrir flest er að stofna Scout.org aðgang. Þú þarft að vera 13 ára eða eldri til að stofna Scout.org notanda, ef þú ert yngri þarf fullorðinn einstaklingur að stofna aðgang og getur bætt þér við eftir á.

Ef þú átt þegar Scout.org aðgang getur þú einfaldlega skráð þig inn.

Eftir að hafa stofnað aðgang biður síðan þig að velja hvort þú sért að skrá þig eða skáta 12 ára eða yngri. Sértu að skrá þig er næst beðið um aldurshóp.

3. skref – Persónulegar upplýsingar

Sértu bara að skrá þig geturðu skoðað næsta skref um hvernig skal stofna hóp.

4. skref – Bæta við skáta 12 ára eða yngri

Fullorðnir aðstandendur og skátaforingjar geta bætt við skátum 12 ára og yngri við sinn notanda. Sértu skátaforingi er gott að þú upplýsir forráðafólk um þetta skref sérstaklega. Sértu skráð inn getur þú efst í hægra horninu ýtt á nafn notandans þíns á síðunni og þar smellt á möguleikann að bæta við barni.

Ef þú ert kominn með notanda og búinn að skrá þig inn getur þú smellt á nafnið þitt efst í hægra horni á síðunni.

Þá færðu eftirfarandi form sem þú fyllir út:

Alþjóðatækifæri: Euro Mini Jam 2026

Tue, 20 Jan 2026 21:34:48 GMT

Hvað?

Alþjóðaráð leitar að íslenskum skátaflokkum til að taka þátt í Smáþjóðaleikum skáta, Euro-Mini-Jam, sumarið 2026.
Smáþjóðaleikar skáta er sjö daga skátamót fyrir þjóðir sem eru með færri en milljón íbúa.

Mótið verður haldið í Kýpur 2. – 8. ágúst 2026. Smáþjóðir skiptast á að vera gestgjafar mótsins. Fyrsta mátið var haldið á Íslandi 2010, Liechtenstein árið 2013, Mónakó 2016, Færeyjum 2018 og núna síðast í Gíbraltar 2024.

Hverjir?

Þátttakendur eru skátar á aldrinum 13-16 ára. Hver þjóð fær pláss fyrir 2 skátaflokka á mótinu fyrir þátttakendur á þessum aldri. Hver skátaflokkur samanstendur af 6-8 þátttakendum og 2 foringjum.

Auk þess er í boði að senda eldri skáta sem IST (sjálfboðaliða fyrir mótið) svo skátafélögin mega senda með IST liða í umsóknum skátaflokkanna. Alþjóðaráð leitar því að skátaflokkum sem hafa áhuga á að taka þátt! Mótsgjaldið fyrir þátttakendur er 440 EUR og fyrir IST og foringja er gjaldið 365 EUR. Ofan á mótsgjaldið leggst ferðakostnaður og allt sem ferðalaginu fylgir.

Foringjar skátaflokkana sem verða valdir, mynda saman fararstjórn fyrir mótið og sjá um fjárhagsáætlun, skipulag og framkvæmd ferðarinnar. Alþjóðaráð og Skátmiðstöðin mun veita stuðning við verkefnið þegar þörf er á.

Flokkar verða valdir eftir að skráningarfresti lýkur.

Umsóknarferlið

Þeir skátaflokkar sem hafa áhuga á að fara á mótið fyrir hönd Bandalags íslenskra skáta þurfa að sækja um með því að svara eyðublaðinu hér að neðan og skila inn myndbandi á þar sem þau leysa nokkur verkefni. Myndbandið skal senda á althjodarad@skatarnir.is

Valdir verða fjölbreyttir flokkar. Þar af leiðandi er ekki víst að ef tveir flokkar frá sama skátafélagi sæki um að báðir flokkarnir verði fyrir valinu. Skátafélögum er velkomið að sameinast í 6 til 8 skáta flokka, ekki er tekið við umsóknum skátaflokka ef fjöldi skáta nær ekki 6 eða er yfir 8.

Um myndbandið og verkefnin:

Reglur:

Myndbandið má ekki vera lengra en 10 mínútur
Skátaflokkurinn kynnir nafn flokksins, skátafélags og nöfn allra meðlima flokksins
Mikilvægt er að sýna vel og vandlega þegar verkefni eru leyst

Verkefnin:

Semja flokkshróp og flytja það
Gera góðverk sem hefur áhrif á samfélagið
Byggja katapúlt með sykurpúðum og spaghetti og ná að kasta hlut a.m.k. 50 cm
Kynna ykkur hvernig skátastarf er í Kýpur og segja stuttlega frá því
Setja upp tjald á innan við mínútu
Kveikja eld með því að nota einungis stál og tinnu

Umsóknarfrestur er 5. nóvember 2025

Foringi / foringjar

Vässarö – Svíþjóð

Fri, 16 Jan 2026 21:38:09 GMT

Vässarö er skógi vaxin eyja í Svíþjóð með nokkrum gömlum húsum sem í dag eru notuð sem skrifstofur og skátamiðstöð yfir sumartímann. Ekki er hægt að komast til eyjunnar frá október til lok apríl vegna veðurs og annara utanaðkomandi aðstæðna. En hér má lesa nánar um sögu Vässarö.

Vässarö er í eigu nokkurra skátafélaga í Svíþjóð sem tilheyra öll undir Stockholm scout district of Sweeden en þar starfa 6 starfsmenn sem færa bækistöðvar sínar yfir til Vässarö á sumrin. Auk starfsfólks eru sjálfboðaliðar sem skipuleggja dagskrá og sjá um viðhald á eyjunni. Sjálfboðaliðar á Vässarö kallast „Funk“, og þú getur orðið einn af þeim!

Ef þú ert 18 ára eða eldri og hefur áhuga á að gerast sjálfboðaliði á Vässarö getur þú skoðað þessa síðu fyrir nánari upplýsingar.

Gamli fær nýja kamínu

Mon, 08 Dec 2025 09:22:00 GMT

Við Gamla, skála Skátafélagsins Klakks hafa sl. haust farið fram miklar framkvæmdir, sem miða að endurbótum skálans og gera hann útilegufæran á ný. En vegna mikillar almennrar umferðar um svæðið og þess, að skálinn var alla tíð opinn fyrir gesti og gangandi var hann kominn í nokkra niðurníðslu og hafði því miður orðið fyrir barðinu á slæmri umgengni (jafnvel skemmdarverkum). En á haustdögum var ráðist í gagngerar endurbætur á skálanum, sem raunar standa enn yfir, og hefur Tumi Snær Sigurðsson haft umsjón með af þeim, ásamt vöskum rekkaskátum og öðrum skátum á öllum aldri.

Sl. sunnudag, 7. des. var þeim áfanga fagnað, að ný kamína er komin í gagnið og skálinn formlega orðinn útilegutækur. Boðið var upp á gönguferð með leiðsögn frá Hömrum upp að Gamla, þar sem boðið var upp á kakó, kex og mandarínur (í tilefni aðventunnar) og voru þar samankomnir á þriðja tug manns þegar mest var. Áttu viðstaddir þar notalega og ánægjulega stund, auk þess sem veður var með besta móti til gönguferða. Jóhann Malmquist félagsforingi hélt erindi en einnig sagði Ólafur Kjartansson frá Brunná lítillega frá framkvæmdunum við byggingu skálans á árunum 1979-81. Ólafur, jafnan kallaður Óli Kjartans, hafði einmitt veg og vanda af því að koma nýju kamínunni fyrir og málmsmíðum í kringum hana. Sagði Óli frá því, að á sínum tíma hefði allt efnið í skálann verið borið frá Kjarnaskógi eða Fálkafelli og kamínan líklega þyngst af því öllu. Nýja kamínan og annað efni til framkvæmda var hins vegar ferjað uppeftir með þyrlu nú haustdögum. Rétt er að óska hlutaðeigandi til hamingju með nýja kamínu og aðrar endurbætur á Gamla.

Þankadagspakki 2026 – okkar vinátta

Wed, 03 Dec 2025 09:20:00 GMT

Þankadagspakkinn 2026 er kominn út!

Þemað að þessu sinni er „okkar vinátta“ og framhaldsþema frá árinu 2025.

Hér má lesa meira um þankadagspakkann og finna hlekk til að sækja verkefnin.

Þankadagspakki 2026 – okkar vinátta

Wed, 03 Dec 2025 09:20:00 GMT

Þankadagspakkinn 2026 er kominn út!

Þemað að þessu sinni er „okkar vinátta“ og framhaldsþema frá árinu 2025.

Hér má lesa meira um þankadagspakkann og finna hlekk til að sækja verkefnin.

Klípusögur kveiktu í umræðunum

Tue, 02 Dec 2025 15:53:00 GMT

Rafrænt námskeið í samskiptum og siðareglum

Í gær, mánudaginn 1. desember, var haldið rafrænt námskeið í samskiptum og siðareglum. Fengum við góðan hóp til okkar sem kom víða að af landinu en það er einmitt markmið rafrænna námskeiða. Með þeim viljum við hjá Æskulýðsvettvanginum auka aðgengi þeirra sem búa úti á landi að námskeiðunum og var gaman að sjá hversu vel það tókst í gær.

Námskeiðið sjálft fjallaði um samskipti og siðareglur sem er mjög mikilvægur hluti í okkar starfi. Góð samskipti eru lykillinn að jákvæðum tengslum og mikilvægt er að hægt sé að ræða þau ágreiningsmál sem koma upp á friðsælan máta. Auk þess er mikilvægt að öll þekki til siðareglna Æskulýðsvettvangsins en þar eru fönguð í orð þau siðferðislegu gildi og viðmið um hátterni sem Æskulýðsvettvangurinn og þau félagasamtök sem saman mynda vettvanginn starfa eftir: vellíðan – velferð – öryggi .

Á námskeiðinu fengu þátttakendur klípusögur þar sem þau notuðu siðareglurnar til að leysa úr ágreiningsmálum sem geta komið upp innan hópa og mynduðust góðar og gagnlegar umræður í kjölfarið.

Við þökkum öllum fyrir komuna og hlökkum til að sjá sem flest á næsta námskeiði sem haldið verður 25. febrúar 2026. Aðgangur að námskeiðinu er ókeypis og hægt er að skrá sig hér: www.aev.is/skraning-a-namskeid/

Fálkaskátaflokkur Árbúa Fálkakempur 2025

Wed, 26 Nov 2025 16:29:00 GMT

Síðastliðna helgi buðu Hraunbúar fálkaskátum landsins í heimsókn í Skátalund við Hvaleyrarvatn þar sem skátarnir hlupu um í póstaleik í kringum vatnið og kepptust um farandviðurkenninguna.

Veðrið lék um fálkaskátana en þau hófu leika með skemmtilegum eltingarleik við skátaskálann áður en lagt var að stað í leit af póstum kringum vatnið. Skátarnir söfnuðu sér inn stigum sem flokkur með samvinnu og góðri frammistöðu í verkefnunum sem meðal annar voru að leysa skátadulmál, rugla í hefðbundnum skátasöngvum, súrra þrífót, leiða hvort annað í gegnum blindrabraut og gera sjúkrabörur úr eigin fötum.

Að lokum söfnuðust allir flokkarnir saman við Skátalund þar sem þau kepptu í lokaþrautinni, að brenna band, en hver flokkur fékk einn skátahníf, einn eldspýtustokk og einn viðardrumb. Skátarnir þurftu síðan að ná upp nægilega stórum loga til þess að ná að brenna band sem var fest þvert yfir hverja stöð.

Fálkaflokkurinn í Árbúum voru fyrst til þess að brenna bandið og báru því sigur úr bítum þetta árið. Þau fengu afhentan farandviðurkenninguna sem nú fær að príða Árbúaheimilið þar til að fálkaskátadagurinn verður haldinn næsta haust.

Svo var að sjálfsögðu sungin nokkur vel valin skátalög til að halda hita í fálkunum á meðan beðið var eftir úrslitum. Eftir kvöldvöku gæddu fálkar og foringjar sér á heitu kakói og kexi að skátasið áður en haldið var heim.

Skátaskírteinið snýr aftur

Thu, 20 Nov 2025 15:54:00 GMT

Það gleður okkur að tilkynna að skátaskírteinið snýr aftur eftir nokkurra ára hlé. Að þessu sinni mun skírteinið verða rafrænt í símaveski með aðstoð Leikbreytis.

Öll sem eru skráð hjá sínu félagi í Abler fá tilkynningu á næstu dögum til að hlaða niður sínu skírteini. Forráðafólk skáta undir 18 ára aldri fá tilkynninguna til sín en hægt er að hlaða skírteininu niður í fleiri en eitt símtæki.

Skátaskírteinið snýr aftur

Thu, 20 Nov 2025 15:54:00 GMT

Það gleður okkur að tilkynna að skátaskírteinið snýr aftur eftir nokkurra ára hlé. Að þessu sinni mun skírteinið verða rafrænt í símaveski með aðstoð Leikbreytis.

26 sæmd forsetamerkinu á 60 ára afmæli þess

Sun, 02 Nov 2025 21:00:00 GMT

Í dag veitti frú Halla Tómasdóttir, forseti Íslands, 26 skátum forsetamerkið við hátíðlegar athafnir á Bessastöðum. Þetta er fjölmennasti hópurinn sem hlýtur forsetamerkið síðan árið 2016. Frú Halla Tómasdóttir er verndari skátahreyfingarinnar og veitir forsetamerkið þeim rekkaskátum (16-18 ára) sem hafa stundað metnaðarfullt rekkaskátastarf. Forsetamerkishafarnir Fríða Björg Tómasdóttir, Skátafélaginu Klakki, og Kristófer Njálsson, Skátafélaginu Mosverjum, fluttu ávarp í athöfnunum þar sem þau sögðu frá skátaferli sínum og þeim verkefnum sem þau unnu að í tengslum við forsetamerkisvegferðina.

Í forsetamerkinu sameinast gildi skátahreyfingarinnar um persónulegar framfarir einstaklingsins og þess að gera sitt besta samfélaginu til heilla. Vegferðin að forsetamerkinu er 2-3 ára verkefni sem hvetur skátana til persónulegs vaxtar í gegnum 24 fjölbreytt verkefni sem skátarnir þurfa að vinna að.

Í byrjun vegferðarinnar setja skátarnir sér markmið fyrir rekkaskátastarfið sitt og í lok hennar endurmeta þeir síðan vegferðina. Skátarnir þurfa að ljúka verkefnum úr fjórum verkefnaflokkum: Leiðtogafærni, Skapandi hugur, Heimurinn og umhverfið og Tilveran mín. Til þess að öðlast merkið þurfa skátarnir meðal annars að sækja 5 daga skátamót, ferðast 40 kílómetra á eigin afli, sækja helgarnámskeið í leiðtogaþjálfun og 12 klukkustunda skyndihjálparnámskeið. Að lokum velja skátarnir sér 2 langtímaverkefni sem krefjast virkrar þátttöku þeirra yfir 3-12 mánaða tímabil. Dæmi um þetta eru að vera foringi yngri skáta, taka þátt í skipulagi stórs skátamóts, sitja í stjórn skátafélags, ráði eða vinnuhóp, að taka að sér viðhald skátaheimilis eða skátaskála og margt fleira sem forsetismerkishafar hafa látið sér detta í hug. Hér má lesa nánar um forsetamerkið.

Í ár er 60 ára afmæli forsetamerkisins og síðan merkið var fyrst veitt árið 1965 hafa 1488 skátar verið sæmdir því. Eftir athafnir dagsins var afmæli merkisins fagnað í Jötunheimum, skátaheimili Vífils en þar komu saman nokkrar kynslóðir forsetamerkishafa ásamt öðrum góðum skátum. Elín Richards, forsetamerkishafi 36, ávarpaði gesti veislunnar sem og Jóhanna Björg, forsetamerkishafi nr. 1083 fyrir hönd starfsráðs. Þá fóru Fríða og Kristófer aftur með hugvekjuna sína frá því fyrr um daginn og skátahöfðingi og forsetamerkishafi númer 1000, Harpa Ósk bauð gesti velkomna.

Hugvekja nýtta forsetamerkishafa

Kristófer: Virðulegi forseti, ágætu skátavinir og aðrir góðir gestir

Það er ekki oft sem maður fær tækifæri líkt þessu, að standa frammi fyrir forseta Íslands, – hvað þá í höfuðstöð hennar þar sem tilefnið er að fagna okkar afreki. Mér finnst því frábært að geta nýtt þessa hugvekju til þess að miðla þakklæti mínu fyrir hönd okkar sem fyrir örfáum mínútum sátum í þessu herbergi með sveittar hendur, ólm í að öðlast þessa fögru nælu og heiðurinn sem henni fylgir.

Nú sitjum við saman með misslitnar og krumpaðar bækur sem hafa öðlast líf eftir traust verk sitt sem fylgifiskar í verkefnum okkar. Það er mikilvægt að sjá hvernig hver bók endurspeglar fjölbreytnina í persónuleika og vinnubrögðum okkar. Því það er sama fjölbreytnin í huga, sálu og líkama hvers og eins okkar sem kjósa að vinna okkar hlut í að halda skátahreyfingunni lifandi sem málar þennan einstaka lit hennar.

Fríða: Ég hef oft verið spurð hvað það er eiginlega sem við gerum í skátunum. Fólk virðist halda að við séum að kveikja eld og hnýta hnúta alla fundi en öll hér inni vitum við að skátastarfið er svo miklu meira en það. Skátahreyfingin er eina æskulýðshreyfingin, svo ég best viti, sem er með eitt inntökuskilyrði: Að leggja sitt af mörkum til þess að bæta samfélagið. Þótt við kveikjum vissulega marga elda þá áttar maður sig á því að skátastarfið snýst ekki bara um eldinn sjálfann, heldur um það að kveikja eld innra með sér og öðrum. Að verða forvitin, þrautseig, opin fyrir ævintýrum og tilbúin að takast á við áskoranir. Núna, þegar ég stend hér í dag, finnst mér eins og þessi eldur logi aðeins skærar.

Nú veit ég ekki með ykkur en ég ætla að vera alveg hreinskilin og segja að ég byrjaði ekki í skátunum vegna einhverjar djúprar köllunar til að þjóna samfélaginu eða bjarga heiminum, heldur einfaldlega vegna þess að vinir mínir voru í skátunum og þetta virtist skemmtilegt. Ég held að flest okkar geti samt verið sammála um að það hafi kannski ekki alveg verið fyrsti dagurinn sem breytti lífinu, en einhvern veginn, án þess að maður tók eftir því fór þetta starf að festa rætur í hjartanu mans og varð að gríðarstórum hluta af manni. Það hafa verið ótal skipti þar sem ég hef hugsað ,,af hverju er ég að gera þetta“ hvort sem ég hafi verið í skafrenningi að reyna að tjalda eða á landsmóti blaut alveg inn að beini.

Kristófer: En það eru einmitt þessi augnablik sem kenna manni hvað samvinna og jákvætt hugarfar þýða í raun.

Fríða: Að þrautseigja þýði ekki að gefast aldrei upp, heldur að halda áfram jafnvel þegar maður þarf að taka smá hlé, draga andann djúpt og reyna aftur. Á milli þess að frjósa, hlæja og reyna að muna hvernig í ósköpunum maður gerir fánahnút, lærir maður eitthvað meira, um sjálfan sig, um aðra og um það hvað það þýðir að standa saman.

Kristófer: Talandi um samvinnu. Ég myndi segja að ferðin til Kóreu hafi sett mestan svip á ferlið mitt. Ég hafði fjarlægst skátahreyfingunni mikið þegar ég ákvað að slást í fararhópinn okkar á Alheimsmót skáta. Þar upplifði ég eitt, ef ekki besta ævintýri lífs míns. Ég hef aldrei verið hluti af jafn stórum hópi fólks – skáta alls staðar af úr heiminum – jafnvel frá löndum sem ég hafði ekki einu sinni heyrt um. Ég hef aldrei fengið jafn gullið tækifæri til að vera jafn frjáls í anda og þá. Það var endalaust hægt að fíflast í og með fólki. Skemmtilegastir voru Indverjarnir. Þeir kunnu æstustu leikina en sýndu líka yndislega gestrisni sem ég miða nú sjálfur við þegar ég býð fólki heim til mín. Einnig var samheldnin og samvinnan í verki svo einstaklega góð meðal íslenska fararhópsins. Svo góð að ást mín fyrir skátastarfinu vaknaði úr blundi sínum.

Fríða: Hér í dag eru líka mörg kunnugleg andlit úr ferðinni. Saman sköpuðum við ógleymanlegar minningar og erum nú aftur saman komin til að deila öðrum merkum áfanga í lífi okkar.

Kristófer: Skátastarfið er svo sannarlega ólgandi sjór. Í því myndast vinabönd og upplifanir sem annað hvort haldast eða enda en öldurnar draga mann alltaf aftur til minninganna. Eins og í dag hafa þær dregið okkur saman til að heiðra allar þær einstöku minningar sem við höfum myndað saman eða sér.

Fríða: Það er eitthvað alveg einstakt við það hvað skátarnir draga fram það besta í fólki. Maður hittir fullt af mismunandi einstaklingum í skátunum en ég held að ég geti fullyrt það að fólkið í skátunum er eitt það besta og skemmtilegasta sem ég hef nokkurn tímann hitt. Ég hef bæði eignast nýja vini og tengst þeim ég átti fyrir á hátt sem erfitt er að útskýra. Þetta er fólkið sem hlær með manni, stundum að manni en hjálpar manni samt alltaf á fætur sem minnir okkur á það hvers vegna þetta er allt þess virði.

Í ár fagnar forsetamerkið 60 ára afmæli. Það er svolítið sérstök tilfinning að standa hér í dag og hugsa til allra 1473 forsetamerkishafana sem hafa staðið hér á undan mér. 60 ár af skátum sem hafa tekið við þessu merkilega merki, hver og einn með sína sögu, sín ævintýri og sínar áskoranir. Þó tíminn hafi breyst, þá held ég að kjarninn sé sá sami. Við höfum öll á okkar hátt, lofað því sama: Að leggja okkar að mörkum í samfélaginu, að sýna gott fordæmi og að lifa eftir skátalögunum.

Kristófer: Eða eins og Baden Powell orðaði það “Gerum okkar besta til að skilja við heiminn örlítið betri en þegar við komum í hann.”

Fríða: Það er fallegt að hugsa til þess að við erum nú orðinn hluti af þessum hópi, þessari keðju fólks sem sér til þess að skátaandinn lifi áfram, hvort sem það er meðvitað eða ekki. Forsetamerkið er nefnilega ekki bara viðurkenning fyrir það sem við höfum gert, heldur áminning um að halda áfram að lifa eftir skátalögunum. Að halda áfram að vera forvitin, hjálpsöm og hugrökk. Kæru skátar, innilega til hamingju með þetta afrek. Munið að forsetamerkið er ekki lokaverkefni, heldur byrjun á nýjum kafla.

Skátar úr 9 félögum

Eftirfarandi rekkaskátar úr 9 skátafélögum hlutu forsetamerkið á Bessastöðum 2. nóvember 2025 og bættust í hóp 1488 forsetamerkishafa frá upphafi.

Úr Árbúum:
Daníel Þröstur Pálsson

Úr Faxa:
María Fönn Frostadóttir

Úr Fossbúum:
Vigdís Jóna Árnadóttir

Úr Hraunbúum:
Dagný Lind Pálsdóttir
Inga Dís Guðjónsdóttir
Logi Friðriksson

Úr Klakki
Anton Bjarni Bjarkason
Anton Dagur Björgvinsson
Ásbjörn Garðar Yngvason
Birkir Kári Gíslason
Birkir Kári Helgason
Fríða Björg Tómasdóttir
Hörður Andri Baldursson
Snædís Hanna Jensdóttir

Úr Kópum:
Eva Rut Tryggvadóttir
Silja Líf Eiðsdóttir

Úr Mosverjum:
Eberg Óttarr Elefsen
Kristófer Njálsson
Pétur Jón Árnason
Unnur Elísa Sigurgísladóttir

Úr Víflum:
Elí Hrönn Hákonar
Helgi Þórir Sigurðsson
Ingvar Jarl Eineborg

Úr Ægisbúum:
Aðalsteinn Ingi
Andri Rafn Ævarsson
Berglind Anna Magnúsdóttir

Umsókn þátttakanda á alheimsmóti 2027 - biðlisti

Fri, 31 Oct 2025 13:01:00 GMT

LANGAR ÞIG AÐ KOMA MEÐ Á ALHEIMSMÓT SKÁTA Í PÓLLANDI SEM ÞÁTTTAKANDI?

Opið er fyrir umsóknir þátttakanda á biðlista á alheimsmóti skáta í Póllandi 2027.

Hvað felst í því að vera þátttakandi á Alheimsmóti ?

Hér eru drög af ferðafyrirkomulagi hópsins með fyrirvara á breytingum þegar nær dregur ferðinni.

27. júlí 2027 – IST flýgur út
29. júlí 2027 – Aðalhópurinn flýgur út
30. júlí 2027 – Mótssetning
8. ágúst 2027 – Mótsslit
9.-13. 2027 – Mótsslit

Hvað kostar ?

Verðið fyrir þátttakanda er 572.000 kr. Athugið að þetta er verð án flugs.

Innifalið í verðinu er:

Þátttökugjald til mótsins: 215.000 kr.
Eftirmótsupplifun í Kraká: 110.000 kr.
Einkenni: 35.000 kr.
Annar kostnaður 212.000 kr.
- Sameiginlegur búnaður
- Sveitarstarf fyrir mótið
- Fararstjórn
- Skrifstofu- og ófyrirséður kostnaður

Þau sem vilja taka þátt eru beðin um að lesa vel skilyðrin hér að neðan og fylla síðan út umsóknareyðublaðið. Umsóknarfresturinn er til og með 1. apríl 2026

Ef það eru einhverjar spurningar um hlutverkið þá hvetjum við ykkur til að hafa samband við fararstjórana á netfangið jambo2027@skatarnir.is.

Skilyrði fyrir þátttakendur

Vera orðin 14 ára og ekki orðin 18 ára þegar mótið hefst, 30. júlí 2027
Hafa farið á a.m.k. fjögurra nátta skátaviðburð og gist í tjaldi allan tímann
Hafa unnið sér inn færnimerkin:
- Skyndihjálp
- Hnífur
- Útieldun
Vegna víðáttumikils mótsvæðis þarf þátttakandi að vera í góðu líkamlegu formi og geta fengið a.m.k. 10 kílómetra á dag (nema ef um sérstök frávik er að ræða)
Meðmæli frá sveitarforingja og einum úr félagaþrennunni þar sem hún er starfandi í félaginu, annars félagsforingja
Góð heilsa þar sem að á mótinu er mikil útivera og dagskrá sem krefst mikillar hreyfingar í +25°C hita og því mikilvægt að þátttakendur séu líkamlega hraustir
Þekki skátalögin og geti haft þau að leiðarljósi í allri vegferðinni í kringum mótið og í samskiptum við aðra.
- Hafa kynnt sér siðareglur Æskulýðsvettvangsins
- Hafa kynnt sér samskipta – og siðareglur þátttakanda mótsins sem allir þátttakendur þurfa að lesa yfir og samþykkja áður en þau fara á mótið
- Hafa kynnt sér 2. grein reglugerðar Bandalags íslenskra skáta um utanferðir skáta .
Taka þátt í undirbúningsfundum og/eða útilegum sveitarinnar og fararhópsins til að tryggja að þátttakandi sé vel upplýstur og undirbúinn fyrir ferðina t.d.:
- Hittingur fararhópsins á Landsmóti skáta á Hömrum 2026
- Sveitarútilegur
- Undirbúningsfundir sveitarinnar
Geta borið allan farangurinn sinn í einum bakpoka (18-20 kg) með minni dagspoka í u.þ.b. 30 mínútur (möguleg ganga frá rútunni að tjaldsvæðinu)
Hafa andlega burði til að búa þétt við frumstæðar aðstæður í fjölbreyttri mannflóru og miklu áreiti í þrjár vikur fjarri foreldrum/forráðafólki
Hafa jákvætt viðhorf gagnvart nýjum reynslum, ólíkum menningarheimum og að kynna íslenskt skátastarf á alþjóðlegum vettvangi

Umsókn fyrir þátttakendur

Skátadagatalið snýr aftur

Wed, 08 Oct 2025 12:15:00 GMT

Það er með mikilli gleði sem við endurvekjum skátadagatalið. Dagatalið er útprentað í stærð A2 svo það er þægilegt að […]

Útkall eftir umsóknum á norrænt gilwell

Thu, 25 Sep 2025 16:25:00 GMT

BÍS stendur til boða að senda 3 þátttakendur á norrænt Gilwell leiðtogaþjálfunar námskeið sem haldið verður í Finnlandi. Þátttakendur verða frá öllum Norðurlöndunum en námskeiðið fer fram á ensku. Að námskeiði loknu þurfa þátttakendur að mæta á lokahelgi Gilwell þjálfunarinnar á Íslandi.

HVAR OG HVENÆR

Námskeiðinu í Finnlandi er skipt í nokkra hluta:

3 netnámskeið: sunnudaginn 1. febrúar, sunnudaginn 22. mars og sunnudaginn 26. apríl. Nánari tímasetningar koma síðar
Útilega í Asikkala, suður Finnlandi, dagana 29. júní – 4. júlí 2026
Lokahelgi þjálfunarinnar í suður Finnlandi 6.-9. janúar 2027. Nánari staðsetning kemur síðar.

MARKMIÐ

Markmið námskeiðsins er að bjóða upp á ævintýralegt námskeið ásamt því að styrkja leiðtogahæfni þátttakenda. Á námskeiðinu er mikil áhersla á gildi, bæði einstaklingsins og skátahreyfingarinnar, og þurfa þátttakendur að vera tilbúin að taka þátt í verkefnum sem krefjast ígrundunar á eigin gildum og viðhorfum.

Nánari upplýsingar um námskeiðið má finna hér .

KRÖFUR

Þátttakendur þurfa að vera 22 ára, hafa reynslu af foringjastörfum, eða öðrum leiðtogastörfum, innan skátahreyfingarinnar og stefna á að halda því áfram. Jafnframt er æskilegt að þátttakendur hafi lokið sveitarforingjanámskeiði.

KOSTNAÐUR

Þátttökugjaldið er 550 evrur ásamt því að þátttakendur þurfa að greiða eigin ferðakostnað (2 ferðir til Finnlands).

UMSÓKNIR

Umsóknir skulu berast í gegnum formið hér að neðan. Umsóknarfrestur er til og með 12. október.

Gróðursettu tæplega 500 tré

Mon, 22 Sep 2025 16:01:00 GMT

Skátarnir komu sér fyrir og könnuðu svæðið á föstudeginum, í kvöldmat voru ljúffengar kjúklingavefjur sem þátttakendur elduðu sjálf. Öll þurftu að vakna snemma á laugardeginum, borða morgunmat og útbúa nesti því ferðinni var heitið upp á Esju. Skógræktarfélag Reykjavíkur kenndi þátttakendum réttu handtökin ásamt því að veita þeim fræðslu um þær mismunandi trjátegundir sem þau voru að gróðursetja og hvar best væri að gróðursetja þær svo þær séu vænlegastar til langlífs svona hátt uppi í Esjunni. Þær trjátegundir sem voru gróðursettu voru 175 Gráelri, 140 Stafafurur, 105 Kjarrelri og 40 Víði eða um 460 plöntur í heildina sem þátttakendur gróðursettu á mettíma.

Eftir hádegismat gátu þau sem vildu tekið gönguna upp að Steini sem var um helmingurinn af hópnum en rest fór aftur niður í tjaldbúðina. Í síðdegishressingu voru kleinur og kanilsnúðar og svo var haldið af stað í stöðva dagskrá. Í stöðvunum var meðal annars uppkvistun við stíg í skóginum þar sem farið var yfir hvernig eigi að snyrta trén til þess að hleypa meiri birtu inn í skóginn og svo voru afgangs viðardrumbar endurnýttir og fræðsluefni í kringum það.

Högni reiddi fram dýrindis hamborgara fyrir þátttakendur og svo var haldið skógarball og þar var tjúttað og dansað. Kvöldvaka var haldin við varðeldalautina sem skátarnir gerðu fyrr um daginn og sum skelltu sér í saunu. Þetta var svo sannarlega eftirminnilegt kvöld. Á sunnudeginum var tiltekt og allt rusl týnt upp. Viðburðinum var slitið með pylsum á grilli og merkja afhendingu.

Markmið viðburðarins var að gróðursetja tré og veita athygli á loftslagsmálum, efla náttúrutengsl ungmenna, kynna skátastarf, og læra um allskonar skemmtilegt sem hægt er að nýta afurðir trjáa í. Einnig var áhersla lögð á að sýna þeim frábært útivistarsvæði í útjaðri bæjarins. Þátttökugjald á viðburðinn var ekkert þar sem verkefnið hlaut styrk úr Loftlagssjóði ungs fólks í Reykjavík (Youth Climate Action Fund) sem er samstarfsverkefni Reykjavíkurborgar og Bloomberg Philanthropies.

Ungmennaráð BÍS þakkar öllum þeim sem komu fyrir frábæra helgi og vonast er til að geta haldið fleiri viðburði í þessum dúr.

Daði gengur til liðs við Úlfljótsvatn

Tue, 16 Sep 2025 08:44:00 GMT

Daði er ekki ókunnugur Úlfljótsvatni, en fyrir utan að hafa sótt þangað námskeið og viðburði var hann dagskrárstarfsmaður í hlutastarfi síðasta vetur, og lék þá lykilhlutverk í rekstri skólabúðanna.
Daði hefur numið leiklist, bifreiðasmíði og tungumál og hefur verið virkur í skátastarfi síðan 2007. Hann hefur meðal annars verið sveitarforingi, félagsforingi, starfsmaður SSR, meðlimur í Leiðbeinendasveitinni og sveitarforingi á Jamboree í Kóreu. Daði hefur verið mjög virkur í alþjóðastarfi og situr í dag í Alþjóðaráði.

„Ég er ánægður að hljóta þann heiður að fá að vinna á svo fínum stað, með svo góðu fólki og umvafinn náttúru sem leikur við augað,” segir Daði. “Á öðrum nótum er ég annars spenntur að fá að sinna dagskrá og vinna öll þau verkefni sem beinast að mér.”

Við bjóðum Daða hjartanlega velkominn til starfa og óskum honum velfarnaðar í starfi.

Skátarnir fagna fjölbreytileikanum

Fri, 15 Aug 2025 11:10:00 GMT

Grein eftir Kolbrúnu Ósk Pétursdóttir, skátaforingja í Garðbúum, sem birtist í tímariti Hinsegin daga.

Ég byrjaði í skátunum 18 ára gömul, frekar seint miðað við flest, þá nýkomin heim úr skiptinámi. Heimkoman reyndist mér erfið: ég var smá týnd og vissi ekki alveg hvert ég stefndi. Þá kom vinkona mín og bauð mér að vera skátaforingi með sér í skátafélagi sem var að endurvekja skátastarfið hjá sér. Ég ákvað að slá til þótt ég vissi ekki alveg út í hvað ég var að fara.

Þar sá ég hversu dýrmæt gildi skátanna eru og hversu mikil áhrif starfið getur haft – bæði á börnin og okkur sem leiðum það. Það var þó ekki fyrr en á mínu fyrsta skátamóti sem ég upplifði þessa tilfinningu: Ég er skáti . Ég var hluti af fjölbreyttu og fallegu samfélagi þar sem öll fá að vera þau sjálf. Þar kviknaði löngunin hjá mér til að vaxa, prófa eitthvað nýtt og einfaldlega vera ég sjálf. Ég kom líka frekar seint út úr skápnum og eftir að ég gerði það tók það mig alveg smá tíma að þora að taka þátt í hinsegin samfélaginu. Mér fannst ég ekki nógu hinsegin til að vera með, vildi ekki taka pláss frá öðrum sem ég hélt að ættu meira heima þar. En þegar ég leyfði mér að stíga inn í hinsegin samfélagið small þetta fyrir alvöru. Ég fann að þessi tvö samfélög – skátahreyfingin og hinsegin samfélagið – eru ekkert svo ólík. Þau standa fyrir frelsi, fjölbreytileika og virðingu. Að við fáum að lifa okkar lífi – frjáls undan fordómum, mismunun og útilokun. Að við fáum að vera við sjálf og að það sé í lagi.

Skátarnir í Gleðigöngunni

Skátarnir hafa tekið þátt í Gleðigöngunni af fullum krafti frá 2014. Við mætum í skátabúningunum okkar, með regnbogafána, syngjandi og hlæjandi og sendum samfélaginu skýr skilaboð: Fjölbreytileikanum er ekki bara sýnt umburðarlyndi – heldur virkilega fagnað!

Við viljum að öll tilheyri og sýna að skátasamfélagið stendur með réttlæti, mannréttindum og jafnræði. Hér þarf enginn að fela sig eða aðlaga sig til að passa inn! Það er ástæðan fyrir því að við göngum í Gleðigöngunni. Þetta er skemmtileg og falleg stund sem við eigum með vinum og fjölskyldu en það er líka gríðarlega mikilvægt. Þetta er tákn um það samfélag sem við viljum búa í, þar sem öll fá að vera með. Þetta er stórt verkefni og við ætlum að leggja okkar af mörkum um ókomna tíð.

Ég er þakklát fyrir að hafa fundið minn stað í skátunum. Og ég er þakklát fyrir að hafa fundið minn stað í hinsegin samfélaginu. Og í dag er ég stolt af því að fá að leggja mitt af mörkum til beggja þessara samfélaga – þar sem fjölbreytileikanum er fagnað af alvöru. Því að einmitt þannig skiljum við heiminn eftir betri en við fundum hann.

Lesa má tímaritið í heild sinni hér.

Úr Ragnaroki í Costa del Úlfljótsvatn

Thu, 14 Aug 2025 14:02:00 GMT

Ævintýri á Fálkaskátamóti

Síðastliðna helgi mættu 180 skátar af öllu landinu á Þingvelli á Fálkaskátamót þar sem framundan beið þeim stútfull dagskrá og fjör að víkingasið. Þátttakendurnir voru fljótt fluttir 800 ár aftur í tímann til að hjálpa Snorra Sturlusyni og fleiri höfðingjum að afstýra Ragnarökum sem voru yfirvofandi. Sú spá rættist heldur betur þegar þátttakendur vöknuðu morgunin eftir við fjúkandi tjöld, sem varð til þess að mótið var fært yfir á Úlfljótsvatn. Færsla mótsins gekk vonum framar, þar sem samtakamáttur skátahreyfingarinnar skein í gegn. Skátar mættu úr öllu áttum til að hjálpa til og stuttu seinna var risin ný tjaldbúð á Úlfljótsvatni. Skátarnir létu ekki flutningana slá sig út af laginu og nýttu sér þá frábæru dagskrámöguleika sem Úlfljótsvatn hefur upp á að bjóða; að klifra í klifurturninum, sigla á bátum, föndra, heimsækja Skátasafnið og fara á ótal kvöldvökur svo eittvað sé nefnt. Hápunkturinn var þó gleðigangan og diskóblótið, hinsegin partý mótsins. Skátarnir fagna jú alltaf fjölbreytileikanum, þó þeir skipuleggi óvart skátamót á hinsegindögum. Eftir að hafa séð samtakamátt, vinsemd og bræðralagið milli ættana á mótinu ákváðu höfðingjarnir að koma á friði, sem reyndist vera það sem þurfti til að koma í veg fyrir Ragnarök. Að lokum gátu skátarnir því snúið aftur til síns tíma. Því má segja að þrátt fyrir erfiðar aðstæður gekk mótið vonum framar, þökk sé mikilli samvinnu og ómetanlegri aðstoð foringja og sjálfboðaliða mótsins. Allir fálkaskátarnir komu heim með bros á vör, reynslunni ríkari.

Tuttugu Ægisbúar í ógleymanlegri ferð til Vässarö

Wed, 13 Aug 2025 12:40:00 GMT

Fyrstu nóttina var gist í skátaheimili Sancta Maria Scoutkår í Stokkhólmi, þar sem hópurinn fór saman út að borða á pizzastað og upplifði stemninguna í borginni. Áður en ferðalagið til eyjunnar sjálfrar hófst var kíkt í verslunarmiðstöð til að klára síðustu innkaup. Þá tók við fimm klukkustunda ferðalag með lestum og strætisvögnum að bryggjunni þar sem bátur beið okkar. Bátsferðin til Vässarö var um 30 mínútur í frábæru veðri með fallegu útsýni yfir sænsku eyjarnar í kring. Við komuna beið okkar traktor sem flutti allar töskurnar á tjaldsvæðið. Þar fengum við afhendan allan þann tjald- og eldunarbúnað sem að við þurftum. Efrir að tjöldin voru reist endaði fyrsta kvöldið á sjósundi og heimsókn í saununa við bryggjuna.

Þó svo að moskítóflugurnar væru heldur ágengar í ljósaskiptunum létu skátarnir það ekki á sig fá. Dagskráin á Vässarö var fjölbreytt og skemmtileg. Í boði voru siglingar á seglskútum, kajakferðir, padel board, klifur, göngur, leikir og endurnærandi ferðir í saunu og sjó. Skátarnir reistu eigin tjaldbúð og skiptust á að elda máltíðir fyrir hópinn. Tveir skátar tóku þá ákvörðun að sofa í hengirúmum alla vikuna, sem gekk ótrúlega vel og stór og glæsileg fánastöng var reist í miðju tjaldbúðarsvæðinu. Froskarnir á eyjunni létu ekki sitt eftir liggja og kíktu iðulega í heimsókn í tjöldin, sem vakti mikla kátínu.

Eftir sex dásamlega daga á Vässarö var komið að kveðjustund. Hópurinn hélt aftur heim á leið með stuttu stoppi á McDonalds á flugvellinum sem þótti skemmtilegur endapunktur á ferð sem einkenndist af gleði, samvinnu, náttúru og ævintýrum.

Ferðin til Vässarö var einstök upplifun fyrir Dróttskátana og er sannarlega eitthvað sem fleiri skátafélög ættu að íhuga.

Dagur Sverrisson, sveitarforingi Hvítu Fjaðrarinnar

Skátar fagna fjölbreytileikanum

Tue, 12 Aug 2025 17:20:00 GMT

Skátastarf snýst um miklu meira en að binda hnúta og ganga á fjöll. Skátastarf snýst um að finna sitt fólk, læra að treysta sjálfu sér og öðrum og finna öryggið til að vera nákvæmlega þú sjálft. Fyrir hinsegin ungmenni getur það skipt sköpum að tilheyra hópi þar sem fjölbreytni er ekki bara liðin heldur fagnað. Þátttaka skátanna í Gleðigöngunni er löngu orðinn fastur liður í dagskrá sumarsins en Hjálpasveit skáta í Reykjavík hefur tekið þátt í göngunni með skátunum frá upphafi. Með þátttökunni sýnum við ungu skátunum okkar í verki að skátahreyfingin sé staður þar sem þau geta verið þau sjálf, að við stöndum með mannréttindum og fögnum fjölbreytileikanum.

En skátar tóku ekki aðeins þátt í Gleðigöngunni í Reykjavík á laugardaginn var heldur var fjölbreytileikanum einnig fagnað á Fálkaskátamóti á Úlfljótsvatni um helgina. Hátt í 180 fálkaskátar, foringjar og sjálfboðaliðar dönsuðu og gengu frá Friðarlautinni upp í KSÚ þar sem haldið var eftirminnanlegt diskóblót í ljósaskiptunum. Myndirnar tala fyrir sig.

Þá var Elín Esther Magnúsdóttir, rekstrarstjóri Útilífsmiðstöðvar skáta á Úlfljótsvatni ein af þremur viðmælendum í þættinum Hinsegin dagar, vikur, mánuðir, ár sem sýndur var sunnudaginn 10. ágúst í tilefni hinsegin daga. Viðtalið er einlægt, skemmtilegt og hvetjandi en Elín Esther er frábær fyrirmynd fyrir unga skáta. Horfa má á þáttinn hér en innslagið með Elínu hefst á 29. mínútu.

Íslendingar í Vín: Sjö skáta fararhópur fer á evrópuþing skáta fyrir hönd Íslands:

Wed, 30 Jul 2025 15:16:00 GMT

Í síðustu viku fóru fram Evrópuþing WOSM og WAGGGS og voru haldin í Vínarborg í Austurríki. Fararhópurinn fór út á föstudaginn þann 18. júlí og komu heim á fimmtudaginn þann 24. júlí. Fyrir hönd BÍS fóru sjö skátar út, tvö á WAGGGS þingið og fimm á WOSM þingið.

Á þinginu var margt að gera. Farið var yfir nýjar stefnur Evrópudeildar skátahreyfingunnar sem mun gilda næstu þrjú ár, kosið var í stjórnir Evrópudeildar hreyfinganna WOSM og WAGGGS og svo voru áskoranir á stjórnirnar sem voru fjörugar. Oftast þá komst þingið í gegnum þessar tillögur frekar fljótt, en eins og alltaf þá voru einhverjar tillögur sem rifist var mikið um. Í grunninn starfar Evrópuþing eins og Skátaþing gerir heima á Íslandi nema það er mikið sturlaðra og lengra. Samanlagt voru þrír dagar af þingstörfum en það voru þó ekki aðeins þingstörf heldur voru líka t.d. kynningar frá mismunandi aðilum eins og næstu stjórn fyrir Roverway sem verður haldið í Sviss árið 2028, og svo var einnig heill hellingur af smiðjum og þar má nefna t.d. smiðjur um að búa til stefnur, valdeflingu ungmenna og safe from harm.

Líklega það áhugaverðasta við það að fara í svona ferðir er samspil heimshreyfingana skáta og mismunandi skátabandalaga. Í rauninni voru þetta 3 þing sett saman. WOSM þingið WAGGGS þingið og sameiginlega þingið. Á WOSM og WAGGGS þinginu var rætt um það hefðbundna (áskoranir og skýrslur) en svo á sameiginlega þinginu var aðallega rætt um samstarf bandalaganna og hvernig ætti að styrkja það. Einnig var skemmtilegt að fylgjast með hvernig það sást í tengslanet bandalaga. Líklega besta dæmið um þetta voru Norðurlöndin. Algengt var að sjá hópa af Dönum, Svíum, Norðmönnum og Finnum að spjalla saman á göngunum og styðja við hvort annað í þingsalnum.

Annað sem var rosalegt er hversu mikið af valdamiklu og áhugaverðu fólki var á þinginu, það var frekar súrrealískt að sjá fólk ekki merkt löndum heldur heimshreyfingum eins og til dæmis má nefna WOSM stjórn sem gengur um með fjólubláan klút og í dökkblárri skyrtu. Þetta er fólkið sem tekur sumar af stærstu ákvörðunum innan skátanna sem hafa áhrif á alla skáta í Evrópu, jafnvel heiminum. Ef maður lenti á spjalli við einhvern frá öðru landi voru miklar líkur á að það væri stjórnarmeðlimur, jafnvel skátahöfðingi þess lands. En þrátt fyrir þetta þá tók maður ekki mikið eftir því í raun. Allir þarna hefðu alveg eins getað verið skátar og stjórnarmeðlimir félaga að hittast á Skátaþingi á Íslandi. Þess vegna var svo svalt að sjá einnig mikið af ungmennum á þinginu. Eitt hlutverk innan fararhópanna hét Youth delegate og það var alltaf skemmtilegt þegar þau komu með athugasemdir á umræðuna, oft skemmtilegra að hlusta á þau heldur en þau eldri.

Næsta Evrópuþing verður haldið í Flórens og við hlökkum til að sjá sem flest sækja um fyrir það!

-Helgi Þórir Sigurðsson, skátafélagið Vífill

Hægt er að lesa um stefnuna sem var kosin hjá WOSM næstu þrjú ár hér

Frá Bifröst til Búðardals

Tue, 29 Jul 2025 11:54:00 GMT

Þann 14. júlí 2025 hófst ferðalag sem átti eftir að verða mikið ævintýri fyrir þátttakendur og skipuleggjendur. Þetta ævintýri var Landsmót rekka- og róverskáta sem haldið er fyrir skáta á aldrinum 16-25 ára um landið allt, m ótið skiptist upp í gönguhluta og tjaldbúðarhluta. Að þessu sinni var ákveðið að ganga Vatnaleiðina frá Bifröst til Hlíðarvatns og hafa þar tjaldbúð við Hallkelsstaðahlíð.

Eftir góða sundferð í Borgarnesi safnaðist gönguhópurinn saman við Bifröst þar sem gist var við háskólann og smurt nesti fyrir fyrsta göngudag. Frá Bifröst lögðu að stað 21 göngugarpar frá Garðbúum, Landnemum, Klakki, Skjöldungum og Ægisbúum, þriðjudaginn 15. júlí. Þar af voru fjórir skipuleggjendur mótsins og tveir sjálfboðaliðar með gríðarlega reynslu og flotta kálfa. Þessum hóp til halds og trausts voru þrír sjálfboðaliðar sem sáu meðal annars um að flytja farangur, hlúa að þreyttum löppum eftir langan dag og leyfa latari hluta skipuleggjanda að gista í fortjaldinu hjá sér.

Þar sem þátttakendur fengu að ráða eigin ræsi var lagt að stað aðeins á eftir áætlun á fyrsta degi göngunnar. Gengið var fram hjá Hreðavatni, upp Vikrafell og að Langavatni. Fjölbreytt landslag einkenndi fyrsta dag göngunnar sem var virkilega fallegur með óvenju há tré, grýtt fjöll, mosagræna hóla, grasbrekkur, mýrlendi og falleg vötn. Skátarnir nýttu ótrúlega gott veður til þess að sóla sig, synda í vötnum og gengu í stuttbuxum og stuttermabolum alla leið. Helstu vandamálin á fyrsta degi voru tómir vatnsbrúsar, sólbruni og mýflugur sem eltu skátana upp holt og hæðir og áttu eftir að herja þau alla gönguna. Nestið var fjölbreytt og metnaðarfullt hjá skátunum, á göngunni voru flatkökurnar vinsælar ásamt hágæða hnetublöndum og í kvöldmat voru gerðar flottar núðlusúpur, bakaðar pizzur og pasta með ljúffengum ostum.

Göngudagur tvö var sá lengsti og lá um 23 kílómetra frá Langavatni til Hítarvatns. Á leiðinni þurftu skátarnir að vaða yfir á, klífa brattar brekkur í gegnum skarð, berjast við flugur og halda sér vel vökvuðum á heitum degi. Sumir skátanna ákváðu að skella sér á toppinn á Ok og fengu þar að njóta frábærs útsýnis áður en ský dró fyrir. Vatnaleiðin var ekki sú besta þegar kom að stikum og merkingum en skátarnir voru með hamar með í för til að laga skakkar stikur sem þau sáu, oftar en ekki þurftu þau að finna sína eigin leið með því að treysta á kort og kennileiti á leiðinni. Eftir langan dag komu þreyttir og vel teipaðir fætur, í boði Hansaplast, að skálanum við Hítarvatn. Þegar búið var að tjalda, teygja og borða dýrindis kvöldmat var tekinn stöðufundur með hópnum en veðurfræðingur hópsins spáði mikilli rigningu næsta dag og var ákveðið að vakna snemma til að reyna að sleppa við sem mest af henni.

Vekjaraklukkur byrjuðu að hringja klukkan sex næsta morgun og skátarnir komu hoppandi glaðir úr tjöldum sínum tilbúin að takast á við daginn. Síðasti göngudagurinn var 10 kílómetra leið frá Hítarvatni til Hallkellsstaðahlíðar við Hlíðarvatn. Eftir myndatöku stopp við magnað landslag Hítarvatns tók við mýri og löng brekka sem var öll hækkun dagsins. Hópurinn var kominn upp hálfa brekkuna þegar rigning og þoka mætti þeim en skátarnir gáfu þá bara í og drápu tímann með því að syngja skátasöngva og reyna að komast að því hver maðurinn var. Nokkrir skátar leituðu skjóls í helli þar sem tekin var stutt nestispása fyrir lokasprett að Hlíðarvatni en þar þurfti að vaða og gekk hópurinn síðasta kílómetrann á tám, tevum eða blautum skóm. Þegar komið var á leiðarenda leitaði hópurinn skjóls frá rigningunni inn í tjaldi sem frábærir sjálfboðaliðar höfðu reist. Restin af mótsstjórninni mætti svo á svæð ið með fjöldann allan af búnaði svo hægt var að reisa almennilega tjaldbúð og matartjald. Eftir kvöldmat höfðu skátarnir það kósí inn í matartjaldi, spiluðu borðspil og spjölluðu.

Tjaldbúðin var lengi á fætur næsta dag enda margir ansi þreyttir eftir langa göngu e n eftir góðan morgunmat var fánastöng fljót að rísa ásamt og hengirúmi úr trönum. Skátarnir tókust svo á í góðum hópeflisleikjum, spiluðu spil, föndruðu og höfðu það almennt frekar notalegt. Yfir daginn bættust skátar við hópinn og voru í heildina 32 skátar frá Árbúum, Fossbúum, Garðbúum, Heiðabúum, Hraunbúum, Klakki, Kópum, Landnemum, Svönum, Vogabúum og Ægisbúum ásamt frábæru liði sjálfboðaliða. Vindur var yfir svæðinu og smá þoka svo skátarnir treystu sér ekki út á bát á vatninu, þessi þoka reyndist svo vera gosmengun og eftir að hafa hringt og ráðstafað okkur við gáfaðra fólk var tekin ákvörðun um að gista innandyra.

Þátttakendur eiga stórt hrós skilið fyrir hvernig þau tóku þessum fréttum. Með góðri samvinnu var sett heimsmet í frágangi á tjaldbúð, smalað í bíla og lagt af stað í Búðardal. Við erum ótrúlega þakklát Skátafélaginu Stíganda og Búðardal sem leyfði okkur að gista í grunnskólanum og nýta aðstöðuna þar.

Laugardaginn 19. júlí, vaknaði hópurinn í Auðarskóla og eftir morgunmat, morgunleikfimi og fánaathöfn dreif hópurinn sig í sund í Laugum í Sælingsdal. M jög gott var að geta skolað af sér ferðarykið, slappa af í pottinum og leika sér í lauginni. Laugin var full þegar hópurinn mætti á svæðið en varð ansi tóm þegar hann fór af einhverjum ástæðum. Eftir sund heimsótti hópurinn Erpsstaði, gæddi sér á dýrindis ís og heilsaði upp á dýrin þar. Einnig var klifrað upp ganginn í skólanum á rúllustólum og spilað fleiri borðspil. Um kvöldið tók svo við söguleg kvöldvaka með frábærum kvöldvökustjórum, fallegum söng og sprenghlægilegum skemmtiatriðum sem stóð yfir í þrjá klukkutíma. Lokadagur ferðarinnar einkenndist að frágangi og þrifum. Eftir góða kveðjustund og merkjagjöf skiptist hópurinn í bíla og kom sér heim.

Við í mótsstjórn erum alsæl með þetta mót þó svo að það hafi ekki farið alveg eins og upphaflega var planað. Við viljum þakka öllum sjálfboðaliðum sem komu að þessu móti þar sem það hefði ekki getað orðið að veruleika án þeirra. Einnig viljum við þakka öllum frábæru þátttakendunum sem gerðu þetta mót svona skemmtilegt og tóku vel í allar breytingar og verkefni sem við hentum í þau.

Skátakveðja,

Mótsstjórn Náttúrulegu 2025, Landsmóts Rekka-og Róverskáta.

Líf í lundi: Brauðilmur og náttúrubingó í hjarta skógarins

Fri, 27 Jun 2025 12:11:00 GMT

Frétt og myndir frá Skógarskátum.

Líf í lundi á Úlfljótsvatni

Það vr eitthvað sérstakt við andrúmslotfið í skógarrjóðrinu við KSÚ á Úlfljótsvatni laugardaginn 21. júní síðastliðinn. Ilmur af nýbökuðu brauði blandaðist við sumarloftið, hlátur barna og mjúkan fuglasöng. Skógræktarfélag skáta við Úlfljótsvatn stóð þá fyrir sínum fyrsta Líf í lundi viðburði og úr varð samverustund í faðmi náttúrunnar.

Gestirnir – hátt í 25 manns – mættu vel búnir og tilbúnir að njóta dagsins, þrátt fyrir smá skúrir. Veðrið var milt, nánast stillt og regnið gaf stemningunni jafnvel meiri dýpt – eins og náttúran væri sjálf að taka þátt í hátíðinni.

Við eldstæðin var mikið fjör. Með birkigrein í hendi og pítsadeig vafið utan um bökuðu þátttakendur sitt eigið brauð. Þegar tók að rjúka úr deginu voru valkostirnir klárir: hvítlauksolía eða kanilsykur – eða bæði! Sérstaklega vinsælt reyndist að hella fyrst olíunni yfir og síðan sykrinum – olían virkaði sem fullkomið „lím“ og úr varð brakandi góð blanda af krydduðu og sætu.

Fyrir þau sem vildu hreyfa sig var boðið upp á náttúrubingó. Gengið var í gegnum skóginn með bingóspjöld í hönd og augun opin fyrir laufblöðum, steinum og öðrum fjársjáðum skógarins. Þetta reyndist vinsælt hjá börnum og fullorðnum og veitti aukna tengingu við umhverfið.

Viðburðurinn vakti ánægju og sýndi að einföld gleði – eldur, brauð og náttúra – dugar langt til að skapa dýrmætar minningar. Skógræktarfélagið hvetur nú öll að ganga skógarstíginn sem hefst á litríkum steinum skammt frá undirgöngunum á Úlfljótsvatni – róleg ganga sem tekur einungis um 30 mínútur og hentar vel fyrir fjölskyldur.

Við þökkum öllum sem komu í lundinn kærlega fyrir og hlökkum til að sjá ykkur aftur á næsta Líf í lundi!

Geimdrekar tóku yfir Úlfljótsvatn

Wed, 18 Jun 2025 11:03:00 GMT

Frétt skrifuð af mótsstjórn Drekaskátamóts 2025. Myndir: Andrea Dagbjört

Helgina 13.-15. júní héldu hátt í 200 drekaskátar á vit ævintýranna á landsmót drekaskáta 2025 á Úlfljótsvatni. Helgin var svo sannarlega ævintýraleg þar sem þema mótsins í ár var geimveruþema.

Skátarnir reistu glæstar tjaldbúðir í góðu veðri og landsmót drekaskáta var svo sett með miklum látum þegar hann Goggi geimvera brotlenti geimflauginni sinni. Þar komu skátarnir sér saman um að hjálpa þyrfti Gogga aftur heim til plánetunnar sinnar Zurka.

Á laugardeginum unnu skátarnir hörðum höndum að því að safna stjörnuorku til þess að knýja geimskipið hans Gogga áfram. Til dæmis var klifrað í klifurturninum, buslað í vatnasafaríinu og farið í bogfimi. Einnig máluðu skátarnir steina til þess að skreyta nýju fallegu gönguleiðina. Sumir máluðu meira að segja steina með myndum af plánetunni Zurka svo að Goggi fengi ekki heimþrá. Ekki var það verra að íslenska sumarið skartaði sínu allra fegursta og glampandi sólin lék við drekaskátana allan daginn. Þegar kvöldaði vantaði þó enn stjörnuorku í geimskipið hans Gogga og eftir vel heppnaða kvöldvöku heyrðust orðrómar um að vísindamenn væru komnir á kreik, tilbúnir að selja skátunum stjörnuorku gegn því að leysa þrautir. Skátarnir voru ekki lengi að hlaupa af stað og finna vísindamennina, enda þótti þeim vænt um Gogga og vildu óðum hjálpa honum að komast heim.

Óhætt er að segja að skátarnir stóðu sig með prýði við söfnun stjörnuorkunnar og Goggi kvaddi þakklátur þegar hann flaug til heimaplánetunnar sinnar Zurka í geimflauginni sinni. Allt er gott sem endar vel og landsmót drekaskáta 2025 endaði svo sannarlega vel. Vert er að minnast á að í ár hefur mótsstjórn síðustu ára unnið að því að þjálfa nýja mótsstjórn samhliða undirbúnings mótsins. Mótsstjórnin var því vel mönnuð af bæði miklum reynsluboltum sem og nýjum og metnaðarfullum mótsstjórnarmeðlimum. Fráfarandi mótsstjórnarmeðlimir kveðja stoltir og bjartsýnir fyrir nýrri mótsstjórn komandi drekaskátamóta og þakka innilega fyrir samfylgdina síðustu ár.

Einstakt Sumar-Gilwell á Úlfljótsvatni

Fri, 06 Jun 2025 17:15:00 GMT

Blað var brotið í sögu Gilwell á Íslandi síðustu helgi þegar 16 gilwellskátar fengu tækifæri til að hefja vegferð sína að þriðju og fjórðu perlu. Er það í fyrsta skipti sem framhaldsnámskeið með þessu sniði er haldið á Íslandi. Á sama tíma fór fram grunnnámskeið Gilwell, með 10 þátttakendum í tveimur flokkum, Gaukum og Hröfnum. Grunnnámskeiðið tók forskot á sæluna, og mætti degi fyrr heldur en framhaldsnámskeiðið eða miðvikudaginn 28. maí. Þá gafst þeim tími til að kynnast flokknum sínum og reisa tjaldbúð.

Dagskrá námskeiðanna var fjölbreytt. Báðir hópar fengu tækifæri til að æfa sig í útieldun, taka þátt í póstaleikjum og kvöldvökum og sitja vinnustofur um menningu og gildi og þarfamiðuð samskipti. Á grunnnámskeiðinu einbeittu þátttakendur sér að eigin skátastarfi og starfi skátafélagsins á meðan áhersla framhaldsgilwells er skátastarf á landsvísu; verkefnastjórnun og stefnumótun. Þátttakendur framhalds Gilwell fengu innihaldsríkt örnámskeið í verkefnastjórnun frá Halldóru Guðrúnu Hinriksdóttur og vinnustofu í krísustjórnun frá Hermanni Sigurðssyni. Þá ber að nefna að Gilwell skátinn Valdís Þorkelsdóttir fékk Gilwell einkenni sín afhent 58 árum eftir að hún hóf Gilwell vegferðina sína, eftir að áhuginn kviknaði aftur í kjölfar Gilwell útskriftar barnabarns Valdísar fyrir ekki löngu síðan. Síðan þá hefur Valdís orðið hluti af skátasamfélaginu á ný en viðstödd afhendinguna voru því góðir vinir úr starfinu sem og þátttakendur framhaldsnámskeiðsins ásamt leiðbeinendum þeirra.

Sérstakur gestur á námskeiðinu var Diana Slabu frá Evrópustjórn WOSM en hún kynnti fyrir þátttakendum störf Evrópustjórnarinnar, stefnur og áherslur og uppbyggingu teymisins. Andinn var sérstaklega góður á námskeiðunum og samheldni hópanna áberandi. Þar var hlegið, grátið, sungið og allt þess á milli. Aðspurð um upplifun sína af námskeiðinu lýsti Díana henni eins og að ganga inn í fjölskyldu. Þar hitti hún naglann á höfuðið en samheldnin, samvinnan og samveran var einkennandi fyrir námskeiðið. Það verður spennandi að fylgjast með hvernig verkefni þátttakendanna þróast og skila sér út í skátastarfið í landinu.

Effelturninn súrraður á Úlfljótsvatni!

Tue, 27 May 2025 10:06:00 GMT

Helgina 25. – 27. apríl síðastliðinn mættu 36 dróttskátar víðsvegar af höfuðborgarsvæðinu á súrr viðburðinn – DS. Súrr-realisma á Úlfljótsvatni. Viðburðurinn var haldinn af Grænjöxlunum, viðburðarsveit sem var að halda sinn annan viðburð. Síðast héldu Grænjaxlarnir 18:23 árið 2023 svo það stefnir í eitthvað spennandi 2027.

Hugmyndin með DS.Súrr-realisma var að þátttakendurnir fengu tækifæri til þess að súrra eitthvað flippað, annað en þeir eru vanir að gera á skátamótum eða fundum, sem þeir gerðu svo sannarlega. Hitt markmiðið okkar var að gista í tjöldum og halda í klassíska tjaldútilegu stemningu. Helgin byrjaði á því að þátttakendurnir skiptu sér í flokka og plönuðu hvað þeir ætluðu að súrra daginn eftir.

Flokkarnir voru

Alltaf aftur, sem súrruðu stað til að hanga
Df. Zipz, sem súrruðu aparólu á upphækkuðum palli
Föðurlandsþjófarnir, sem súrruðu borð með hangandi bekk og netahengirúmi
Gervi-Frakkar, sem súrruðu Eiffel turninn (e.þ.s. þrífótaþrífóturinn)
Klifurgengið, sem súrraði brú með neti
Reynir, sem súrraði stað til að hanga

Laugardagurinn byrjaði á fánaathöfn, morgunleikfimi og fána og svo fór restin af deginum í að súrra. Þess á milli skiptust flokkarnir á að elda fyrir hópinn, sem heppnaðist ljómandi vel. Á laugardagskvöldinu, þegar allar súrr-byggingar voru reistar, var haldin skemmtileg kvöldvaka þar sem allir flokkarnir voru með skemmtiatriði og svo var farið í æsispennandi næturleik – þorpaleikinn. Dagurinn endaði svo á klassísku skátakakó og kexi. Á sunnudeginum fengu þátttakendurnir tækifæri til að sýna hvort öðru trönubyggingarnar sínar áður en tekið var saman og haldið heim á leið.

Vert er að minnast á að mikil áhersla var lögð á öryggi og flokkarnir sem voru að súrra hátt uppi voru vel tryggðir í beltum og hjálmar hafðir við alltaf þegar eitthvað átti á hættu á að detta niður á fólk. Einnig var lagt upp með að skera ekki á nein bönd, #Náttturuvinur, en til að gera það þarf að brenna endana strax og böndin eru skorin og setja smá vinnu í að leysa hnútana á sunnudeginum.

Það sem stóð upp úr á viðburðinum var að sjá hugmyndir flokkana verða að veruleika; að sjá samvinnuna, þrautsegjuna og metnaðinn sem þurfti til að fá allar trönubyggingarnar til að rísa. Þeir gáfust ekki upp, þó svo að súrrið hafi verið erfitt. Þá fundu þeir nýjar leiðir og héldu áfram að reyna. #PGM! (Plana, gera og meta).

Frétt skrifuð af Grænjöxlum.

Nýkjörin stjórn Skátagildanna á Íslandi

Mon, 26 May 2025 10:02:00 GMT

Guðni Gíslason, landsgildismeistari
Sigríður Kristjánsdóttir, varalandsgildismeistari
Þóra Guðnadóttir, ritari
Hjördís Sigursteinsdóttir, gjaldkeri
Agnes Ösp Þorvaldsdóttir, alþjóðlegur bréfritari
Laufey Bragadóttir, varamaður í stjórn

Tóku þátt í vetrarskátun

Tue, 22 Apr 2025 14:22:00 GMT

Fréttin birtist fyrst hjá akureyri.net og er birt með leyfi.

Skíðasamband skáta stendur árlega fyrir dagskrá í „vetrarskátun“ sem endar með 4-5 daga gönguferð á skíðum um páska sem kallast ÍSHÆK. Í ár fóru tíu vaskir skátar í leiðangurinn og var stefnan sett að Gili suður af Fjörðum.

Vetrarskátun er dagskrá fyrir skáta, 14 ára og eldri, þar sem lögð er áhersla á kennslu á gönguskíðum utan brautar og ferðamennsku að vetri. Það eru skátar úr Skátafélaginu Klakki á Akureyri sem halda utan um verkefnið og sjá um skipulagningu undir merkjum Skíðasambands skáta. Dagskráin er í boði fyrir skáta alls staðar að af landinu.

Yfir veturinn eru reglulegar skíðaæfingar þar sem hinar ýmsu listir utanbrautarskíða eru reyndar og þátttakendur æfa sig í að rata. Skátunum gefst einnig kostur á að taka þátt í útilífsnámskeiði yfir helgi þar sem þeir læra það helsta um útivist, svo sem klæðnað, búnað, matarræði, skyndihjálp, skíðabúnað og margt fleira. Þátttakendur gista eina nótt inni, en seinni nóttina í tjaldi. Námskeiðið er að mestu leyti verklegt og fer að stórum hluta fram utandyra.

Þeir skátar sem náð hafa 16 ára aldri, ljúka útilífsnámskeiðinu, tilteknum fjölda skíðaæfinga og standast rötunarpróf eru svo gjaldgengir í lokaþolraunina, ÍSHÆK og bikarmót Skíðasambands skáta.

ÍSHÆK 2025

Það voru tíu vaskir skátar sem lögðu af stað í ÍSHÆK laugardaginn 12. apríl og var stefnan sett að Gili suður af Fjörðum. Gengið var frá bílaplaninu neðan Kaldbaks, upp Grenjárdal og niður Trölladal um 14 km leið uns komið var að ferðaskála að Gili þar sem hópurinn hafði bækistöð í ferðinni. Veður var með ágætum en snjóalög frekar slök sökum hitatíðar dagana á undan. Þótt hópurinn þyrfti að ganga með skíðin á bakinu frá Finnastaðatungum miðaði honum vel en skátarnir voru þó hvíldinni fegnir í lok þessa fyrsta dags þegar komið var á áfangastað.

Á Pálmasunnudegi hafði veðrið versnað nokkuð, skátarnir létu það þó ekki á sig fá og var farið í dagsferð frá Gili og gengið upp fjallshlíðina austan við á, upp Illagil og til baka. Byrjað var að blása og kólna og þar sem spáin fyrir mánudaginn var ekki sem best var ákveðið að taka forskot á bikarmót Skíðasambands skáta, sem til stóð að halda daginn eftir. Það reyndist skynsamlegt því á mánudeginum var slagviðri; bálhvasst og úrkoma. Ferðalangarnir héldu sig því mest innandyra þann dag, en luku þeim keppnisgreinum sem eftir voru af bikarmótinu í kringum skálann.

Bikarmótið

Hefð er fyrir því að halda bikarmót Skíðasambands skáta í ferðinni. Keppt er í ýmsum þolraunum s.s. spjótkasti, skíðasvigi, spretthlaupi o.fl. Þá tíðkast, segja skátar í léttum dúr, að múta megi – eða hreinlegi eigi að múta – dómurum til að auka vegferð keppanda að hinum mikla heiðri sem felst í því að fá nafn sitt á forláta farandbikar sem sigurvegarinn hlýtur í verðlaun! Að keppni lokinni var það Anton Dagur Björgvinsson sem bar sigur úr bítum og hefur þannig ritað nafn sitt rækilega í sögu ÍSHÆK.

Á þriðjudeginum var pakkað saman og skíðuðu skátarnir sem leið lá ríflega 16 km suður um Leirdalsheiði uns komið var til byggða. Súlur – Björgunarsveitin á Akureyri – sá um að ferja skátana í sund þar sem ferðarykið var skolað af mannskapnum og tröllasögur úr ferðinni sagðar í pottinum.

Sækjum fram – skátar í hverri höfn

Thu, 10 Apr 2025 17:34:00 GMT

Harpa Ósk Valgeirsdóttir, skátahöfðingi, setti þingið og ávarpaði þingheim. Í ávarpinu kom hún inná hvað skátastarf hefur þróast og dafnað undanfarin tæp 120 ár og á enn jafn vel við í dag og þá. Enn er skátastarfið að skila sínu til samfélagsins, stuðla að frið, efla ungt fólk til ábyrgðar og halda tengslum við upprunan og náttúruna. Þá talaði hún einnig um hvernig síðustu ár hafa farið í að styrkja innviði skátastarfs, hvatakerfið, uppbyggingu viðburða og fleira og þess vegna er skátahreyfingin tilbúin að sækja fram og efla skátastarf í landinu.

Heiðursmerki voru veitt fyrir ýmis vel unnin störf og voru það eftirfarandi sem hlutu heiðursmerki:

Þjónustumerki BÍS úr gulli:
Alex Már Gunnarsson, Vífill, fararstjórn Roverway
Halldóra Hinriksdóttir, Landnemar, fararstjórn Roverway
Valdís Huld Jónsdóttir, Vífill, fararstjórn Roverway
Þóra Lóa Pálsdóttir, Hraunbúar, fararstjórn Roverway

Þórshamarinn úr bronsi:
Bjarni Freyr Þórðarson, Hraunbúar , fyrir framlag sitt til skátastarfs í Hafnarfirði
Haukur Friðriksson, Ægisbúar , fráfarandi félagsforingi Ægisbúa

Skátakveðjan úr bronsi:
Claus Hermann, Hraunbúar, fyrir framlag sitt til skátastarfs í Hafnarfirði
Kristjana Þórdís Ásgeirsdóttir, Hraunbúar, fyrir framlag sitt til skátastarfs í Hafnarfirði
Þórey Valgeirsdóttir, Hraunbúar, fyrir framlag sitt til skátastarfs í Hafnarfirði

Skátakveðjan úr gulli:
Guðni Gíslason, Hraunbúar, fyrir framlag sitt til skátastarfs í Hafnarfirði

Bronskrossinn:
Anna Kristjana Öfjörð Helgadóttir , Klakkur.
Fyrir rétt viðbrögð við slysi á dróttskátamóti í Viðey þar sem skáti ökklabrotnaði. Anna tók stjórn á aðstæðum, hlúði að skátanum og veitti aðstoð við andlega skyndihjálp, lét útbúa börur og stýrði því að skátanum var komið ferjuna til að fá aðstoð við hæfi á Landspítalanum.

Matthildur Guðrún Hlín Leósdóttir, 8 ára, Heiðabúar.
Fyrir að sýna hárrétt viðbrögð þegar það rofnaði kransæð hjá móður hennar og þær tvær einar heima. Hún lét móður sína hringja í 112 og beið róleg með henni þar til sjúkraflutningamenn komu og fylgdi henni alla leið á hjartagáttina sem stuðningur.

Silfurkrossinn:
Jón Andri Helgason, Árbúar.
Fyrir hetjulega björgun á Crean þar sem írskir skátar misstu fótana í straumharðri á sem þeir reyndu að þvera. Jón Andri Stakk sér á eftir þeim og kom þeim að lokum í land, blautum en afar þakklátum fyrir lífgjöfina.

Almenn þingstörf fóru fram fyrri hluta laugardags og var þar kosið um lagabreytingatillögur og rætt um ýmis mál. Að þingstörfum loknum voru haldnar vinnusmiðjur þar sem starfsráð kynnti færnimerki, R.s. Snúðar kynntu færnifant sem er nýtt færnimerkjaspil og alþjóðaráð fræddi fólk um hvað þau geta gert á eigin vegum í alþjóðastarfi. Einnig voru Úlfljótsvatn, Hraunbyrgi og Hamrar með umræðusmiðju um skátamiðstöðvar á Íslandi og tækifærin sem þar liggja. Vinnuhópur Hringferðarinnar var með tvær smiðjur, annars vegar um fjölgun sjálfboðaliða og hinsvegar um fjölgun skátafélaga. Þá var einnig smiðja um skátasambönd.

Hátíðarkvöldverður var haldin á laugardagskvöldinu þar sem Jakob Burgel veislustýrði með miklum glæsibrag og Elfa Dögg reytti af sér brandarana.

Sunnudagurinn var tileinkaður stefnumótun þar sem um 80 skátar mættu og fóru yfir það sem vel var gert í stefnunni sem klárast í ár en jafnframt var horft fram á við og hvaða markmið skátahreyfingin vill sjá í stefnu 2026 – 2030. Stærstur hluti þeirra sem komu að þessari undirbúningsvinnu nýrrar stefnu voru ungmenni og erum við stolt af því að rödd þeirra muni sjást og heyrast í næstu stefnu. Smiðjan um stefnuna var þó einungis upphafið að vinnu við gerð nýrrar stefnu og kemur hún til með að lýta dagsins ljós í upphafi árs 2026.

Skátaþing var sett í gærkvöldi

Sat, 05 Apr 2025 10:57:00 GMT

Skátaþing var sett í gærkvöldi með hátíðlegri setningarathöfn sem var einkar vel sótt en yfir 160 manns sóttu setninguna. Skátaþing fer fram í Víðistaðaskóla í Hafnarfirði og eru gestgjafar þingsins skátafélagið Hraunbúar. Harpa Ósk Valgeirsdóttir, skátahöfðingi, setti þingið og ávarpaði þingheim.

Ávörp fluttu Ólafur Proppé landsgildismeistari, Bjarni Freyr Þórðarson félagsforingi Hraunbúa og Ágúst Þorsteinsson fyrrverandi skátahöfðingi.

Veitt voru heiðursmerki og hetjudáðarmerki, en sjaldgæft er að hetjudáðamerki séu afhent.

Hetjudáðarmerki hlutu:

Anna Kristjana Helgadóttir, skátafélaginu Klakki, fyrir rétt viðbrögð þegar dróttskáti ökklabrotnaði í Viðey.

Jón Andri Helgason, skátafélaginu Árbúum, fyrir lífsbjörg þegar Crean farar misstu fæturnar í straumharðri á fyrr á árinu.

Matthildur Guðrún Hlín Leósdóttir, 8 ára, skátafélaginu Heiðabúum, fyrir rétt viðbrögð þegar hún og móðir hennar voru tvær heima og kransæð rofnaði hjá móður hennar. Matthildur lét móður sína hringja í 112 og hlúði að móður sinni þar til sjúkrabíll kom.

Nokkur skemmtileg verkefni voru kynnt þingheim en það voru kynningar á samstarfi skátamiðstöðva á Íslandi, Landsmóti skáta 2026, hringferð sem verið er að leggja í en markmið hennar er að fjölga skátum og skátafélögum í landinu. Að lokum var kynnt hughrifaherferð og sýnt var frá fyrsta tökudegi hennar.

Skemmtilegt er að segja frá því að 50% atkvæða þingsins eru í höndum ungmenna á aldrinum 13-25 ára.

Þingstörf halda áfram í dag 5. apríl en þinginu lýkur á morgun.

16 rekkaskátar sæmdir forsetamerkinu

Mon, 31 Mar 2025 15:05:00 GMT

Skemmtileg og óhefðbundin fyrsta athöfn nýs forseta

16 ungir skátar hlutu forsetamerkið laugardaginn síðastliðinn , 29. mars, við skemmtilega og einlæga athöfn í Bessastaðastofu . Er þetta í fyrsta sinn sem Halla Tómasdóttir, forseti Íslands, afhendir forsetamerkið en hún er verndari skátahreyfingarinnar á Íslandi. Því afhenti Harpa Ósk Valgeirsdóttir, skátahöfðingi, Höllu gullmerki Bandalags íslenskra skáta en í þakkarorðum Hörpu sagði hún það mikinn heiður fyrir skáta að Halla hafi fallist á það að vera verndari skátahreyfingarinnar og þannig viðhalda þeirri hefð sem afhending forsetamerkisins hefur verið í skátastarfinu. Í athöfninni fluttu tvö úr hópi forsetamerkishafa, Alma Sól Pétursdóttir og Viktor Nói Bergs stutta hugvekju þar sem þau stikluðu á stóru gegnum vegferð sína að forsetamerkinu. Hugvekjuna má finna hér að neðan.

Forsetamerkið er veitt rekkaskátum, 16-18 ára, sem hafa valið að vinna að merkinu samhliða starfi sínu. Í forsetamerkinu sameinast gildi skátahreyfingunnar um persónulegar framfarir einstaklingsins og þess að gera sitt besta samfélaginu til heilla. Vegferðin að forsetamerkinu er 2-3 ára verkefni sem hvetur skátanna til persónulegs vaxtar í gegnum 20 fjölbreytt verkefni.

Auk þess þurfa skátarnir að sækja 5 daga alþjóðlegt skátamót, ferðast 40 kílómetra á eigin afli, sækja helgarnámskeið í leiðtogaþjálfun og 12 klukkustunda skyndihjálparnámskeið. Að lokum velja skátarnir sér 2 langtímaverkefni sem krefst virkrar þátttöku þeirra yfir 3-12 mánaða tímabil, dæmi um þetta er að vera foringi yngri skáta, taka þátt í skipulagi stórs skátamóts, sitja í stjórn félags, ráði eða vinnuhóp, að taka að sér viðhald skátaheimilis eða skátaskála og margt fleira sem forsetismerkishafar hafa látið sér detta í hug. Hér má lesa nánar um forsetamerkið.

Hugvekja nýrra forsetamerkishafa
Alma Sól Pétursdóttir og Viktor Nói Bergs

Alma: Frú forseti, ágætu skátar og kæru aðstandendur.

Í dag rennur upp skemmtilegur og merkilegur dagur í skátalífi okkar þar sem við erum hér til að taka við viðurkenningu fyrir að hafa stundað þróttmikið skátastarf og leyst samvisku- samlegan lista af verkefnum. Venjulega er þessi athöfn haldin í Bessastaðakirkju en í dag fáum við að standa hérna í stofu forsetans. Sumir munu reyna telja ykkur trú um að þetta sé bara neyðarráðstöfun, en ég er viss um að forestanum þyki bara svo vænt um okkur að hún vilji hafa okkur í stofunni sinni.

Verkefni forsetaembættisins eru fjölbreytt og margvísleg, en ég held að við getum öll verið sammála um að það mikilvægasta sé að vera verndari Skátahreyfingarinnar.

Litla bláa bókin sem hefur fylgt okkur í vasanum alla þessa ferð, eins og bakpoki fyrir hugmyndir og minningar, er eflaust fremur krumpuð og sjúskuð eftir fjögurra ára ferð. Nema náttúrulega hjá þeim sem skrifuðu allt í bókina daginn fyrir skil. Þær bækur eru með mjög sléttar og fínar blaðsíður. Það verður gaman að geta flett í gegnum bókina og að geta munað eftir öllum spennandi (og skrítnu) hlutunum sem maður hefur gert í nafni skátanna.

Viktor: Þetta er tíminn þar sem við fáum að prófa sjálf. Leggja í ferðalög eins okkar liðs sem við skipuleggjum kannski með öðrum jafnöldrum. Það sem er pínu frábrugðið mínu ferli frá öðrum er að ég vann stóran part af mínu úti í Danmörku. Ferðalagið sem ég lærði mest af var þegar við héldum út í skóg og ætluðum að kveikja saklausan eld sem endaði heldur betur ekki svoleiðis. Eldurinn hætti bara ekki að stækka og hann var orðin það stór að ég hringdi í Halldór, gamla skátaforingjann minn, í algjöru paniki að spurja hvað í andskotanum ég ætti að gera næst.

Alma: Ef þú hefðir sagt mér fyrir fjórum árum að ég myndi fara í fimm daga ferð sem væri plönuð aftan á kexpakka daginn eftir að við skipulögðum hana, eða hjólað 50 kílometra hefði ég líklega- dáið úr hjartaáfalli. Skipulagða litla ég hefði aldrei trúað því að ég gæti gert nokkuð án fyrirvara.

Viktor: Það er í þessum ferðalögunum sem maður skipuleggur sjálfur og sérstaklega þegar eitthvað fer úrskeiðis sem maður lærir mest, hvernig fór ferðin og hvað hefði mátt fara betur, við lærum að axla ábyrgð og standa á eigin fótum. En þessi ferð er auðvitað æfing í því að stíga út fyrir þægindaramman.

Alma: Fyrir mörg okkar er Skátahreyfingin griðastaður í hversdeginum. Vettvangur vináttu, þar sem við vinnum saman að því að efla okkur sem einstaklingar með því að gera okkar besta, samfélaginu til heilla.

Viktor : Hinsvegar væri ekkert af þessu hægt ef við værum ekki með þennan frábæra foringja hóp sem alltaf er hægt að leita til og verð ég að fá að þakka Halldóri Valberg fyrir að gefa mér fullt af ógleymanlegum minningum, og auðvitað fyrir að hjálpa mér að sauma merkin á skyrtuna mína í gærkvöldi. Það er nefnilega ótrúleg vinna sem fer í foringja starf og nú þekkjum við það flest sjálf, það er ótrúlega gefandi að fá að kenna litlu skátunum okkar það sem við höfum lært á skáta árunum okkar. Og eins og rannsóknir hafa sýnt fram á eru sjálfboðaliðar að meðaltali hamingjusamari en aðrir.

Alma: Og elsku foreldrar, takk fyrir þolinmæði ykkar gagnvart skrítnum verkefnum og unglingastælum.

Viktor: Þetta ferli hefur verið ótrúlega skemmtilegt og ef ekki skemmtilegasti tími lífs míns, en það er magnað hvað þetta getur gleymst hratt og þess vegna er svo einstakt að eiga þessa bók og getað rifjað upp allt þetta ferli.

Alma: Einhver gæti spurt: Hvernig í ósköpunum gerum við heiminn betri með því að ferðast 40 kílómetra undir eigin afli, eða ganga á jökli en með því að gera slíka hluti lærum við að vinna saman, setja okkur markmið og fylgja þeim eftir. Og auðvitað verður þetta pínulítil keppni. Og eins og allar keppnir sem skipta einhverju máli er þetta keppni við okkur sjálf. Sem við keppum samt í með aðstoð annara. Til þess að gera samfélagið okkar betra þurfum við að byrja á því að vinna í okkur sjálfum. Svo að við getum tekist á við áskoranir saman, og vinna til góðs.

Viktor: Að segja fólki að þú sért skáti getur verið erfitt. Fólk hefur mjög skýra steríótýpu teiknaða í hausnum sem eiga líklega uppruna sinn úr amerískum bíómyndum. Ofurskátinn sem bindir hnúta, tálgar spítur og hjálpar gömlum konum yfir götur. Þetta er ekki endilega staðalímynd sem að margir skátar tengja við í dag, en er jú að vissu leyti hluti af því sem að við gerum í skátastarfi, nema við gerum oft svo miklu meira. Í skátastarfi kynnist maður frábæru fólki og eignast vini til eilífðar. Vináttan er ástæðan fyrir því að við höldum áfram að mæta á fundi og bíðum spennt vikum saman eftir næsta viðburði. Ég er handviss um að flestum þætti mjög gaman í skátunum eða allavega eftir að þú fattar þennan aula húmor. Það sem ég elska við skátana er að ég fæ að vera ég sjálfur, það er enginn hér til þess að dæma einn né neinn og allir eru bara eins og þeir eru.

Í skátunum hef ég þroskast mikið en á sama tíma fengið að leika mér eins og barn. Það er svo mikilvægt að hætta aldrei að leika sér því fyrst þá nær aldurinn þér og þú verður gamall lúinn og fúll. Höldum áfram að leika okkur, höldum áfram að vera vinir. Því saman getum við gert heiminn að betri stað.

Forsetamerkishafar úr 6 félögum

Eftirfarandi rekkaskátar úr 6 skátafélögum hlutu forsetamerkið á Bessastöðum 29. mars 2025 og bættust í hóp 1462 forsetamerkishafa frá upphafi.

Úr Árbúum:
Jón Björn Richardsson Yeo

Úr Garðbúum:
Brynjar Ingi Ágústsson
Daníel Eiríksson
Tinna María Antonsdóttir

Úr Hraunbúum:
Brynhildur Þorbjörg Þórhallsdóttir
Guðni Hannesson
Gunnsteinn Hjalti Jónsson
Kjartan Ingólfsson
Sara Elísabet Jónsdóttir

Úr Vífli:
Arnar Freyr Hallgrímsson
Jóhann Thomasson Viderö

Úr Svönum:
Birta Dís Gunnarsdóttir
Viktor Nói Bergs

Úr Ægisbúum:
Alma Sól Pétursdóttir
Hildur Þórey Sigurbjörnsdóttir
Högni Gylfason ( Rs. Snúði)

Sjóræningjar í Vesturbæ

Wed, 05 Mar 2025 12:46:00 GMT

Dagurinn hófst með risahókípóki þar sem krakkarnir vöktu Vesturbæinn með gleði og fjöri. Eftir það tóku skátarnir þátt í hópleikjum og ratleik um Vesturbæinn. Í ratleiknum áttu skátarnir að leysa ýmsar þrautir, þar á meðal að taka myndir af þremur leiðum með nafninu Anna í Hólavallakirkjugarði.

Þrátt fyrir óhagstætt veður stóðu krakkarnir sig mjög vel og héldu í góða skapið eins og sannir sjóræningjar. Í hádeginu voru borðaðar pylsur, sem var án efa hápunktur dagsins fyrir marga. Eftir ratleikin fengu drekarnir kex og kakó í von um að fá smá hita í kroppinn.

Ægisbúar þakka fyrir frábæran dag og góða mætingu.

Vetaráskorun Crean 2025 – Ógleymanlegt ævintýri á Íslandi

Tue, 04 Mar 2025 14:58:00 GMT

Þolpróf í íslenskri náttúru
Þrátt fyrir lítið magn snjós skapaði náttúran töfrandi umgjörð fyrir ævintýrið, með norðurljósum sem lýstu upp himininn. Skátarnir stóðu frammi fyrir breytilegum aðstæðum, þar á meðal kulda sem fór niður í -6°C, blautum stígum og ófyrirsjáanlegu veðri. Þau sýndu gott úthald og seiglu, sérstaklega á sjötta degi þegar þau gengu 15 km leið í drullu og krefjandi landslagi.

Samvinna og menningarsamskipti
Meðan á ferðinni stóð lærðu þátttakendur fjölbreytta færni, allt frá leiðsögn í náttúrunni til teymisvinnu við krefjandi aðstæður. Menningarsamskipti milli íslenskra og írskra skáta sköpuðu einstaka stemningu, þar sem nýjar vináttur mynduðust og ómetanleg reynsla safnaðist í minningabankann.

Lokaathöfn í Reykjavík
Leiðangrinum lauk 22. febrúar með viðurkenningaafhendingu í Reykjavík, þar sem skátarnir voru verðlaunaðir fyrir framúrskarandi frammistöðu og þrautseigju. Sérstakar þakkir voru veittar Hörpu Ósk Valgeirsdóttur, skátahöfðingja, og Eoin Callanan skátahöfðingja Írlands fyrir þeirra framlag og stuðning við viðburðinn.

Crean Challenge heldur áfram
Eftir 7 mánaða ferli, 12 nætur og 110 gengna kílómetra hafa 15 íslenskir skátar öðlast einstaka reynslu í farteskinu sínu, innblásnir af áskoruninni sem þeir tóku þátt í. Crean Challenge Expedition 2025 var ekki aðeins þrekraun heldur einnig vettvangur fyrir vináttu, lærdóm og ógleymanlegar stundir í íslenskri náttúru. Við hlökkum til að fylgjast með næstu ævintýrum sem skátarnir taka sér fyrir hendur!

Takk fyrir þátttökuna – sjáumst í næsta ævintýri!

Skátahreyfingin á fund forseta Íslands

Mon, 03 Mar 2025 09:17:00 GMT

Þau Harpa Ósk Valgeirsdóttir, skátahöfðingi og Ragnar Þór Þrastarson, framkvæmdarstjóri BÍS fóru á fund forseta Íslands, Höllu Tómasdóttur, í liðinni viku. Rætt var um náið samband forsetaembættisins og skátahreyfingarinnar allt frá lýðveldisstofnun og um framhald á því samstarfi í embættistíð núverandi forseta.

Forseti Íslands hefur verið verndari skátahreyfingarinnar frá 50 ára afmæli skátastarfs á Íslandi árið 1961 og engin breyting er þar á en Halla Tómasdóttir, forseti er verndari skátahreyfingarinnar. Samstarfið hefur meðal annars átt sinn fasta sess með afhendingu forsetamerkisins á Bessastöðum á ári hverju, en þar afhendir forseti heiðursmerki til 18-19 ára ungmenna sem hafa til þriggja ára sett sér markmið um að efla sig sjálf en á sama tíma efla samfélagið með sjálfboðalistastarfi.

Fram kom á fundinum að skátahreyfingin hefur á síðustu árum náð að byggja upp þátttöku ungmenna innan sinna raða í þátttöku lýðræðislegra ákvarðanna og sett i lög að í öllum ákvörðunareiningum séu fulltrúar ungmenna. Á síðasta aðalfundi hreyfingarinnar, Skátaþingi vorsins 2024, voru yfir 70% þátttakenda undir 30 ára aldri og voru 65% atkvæða í höndum skáta á aldrinum 13-25 ára. Á fundinum var rætt um möguleika á samstarfi fleiri æskulýðssamtaka um að koma á verkefnum á landsvísu þar sem ungmenni fái stuðning og fræðslu til áhrifa á samfélagið. (Texti unnin uppúr texta forsetaembættisins).

Yngsta Ungmennaráðið til þessa

Fri, 28 Feb 2025 15:03:00 GMT

Helgina 7-9. febrúar var Ungmennaþing 2025 haldið. Upprunalega átti það að vera í Stykkishólmi en vegna veðurs var það fært í Skátaheimili Vogabúa. Þingið sjálft fór hins vegar fram í Skátamiðstöðinni.

Á föstudaginn mættum við um kl. 20:00 í Skátafélag Vogabúa. Við komum okkur fyrir, settum mótið og fórum svo stuttu eftir að sofa.

Á laugardeginum var vaknað um kl. 09:00 og farið í morgunmat, síðan var lagt af stað í strætó upp í Skátamiðstöðina þar sem þingið var haldið. Á þinginu var farið yfir áskoranir og lagabreytingatillögur t.d. Skátafrakka, fleiri útilegur fyrir Rekka- og Róverskáta og að hækka lágmarks aldur Ungmennaráðs. Einnig var kosið í Ungmennaráð og Áheyrnarfulltrúa Ungmenna. Í hádegismat voru tortillur. Þingið stóð í sjö tíma.

Þegar komið var aftur í Vogabúa heimilið voru hamborgarar í kvöldmat. Horft var á söngvakeppnina, spilaður foosball og voru allir mjög pepp. Síðan var farið í karaoke keppni.

Ræs var á svipuðum tíma á sunnudeginum og svo beint í frágang. Það var haldið uppboð til þess að losna við allan mat sem eftir var. Af því loknu var mótinu slitið og þau sem vildu fóru í sund!

Eins og á hverju ári var kosið í nýtt Ungmennaráð. Núna eru komnir þrír nýir meðlimir:
Emil Kjartan Valdimarsson – Ægisbúi ,
Ragnar Eldur Jörundsson – Ægisbúi og
Ragnheiður Óskarsdóttir – Kópur .
Meðlimir sem sitja áfram eru:
Þorkell Grímur Jónsson – Garðbúi og
Hafdís Rún Sveinsdóttir – Fossbúi .

Þetta er yngsta Ungmennaráð sem hefur verið, þar sem 4 meðlimar þess eru Dróttskátar!

Einnig var kosinn Áheyrnarfulltrúa ungmenna. Það var aðeins einn frambjóðandi þar og eftir stuttar og einfaldar kosningar var Einar Tryggvi Petersen – Árbúi kosinn nýji Áheyrnarfulltrúi ungmenna.

Vel lukkuð skátagleði í samstarfi við Rauða krossinn

Mon, 17 Feb 2025 17:24:00 GMT

Laugardaginn 15. febrúar síðastliðinn var haldin fjölmenn og vel lukkuð skátagleði fyrir fjölskyldur á flótta. Verkefnið hlaut styrk úr Æskulýðssjóði og er samstarfsverkefni BÍS, Rauða krossins og Skátafélagsins Landnema. Á svæðinu voru hátt í 80 þátttakendur, sjálfboðaliðar, túlkar og aðrir sem komu að deginum. Dagskráin fór öll fram í og við skátaheimili Landnema en þar var m.a. súrrað, föndrað og grillað brauð. Boðið var upp á hádegisverð en dagskrá lauk með leikjum og skátasöng.

BÍS og Rauði Krossinn þakka kærlega öllum þeim sem stóðu að deginum og þátttakendum fyrir að mæta, taka þátt og skemmta sér með okkur.

Vetrarskátun á Úlfljótsvatni

Mon, 27 Jan 2025 14:05:00 GMT

Vetrarmót Reykjavíkurskáta var haldið í níunda sinn í útivistarparadísinni á Úlfljótsvatni um helgina. Þema mótsins að þessu sinni var heimskautaferðalangar.

Um 150 skátar skemmtu sér konunglega í frábæru veðri. Á föstudagskvöldið var setning þar sem skátarnir bjuggu til kyndla og kveiktu upp í stórum varðeld og kyrjuðu skátalög.

Á laugardeginum var fjölbreytt skátadagskrá þar sem tekist var á við klifurturninn, eldað hikebrauð yfir opnum eldi, byggt snjóhús, grunnur í snjóflóðafræðum var kennd en það sem stóð uppúr hjá skátunum var sleðabrekkan þar sem var rennt sér niður á öllu því sem hendi var næst. Gleðin var á hverju andliti þegar þau renndu sér niður brekkuna í frábærum vetraraðstæðum.

Fálkaskátar komu í dagsferð á laugardeginum en vegna slæmrar færðar á leiðinni austur var farið góða skoðunarferð um suðurlandið í gegnum Laugarvatn á leiðinni á Úlfljótsvatn en Fálkaskátarnir voru hamingjusamir þegar loksins var komið á Úlfljótsvatn og tóku þátt í póstaleiknum og í lok dagsferðar var kvöldvaka með skátakakó, snúðum og gómsætum kökum.

Boðið var upp á glæsilegan kvöldverð að hætti Arthurs gjaldkera SSR og eftir hann tók við næturleikur þar sem skátarnir þurftu að fanga góðar mörgæsir og forðast vondar mörgæsir til þess að fá hráefni til þess að búa til risa skilti til þess að senda neyðarboð til þess að komast aftur heim frá suðurskautinu.

Á sunnudaginn var frágangur á staðnum og stórleikur þar sem skátarnir tókust á í „capture the flag“ en sleðabrekkan var áfram afar vinsæl. Mótinu var síðan slitið með Bræðralagssöng og félögin fengu þátttökuviðurkenningar sem voru glæsilegir skildir í tilefni 10 ára afmælis vetrarmóts. Við brottför fengu skátarnir svo afhent mótsmerki fyrir vel unnin skátastörf um helgina.

Markmið með Vetrarmóti Reykjavíkurskáta er fyrst og fremst að kenna ungum skátum að takast á við fjölbreyttar áskoranir að vetrarlagi og að efla samstarf milli skátafélaganna í Reykjavík. Sjálfboðaliðar úr skátafélögunum sjá um undirbúning og framkvæmd mótsins og eiga þau hrós skilið fyrir frábært vetrarmót og spennandi dagskrá.

Árangur, ævintýri og undirbúningur: Crean 2025 tekur síðustu skrefin fyrir stóru ferðina!

Wed, 22 Jan 2025 15:00:00 GMT

Crean 2025 sveitin er á lokasprettinum í undirbúningi sínum fyrir hina stóru ferð í febrúar. Helgin sem leið var stór áfangi, þar sem skátarnir komu saman við Skátalund í Hafnarfirði, tóku þátt í vetrarfærnis kynningum, gistu í tjöldum í -3° frosti og gengu 18km til Bláfjalla. Núna er ljóst að þau eru vel undirbúin fyrir það sem fram undan er.

Vikan í febrúar, Ævintýrið sem sameinar

Vikan í febrúar, þar sem sveitin mun sameinast 32 írskum skátum við Úlfljótsvatn, verður stútfull af ævintýrum, fræðslu og þjálfun í vetrarfærni. Skátarnir munu læra um Tom Crean, írskan suðurskautsfara, og hetjudáðir hans, sem er mikill innblástur í þessari áskorun. Auk þess munu þau fá þjálfun í rötun og kortalestri, vetrarfærnin tekur einnig á mikilvægum þáttum eins og snjóflóðum, félagabjörgun, ganga í mannbroddum, byggja snjóhús og að draga púlku.
Ekki má gleyma að ferðin er líka tækifæri til að efla vináttu og læra hvert af öðru. Skátarnir munu einnig kynnast menningu og sögu landa hvor annars í gegnum fræðslu, samskipti og samverustundir. Þetta mun dýpka skilning þeirra og auka enn frekar ríkidæmi þessa ævintýris.
Til viðbótar við þessa þjálfun mun sveitin fara í tvær upphitunargöngur í nágrenni Úlfljótsvatns og gista tvær nætur í tjaldi. Þetta verður einstakt tækifæri til að prófa búnað, byggja upp reynslu og auka sjálfstraustið fyrir stóra daginn.
Ferðin endar með göngu frá Úlfljótsvatni í skátaskálana á Hellisheiði, þar sem hópurinn mun hvíla sig og fagna vel unnu verki. Þaðan verður ferðinni haldið áfram til Reykjavíkur, þar sem henni verður lokið með hátíðlegri athöfn og pizzaveislu – fullkominn endir á þessari mögnuðu áskorun. Vetraráskorunin Crean er einstakt verkefni sem sýnir hvað hægt er að ná þegar unnið er saman með ástríðu og þrautseigju.

Köfuðum dýpra á Neista 2025

Thu, 16 Jan 2025 09:11:00 GMT

Nú um helgina komu hátt í 70 manns saman á Úlfljótsvatni og tóku þar þátt í Neista 2025. Neisti er árlegur helgarviðburður þar sem skátar, 16 ára og eldri, fá tækifæri til að læra nýja færni, kynnast öðrum skátum og byrja nýtt skátaár á því að viðhalda skátaneistanum sínum. Neisti í ár var með breyttu sniði en vanalega, nú völdu þátttakendur sér leið eftir áhugasviðum og nýttu helgina til að kafa djúpt í valið viðfangsefni. Leiðirnar sem stóðu þeim til boða voru þrjár; dagskrá, útivist og stjórnun skátafélaga.

Helgin hófst á setningarathöfn þar sem þátttakendum var skipt í flokka og hin sívinsæla flokkakeppni hófst. Að því loknu fóru þátttakendur í póstaleik þar sem verkefnið var að byggja kafbát sem gerði þeim kleift að kafa djúpt ofan í hafsjó þeirrar þekkingar sem þátttakendur völdu að tileinka sér. Hver leið táknaði eina stöð innan kafbátsins en það sýndi okkur einnig að þó þátttakendur væru á ólíkum leiðum yfir helgina þá virkar kafbáturinn ekki nema við séum öll að vinna saman – líkt og í skátastarfinu.

Kvöldið endaði í Ólafsbúð þar sem þátttakendur áttu huggulega stund saman við varðeldinn.

Laugardagurinn byrjaði á fánaathöfn og hláturjóga og svo byrjaði dagskráin þar sem þátttakendur dýfðu sér ofaní þá leið sem þau völdu. Þátttakendur tókust á við ýmis verkefni, bæði utandyra og innandyra og var góður andi yfir hópnum. Á meðal viðfangsefna var leikjasmiðja, táknræn umgjörð, hvernig virka stjórnir skátafélaga, og snjóflóðaýla leit.

Að kvöldi var svo komið að hinum klassísku Eldleikum og að þeim loknum var haldin öflug kvöldvaka þar sem hópurinn söng og hló saman til skiptis.

Á sunnudeginum kláruðu hóparnir sína leið og tóku svo til hendinni og gengu frá öllu eins og skátum einum er lagið.

Við þökkum kærlega fyrir skemmtilega og lærdómsríka helgi, takk fyrir samveruna og takk öll sem aðstoðuðu við skipulag og gerðu helgina að veruleika.

Gleðilegt nýtt skátaár!

Kraftur í boði Leiðbeinendasveitarinnar

Tue, 26 Nov 2024 16:53:00 GMT

Leiðbeinendasveit skátanna hefur haft í mörgu að snúast síðastliðinn mánuð en í nóvember hefur sveitinn haldið tvö leiðtogaþjálfunarnámskeið, DróttKraft og FálkaKraft.

55 dróttskátar á Blönduósi

Skátar norðan og sunnan heiða hittust í Glaðheimum á Blönduósi helgina 15.-17. nóvember og gerðu sér glaða daga. Reyndar frestaðist ferðin til ósa Blöndu ögn vegna veðurs en við hittumst hress í hádegi á laugardag eftir gistingu í skátaheimili Landnema fyrir sunnan og skátaheimili Klakks fyrir norðan.

Þema helgarinnar var Landvættir en skátarnir áttu m.a. að finna nafnið á sínum landvætti. 55 skátar frá Akranesi, Garðbúum, Landnemum, Skjöldungum, Ægisbúum, Mosverjum, Heiðabúum og Klakki blönduðu sér í 8 flokka og unnu saman að ýmsum verkefnum, m.a. að undirbúa útilífsmiðstöð í Hrútey við Blönduós, kveiktu eld og lærðu á Hollendinga, undirbjuggu starfsáætlun og héldu æðislega kvöldvöku.

Mjög skemmtileg helgi er að baki og við vonumst til að geta tengt skátafélög víðsvegar að af landinu saman í meira mæli á næstu námskeiðum.

Við sendum þakkir til allra þátttakenda og sjálfboðaliða sem aðstoðuðu okkur við að gera þennan viðburð að veruleika!

Fyrsti FálkaKraftur fyrir norðan

Sveitarforingjar fálkaskátasveitanna Arna og Skeifa í Klakki báðu Leiðbeinendasveitina um að halda Fálkakraft hjá sér og var það okkur sönn ánægja að verða við þeirri ósk.

Námskeiðið var haldið í Valhöll laugardaginn 23. nóvember í sveitarútilegu fálkaskátasveitanna sem 15 skátar tóku þátt í. Þema námskeiðsins var heimshornaflakk þar sem skátarnir heimsóttu m.a. Palavúflugvöll og fóru í ímyndað útsýnisflug yfir Akureyri til að skoða hvar þau vilja bæta nærsamfélag sitt með því að vinna samfélagsverkefni.

Draumur fálkaskátanna í Klakki er að byggja tívolí í bænum, það verður spennandi að fylgjast með því.

Þá hönnuðu skátarnir póstaleik þar sem viðfangsefnið var skátalögin og póstarnir tengdir þeim. Sem dæmi má nefna að „Skáti er glaðvær“ var túlkað með því að renna sér í snjónum niður svakalega skemmtilega brekku.

Við þökkum skemmtilegri fálkaskátasveit fyrir að fá okkur í heimsókn norðum og hlökkum til að fara í heimsókn til fleirri sveita á árinu.

Hvað gerir Leiðbeinendasveitin?

Leiðbeinendasveitin er vinnuhópur á vegum Skátaskólans. Hlutverk hennar er að sjá um leiðtogaþjálfun á vegum BÍS, undirbúa, framkvæma og meta námskeið.

Í leiðbeinendasveitinni er þegar hópur öflugra leiðtoga en það er alltaf opið fyrir einstaklinga sem eru áhugasöm um að þjálfa næstu kynslóð leiðtoga og vill auka gæði þjálfunar og fræðslu á vegum Bandalags íslenskra skáta. Leiðbeinendasveitin vinnur að því að auka leiðtogafærni og valdefla unga skáta til virkrar þátttöku í skátastarfi sem og í daglegu lífi þeirra. Leiðbeinendasveitin miðlar þekkingu sinni og reynslu til annara skáta og vinnur að því að auka áhrif skátastarfs á íslenskt samfélag.

Nánari upplýsingar um starf sveitarinnar má finna hér.

Þroski – samheldni – heiðarleiki

Tue, 12 Nov 2024 11:50:00 GMT

Glæsilegur hópur skáta fengu Gilwell einkennin sín afhent á hátíðlegri stund í Gilwell skálanum um helgina. Þeir sem fá Gilwell einkenni hafa lokið 10 daga leiðtogaþjálfun og gert lokaverkefni. Gilwell leiðtogaþjálfun er æðsta stig foringjaþjálfunar BÍS. Fyrsti hluti ævintýrsins var í febrúar, í júní var tjaldbúð reist á Úlfljótsvatni í 5 daga þar sem fræðslu var blandað við tjaldbúðarupplifun. Þriðji og síðasti hlutinn var svo núna um helgina. Hápunktur helgarinnar var þegar skátarnir kynntu Gilwell verkefnið sitt fyrir hópnum en þau völdu sér verkefni á vordögum sem þau unnu svo að fram á haust. Óhætt er að segja að verkefnin hafi verið fjölbreytt, allt frá því að smíða sturtuhús við vatnasafaríið á Úlfljótsvatni í að gera handbók fyrir fararstjóra á Landsmót skáta og endurskoða hlutverk sjálfboðaliðaforingja.

Þó nokkrir gestafyrirlesarar hafa komið að námskeiðunum en á þessum síðasta hluta má nefna Jakob Frímann Þorsteinsson og Vöndu Sigurgeirsdóttur, Elínu Ester, Hrönn Pétursdóttir, Guðrúnu Ásu og Arnór Bjarka Svarfdal. Þau eru öll skátar og miklir leiðtogar á sínum sviðum í atvinnulífinu en leiðtogafræði og leiðtogaþjálfun var einmitt þema helgarinnar og unnið er með hæfni hvers og eins

Skátarnir fjórtán eru á aldrinum 20 – 52 ára og koma úr 9 skátafélögum. Skipt var í flokka í upphafi sem héldust í gegnum ferlið, flokkarnir unnu saman að stórum sem smáum verkefnum. Síðasta verkefni þeirra var að velja eitt orð sem lýsir upplifun af námskeiðinu – þessi orð urðu fyrir valinu: Þroski – samheldni – heiðarleiki

Risaþrautir, eldkeppni og kvöldvaka á fálkaskátadegi

Mon, 04 Nov 2024 08:59:00 GMT

Fálkaskátadagurinn var haldinn laugardaginn 2. nóvember á 112 ára afmæli skátastarfs á Íslandi en í þetta sinn voru það Landnemar sem voru gestgjafar dagsins.

Dagskráin hófst á póstaleik í Öskjuhlíðinni þar sem flokkarnir fóru í risamíkadó, risamyllu, leystu skátadulmál, fóru í blindandi skógargöngu, bjuggu til sjúkrabörur, reiknuðu út hæð, lengd og rúmmál undirganganna undir Bústaðaveg, gáðu til veðurs, kynntust vatnstankinum á Veðurstofuhæðinni, fluttu vatn og fleira. Í lok póstaleiksins söfnuðust allir flokkarnir saman fyrir framan Landnemaheimilið og kepptu í eldkeppni þar sem markmiðið var að brenna snæri sem strengt hafði verið yfir eldstæðin. Eftir æsispennandi póstaleik stóð flokkurinn Ostasnakk úr Garðbúum uppi sem sigurvegarar leiksins en flokkurinn fékk samtals á þriðja þúsund stig og hlaut að launum farandfánann Fálkakempur.

Eftir póstaleikinn var haldin kvöldvaka þar sem fálkaskátarnir tóku vel undir í söng og að henni lokinni var boðið upp á kakó og kex en rúsínan í pylsuendanum var draugahúsið sem dróttskátarnir í Landnemum höfðu sett upp í skátaheimilinu.

Um 100 fálkaskátar ásamt foringjum tóku þátt í Fálkaskátadeginum og veður var með besta móti. Landnemar þakka öllum þeim sem tóku þátt í deginum kærlega fyrir samveruna, og óska öllum skátum til hamingju með 112 ára afmæli skátastarfs á Íslandi!

Myndaratleikur um eyjuna Soumenlinna

Tue, 29 Oct 2024 12:11:00 GMT

Höfundur og myndir: Ísold Vala Þorsteinsdóttir

Dagur 1 á Ung i Norden í Finnlandi
Til að byrja með voru allar upplýsingar sem voru gefnar fyrir viðburðin mjög skýrar og mjög hjálplegar. T.d. Hvernig maður kæmist frá flugvellinum að hostelinu og hvernig dagskráin yrði.
Þegar ég lenti í Helsinki vissi ég strax hvert ég átti að fara og var komin á hostelið á innan við hálftíma. Hitti þar mótstjórana, þær Ronju og Kimmel og voru þær mjög almennilegar og hjálplegar. Ég kom mér fyrir í koju og svo var farið í kynningarleiki.
Það fannst nánast öllum mjög áhugavert að ég væri eini Íslendingurinn, það voru meira að segja fleirri frá færeyjum, en við lærðum nöfnin á öllum (eða ekki) og fórum svo út að kanna svæðið og borða svo kvöldmt á Indverksum stað.

Dagur 3
Ræs kl 8:00, morgunmatur og pakka niður. Við kvöddum hostelið um 10 leitið og komum okkur aftur upp í bandalag, þar var okkur skipt í tvennt þar sem fyrsti hópurinn bjó til jólaskraut á klútinn sinn og hinn talaði um staðalímyndir og hvernig við getum breytt þeim. Fórum í nokkra leiki og fengum okkur hádegismat. Eftir matinn var kynnt fyrir okkur hinir og þessir viðburðir sem eru væntanlegir í skátahreyfingunni og hvernig við getum farið á hina og þessa skáta staði í heiminum og gerst sjálfboðaliðar. Þegar dagskránni var við það að ljúka komumst við að því að það væri ekki búið að hanna eða búa til Ung i norden merki handa okkur, unnum við þá í að hanna flottasta merkið og ætlum að láta framleiða það fyrir okkur. Þá var komið að kveðjustund, kvöddum foringjana okkar og héldum í smá búðarferð.

Ég kynntist mikið af nýju fólki og nýjum leikjum og fannst verulega áhugavert að fara ein á skátaviðburð.

Vel heppnað Merkjamót

Mon, 21 Oct 2024 11:11:00 GMT

Seinni part dags var farið í tvær stórar keppnir, önnur þeirra var Skátatankurinn sem er keppni byggð á þáttunum “Shark Tank” þar sem þátttakendur þurf að selja dómnefnd einhverja vöru. Að þessu sinni áttu skátar að selja dómnefnd merki. Í dómnefnd sátu Harpa Ósk skátahöfðingi, Úlfur Kvaran og Einar Tryggvi. Það var ríkti mikið keppnisskap enda voru vegleg verðlaun í boði. Seinni keppnin var skátarúlleta, þá skiptu skátarnir merkjum og var markmiðið að safna sem flestum. Veitt voru verðlaun fyrir flest merki og mesta úrvalið.

Ályktun frá stjórn BÍS

Fri, 11 Oct 2024 14:25:00 GMT

Þann 10. október var haldinn stjórnarfundur til að geta brugðist við yfirvofandi umfjöllun Kveiks um Alheimsmótið í Suður-Kóreu 2023. Eftirfarandi ályktun var samþykkt á fundinum.

Ályktun stjórnar 10.10.24

Uppgötvun á foringjanámskeiði

Fri, 13 Sep 2024 13:58:00 GMT

Foringjanámskeið var haldið helgina 6.-8. september í Lækjarbotnum.

Þangað voru mættir foringjar sem eru að hefja starfsárið í sínum skátafélögum en það var sérstaklega gaman að þátttakendahópurinn var mjög fjölbreyttur; bæði foringjar sem eru að taka sín fyrstu skref í foringjastörfum en líka reynslumeiri foringjar, og hópurinn samanstóð af foringjum frá mörgum aldursbilum.

Þema helgarinnar var “Uppgötvum!”, þar sem markmiðið var að uppgötva töfra foringjahlutverksins, og skátastarfs í heild. Þátttakendur störfuðu í þremur flokkum sem báru nöfnin Nóbel, Tinnarnir og Einstein. Á námskeiðinu lærðu þátttakendur meðal annars um hlutverk skátaforingja, markmiðaflokkana og hvernig þeir geta stutt við dagskrárval, PGM og ÆSKA, færnimerkin, stikumerkin og könnuðamerkin.

Þá lærðu þátttakendurnir að gera starfsáætlun fyrir veturinn og fengu að heyra innlegg um frávik í hegðun og öryggi í skátastarfi.

Á laugardagskvöldinu var haldin kvöldvaka undir stjörnubjörtum himni þar sem flokkarnir sýndu skemmtiatriði og bæði klassísk og minna þekkt skátalög voru sungin.

Foringjanámskeið er ekki síst kjörinn vettvangur til að spjalla við aðra foringja, deila ráðum, hugmyndum og mismunandi sjónarhornum og nú halda þátttakendurnir út í starfsárið með gott veganesti.

Leiðbeinendasveitin óskar öllum sveitar- og aðstoðarsveitarforingjum góðs gengis og góðrar skemmtunar á starfsárinu sem er framundan!

Nýjar reglugerðir og afsökunarbeiðni fyrir WSJ23 á Alheimsþingi

Fri, 23 Aug 2024 13:40:00 GMT

Alheimsþing skáta fer nú fram í Egyptalandi og á Bandalag íslenskra skáta tvo fulltrúa þar, þau Berglindi Lilju Björnsdóttur og Daða Má Gunnarsson.

Ýmislegt hefur verið á dagskrá en meðal annars var samþykkt níu ára áætlun til að tryggja öryggi á viðburðum, stórum sem smáum. Áætlunin er þróuð í nánu samstarfi við hagsmunaaðila og leggur áherslu á öryggi, tækniframfarir og að öll séu velkomin með óháð kyni, trú, kynhneigð, fötlun eða öðru. Markmiðið er að setja hærri staðla í að tryggja að Alþjóðlegir viðburðir séu öruggir, grípandi, áhrifamiklir og hvetjandi fyrir næstu kynslóðir leiðtoga. Hægt er að lesa nánar um áætlunina hér.

Bandalag Kóresku skátanna baðst afsökunar til allra bandalaga, þátttakenda alheimsmóts 2023 og aðra hlutaðeigandi og lýsir eftirsjá yfir göllum mótsins og þeim erfiðleikum sem öll þurftu að takast á við. Þau hafa endurmetið mótið og lýstu þeim atriðum sem fóru úrskeiðis til að hægt verði að koma í veg fyrir slíkt á komandi mótum. Hægt er að horfa á myndbandið hér , en það hefst á mínútu 46:33.

Einnig var lögð fram viðburðarreglugerð sem gengur út á viðburðarstefnu þar sem ábyrgð er skýr, væntingastjórnun er skilvirk og öryggi tryggt. Stefnan miðar að því að geta haft öruggari, sjálfbærari og áhrifaríkari viðburði um leið og traust meðal aðildarfélaga og gestgjafa er gætt. Einnig mun WOSM hafa auknari heimildir til að stíga inn í og veita utanumhald og aðstoð.

Leiðarendi

Mon, 29 Jul 2024 16:29:00 GMT

Nú er fyrsta vikan að líða undir lok hjá hópnum okkar á Roverway og þátttakendur byrjaðir að fjölmenna á mótssvæðið í Stavanger. Hóparnir hafa farið í þvílíkt fjölbreyttar ferðir og fengið að upplifa hina ýmsu hluti.

Einn fararhópurinn fór á hefðbundið danskt landsmót, þar sem var gengið 75km, farið í zipline garð og fjöldan allan af leikjum með hinum þátttakendunum. Danirnir voru æstir í að fá að deila sínum hefðum og dagskrá með hópnum og eru Íslendingarnir okkar heldur betur þreytt eftir þetta ferðalag. Hver mínúta var skipulögð í þaula, en hópurinn náði að taka lest, sem gerði gæfu muninn fyrir þau sem fengu að upplifa það í fyrsta skipti.

Annar hópur fór í Rypetoppen, sem er þrautagarður í háloftunum, þar eru zipline ferðir yfir vötn, brýr sem eru strengdar yfir gil og stöðuvötn þar sem þátttakendurnir fengu að prófa sig áfram á standbretti. Íslenski fararhópurinn gerði gott betur en dagskráin sagði til um og skipulögðu göngu til Svíþjóðar sem var í um 3 klukkustunda fjarlægð, fengu leyfi frá ábyrgðaraðila ferðarinnar og gengu þetta í sameiningu.

Einn hópurinn fór í bæjarferð, gönguferð og vatnadagskrá þar sem hver dagur var nýtt ævintýri. Ásamt því að taka þátt í dagskráliðum, eignaðist hópurinn fjölda vina, upplifði norskt skordýralíf og böðuðu sig lækjunum í kring.

Nú halda allir 11 hóparnir okkar á mótssvæðið þar sem verður í boði fjölbreytt skemmtidagskrá með þemum á borð við; sjálfbærni, vatnaveröld, og hæfni í útivist. Þátttakendur fá að velja sjálf hvað þau vilja gera og veðurspáin fyrir komandi viku ætti að þerra alla þá skáta sem eru að skila sér blautir til baka.

Tæplega 90 skátar mættir á Roverway í Noregi

Thu, 25 Jul 2024 14:22:00 GMT

Síðustu helgi lögðu tæplega 90 íslenskir skátar af stað á vit ævintýranna til Noregs á Roverway. Stór hluti hópsins aðstoðaði og tók þátt þátt í Landsmóti skáta 2024 sem lauk fyrir helgi, því aðeins nokkrum dögum áður en flogið var út.

Roverway byrjar á því að flokkar fara í leiðir ( e: paths) sem þau eru búin að velja og því byrja þau á mismunandi stöðum áður en þau enda öll saman í Stavanger. Hluti hópsins fór því til Osló á meðan restin hélt áfram til Stavanger og gisti því hópurinn í tvennu lagi fyrstu nóttina.

Við komu til Stavanger var gríðarleg rigning og var íslenska fararstjórnin stoppuð þrisvar af starfsfólki mótsins til þess að segja þeim frá því hversu góður andir er yfir hópnum þrátt fyrir að öll væru gengsósa og þreytt eftir 20 tíma ferðalag. Má segja að þau séu orðin vön þessari rigningu og láta hana ekkert stoppa sig.

Frábært veður var um kvöldið í Osló, tjaldað í blíðu og fór hópur saman í kvöldmat í golfskála. Þau fengu þó að upplifa þessa sömu rigningu morguninn eftir, þegar þau pökkuðu saman búnaðinum sínum til að halda áfram á sína leið.

Hóparnir eru núna á víð og dreif um Noreg (og einn í Danmörku) að leggja af stað í 11 mismunandi ferðalög sem standa fram á föstudag. Eftir það sameinast allir þátttakendur Roverway í Stavanger fyrir meiriháttar skemmtidagskrá.

Ekki bara fengum við frábærann hóp til þess að ferðast með heldur erum við með framúrskarandi IST sem að taka þátt á mótinu sem starfsmannastuðningur. Það hefur gert gæfumuninn í þessari ferð hvað skátaandinn er sterkur, grunnt liggur á hjálpseminni, og allar töskur með góða skapinu virðast hafa skilað sér.

Hægt er að fylgjast með hópnum á Instagram reikningingi þeirra roverway.iceland og mælum við með því!

Eintóm gleði á síðasta degi Landsmóts

Fri, 19 Jul 2024 19:31:00 GMT

Í gær var síðasti dagskrárdagur Landsmóts haldinn hátíðlegur þar sem öll voru velkomin í heimsókn til að kynnast ólíkum menningarheimum og skoða hvað skátafélögin höfðu upp á að bjóða. Skátafélög kynntu heimabæi og lönd sín og buðu meðal annars upp á ýmsar veitingar og skemmtilega leiki á borð við flöskuendurvinnslu þar sem hægt var að fá skátamerki að launum, taka ferð á villtum bola og einnig voru ýmsar gerðir af gestabókum um allt svæðið.

Um hádegisbil flaug Landhelgisgæslan yfir svæðið og sýndi björgun úr vatni og hífði nokkra skáta úr Úlfljótsvatni og vakti það mikla lukku meðal áhorfenda.

Meðal gesta mótsins voru Guðni Th. Thorlacius, forseti Íslands og verndari skátahreyfingarinnar og Jeannette Menzies, sendiherra Kanada á Íslandi, en þau gengu um svæðið með mótsstjórn og stjórn BÍS og gæddu sér á veitingum, prófuðu leiki og spjölluðu við skáta allsstaðar að úr heiminum. Mörgum erlendum skátum fannst magnað að sjá forsetan falla svo vel í hópinn vildu ólm fá mynd með honum.

BMX bros voru einnig á svæðinu og sýndu listir sínar við góðar undirtektir. Veðrið var eins og sönnu íslensku veðri sæmir, rigning, glampandi sól og hiti, þrumur og eldingar, úrhellis rigning og svo loks logn og skýjað. Ótrúlegt að upplifa allar þessar veðurbreytingar á einum og sama deginum.

Um kvöldið var svo hátíðarkvöldvaka en þar stigu á svið gamalreyndur kvöldvökuhópur ásamt yngri og nýrri kvöldvökuhóp og stjórnuðu þau stórglæsilegri kvöldvöku en einnig voru skemmtiatriði sem vöktu mikla gleði. Inspector Spacetime kom svo brekkunni í partýstuð og myndaðist ein lengsta kóngaröð sem sést hefur á Landsmóti. Stuðlabandið hélt svo stuðinu uppi lang frameftir kvöldi og ómuðu tónar þeirra og gleði skátanna um allt tjaldsvæðið.

Skátablaðið Pappírsheimur – 6. tölublað

Thu, 18 Jul 2024 12:52:00 GMT

Yfir Landsmót kemur út mótsblað og ber það heitið Pappírsheimur og eru ritstjórar þess Unnur Líf Kvaran og Vigdís Fríða Þorvaldsdóttir. Hér má lesa 6. tölublað.

Reistu 15,3 metra háa fánastöng í skjóli nætur

Thu, 18 Jul 2024 12:10:00 GMT

Kanadískir og íslenskir skátar vöknuðu um miðja nótt, söfnuðu saman trönum og bindingum og reistu 15,3 metra háa fánastöng fyrir framan stóra sviðið á mótsvæðinu. Mörg voru hissa þegar þau fóru á stjá morguninn eftir en þa trjónaði fánastöngin yfir allt með nokkrum fánum á.

Hamravíðir vex nú einnig á Úlfljótsvatni

Wed, 17 Jul 2024 22:53:00 GMT

Í dag rigndi á okkur en öll hafa verið á fullu í dagskrá með bros á vör. Þreytan er farin að gera vart við sig en spenningurinn fyrir heimsóknardegi og hátíðarkvöldvöku morgundagsins leynir sér ekki. Trönubyggingar rísa, fánastangir hækka og verður hæsta fánastöngin tilkynnt í Pappírsheimum, landsmótsblaði morgundagsins.

Skáti er náttúruvinur og í dag var Útilífsmiðstöð skáta á Úlfljótsvatni færð gjöf sem mun stækka um ókomin ár. 175 plöntur frá Dróttskátasveitinni Montis frá Klakki á Akureyri. Sveitin fór að Hömrum í vor, klipptu til greinar og ræktuðu hríslur sem þau tóku svo með sér í rútuna á Landsmót. Plönturnar voru gróðursettar á svæðinu í dag. Gróðursettur var Hamravíðir og vex hann nú á Hömrum og Úlfljótsvatni.

Þegar skátafélagið Klakkur fékk Hamra árið 1999 stóðu þar auð tún en svæðið hefur tekið stakkaskiptum vegna gróðursetninga skáta í gegnum árin. Það var á níunda áratugnum sem skátafélagið Klakkur og Hamrar, útilífsmiðstöð skáta á Akureyri, hóf að færa ÚSÚ hríslur og gróðursetja víðsvegar á svæðinu. Vill Bandalag íslenskra skáta færa bestu þakkir fyrir gjafirnar í gegnum tíðina.

Skátablaðið Pappírsheimur – 5. tölublað

Wed, 17 Jul 2024 13:11:00 GMT

Yfir Landsmót kemur út mótsblað og ber það heitið Pappírsheimur og eru ritstjórar þess Unnur Líf Kvaran og Vigdís Fríða Þorvaldsdóttir. Hér má lesa 5. tölublað.

Fimmti dagur ævintýra á Landsmóti

Tue, 16 Jul 2024 20:16:00 GMT

Fimmti dagur Landsmóts var rólegur en fullur af ævintýrum. Loks fengum við týpískt íslenskt sumarveður, skýjað, hlýtt og smá gola. Þátttakendur fóru í klifurturninn, hoppukastalana, gönguferðir og ýmislegt fleira. Áfram var unnið að samfélagsverkefnum og voru undirgöngin meðal annars máluð í öllum regnbogans litum. Útieldunin hefur einnig slegið í gegn en í dag var til dæmis heill fiskur eldaður í dagblaði yfir opnum eldi. Hæfileikakeppni mótsins sló í gegn og ómuðu fagnaðarlætin um allt. Þar voru meðal annars söngatriði, dansatriði, tónlistaratriði og rapp.

Í fjölskyldubúðum hefur einnig verið mikil og fjölbreytt dagskrá. Í dag var dagvaka, eða kvöldvaka haldin að degi til svo allra yngstu þátttakendur gætu verið með og mættu skátar frá skátafélagi Sólheima í heimsókn. Bátasmiðjan í fjölskyldubúðum hefur einnig slegið í gegn og líka búningarnir sem hægt er að fá lánaða.

Um kvöldið var svo æsispennandi flokkakeppni þar sem skátaflokkar kepptust um að hljóta titilinn „Flokkur mótsins“ en til þess þurftu flokkarnir að takast á við ýmsar skátaþrautir. Einnig var Gilwell endurfundir (e. reunion) og þar var mikið spjallað, sungið og hlegið. Enn einn frábær ævintýradagur að líða undir lok!

Skátablaðið Pappírsheimur – 4. tölublað

Tue, 16 Jul 2024 12:08:00 GMT

Yfir Landsmót kemur út mótsblað og ber það heitið Pappírsheimur og eru ritstjórar þess Unnur Líf Kvaran og Vigdís Fríða Þorvaldsdóttir. Hér má lesa 4. tölublað.

Skátaandinn svífur yfir svæðið

Tue, 16 Jul 2024 09:49:00 GMT

Fjórði dagur mótsins byrjaði vel, sólin skín og öll komin út á stuttermabolnum, buslandi í vatninu og í leit að nýjum ævintýrum. Það er magnað að sjá hvað skátaandinn svífur yfir svæðið, öll hafa áhuga á að kynnast nýjum skátavinum allsstaðar að úr heiminum. Mörg eru að fræðast um skátastarf í öðrum löndum og kynnast annarri menningu. Að sögn þátttakenda eru aðal töfrarnir við Landsmót að kynnast öðrum skátum og skiptast á sögum og merkjum.

Einnig fagnaði Skátasafnið 10 ára afmæli, 15. júlí. Af því tilefni var haldin afmælishátíð í og við nýuppgert húsnæði safnsins. Haldnar voru ræður og lög sungin. Harpa Ósk Valgeirsdóttir, skátahöfðingi og Davíð Þrastarson, meðstjórnandi í stjórn BÍS, afhentu Skátasafninu styrk upp á þrjár og hálfa milljón, frá Bandalagi íslenskra skáta, til uppbyggingar safnsins og uppsetningu nýrrar sýningar. Atli B. Bachmann tók við styrknum fyrir hönd safnsins.

Kvöldið einkenndist svo að skemmtun og gleði á kvöldvökum um allt svæðið. Dagurinn hefur svo sannarlega verið viðburðaríkur og ævintýralegur í frábæru veðri og vonandi býður dagurinn í dag upp á enn fleiri ævintýri og nýja vini.

Skátablaðið Pappírsheimur – 3. tölublað

Mon, 15 Jul 2024 10:54:00 GMT

Hér má lesa 3. tölublað.

Froðupartý sló í gegn

Sun, 14 Jul 2024 20:54:00 GMT

Þriðji dagur Landsmóts fór vel af stað, enn eru einhver tjöld og búnaður í þurrkun en gleðin leynir sér þó ekki. Öll eru boðin og búin til að hjálpa nágrönnum sínum og skemmta sér vel á meðan.

Í dag var boðið upp á stórskemmtilegan skyndiviðburð, froðupartý í risastórum hoppukastala og var gleðin allsráðandi. Ungmennaráð átti frumkvæði af viðburðinum en þau eru á aldrinum 15 – 19 ára.

Í opnu dagskrárbilunum hafa drótt- og rekkaskátar tækifæri á að koma og stjórna útvarpsþætti í FM Landsmót skáta 106.1 sem einnig er hægt að hlusta á hér, og hefur það slegið í gegn og koma sum oftar en einu sinni. Dæmi um þætti sem þau hafa verið í loftinu eru spurningaþættir, spjallþættir og viðtalsþættir. Sum koma til að stjórna tónlistinni í hálftíma.

Vonandi verðum við hér aftur eftir 50 ár með enn stærra mót

Sun, 14 Jul 2024 18:57:00 GMT

Fyrir 50 árum síðan, árið 1974, var Landsmót skáta í fyrsta skipti haldið á Úlfljótsvatni dagana 14. – 21. júlí, en áður höfðu þau verið haldin víðsvegar um landið. Mótsstjóri var Bergur Jónsson, verkfræðingur. Þema mótsins var „Landnámið“ og var öll dagskrá byggð á því þema. Hvert skátafélag valdi sér landnámsmann og voru tjaldbúðirnar skírðar eftir fornum höfuðbólum í heimahéraði hvers félags. Um 1700 íslenskir skátar ásamt 200 erlendum skátum tóku þátt í mótinu en einnig voru um 100 skátar frá Danmörku og Frakklandi sem komu í tvo daga.

Dagskráin var fjölbreytt og skemmtileg. Sem dæmi um dagskrá má nefna samfélagsverkefni þar sem skátarnir fegruðu nærumhverfi sitt, einnig var markaðstorg þar sem hægt var að skiptast á merkjum, klútum, bókum og fleiru. Sett var upp tívolí með skemmtilegri afþreyingu en þar var hægt að prófa bogfimi og stultur. Heimsóknardagur var svo þann 20. júlí en þá var öllum sem vildu boðið í heimsókn á mótið.

Gamla kirkjuklukkan úr Landakotskirkju var flutt á Úlfljótsvatn fyrir mótið og komið fyrir á stórri járngrind og er hún hér enn í dag á glænýrri grind.

Það er gleðilegt að halda Landsmót hér á Úlfljótsvatni aftur 50 árum seinna með svipuðum fjölda skáta. Vonandi verðum við hér aftur eftir 50 ár með enn stærra mót.

Hressir skátar í sjónvarpsviðtali

Sun, 14 Jul 2024 14:21:00 GMT

Hressir skátar úr skátafélaginu Skjöldungum voru í viðtali í kvöldfréttum RÚV þann 12. júlí þegar setningarathöfn var nýlega lokið. Endilega kíkið á viðtalið sem hefst á mínútu 18:50 í hlekknum hér.

Skátablaðið Pappírsheimur – 2. tölublað

Sun, 14 Jul 2024 11:51:00 GMT

Yfir Landsmót kemur út mótsblað og ber það heitið Pappírsheimur og eru ritstjórar þess Unnur Líf Kvaran og Vigdís Fríða Þorvaldsdóttir. Hér má lesa 2. tölublað.

Lausnamiðun og hjálpsemi á fyrsta degi mótsins

Sun, 14 Jul 2024 11:22:00 GMT

Það rigndi vel á okkur á fyrsta degi Landsmóts. Skátarnir létu það þó ekki á sig fá og komu upp tjaldbúðum, elduðu mat og skemmtu sér vel. Þegar líða fór á kvöldið bætti þó heldur í rigninguna, stórir pollar mynduðust á tjaldflötunum og sum tjöld fóru á flot. Þar sem skátar eru einkar lausnamiðaðir og hjálpsamir voru því öll stærri tjöld nýtt til þurrkunar á minni tjöldum og öðrum búnaði. Brugðið var á það ráð að moka litla skurði sem stýrðu vatninu frá tjaldflötunum.

Annar dagur mótsins hófst svo í dag með fjölbreyttri dagskrá t.d. var opin dagskrá þar sem hægt var að fara í klifurturninn, taka þátt í fótboltamóti, heimsækja Gilwell skálann, Skátasafnið og margt margt fleira.

Eftir hádegismat fóru skátarnir í torgadagskrá sem verður í boði fjóra daga á mótinu og allir skátar fara á öll torgin. Torgin eru fjögur. Á göngutorg er hægt að velja um ýmsar gönguleiðir í kringum Úlfljótsvatn og nágrenni. Á samfélagstorgi er hægt að vinna verkefni sem miða að því að fegra og betrumbæta umhverfi Úlfljótvatns. Á sköpunartorgi er ýmis efniviður og þar fær ímyndunaraflið að njóta sín. Og á þrauta-og metatorgi var hægt að fara í vatnasafarí, byggja fleka, keppa í sápubolta og margt fleira.

Um kvöldið var svo skátaáskorunin en það eru 100 þrautir um allt svæðið sem hvert skátafélag þurfti að leysa í sameiningu. Sem dæmi um þrautir og verkefni sem þufti að leysa var að raða sér í afmælisröð án þess að tala saman, fylla vatnsbrúsa með rigningarvatni og bera kennsl á 10 fána á svæðinu. Skátaáskorunin einkenndist af gleði, fjöri, rigningu og samvinnu.

Landsmót er formlega sett!

Sat, 13 Jul 2024 11:11:00 GMT

Landsmót skáta var formlega sett í gærkvöld en skátafélögin og flokkarnir gengu í fylkingum að sviðinu þar sem setningarathöfn fór fram.

Setningarathöfnin var skemmtileg og lífleg þrátt fyrir mikla rigningu, sungnir voru hreyfisöngvar, mótsstýra, Kolbrún Ósk Pétursdóttir, ávarpaði þátttakendur og að lokum var mótslagið „Úr alls konar áttum“ sungið.

Hlustaðu á Fm Landsmót skáta

Sat, 13 Jul 2024 11:08:00 GMT

Á Landsmóti skáta verður starfrækt útvarp. Hægt er að hlusta á útvarpið hér eða stilla á 106.1

Dagskráin verður fjölbreytt en sem dæmi verða viðtöl við allskonar skáta, tónlist, viðtöl við skáta í dagskrá og svo er ungum skátum boðið að stjórna sínum eigin útvarpsþætti.

Útvarpsstjórar eru Helena Sif Gunnarsdóttir, Ísak Árni Eiríksson Hjartar og Óli Björn Sigurðsson.

Það er því tilvalið fyrir öll að hlusta, hvort sem þau eru á Landsmóti eða ekki.

Skátablaðið Pappírsheimur – 1. tölublað

Sat, 13 Jul 2024 11:04:00 GMT

Yfir Landsmót kemur út mótsblað og ber það heitið Pappírsheimur og eru ritstjórar þess Unnur Líf Kvaran og Vigdís Fríða Þorvaldsdóttir. Hér má lesa 1. tölublað.

Skátar streyma að

Fri, 12 Jul 2024 17:08:00 GMT

Landsmót skáta er að hefjast og skátar allstaðar að úr heiminum hafa streymt á svæðið frá því á mánudag. Öll íslensku skátafélögin og fleiri erlendir skátar setja upp tjaldbúðir sínar á svæðinu í dag. Eftirvæntingin leynir sér ekki á mótsvæðinu á Úlfljótsvatni, enda hafa liðið átta ár frá síðasta Landsmóti skáta.

Mikil gleði ríkir á svæðinu þrátt fyrir hressilega rigningu og fagna skátarnir því að geta prófað allan búnaðinn sinn á mótinu. Samkvæmt veðurspá styttir upp skömmu eftir helgi.

Á mótið koma um 2000 skátar, t.d. frá Kanada, Hong Kong, Tavían, Evrópu og Bandaríkjunum.

Mótið verður sett í kvöld kl 20:00 með glæsilegri setningarathöfn.

Það er spennandi og skemmtileg vika framundan þar sem við hittum skáta allsstaðar að úr heiminum og byggjum upp stórt alþjóðlegt skátasamfélag. Fimmtudaginn 18. júlí bjóðum við öllum áhugasömum að koma í heimsókn. Hægt verður að rölta um allt svæðið og kynnast ólíkum menningarheimum skáta frá mismunandi löndum. Deginum lýkur með hátíðarkvöldvöku. Við hvetjum öll til þess að taka daginn frá og gleðjast með okkur á Úlfljótsvatni.

Hægt verður að fylgjast með Landsmótinu á heimasíðu og samfélagsmiðlum skátanna, Facebook og Instagram. Gefið verður út daglegt fréttablað frá Landsmóti og að auki hægt að fylgjast með því í útvarpi á rásinni 106.1 eða á spilarinn.is

Landsmót hefst á morgun!

Thu, 11 Jul 2024 13:02:00 GMT

Landsmót skáta verður haldið 12. – 19. júlí á Útilífsmiðstöð skáta á Úlfljótsvatni. Skátar fagna því að geta aftur komið saman eftir 8 ára hlé, en fella þurfti síðasta mót niður vegna Covid 19. Á landsmótum skáta er samheldni, gleði og skátaandinn í fyrirrúmi.

Þema landsmóts í ár er „Ólíkir heimar“ sem vísar til þess að á landsmóti eru ekki bara íslenskir skátar heldur koma skátar alls staðar að úr heiminum, enda er skátahreyfing stærsta æskulýðs- og friðarhreyfing í heimi. Skátarnir koma frá ólíkum löndum, hafa ólíkan menningarbakgrunn og tala ólík tungumál en eiga það öll sameiginlegt að vera skátar.

Landsmót skáta stendur yfir í viku, og er gist í tjöldum. Tjaldbúðirnar sem rísa munu rúma yfir 2000 skáta og fjölskyldur þeirra, og á örfáum dögum rís nýtt bæjarfélag skáta á Úlfljótsvatni. Dagskráin er fjölbreytt og skemmtileg þar sem öll ættu því að geta fundið eitthvað við sitt hæfi, reynt við nýjar áskoranir og á sama tíma eignast nýja vini. Dæmi um dagskrá eru hike-gönguferðir, sköpunarsmiðjur, bogfimi, klifur og stór þrautasvæði. Stór hluti skátastarfs byggir á þjónustu við samfélagið og munu því allir skátar mótsins taka þátt í því að bæta heiminn í einn dag, og vinna verkefni sem byggja upp miðstöðina á Úlfljótsvatni.

Sérstakar fjölskyldubúðir verða starfræktar á mótinu þar sem fjölskyldur þátttakenda, eldri skátar og fjölskyldur þeirra og þau sem eru áhugasöm um að kynnast skátastarfi stendur til boði að tjalda saman og taka þátt í mótinu. Dagskráin er sérstaklega miðuð að yngri kynslóðinni og fá þau meðal annars að fara í bátasmiðju, útieldun, á kvöldvöku og margt fleira.

Á heimsóknardegi þann 18. júlí geta þau sem vilja komið í heimsókn á mótið og tekið þátt í dagskrá, rölt um svæðið og kynnst skátafélögunum sem mörg hver verða með kynningar, leiki og fleira. Einnig er hægt að kíkja á kaffihúsið í Strýtunni og fá sér kaffi og vöfflur eða versla í Skátabúðinni og enda svo daginn á hátíðarkvöldvöku.

Stuð, pepp og stemning á Fimmvörðuhálsi

Thu, 20 Jun 2024 09:54:00 GMT

Þann 7. júní lögðu tæplega 30 dróttskátar og 11 foringjar af stað í leiðangur yfir Fimmvörðuháls sem er gönguleið á milli Eyjafjallajökuls og Mýrdalsjökuls. Veðrið setti aðeins strik í reikninginn og þess vegna var ekki farið eftir upphaflega planinu en ekkert stöðvaði okkur. Við lögðum af stað frá Landnemaheimilinu að morgni föstudags í góðu veðri og þá byrjaði ævintýrið. Keyrt var alla leið á Hvolsvöll og þar var stoppað til að fá sér að borða og skreppa á klósettið.

Eftir langt og gott stopp keyrðum við áfram að Seljalandsfossi og hann var skoðaður gaumgæfilega. Sumir komu smá blautir úr þeirri upplifun en það var bara SPS (stuð, pepp og stemning#takkEinar ). Næst á dagskrá var að skoða Gljúfrabúa sem er foss inn í gili. Það var tekið mikið af myndum af fossinum, enda var hann mjög töfrandi. Svo skelltum við okkur í Nauthúsagil og gengum þar meðfram klettaveggjunum að litlum fossi og var þetta fyrsta áskorunin fyrir suma, þar sem að þurfti að klifra á keðju til að komast að fossinum. Merkurker var næst í röðinni, á bílastæðinu skelltu sér allir í sundföt og síðan var stokkið út í á sem liggur í gegnum helli.

Þegar buslinu lauk, lá leiðin beint inn í Bása, þar sem reist var tjaldbúð. Um kvöldið var lögð mikil vinna í að grilla kjúkling sem að sló í gegn hjá þreyttum skátum. Nokkrir skátar kveiktu lítinn eld, sungu saman og fengu sér sykurpúða. Aðrir þreyttir skátar eftir langan ferðadag skriðu inn í tjöld en nokkrir hressir skátar skelltu sér að kanna Þórsmörk.

Morguninn eftir vöknuðu allir í blíðskapar veðri og byrjað var að taka niður tjaldbúðina. Lagt var af stað upp hálsinn um hádegisbilið og það var mikið SPS í gangi. Gangan byrjar á að fara upp Kattarhrygginn sem var áskorun fyrir marga lofthrædda í hópnum. Eftir það var komið að Heljarkambi sem margir voru orðnir stressaðir fyrir keðju sem þarf að ganga eftir part af leiðinni, allir komu úr því ævintýri heilir á húfi. Þá var bara leiðin upp að skálunum. Krökkunum var síðan skipt á tvo skála, Baldvinsskála sem er í 800m hæð og Fimmvörðuskála sem er í 1000 m hæð. Á leiðinni var mikið verið að vinna með ,,Njóta en ekki þjóta” (kannski aðeins of mikið). Nokkrir af reyndari skátunum í hópnum peppuðu þau sem voru orðin þreytt og uppgefin. Við komum loks í skálana um hálf eitt, öll svöng og þreytt tilbúin að fara að sofa.

Skátarnir vöknuðu í svitakófi eftir með misgóðan svefn og gerðu sig tilbúin til að hittast aftur á leiðinni niður að Skógum. Sá endurfundur vakti gleði og þrömmuðu þau áfram með SPS í hjarta, tilbúinn fyrir ferðina að handan. Smá snjór var eftir þannig við nýttum öll tækifæri til að renna okkur niður snjóbrekkurnar. Á leiðinni niður var glæsilegt útsýni og fossarnir nærri því óteljandi, þó að einhverjir reyndir foringjar hafi náð góðri tölu. Skógar voru sýn sem öllum þreyttum skátum hafði dreymt um og hamingju magnið var yfirfullt.

Margir skátar fengu sér lúr í rútunni sem að kom sérstaklega seint heim eftir smá vesen á leiðinni því að dekkið sprakk á miðri leið. Heimkoman í Landnemaheimilið var í kringum miðnætti.

Gangan yfir Fimmvörðuháls tekur þrjósku, pepp og algjört meistarahugarfar og er þetta risastórt afrek á vonandi löngum ferli þessa frábæru skáta. Þeir skátar sem tóku þetta verkefni að sér eru formlega orðnir sigurvegarar í augum okkar og við þökkum öllum æðislegu foringjunum sem þoldu öll þau vandamál sem komu upp fyrir æðislega og ógleymanlega ferð. Sjáumst á Landsmóti SPS!

Þetta var í annað sinn sem hópur dróttskáta gekk yfir Fimmvörðuháls og er ferðin styrkt af styrktarsjóði skáta, þannig að dósunum frá Grænum skátum var breytt í káta skáta.

Fyrrverandi skátahöfðingi sæmd Fálkaorðu

Tue, 18 Jun 2024 14:02:00 GMT

Margrét Tómasdóttir, hjúkrunarfræðingur og fyrrverandi skátahöfðingi var í gær þann 17. júní 2024, sæmd riddarakrossi hinnar íslensku Fálkaorðu fyrir störf í þágu skátahreyfingarinnar.

Margrét Tómasdóttir gekk til liðs við skátahreyfinguna á barnsaldri, fyrst í Reykjavík síðan í Kópavogi og Garðabæ.
Hún gegndi öllum helstu foringjastörfum í hreyfingunni á yngri árum og að námi loknu var hún í forystu skátahreyfingarinnar m.a. formaður starfsráðs Bandalags íslenskra skáta, en ráðið fjallar um viðfangsefni skátastarfsins á hverjum tíma. Margrét sat í stjórn Skátafélagsins Vífils í Garðabæ á árunum 1991-1996 og var Margrét einstaklega röggsöm og fylgin sér og á félagið henni margt að þakka! Árið 2004 var hún fyrst kvenna kjörin skátahöfðingi Íslands eftir að hafa gegnt embætti aðstoðarskátahöfðingja um árabil. Margrét var skátahöfðingi alls í sex ár eða til ársins 2010.

Við óskum Margréti innilega til hamingju um leið og við þökkum henni fyrir ómetanlegt starf í gegnum árin.

Drekar fóru í sirkus

Thu, 13 Jun 2024 17:21:00 GMT

Helgina 31. maí – 2. júní var Drekaskátamót haldið á Úlfljótsvatni og var þemað í ár Sirkus. Skátarnir reistu tjaldbúð við Strýtuna sem að var nú orðin að sirkustjaldi og fengu að kynnast trúðunum á svæðinu og hjálpuðu þeim að læra nýjar sirkúskúnstir.

Dagskráin var svipuð og síðustu ár en meðal annars var boðið upp á klifur , bogfimi, báta , hoppukastala og samfélagsverkefni. Þetta árið stóðu samfélagsverkefnin upp úr þar sem drekaskátarnir hjálpuðu til við að snyrta skóginn fyrir aftan KSÚ og máluðu regnboga með höndunum á vegginn á Norðursal.

Á laugardeginum var Karnival þar sem að skátarnir gátu unnið sér inn miða með því að leysa allskonar skemmtilegar þrautir og gátu svo keypt sér kandífloss, popp og ferð í hoppukastalana með miðunum.

Veðrið stríddi okkur en við létum það þó ekki stoppa okkur og nutum okkar út í smá regni og roki. Sólin kom þó og kvaddi okkur með geislunum á sunnudeginum.

Samvinna, tjaldbúð og veðurviðvaranir á 2. hluta Gilwell

Wed, 12 Jun 2024 16:35:00 GMT

Um síðastliðna helgi var annar hluti Gilwell námskeiðsins á Úlfljótsvatni haldið. Hópurinn sem nú tekur þátt í námskeiðinu hóf ferðina í febrúar og nú líkt og þá voru gular veðurviðvaranir í kortunum dagana fyrir setningu námskeiðsins. Þrátt fyrir það reis glæsileg tjaldbúð á Hvítasunnuflötinni dagana 5. -9. júní og flokkarnir þrír komu sér vel fyrir með útieldhúsi, útilegukamínu, eldstæði og gashellum, enda er útieldun mikilvægur þáttur námskeiðsinns.

Verkefni flokkanna var þó helst það að reyna á eigin skinni þá áskorun að vera í þéttum samskiptum og sambúð með skátaflokknum sínum. Á þessu skrefi var áherslan á flokkastarf, samvinnu og samkennd og hjálpuðu veðurguðirnir okkur við að reyna á seiglu og þol þátttakenda með stöðugu roki og smá hagléli í hike-inu. Skátarnir stóðust allar þessar áskoranir með prýði og skemmtu sér vel í göngunni og tjölduðu svo í skógarrjóðri þar sem langþráð skjól fannst fyrir norðanáttinni.

Áfram var svo haldið að leggja inn hjá þeim ýmsar aðferðir til að styrkja hópinn, greina vandamál, nota jákvæð samskipti og virka hlustun auk þess að vinna með aðgengileika skátastarfs og lýðræðislegar ákvarðanir.

Við erum sérstaklega þakklát öllum þeim sérfræðingum sem hjálpuðu til við að gera námskeiðið einstakt með því að sýna okkur hvernig töfra má fram gómsætar máltíðir yfir eldi og gera tjaldbúðina flottari ásamt þeim sem deildu með okkur visku sinni og reynslu.

Á laugardagskvöld var boðið í opna kvöldvöku sem var vel sótt af eldri Gilwell skátum og var einstaklega góð stemming og sungið hátt og snjallt, auk þess sem borðin svignuðu undan kræsingum og heitu kakói með rjóma.

Það voru glaðir og þreyttir skátar sem luku námskeiðinu í sól og blíðu og öll hlökkum við til lokaskrefsins sem verður í nóvember, þar sem við skoðum hvernig virkja má leiðtogann í sér, bæði í skátastarfi og í eigin lífi.

Forseti fagnar með Kóreuförum

Wed, 29 May 2024 14:33:00 GMT

Síðastliðin sunnudag var haldið lokahóf á Úlfljótsvatni, fyrir fararhópinn á Alheimsmót skáta 2023. Veðrið lék við gestina sem nýttu sér það vel og léku sér úti og snæddu pylsur að klassískum skátasið.

Guðni Th. forseti kíkti í heimsókn sem vakti mikla lukku. Hann, ásamt Hrafnhildi Ýri, fararstjóra, og Hörpu Ósk, skátahöfðingja, afhentu þátttakendum, sjálfboðaliðum og foringjum viðurkenningjaskjal vegna þátttöku sinnar á 25. Alheimsmóti skáta í Suður Kóreu, en þessi hópur sýndi af sér mikla seiglu og dug í ferðinni og stóðu sig eins og hetjur.

Einnig var Guðni Th. forseti sæmdur gullmerki skáta sem þakkir fyrir síðastliðin ár sem verndari skátahreyfingarinnar.

Það kom ekki annað til greina en að syngja nokkur lög saman og tók forsetinn vel undir með hópnum. Eftir athöfnina var opin dagskrá á svæðinu og mátti sjá skáta klifra í klifurturninum, sigla á Úlfljótsvatni, strengja boga í bogfimi, hoppa í hoppukastala og spjalla saman. Frábær dagur á Úlfljótsvatni með skemmtilegum skátum.

„fræin sem við sáum í dag hafa möguleika til að breyta heiminum“

Tue, 28 May 2024 15:04:00 GMT

Harpa Ósk Valgeirsdóttir, skátahöfðingi með stutta hugvekju um skátastarf. Þar rifjar hún upp minningu af sínu fyrsta landsmóti á Úlfljótsvatni, þjónustu Grænna skáta og því skemmtilega og mikilvæga starfi sem skátarnir sinna. Við mælum með að hlusta – smellið hér.

Skátar skemmtu sér í ýmsum veðrum

Tue, 28 May 2024 14:03:00 GMT

Um Hvítasunnuhelgina héldu Hraunbúar sitt árlega Vormót í 82. skipti. Vormót er mót fyrir fálkaskáta og eldri og fjölskyldur eru velkomnar í fjölskyldubúðir.

Eftirvæntingin var mikil og má segja að mótið hafi staðið undir væntingum þar sem skátar voru við leik og störf.

Veðrið var allskonar, all frá sól og blíðu yfir í rok, örlitla rigningu, pínulítið haglél og svo kórónað með tvöföldum regnboga, ekkert af þessu setti mótið út af laginu enda skátarnir við öllu búnir bæði með sólarvörn og pollagalla meðferðis.

Dagskrá mótsins var krefjandi og að hluta til miðuð við Rekkaskáta. Í boði voru göngur allt að 20km þar sem hægt var að vinna sér inn stiku- og/eða hæðarmerki, metnaðarfull útieldun þar sem hann Klási okkar kenndi skátunum að elda paellu yfir eldi og djúpsteikja ástarpunga, víkingarnir voru á sínum stað, kanóar og kayakar á Hvaleyrarvatni, ratleikir, hjólaferðir í sund og svo aðstoðaði hún Sigríður Júíla þátttakendur við að skreyta mótsklútana með útsaum, stimplun og fleiru.

Skátapartý, kvöldvaka og næturleikur eru fastir punktar á Vormóti og voru á sínum stað í dagskránni. Rekkaskátar fengu auk þess kvölddagskrá enda ekki annað hægt þegar um fjórðungur þátttakenda eru Rekkaskátar.

Það er fátt skemmtilegra en að vera á góðu skátamóti með góðum vinum og við vorum svo lánsöm að með okkur voru skátar frá Landnemum, Garðbúum, Fossbúum, Ægisbúum, Vífli, Mosverjum og Skjöldungum. Þau settu sinn svip á mótið með jákvæðni og gleði.

Á næsta ári verður Vormót 6.-9. júní svo ætla má að það verði ögn hlýrra þó það sé engin trygging eins og veðurglöggir skátar vita. Næsta ár markar einnig 100 ára samfellt skátastarf Hraunbúa í Hafnarfirði svo við höfum fulla ástæðu til að ætla að gleðin verði alls ráðandi á Vormóti 2025. Hlökkum til að sjá ykkur sem flest.

Texti og myndir: Harpa Hrönn Grétarsdóttir, Hraunbúi

Skátar frá Norðurlöndunum vinna saman – Norðurlandaþing 2024

Thu, 16 May 2024 15:48:00 GMT

Dagana 8.-12. maí tók hópur íslenskra skáta þátt í Norðurlandaþingi sem haldið var í Færeyjum að þessu sinni. Norðurlandaþing er haldið á 3 ára fresti af norrænu skátanefndinni (NSK) sem er samstarfsvettvangur skátasamtaka á Norðurlöndunum. Markmið vettvangsins er að skapa tækifæri til samstarfs, til að miðla reynslu og deila menningu á milli landanna. Hér er hægt að lesa meira um starfsemi NSK.

Allt að 180 skátar frá öllum Norðurlöndunum voru samankomin á ráðstefnunni, þar af 19 manns frá Íslandi. Íslenski hópurinn samanstóð af stjórn og starfsfólki BÍS, fulltrúum frá Alþjóðaráði og fulltrúum ungmenna.

Fyrsta daginn fengu þátttakendur að upplifa náttúruundir Færeyja með vali um ferðir um eyjarnar. Hægt var að fara í fjallgöngu í Klaksvík, gönguferð um Kirkjubø eða göngu um Gásadal og að skoða Múlafoss. Seinna um daginn var þingið sett en þemað að þessu sinni var Tími breytinga . Á opnunarathöfninni fengum við ræður frá Skátahöfðingja og forsætisráðherra Færeyja ásamt tónlistaratriðum, eitt frá ungum skátum í Þórshöfn og svo flutti færeyski tónlistarmaðurinn Marius Ziska nokkur lög.

Á ráðstefnunni var fjölbreytt dagskrá sem samanstóð að mestu af kynningum og vinnusmiðjum ásamt því að þátttakendur fengu tækifæri á því að rýna betur í sýn, stefnu og samstarfsgrundvöll NSK.

Vinnusmiðjurnar komu frá þátttökulöndunum þar sem lögð var áhersla á spennandi og gagnlegar smiðjur til að kynna hin ýmsu verkefni sem bandalögin eru að vinna að. Sem dæmi má nefna smiðju um geðheilbrigðismál í skátastarfi, hvernig hægt er að vekja vitund skáta um veruleika flóttafólks, hvernig dagskrá rekka- og róverskáta lítur út, hvernig sænskir skátar kynna tækifæri til alþjóðastarfs og svo margt margt fleira. Íslensku skátarnir stóðu fyrir þrem smiðjum, einni um sjálfbæra viðburði, aðra um öryggi í skátastarfi og sú þriðja kynnti starfsemi Grænna skáta og hvað það gefur íslensku skátahreyfingunni.

Að lokum ber sérstaklega að nefna að Færeyingar héldu smiðju sem bar heitið Skótahjálpin, þar sem þau sögðu frá góðgerðarstarfi sínu þar sem þau safna peningum fyrir góð málefni. Til að mynda gáfu þau íslenskum skátum 500 þúsund krónur fyrir sumarstarfi grindvískra barna.

Einnig sammældust Norrænu bandalögin um að veita styrk til skáta í Brasilíu sem standa í ströngu um þessar mundir að hjálpa samfélagi sínu að kljást við mikil flóð sem hafa geysað í suðurhluta landsins.

Að sjálfsögðu var svo boðið upp á kvöldvökur að skátasið í lok hvers dags!

Við þökkum frændfólki okkar í Færeyjum fyrir einstaklega vel skipulagða og gagnlega ráðstefnu og erum full tilhlökkunar að innleiða þær hugmyndir sem við fengum á ráðstefnunni í okkar starfsemi.

Agora 2024

Tue, 30 Apr 2024 11:58:00 GMT

Skátamótið Agora fór fram í Göransborg skátamiðstöð í Svíþjóð fyrstu helgina í apríl. Um 56 þátttakendur frá 22 löndum tóku þátt og fóru tveir skátar frá Íslandi. Agora er skátamót skipulagt og haldið af róverskátum fyrir róverskáta.

Á mótinu var mikið rætt um mismunandi róverstarf eftir löndum og valdeflingu ungs fólks. Eitt af markmiðum Agora er að vera samkomustaður róverskáta til að ræða drauma, tilfinningar, áhyggjur, upplifanir og hugmyndir, sækja innblástur og orku og að geta verið til staðar hvort fyrir annað og kennt hvort öðru nýja hluti.

Ljósmyndir: Scouting in Europe

Sumardeginum fyrsta fagnað um land allt

Mon, 29 Apr 2024 15:45:00 GMT

Sumardagurinn fyrsti var haldinn hátíðlegur um land allt fimmtudaginn 25. apríl. Hér má sjá skemmtilegar myndir frá nokkrum skátafélögum.

Félögin í Reykjavík skiptu sér upp eftir hverfum og voru 3 hátíðir í Reykjavík.

Ægisbúar héldu skemmtun við skátaheimilið sitt og voru með hoppukastala og veitingasölu, ásamt hike-brauðs gerð, og héldu síðan kvöldvöku í tilefni af 55 ára afmæli skátafélagsins.

Árbúar voru á Árbæjarsafni í annað sinn með veitingasölu, hike-brauðs gerð og skrúðgöngu um safnið, um 1.800 manns áttu leið í gegnum safnið.

Garðbúar, Landnemar og Skjöldungar sameinuðu krafta sína á ný og og héldu sín hátíðarhöld í Fjölskyldu- og Húsdýragarðinum. Boðið var uppá úrval af hoppuköstulum, súrraðar þrautabrautir, hike-brauð og veitingasölu. Um 2.600 manns gerðu sér góðan dag í garðinum.

Ljósmyndir: SSR – Daði Már Gunnarsson

Í Hafnarfirði voru Hraunbúar með skátadagskrá á Víðistaðatúni og á meðfylgjandi mynd eru þau að gera sig klár fyrir fánaborg í skrúðgöngu.

Í Reykjanesbæ voru Heiðabúar með skátamessu.

Á Akureyri var Klakkur með skrúðgöngu, skátamessu og skátadagskrá á Hömrum.

Inngilding og sjálfbærni í brennidepli á Skátaþingi

Wed, 17 Apr 2024 17:15:00 GMT

Um 150 skátar tóku þátt eða stóðu að Skátaþingi sem haldið var á Sólheimum og Úlfljótsvatni helgina 5.-7. apríl. Skátaþing er árleg samkoma þar sem skátahreyfingin kemur saman, heldur aðalfund sinn og rýnir í stöðu skáta á Íslandi. Þingið er einnig ákveðin uppskeruhátíð fyrir fastaráðin enda er það oft vettvangur kynninga á nýjum leiðum í skátastarfi.

Gaman er að fylgjast með þróun í þátttöku ungmenna á Skátaþingi en í ár var slegið met í virkri þátttöku þeirra, en fyrra met var sett á Skátaþingi í fyrra. Í ár voru 36 af 55 fulltrúum þingsins með atkvæðisrét á aldrinum 13-25 ára og því rúmlega 65% atkvæða í höndum ungmenna. Við fögnum því og erum stolt af því að vera ungmennahreyfing sem stýrt er af ungu fólki með stuðningi fullorðinna.

Inngilding og sjálfbærni voru í brennidepli á Skátaþingi að þessu sinni og var því tilvalið að halda þingið á Sólheimum. Starfsemi Sólheima og skátastarf byggja einmitt bæði á hugsjónastarfsemi og miða að því að bæta þann heim sem við búum í. Þema þingsins að þessu sinni var Leiðtogar í 100 ár í tilefni þess að 100 ár eru liðin frá því að Bandalag íslenskra skáta var stofnað.

Í upphafi voru flutt ávörp frá gestum þingsins en Ás a Valdísar Árnadóttur Oddvit i Grímsnes- og Grafningshrepps flutti opnunarávarp þingsins. Þar fjallaði hún um sveitarfélagið og sagði frá reynslu sinni af því að hitta þátttakendur á Gilwell leiðtogaþjálfuninni þegar þau komu í heimsókn á bæinn sem hún ólst upp á. Ólafur Hauksson og Valgeir F. Backman fluttu ávarp fyrir hönd skátafélagsins Sólheima þar sem þeir buðu skátana velkomna og minntust á að almennt svifi skátaandinn yfir Sólheimum og íbúum þar. Að lokum fór Kristinn Ólafsson, framkvæmdastjóri Grænna skáta, yfir starfsemi þeirra og hvernig hún styður við skátastarf í landinu ásamt því að gefa þátttakendum þingsins gjöf frá fyrirtækinu.

Einnig voru kynningar á þinginu en þar byrjaði Huldar Hlynsson, meðstjórnandi í stjórn BÍS, á því að fara yfir stöðuna í Stefnu BÍS og hvernig hægt sé að vinna að því að markmiðum hennar sé náð fyrir lok árs 2025. Helga Þórey Júlíudóttir , s veitaforingi og s kátaforingi skátastarfs í Guluhlíð, og Margrét Rannveig Halldórsdótt i r , forstöðukona Guluhlíðar sögðu frá Skátastarfi fyrir öll í Guluhlíð en síðastliðið ár hefur verið unnið að því að auka tækifæri fyrir öll börn að stunda skátastarf, óháð færni og getu. Loks kom Rebecca Craske, sérfræðingur bresku skátahreyfingarinnar í sjálfbærni málefnum og talaði um þær breytingar sem eru að eiga sér stað í samfélaginu okkar í dag og þau tækifæri sem standa okkur til boða til að gera lifnaðarhætti okkar sjálfbærari.

Á Skátaþingi tíðkast að veita öflugum skátum þakkir fyrir vel unnin störf. Að þessu sinni ber helst að nefna að fararstjórn, sveitarforingjar og sjálfboðaliðar sem fóru á Alheimsmót skáta fengu öll heiðursmerki fyrir að hafa staðið sig vel í erfiðum aðstæðum í Suður-Kóreu.

Eftir að hefðbundnum aðalfundastörfum lauk var boðið upp á smiðjur þar sem þátttakendur gátu kynnt sér betur starfsemi Sólheima, sjálfbærni næstu 100 árin, könnuðamerki BÍS, leiðir til að minnka skjánotkun, leiðtogaþjálfunarleik og hvernig við aukum alþjóðastarf í skátunum.

Á sunnudag var haldið á Úlfljótsvatn þar sem boðið var upp á dagskrá til að undirbúa Landsmót skáta sem haldið verður í sumar. Þar voru lögð drög að mótsbókinni, rekka- og róverdagskráin var skoðuð og opið var í Skátasafnið. Loks var svo boðið upp á karnival þar sem félögin sýndu frá því sem hefur gefist vel í þeirra tjaldbúðum á Landsmótum.

Við þökkum öllum þátttakendum fyrir skemmtilega og gagnlega helgi á Skátaþingi og hlökkum til þess næsta!

Drekaskátar breyttust í ninjur í Hveragerði

Fri, 08 Mar 2024 15:34:00 GMT

Laugardaginn 2. mars síðastliðinn stóð Skátafélagið Strókur fyrir hinum árlega Drekaskátadegi þar sem um 160 skátar komu saman til að efla skátaandann og samheldni. Drekaskátarnir hjá Stróki völdu að hafa Ninja þema og fengu því öll ninja grímur áður en haldið var í dagskrá.

Fálka- og Dróttskátar Stróks sáu um að skipuleggja og stýra dagskrá sem var ekki af verri endanum. Tvö dagskrárbil voru í boði, annarsvegar í Lystigarðinum þar sem boðið var upp á 7 leikjastöðvar með hinum ýmsu hópeflisleikjum, og hinsvegar 7 stöðva ratleik um Hveragerði þar sem skátarnir gengu eftir korti, leystu ninjaþrautir og höfðu gaman. Vinsælasti pósturinn var klárlega póstur númer 5 þar sem grillaðir voru sykurpúðar og ninjaskátasudoku leyst.

Í hádeginu voru borðaðar hvorki meira né minna en 380 pylsur og var gott fyrir skátana að komast aðeins inn að hlýja sér á milli dagskrárbila. Eftir að öll höfðu lokið dagskrá var komið saman fyrir utan Bungubrekku þar sem öll fengu ninjamerki fyrir þátttöku, kakó, kex og ís því auðvita borða Drekaskátar ís í -5 stiga frosti. Drekaskátadeginum var slitið með Bræðralagssöngnum og héldu skátarnir svo glaðir heim eftir vel heppnaðan dag.

Skátafélagið Strókur þakkar öllum sem tóku þátt og gerðu þennan dag mögulegan og hlakkar til að hitta öll í næsta skátaævintýri.

Fyrir hönd Skátafélagsins Stróks,
Sjöfn Ingvarsdóttir félagsforingi.

Mælitæki á áhrif æskulýðsstarfs á ungt fólk kynnt á ImpactYouth

Mon, 04 Mar 2024 14:28:00 GMT

Þann 22. febrúar sótti Védís Helgadóttir lokafund MIYO verkefnisins í Belgíu.

MIYO verkefnið (e. Measuring Impact: with, for and by youth organisations) er samstarfsverkefni WOSM, YMCA í Evrópu og Maynooth University og markmið þess er að búa til mælitæki til þess að mæla áhrif ýmissa ungmennahreyfinga, t.d. skátahreyfingarinnar, á ungt fólk.
Á fundinum var þetta mælitæki kynnt en það hefur verið í þróun síðastliðin tvö ár og nokkur bandalög hafa nú þegar tekið þátt í pilot-rannsóknum.

Það er mikilvægt fyrir skátahreyfinguna, og smærri einingar innan hennar, að geta sýnt með sannanlegum hætti hver áhrif starfs hennar er á skátana, t.d. hvaða færni skátarnir öðlast og hvað þeir læra.
Fyrst og fremst er það mikilvægt fyrir hreyfinguna sjálfa, til að vita á hvaða leið hún er, en það er líka mikilvægt að hreyfingin eigi þessi gögn til að geta sýnt almenningi hver áhrif skátastarfs eru, sem og til að kynna fyrir styrktaraðilum sínum.

Mælitækið er tvíþætt en miðað hefur verið við að þátttakendur í rannsókninni séu á aldrinum 14-18 ára.
Annars vegar byggist mælitækið á spurningalista og hins vegar á umræðum í rýnihópum. Þannig eiga rýnihóparnir að dýpka svörin úr spurningalistunum.
Spurningalistinn sem lagður er fyrir þátttakendur er tvíþættur; fyrri hlutinn inniheldur lýðfræðilegar spurningar þar sem er spurt um bakgrunnsupplýsingar skátanna, m.a. hve lengi þeir hafa verið starfandi.
Í seinni hlutanum eru fullyrðingar lagðar fyrir og þátttakendur beðnir um að meta á skalanum 1-10 hversu sammála þeir eru fullyrðingunum. Fullyrðingarnar koma alltaf tvær saman og tengjast þær innbyrðis.

Dæmi um fullyrðingapar:

Ég reyni að lifa heilsusamlegu lífi (næring, svefn, hreyfing)
Skátastarf hvetur mig til þess að lifa heilsusamlegu lífi

Þannig lýtur fullyrðing A meira að skátanum sjálfum en fullyrðingu B er ætlað að kanna hver bein áhrif af skátastarfinu sjálfu eru.
Þegar fullyrðingarnar fyrir spurningalistann voru samdar var stuðst við SPICES módelið sem WOSM þróaði og hefur hér heima verið kallað þroskasviðin 6 þannig að fullyrðingarnar tengjast allar einhverju þroskasviðanna.

Nokkur þátttökulönd í verkefninu, m.a. Svíar og Tékkar, sögðu á fundinum frá pilot-rannsóknum sem þau höfðu framkvæmt á meðan verið var að þróa mælitækið og það var verulega gagnlegt að heyra frá þeim hvernig mælitækið virkaði í praktík og hvaða hindrunum þau hefðu mætt og hvernig þau hefðu leyst úr þeim, og sömuleiðis var athyglisvert að heyra niðurstöðurnar þeirra sem voru um sumt svipaðar milli landanna.

Það var gaman að sjá hvað mikill metnaður hefur verið lagður í MIYO verkefnið en að því koma líka akademískir starfsmenn úr Maynooth University sem miðluðu á sérlega skýran máta fræðilegum atriðum varðandi mælitækið og sögðu m.a. frá því hvernig á að velja úrtak og hvernig best er að leiða umræður í rýnihóp.

Á fundinum var mælitækið formlega gefið út þannig að núna geta öll bandalög framkvæmt sínar eigin rannsóknir með notkun þess.
Á vefsíðunni impactofyouth.org eru góðar leiðbeiningar um hvernig maður á að snúa sér í því og það verður spennandi að sjá niðurstöður úr frekari rannsóknum.

Eins og áður sagði snýr mælitækið sem nú hefur verið þróað að því hver áhrif skátastarfs eru á einstaklingana sem taka þátt í skátastarfinu.
Hópurinn sem annast hefur MIYO verkefnið ætlar ekki að láta þar við sitja því nú vonast hópurinn til að fá styrk til að geta þróað annað mælitæki sem rannsakar áhrif skátastarfs á samfélagið. Það verður mjög spennandi að fylgjast með því enda verulega áhugaverð rannsóknarspurning.

Það var verulega gaman og athyglisvert að sitja þennan fund og heyra um þetta mikilvæga verkefni sem mikill metnaður hefur verið lagður í, og það verður gaman að fylgjast með framhaldinu.

Texti: Védís Helgadóttir

Ógleymanlegt Gilwell-ævintýri í Slóveníu

Fri, 01 Mar 2024 15:52:00 GMT

Íslenski fararhópurinn. Frá vinstri: Elín (Fossbúum), Tero (Úlfljótsvatni), Steinar Logi (Kópum), Hinrik (Vogabúum), Sebastian (Klakki), Hjálmar (Kópum) og Thelma (Hraunbúum).

Síðustu helgina í febrúar fóru sex skátaforingjar frá Íslandi, og einn leiðbeinandi, til Postojna í Slóveníu til að taka þátt í seinni hluta Gilwell-námskeiðs. Ferðin var hin eftirminnilegasta í alla staði og á námskeiðinu fengu foringjarnir gott veganesti fyrir foringjastörf sín, og fyrir síðasta hluta þjálfunarinnar – Gilwell-verkefnið.

Þetta er í annað sinn sem íslenskur hópur fer á Gilwell í Slóveníu, en um er að ræða fjölþjóðlegt námskeið sem styrkt er af Erasmus+, og hét fullu nafni International Wood Badge course – Bohinj 2023. Samhliða fjölþjóðlega námskeiðinu eru keyrð tvö önnur námskeið á sama tíma og undir sama hatti. Á þeim er lögð áhersla á dagskrármál annars vegar og stjórnun skátafélaga og viðburða hins vegar. Á alþjóðlega námskeiðinu er áherslan hins vegar á að foringinn læri að þekkja sjálfan sig – hver gildi hans eru og hvernig þau nýtast í leiðtogastörfum.

Fyrri hluti námskeiðsins fór fram í skátamiðstöð við Bohinj-vatn í ágúst á síðasta ári. Auk Íslendinga og Slóvena sóttu foringjar frá Svartfjallalandi og Serbíu námskeiðið líka. Gilwell-námskeið eru alltaf mikil upplifun, en að sitja slíkt námskeið í suður-evrópskri náttúruperlu og fá í leiðinni tækifæri til að kynnast vel skátaforingjum með allt annan bakgrunn, það er ævintýri líkast!

Fyrri hluti námskeiðsins fór fram í Bohinj í ágúst sl. Hér má sjá Tero og Sebastian vinna verkefni með flokknum sínum, úti í skógi.

Hópurinn flaug út á fimmtudegi. Eftir stutt næturstopp í höfuðborginni Ljubljana var farið með lest til Postojna-borgar, sem er hvað frægust fyrir samnefndan helli sem er alls um 23 km langur og fullur af dropsteinum. Fyrir námskeiðið gafst hópnum tími til að fara í skoðunarferð um hellinn, sem var sannarlega fyrirhafnarinnar virði.

Íslensku þátttakendurnir fóru að sjálfsögðu í Postojna-helli, sem er ævintýraheimur út af fyrir sig.

Á námskeiðinu sjálfu var að þessu sinni kafað dýpra ofan í verkefnastjórnun, fullorðna í skátastarfi, leiðtogahlutverkið, sögu Gilwell-námskeiða og fleira. Auk þess var sérstök vinnustofa þar sem þátttakendur reyndu að festa hönd á því hvað þeir höfðu lært á fyrri hluta námskeiðsins. Það getur nefnilega verið auðveldara að átta sig á slíku þegar smá tími hefur liðið og reynsla er komin á að nýta fróðleikinn af námskeiðinu.

Seinni hluti námskeiðsins fór fram í hosteli sem er líka menntaskóli fyrir verðandi skógfræðinga.

Eftir slit á sunnudegi beið svo leigubíll eftir hópnum. Leiðin lá í Predjama kastala, sem er steinsnar frá Postojna. Kastalans er fyrst getið í heimildum árið 1274, en hann er byggður að hluta inni í kletti. Eftir stutta en mjög áhugaverða heimsókn til miðalda lá leiðin aftur til Ljubljana og beint upp í flugvél.

Ferðin endaði svo á heimsókn í Predjama-kastala. Þetta væri nú ágætis skátaheimili!

Við tekur vinna við Gilwell-verkefnin, en hver þátttakandi þarf að klára verkefni sem reynir á verkefnastjórnunar- og leiðtogahæfileika viðkomandi. Verkefnin eru fjölbreytt, allt frá því að skipuleggja útilegu fyrir dróttskáta í tveimur félögum, yfir í viðamiklar rannsóknir eða bókaútgáfu.

Fyrir hvern og einn þátttakanda er ferð eins og þessi ógleymanlegt ævintýri. Fyrir utan það sem hægt er að læra á svona námskeiði fara skátaforingjarnir heim af því með nýja vini frá öðrum heimshornum. Slík vinátta getur enst alla ævi og býður upp á alls konar samstarf, skoðanaskipti, ferðalög og fleira. Þetta vita allir skátar sem hafa ferðast. Balkanlöndin kunna að virðast óralangt frá Íslandi, bæði menningarlega og landafræðilega, en eftir stutt kynni kemur auðvitað í ljós að fólk er meira og minna eins alls staðar. Við borðum morgunmat á morgnanna og kvöldmat á kvöldin.

Fyrir hreyfinguna sjálfa er svo dýrmætt að foringjar sækji sér þjálfun og reynslu sem víðast. Það auðgar flóruna heima við og kemur í veg fyrir stöðnun og fábreytni. Áherslurnar á þessu námskeiði eru enda býsna frábrugðnar þeim á íslenska námskeiðinu, þó svo að unnið sé að sama markmiði. Þess háttar fjölbreytni styrkir hreyfinguna og meðlmi hennar.

Það ætti því að vera keppikefli fyrir skátafélög og -bandalög að senda foringja sína vítt og breytt um heiminn. Þátttaka í Slóveníu-Gilwelli er einmitt ein birtingarmynd þeirrar stefnu.

Í ágúst byrjar nýtt námskeið, sem Íslendingar taka ekki þátt í, en þess í stað fara íslenskir þátttakendur á norrænt Gilwell-námskeið. Það verður spennandi að sjá hvað þau læra þar!

Nýtt ungmennaráð kjörið á Ungmennaþingi á Akranesi

Sun, 25 Feb 2024 15:02:00 GMT

Helgina 3.- 4. febrúar var haldið ungmennaþing fyrir skáta 25 ára og yngri í skátaheimili Skátafélags Akraness. Á þinginu var talað um hvernig ungmenni geta haft áhrif, ásamt því hvernig þing virka. Þau mál sem kosið var um á ungmennaþingi munu síðan vera borin fram á Skátaþingi. Það var mikið fjör, skemmtilegur félagsskapur og æðislegur matur. Saddir skátar eru sáttir skátar!

Upphaflega átti þingið að vera á Sauðárkróki en vegna vandræða með rútu var það fært á Akranes. Einnig frestaðist þingið um einn dag vegna veðurs. Það gekk misvel hjá fólki að komast á þingið, ferðin hjá sumum var vandræðalaus en aðrir áttu í veseni með bilaða bíla. Til þess að komast á þingið, sameinaðist fólk í bíla og notfærði sér strætó og voru þá komin klukkan 10:00 á laugardagsmorgni. Fólk kom sér og dótinu sínu fyrir og það tók ekki langan tíma fyrir masið að byrja!

Þingstörf hófust með stæl klukkan 11:00 og kosið var um fundarstjóra, fundarritara og dagskránna. Næst var framsaga, umræður og afgreiðsla áskoranna. Þær voru margar og fjölbreyttar til dæmis kom sú áskorun um aukna vetrarskátun á höfuðborgarsvæðinu ásamt áskoruninni um nýja útgáfu skátahandbókar.

Lagabreytingartillögurnar fóru fram á sama hátt og áskoranirnar. Dæmi um lagabreytingartillögu sem borinn var fram á þinginu er: Að bæta skildi við efnisyfirliti í lög BÍS.

Nokkur met voru sleginn í ár! Fleiri buðu sig fram í ungmennaráð í ár en nokkru sinni fyrr, eða tíu frábærir skátar. Í núverandi og splunkunýja ungmennaráðinu er yngsti meðlimur í sögu ungmennaþings, sem er fæddur árið 2009. Fjórir af fimm meðlimum ungmennaráðs eru staðsettir utan Höfuðborgarsvæðisins og hafa þeir aldrei verið svo margir. Einnig er það í fyrsta sinn sem ein manneskja hlýtur hlutverk bæði sem meðlimur ungmennaráðs og sem áheyrnarfulltrúi ungmenna.

Næsti dagur fór í það að skemmta sér og njóta síðustu stundanna. Gerðar voru smiðjur fyrir ungmennin: eitt um fyrrverandi ungmennaþing sem Högni Gylfason sá um, hvernig á að skipuleggja viðburð? sem Jóhann Thomasson Viderö sá um og smiðja um svefn og mikilvægi þess sem Huldar Hlynsson sá um. Einnig var farið í menningarferð upp í Akranesveita og sund áður en við kvöddum hópinn sem við höfðum eytt skemmtilegri helgi með!

Ps. pítsan var æðisleg

Texti: Ungmennaráð

Skátar halda upp á 22. febrúar – Þankadaginn

Fri, 23 Feb 2024 15:02:00 GMT

Víðsvegar um heiminn er haldið upp á 22. febrúar en hann er kallaður Þankadagur og Stofnendadagurinn (e. Founder’s day).

Íslenskir skátar héldu upp á þennan dag á ýmsan hátt, sumir báru skátaklútinn eða skiptu um prófílmynd á facebook. Einnig fóru Harpa Ósk skátahöfðingi og Kolbrún Ósk Landsmótsstýra í skemmtilegt viðtal á Rás 1 .
Harpa Ósk skrifaði grein um mikilvægi skátastarfs og geðheilbrigði barna og birtist hún á vísi . Skátafélagið Mosverjar hélt hátíðarkvöldvöku og skátafélagið Kópar og Gildi héldu saman kvöldvöku sem var vel sótt.

Skátaævintýri á Útilífsnámskeiði

Tue, 20 Feb 2024 16:03:00 GMT

Helgina 9.-11. febrúar síðastliðinn stóðu Skíðasamband skáta og skátafélagið Klakkur fyrir Útilífsnámskeiði í Eyjafirði fyrir drótt- og rekkaskáta.

Námskeiðið er haldið árlega og að þessu sinni voru 20 þátttakendur á námskeiðinu, 11 skátar frá Klakki og 9 skátar af höfuðborgarsvæðinu ásamt foringjum.

Hópurinn að sunnan lagði af stað með rútu frá Skátamiðstöðinni í hádeginu föstudaginn 9. febrúar og voru mætt í Valhöll tilbúin í verkefni helgarinnar þegar námskeiðið var sett klukkan 18.

Markmið námskeiðsins er að vera hvatning til skátanna að stunda útivist að vetri til og kenna þeim hvernig best er að undirbúa sig fyrir slík ævintýri.

Til þess fá þau fræðslu um ýmislegt sem nauðsynlegt er að vita, meðal annars um viðeigandi klæðnað og búnað ásamt því að þjálfast í rötun og á gönguskíðum.

Að auki gerðu þátttakendur eldhús úr snjónum, sem nóg var af, en þar elduðu þau og borðuðu flestar máltíðir á meðan námskeiðinu stóð.

Einnig tjölduðu þau í snjónum og létu kuldan ekki á sig fá þegar þau gistu í tjöldunum seinni nóttina.

Það voru sáttir skátar sem héldu heim á sunnudegi.

Framkvæmdastjóri & Skátahöfðingi sóttu fund í Gilwell park

Tue, 20 Feb 2024 15:15:00 GMT

Helgina 9.-11. febrúar síðastliðinn sóttu Ragnar og Harpa fund skátahöfðingja og framkvæmdastjóra Evrópu í Gilwell Park á vegum Evrópustjórnar WOSM. Yfirskrift fundarins var sjálfbærni í skátastarfi og voru vinnulotur og fundir helgarinnar tileinkaðar því mest alla helgina. Í Gilwell park er góð aðstaða fyrir samkomur af þessu tagi, mörg skemmtileg og óhefðbundin rými í boði og hópurinn gisti í hefðbundnum skátaskálum á svæðinu. Fundinn sóttu yfir 50 fulltrúar 26 Evrópulanda auk fulltrúa Evrópustjórnar WOSM.

Fundir helgarinnar voru samkeyrðir að nokkru leiti á milli skátahöfðingja og framkvæmdastjóra en einnig voru vinnustofur sértaklega tileinkaðar öðrum hvorum hópnum. Það er frábært tækifæri að fá að mæta á fund þar sem aðrir einstaklingar sem sinna sömu stöðu í öðrum bandalögum ná að hittast og kynnast, deila hugmyndum og fá speglun á vandamál þvert á menningu og landsvæði.

Meðal fyrirlestra og vinnusmiðja voru
· Innleiðing sjálfbærnihugsjónar í skátastarf
· Seigla bandalaga
· Gagnadrivin ákvarðanataka
· Geðræn heils
· Sjálfbærni í rekstri
· Skautun í þjóðfélögum í Evrópu
· Gegnsæji í stjórnun bandalaga
· Þátttaka ungmenna í stjórnun bandalaga

Umræður um stefnumótun lituðu stóran hluta föstudags og laugardags og komu þá fram að mikilvægustu þættir flestra bandalaga voru vöxtur, dagskrármál, fjárhagslegur stöðugleiki, efling sjálfboðaliða og sjálfbærni.

Það var góð tilfinning og heilmikil upplifun að funda og ræða við alþjóðlega kollega á stað sem hefur mikla þýðingu fyrir upphaf skátastarfs í heiminum. Ekki skemmdi fyrir að við fengum að sjá Kúdúhornið fræga og silfurúlf BP sjálfs. Samkoman skilaði okkur miklum innblæstri og nýjum hugmyndum, auk þess var gott að fá staðfestingu að íslenskt skátastarf er á góðri leið í samanburði við nágrannaþjóðir okkar. Einnig er mikilvægt að átta sig á því að sameiginlegar áskoranir skátastarfs í Evrópu, hvort sem þátttakendafjöldi landsins sé 1000 eða 100.000. Frábær og vel skipulögð helgi að baki þar sem skátahöfðingi og framkvæmdastjóri koma til baka innblásin og betur tengdari en fyrir fund.

Sex dróttskátar feta fótspor Suðurskautsfara

Mon, 19 Feb 2024 15:14:00 GMT

Sex dróttskátar frá félögunum Árbúum, Fossbúum, Garðbúum og Kópum sóttu um síðastliðinn ágúst um á fá að taka þátt í Vetraráskorun Crean, þá hófust 4 undirbúningshelgar þar sem krakkarnir fengu allan þann grunn sem þau þurftu fyrir aðalvikuna.

Þann 9. febrúar byrjaði aðalvikan með því að allir mættu á úlfljótsvatn, Íslendingarnir hittu loks Írana og kepptust við að ná að tala við alla.

Yfir vikuna var farið í æfingargöngur, fyrst upp í Fossbúð svo Írarnir gætu áttað sig á aðstæðum og veðri, seinni gangan var stór hringur gegnum skóglendi, meðfram vatni, yfir tún og fjall.

Þess á milli var ýmis konar kennsla og fræðsla, veðurfræði, hvernig á að ganga í línu í fjallafæri og sagt frá ferðum Tom Crean.

Miðvikudagsmorgunn 14. febrúar vöknuðu allir eldsnemma til að klæða sig upp og borða morgunmat. 4 flokkar biðu eftir því að byrja að ganga, kl 07:00 fór fyrsti flokkurinn, kl 07:20 fór næsti flokkur, kl 07:40 fór þriðji flokkurinn og kl 08:00 fór síðasti flokkurinn. Flokkarnir gengu með flokksforingjum og björgunarsveitarmönnum, héldu fyrst upp að Fossbúð og þaðan í Grafningsrétt upp í fjöll og að hellisheiðinni. Stefnan var tekin á skátaskálana 3 sem eru saman á heiðinni: Þrym, Kút og Bæli.

Gangan var krefjandi og þegar komið var niður að skálunum um kl 17:00, fögnuðu margir þeim risastóra áfanga sem þau höfðu náð, mánuðir af þjálfun hafði þarna skilað sér í risastóru afreki sem var að feta fótspor Tom Crean. Allir elduðu sér kvöldmat og fóru þreytt og sátt að sofa eftir viðburðaríkan dag. Daginn eftir var allur búnaður tekinn saman og hópuðu sér allir saman fyrir framan Kút til að taka hópmyndir. Eftir fallegar pósur héldu allir af stað í áttina að Hellisheiðavirkjun þar sem rútan myndi taka alla í bæinn. Þegar komið var að virkjuninni tóku allir bakpokana sína af sér, fengu sér að borða og nutu þess að setjast niður. Þegar komið var í bæinn tóku allir sundfötin sín og haldið af stað í laugardalslaug enda fátt betra eftir slíka göngu.

Lokadaginn fóru allir í menningargöngu um Reykjavík, þegar líða fór að kvöldi var komið að loka athöfninni, Harpa Ósk Skátahöfðingi kom þá í heimsókn og afhenti viðurkenningarnar fyrir þátttöku á vetraráskorun Crean, allir þátttakendur hlutu viðurkenningu, enda óstöðvandi hópur.

Fagnað var með pizzaveislu og síðan var kveðjustundin mikla og haldið var heim á leið eftir langa, krefjandi og góða viku.

Við þökkum írsku skátunum frá Crean Challenge fyrir þennan magnaða viðburð.

Öflugir skátar hefja Gilwell vegferðina

Fri, 16 Feb 2024 16:06:00 GMT

Nýlega héldu 14 öflugir skátar af stað í Gilwell vegferðina en þau luku fyrsta þrepi af þremur helgina 2-4. febrúar og bera núna stolt Gilwell hnútinn eftirsótta.

Á námskeiðið mættu skátar víðsvegar að, frá Búðardal, Reykjavík, Mosfellsdal og Kópavogi, sum ný á Gilwell vegferðinni en önnur eru að koma aftur til að klára.

Hópurinn lét ekki ófærð og vont veður á sig fá og hóf námskeiðið í Mosverjaheimilinu þar sem farið var yfir helstu leiðtogastíla og hvernig leiðtogar við viljum vera, bæði í skátastarfi sem og í eigin lífi.

Á laugardeginum lá leiðin austur á Úlfljótsvatn og hófst þar með námskeiðið og flokkarnir litu dagsins ljós. Dagskráin hófst með stórskemmtilegum póstaleik þar sem skátaaðferðin var í fyrirrúmi. Dagskrá laugardagsins miðaði svo að gildum í skátastarfi og leiðtogaþjálfun.

Hefðbundin Gilwell kvöldvaka var á sínum stað, þátttakendur slógu í gegn með frumsömdum skemmtiatriðum þar sem persónur úr Njálu skelltu sér á Gilwell! Kvöldinu lauk svo í Ólafsbúð þar sem við ornuðum okkur við eldinn og grilluðum smors og pylsur.

Á sunnudag var rýnt í leiðtogalilju WOSM sem stefnumótunar og verkefnastjórnunartæki. Nú tekur við spennandi tími þar sem Gilwell nemarnir fara að skapa verkefnin sín og var því sunnudagurinn nýttur undir hugarflug og rýni á það hvernig hægt sé að bæta skátastarf á Íslandi.

Þátttakendahópurinn var einstaklega samstilltur og til í allar þrautir og verkefni sem leiðbeinendum datt í hug að leggja fyrir þau. Það gerði helgina sérlega skemmtilega fyrir okkur öll. Yndislegi Gilwell skálinn heldur vel utan um hópinn þar sem sagan og táknræna umgjörðin eru í aðalhlutverki og koma okkur í Gilwell stemminguna.

Næsta þrep verður í júní þar sem við munum búa í tjaldbúð og reynir þá meira á hópastarf og samvinnu.

Skemmtilegt viðtal um skátastarf í hlaðvarpinu „Þú veist betur“

Fri, 16 Feb 2024 15:53:00 GMT

Hér

Skátar á skátamóti í vetrarhríð

Mon, 29 Jan 2024 15:01:00 GMT

Vetrarmót Reykjavíkurskáta var haldið í áttunda sinn um helgina í útivistarparadísinni á Úlfljótsvatni. 140 skátar sóttu mótið að þessu sinni.

Markmið með mótinu var fyrst og fremst að kenna ungum skátum á að takast á við fjölbreyttar áskoranir að vetrarlagi og að efla samstarf milli skátafélaganna í Reykjavík. Þau verkefni sem skátarnir þurftu að takast á við um helgina voru sig og klifur í 8 metra háum turni, elda mat á prímus, búa til kyndil og að auki hefðbundin skátadagskrá eins og póstaleikir, gönguferðir kvöldvaka og risa næturleikur.

Tjöld sett upp í milli stórhríða

Eitt mest krefjandi verkefni Vetrarmótsins var að setja upp tjaldbúðir fyrir elstu skátanna. Um það bil 20 skátar gistu í tjöldum í tvær nætur. Veðrið var bæði mjög slæmt og en einnig komu kaflar þar sem var heiðskírt og logn. Skátarnir skemmtu sér konunglega þótt veðrið hafi barið hressilega á þeim en það verður eflaust það sem mun standa upp úr þegar litið er til baka að hafa tekist á við svona krefjandi aðstæður.

Rosaleg útivera og mikilvæg næring

Neistinn kveiktur fyrir 2024

Wed, 17 Jan 2024 17:10:00 GMT

Síðastliðna helgi komu hátt í 80 manns saman á Neista sem haldinn er árlega í upphafi janúar á Úlfljótsvatni. Þátttakendur voru skátar, 16 ára og eldri, sem lærðu nýja færni, kynntust öðrum skátum og byrjuðu skátaárið á skemmtilegan hátt.

Neisti er færninámskeið þar sem boðið er upp á margvíslegar smiðjur og fá þátttakendur að velja sína eigin dagskrá.

Þema Neista að þessu sinni var Landsmóts þar sem styttist í Landsmót skáta í sumar. Þemað var nýtt í flokkaskiptingu þar sem flokkar helgarinnar voru félög á leið á landsmót en einnig hafði þemað áhrif á dagskrá helgarinnar.

Á föstudegi var setningarathöfn þar sem skipt var í flokka og héldu þau svo af stað í póstaleik. Í póstaleiknum gafst flokkunum tækifæri á því að kynnast betur, þau bjuggu til verndargrip fyrir félagið sitt og tókust á við ýmis verkefni, meðal annars að búa til fallhlíf fyrir egg svo það gæti fallið úr klifurturninum og lent í heilu lagi.

Smiðjurnar voru svo keyrðar á laugardegi og fyrir hádegi á sunnudag en boðið var alls upp á 18 smiðjur yfir helgina. Smiðjurnar voru fjölbreyttar en m.a. var í boði smiðjur um öryggi í skátastarfi, snjallgöngur, landsmóts tjaldbúðina, leikjastjórnun og valdeflingu fálkaskáta.

Að sjálfsögðu voru Eldleikarnir á sínum stað á laugardagskvöldi ásamt kvöldvöku sem nýjir kvöldvökustjórar stýrðu eftir að hafa verið þátttakendur á smiðju um slagverk og kvöldvökur.

Eftir hádegi á sunnudegi kom mótsstjórn Landsmóts skáta 2024 og sá um póstaleik sem gaf þátttakendum innsýn í það við hverju má búast í sumar.

Sérstakar þakkir fá allir þeir sjálfboðaliðar sem komu að helginni og gerðu þennan viðburð að veruleika.

Við hlökkum til að sjá ykkur á Landsmóti í sumar!

Eflum óformlegt nám – menntaráðstefna skáta í París

Tue, 16 Jan 2024 15:12:00 GMT

Bandalag íslenskra skáta sendi 5 fulltrúa á vel heppnaða menntaráðstefnu skáta í París á dögunum. Á ráðstefnunni var áherslan lögð á að styðja og efla menntunargildi skátastarfs um allan heim. Yfir 500 skátar mættu á ráðstefnuna ásamt fulltrúum fjölda stofnana og samtaka.

Fulltrúar okkar dreifðu sér á ýmsar málstofur þar sem fjölbreytt málefni voru til umræðu. Sem dæmi má nefna:

Hvernig á að stýra sjálfboðaliðastarfi og fá fleiri að borðinu?
Mikilvægi þess að fá pásu frá símanum
Hvaða leiðir getur skátastarf farið í átt að heimsfrið?
Hvernig stuðlum við að vitundarvakningu innan skátanna í umhverfis- og loftslagsmálum?
Hvert stefnum við sem alþjóðahreyfing?

Að auki sóttu fulltrúarnir mjög áhugaverða fræðslu um rafræn skátamerki, en nú stendur yfir þróun á rafrænu alþjóðlegu kerfi þar sem skátar geta hlaðið upp og fengið fleiri merki fyrir hæfni sína og unnin verkefni.

Vegvísir fyrir menntun í skátastarfi

Við lok ráðstefnunnar voru málefni hennar og umræður tekin saman og útbúinn vegvísir fyrir skátastarf. Vegvísirinn inniheldur 10 leiðir til að efla innihaldsríkara og aðgengilegra skátastarf. Vegvísinn má finna hér.

Sá lærdómur sem þátttakendur okkar taka með sér heim verður nýttur vel til þess að efla innra starfið.

Íslenskir skátar fóru til Noregs að taka þátt í Ung i Norden

Wed, 10 Jan 2024 16:42:00 GMT

Helgina 10.-12. nóvember 2023 lögðu þrír ungir skátar land undir fót og ferðuðust til Oslóar í Noregi. Þar var haldin viðburðurinn Ung i Norden sem er samstarf Bandalaga allra Norðurlandana. Þar koma saman ungir skátar frá öllum norðurlöndunum og kynnast og fræðast um ýmis viðfangsefni. Í ár var viðfangsefnið Flóttamenn og hvernig það er að vera flóttamaður.

Það var notast við margskonar aðferðir til að lærdómar og vitneskju vakningar. Margir fyrirlestrar voru haldnir þar sem farið kynnt ýmis málefni sem skipuleggjendurnir vildu leggja áherslu á. Fjallað var um hulinn átök sem eru átök sem eru ekki í umfjöllun í fjölmiðlum og því verða þau “hulin” sem og hver er skilgreiningin á flóttamanni.

Það var einnig farið í leik þar sem markmiðið var að fá þátttakendur til að reyna að setja sig í spor flóttamanna. Vissulega var leikurinn hannaður fyrir en yngri skáta en voru á þessum viðburði svo að megin markmið leiksins náði ekki alveg til skila.

Á laugardagskvöldinu var horft á mynd sem heitir Invisible Republic, hún var afar áhugaverð. Myndin fjallaði um átökin í Nagorno-Karabakh. Konan sem gerir myndina er fréttamaður frá armeníu og býr á þessu svæði sem átökin eru á og er á svæðinu á meðan þau standa yfir.

Síðan var svona pallborðsumræður þar sem komu sérfræðingar frá Noregi í þessum málefnum. Þar gátu þátttakendur spurt spurninga og var þetta mjög áhugaverður líður í dagskrá viðburðarins. Viðburðin kláraðist síðan með fallegri athöfn þar sem allir skátarnir kveiktu á kertum og sungu bræðralagssöngin á sínu eigin tungumáli. Noregsfararnir mæla með þessum viðburði fyrir alla unga skáta. Maður kynnist ekki bara nýju fólki heldur líka nýjum skátamenningum.

Höfundur: Reynir Tómas Reynisson

ESC verkefni – Aðgengilegt skátastarf

Fri, 15 Dec 2023 10:49:00 GMT

Starfsárið 2023-2024 vinnum við að verkefni sem snýr að því að auka þátttöku barna af erlendum uppruna í skátastarfi. Þetta er okkur mjög mikilvægt verkefni, við höfum verið að leggja aukna áherslu á innglindingu í skátastarfi og er þetta einn liður í því að gefa öllum börnum tækifæri á að kynnast skátastarfi.

Verkefnið hefur hlotið styrk úr samfélagsverkefnahluta Erasmus+ áætlunarinnar og eru verkþættir verkefnisins eftirfarandi:

Bjóða starfsfólki og sjálfboðaliðum hreyfingarinnar upp á fræðslu
Þýða dagskrárefni skáta
Þýða bókina “Hvað er skátastarf?” ætlað börnum, foreldrum og starfsfólki til kynningar
Koma á tengslaneti fullorðinna skáta með erlendan uppruna búsett á Íslandi og hvetja þau til þátttöku.

Forsenda þess að verkefnið takist vel er að við sem hreyfing leggjumst öll á eitt að gera starfið aðgengilegt, á vettvangi bandalagsins en einnig á vettvangi skátafélaganna.

Því er fyrsti verkþátturinn fræðsla fyrir sjálfboðaliða, starfsfólk og önnur áhugasöm þar sem við fáum tækifæri á því að öðlast innsýn í reynsluheim fólks af erlendum uppruna á Íslandi og hvað aftrar þátttöku þeirra í æskulýðsstarfi.

FJÖLMENNINGARFRÆÐSLA MANNFLÓRUNNAR

Fyrsta fræðsluerindið var haldið í nóvember en þá kom Chanel Björk Sturludóttir, stofnandi Mannflórunnar, til okkar og hélt fræðslu um fjölmenningu.

Chanel kom með ýmsan fróðleik og upplýsingar um hvernig íslenskt samfélag er byggt upp með þátttöku einstaklinga með ólíkan bakgrunn, fjölda ólíkra og sameiginlegra uppruna og einnig einstaklingar sem tilheyra mörgum fjölbreyttum menningarheimum.

Hún kom einnig með fræðslu varðandi ýmiss hugtök sem snertir fjölmenningu og mikilvægt fyrir virka einstaklinga í samfélagi að vera meðvituð um eins og

Staðalímyndir
Kynþátttafordóma
Menningarfordóma
Öráreiti
Hvítleika
Forréttindi
Forréttindi hvítra

Við hvetjum öll að fræðast um þessi mikilvægu málefni en þau sem ekki komust á fræðsluna hjá Chanel geta nálgast ítarefni hjá starfsmanni síns skátafélags.

Við vonum að sem flest sjái sér fært um að mæta á aðrar fræðslur á vorönn.

Ef þið hafið hugmyndir að áhugaverðum fræðsluerinudm má endilega senda þær á skatarnir@skatarnir.is .

Kraftur í fálkaskátum Skjöldunga

Thu, 14 Dec 2023 13:50:00 GMT

Í nóvember voru fálkaskátar í skátafélaginu Skjöldungum fyrstu þátttakendur FálkaKrafts, sem eru ný leiðtoaþjálfunarnámskeið haldin af Leiðbeinendasveitinni.

Á FálkaKrafti fá þátttakendur tækifæri á því að taka þátt í dagskrá sem þjálfar þau í flokkastarfi, að plana-gera-meta og samvinnu. Þátttakendur fá færi á því að kynnast gildum skátahreyfingarinnar í gegnum leiki og reynslunám og eru þau hvött til að vinna að samfélagsverkefnum að viðburði loknum.

„GAMAN AÐ SJÁ HVAÐ KRAKKARNIR ERU FLOTT“

Helena Sif, annar sveitarforingi fálkaskátanna í Skjöldungum, var mjög ánægð með FálkaKraft og fannst gaman að fylgjast með því hversu vel skátarnir þeirra stóðu sig á viðburðinum.

„Þetta gekk vel og var bara kósý“ segir Helena en á FálkaKrafti koma tveir aðilar úr Leiðbeinendasveitinni og keyra dagskrána með fálkaskátunum. Helena sagði það vera mjög þægilegt í ljósi alls sem sjálfboðaliðar eru oft að fást við innan og utan skátastarfs að fá tilbúna dagskrá og aðila sem sjá um hana.

„Við þurftum ekkert að gera nema vera stolt“ sagði Helena en einnig fannst henni gaman að fá nýja að starfinu og sjá þau hvetja skátana þeirra áfram til að vinna að verkefnum sem þeim hefði kannski ekki dottið í hug að gera sjálf. Það helsta sem stóð uppúr fyrir foringjana var „að sjá hvað krakkarnir eru flott og fá einhvern nýjan inn sem sýnir fram á hvað er hægt í skátastarfi. The sky is the limit í rauninni en þau taka ekki alltaf mark á því þegar það kemur frá okkur foringjunum“

Dagskráin gekk vel og höfðaði vel til skátanna, viðfangsefnin voru fjölbreytt og var ólíkt hvað stóð uppúr hjá þátttakendum að sögn Helenu. Það sem hefur þó farið mest fyrir eftir að viðburðinum lauk eru samfélagsverkefni en einn dagskrárliður FálkaKrafts var að flokkarnir áttu að velja sér samfélagsverkefni sem þeim þótti mikilvægt. Í framhaldi að því fóru þau í lýðræðisleik þar sem hver flokkur kynnti sína hugmynd og svo var kosið um bestu hugmyndina sem þau myndu vinna saman að sem sveit. Að auki voru þau hvött til að vinna samt sem áður að sínum samfélagsverkefnum og hafa fálkaskátarnir svo sannarlega gert það en þau hafa þegar framkvæmt tvö samfélagverkefni.

JÓLABALL FYRIR ALLA FJÖLSKYLDUNA

Einn flokkurinn vildi halda jólaball fyrr fjölskyldur í hverfinu og voru þau búin að skipuleggja dagskrá ballsins sjálf. Þau hönnuðu auglýsingar fyrir jólaballið á skátafundum en fóru svo sjálf að dreifa þeim um hverfið í sínum frítíma. Einnig sáu þau um að baka veitingar til að bjóða uppá á ballinu heima hjá sér.

Jólaballið var haldið í skátaheimili Skjöldunga 9. desember og voru um 20 manns sem mættu, hittu jólasveina og skreyttu piparkökur.

DÓSASÖFNUN FYRIR GRINDVÍKINGA

Annar flokkur var mjög áhugasamur um að safna dósum til að styðja söfnun Rauða Krossins vegna jarðrhræringanna við Grindavík. Vörðu þau þrem fundum í að ganga í hús og safna flöskum og dósum úr hverfinu og náðu þau að safna 51.442 krónum sem afhentar voru Rauða Krossinum.

Hér má lesa frétt á vef Rauða Krossins um dósasöfunina.

BÓKA FÁLKAKRAFT

FálkaKraftur er haldinn á vettvangi félagsins en nokkur félög geta einnig sameinast um að halda námskeiðið. Skátafélögin sem óska eftir Fálkakrafti fyrir sínar fálkaskátasveitir útvega húsnæði fyrir námskeiðin (t.d. skátaheimili eða skátaskála) og þannig kemur Fálkakrafturinn til skátafélaganna! Hvert námskeið stendur yfir í 5 klukkustundir og því er tilvalið að prjóna lengri dagskrá við Fálkakraftinn, t.d. sveitarútilegu yfir alla helgina.

Langar þig að fá FálkaKraft í þitt félag? Hafðu samband við Leiðbeinendasveitina með því að senda þeim tölvupóst á leidbeinendasveit@skatarnir.is .

Læst inni í Garðbúaheimilinu

Thu, 23 Nov 2023 16:18:00 GMT

Síðastliðinn þriðjudag spreyttu róverskátar sig á nýju flóttarými (escape room) í Garðbúaheimilinu. Flóttarýmið var sett upp sem dagskrá fyrir róverskáta og eldri skáta og fékk styrk frá Evrópusambandinu. Þetta flóttarými, Föst á fjöllum, var með skátaþema þar sem skátaflokkur í fortíðinni fór í útilegu í fjallaskála og dularfullir atburðir áttu sér stað. Skátarnir sem prófuðu flóttarýmið leystu svo þrautir og gátur til að komast að því hvað hefði gerst og opna lásinn á herberginu til að komast sjálf út.

Viðburðurinn var vel heppnaður og er nú hægt að fá allan búnað í flóttarýmið lánaðan til að setja upp í sínu skátafélagi. Þeir sem hafa áhuga á að setja upp flóttarýmið fyrir dróttskáta, rekkaskáta, róverskáta eða eldri hafið samband við skatarnir@skatarnir.is

Crean þátttakendur gengu frá sólarupprás til sólseturs

Wed, 22 Nov 2023 15:45:00 GMT

Á laugardaginn síðasta skunduðu af stað hressir skátar í fjallgöngu. Þetta var þriðja undirbúningsferðin í Crean Vetraráskoruninni ´23-´24. Í fyrri undirbúningsferðum hafa þau gengið að Hafravatni og einnig gengið um Hvaleyrarvatn.
Að þessu sinni var gengið frá Kjósinni upp á Trönu og þaðan yfir á Móskarðshnúka. Síðan lauk göngunni niðri við skátaskálann Þrist.

Þátttakendurnir byrjuðu gönguna á því að skoða bestu gönguleiðina á kortum og skipuleggja sig. Svo lagði hópurinn af stað við sólarupprás. Létt var yfir hópnum og öll í góðu skapi, skátarnir styttu sér stundir við gönguna með léttum orðaleikjum og spjalli á meðan þau nutu útsýnisins. Víðtækt landslag var í göngunni eins og tún, grjótaslóðar og sandsteinar en svo var einnig smávægis snjór og klaki á toppi Móskarðshnúka og Trönu. Þegar hópurinn var kominn að Móskarðshnúkum var sólin byrjuð að lækka á lofti og gengu þau niður hlíðina við sólsetrið.

Gangan tók um það bil 7 klukkustundir og gengið var 12.5 km. með 1.137m. hækkum.

Hópurinn byrjaði að elda sér verðskuldaðan kvöldmat þegar komið var niður af Móskarðshnúkum og svo var hugguleg kvöldstund með söng, eld í arninum og spjalli. Þau fóru sæl í háttinn bæði inni í Þrist og einnig úti í tjaldi. Haldið var heim á leið fyrir hádegi á sunnudegi.

Boð um aðstoð til Grindvíkinga

Fri, 17 Nov 2023 15:47:00 GMT

Skáti er hjálpsamur og mörg skátafélaganna vilja bjóða Grindvíkingum aðstoð ef á þarf að halda og hafa þegar auglýst eða látið Rauða krossinn vita af því. Í þeim hafsjó upplýsinga sem internetið getur verið er samantektin til að einfalda þeim sem þurfa að finna upplýsingar á einum stað. Athugið að samantektin tekur breytingum eftir því sem upplýsingar um fleiri boð berast og ef einhver úrræða eru nýtt þannig þau standa ekki lengur öðrum til boða.

SKÁTAFÉLAGIÐ GARÐBÚAR

Skátaheimili Garðbúa í Hólmgarði

Afnot af húsnæði

Skátafélagið Garðbúar bjóða Grindvíkingum sem vantar enn húsaskjól afnot af húsnæði félagsins að Hólmgarði 34, 108 Reykjavík. Einnig bjóðum við fram skátaskálann okkar Lækjarbotna undir hlíðum Selfjalls ofan við Heiðmörk, ca 14 km út fyrir bæjarmörk.

Skátaheimilið

Í húsnæði Garðbúa er einn stór salur sem tekur um 50 manneskjur. Inn af salnum er annað rými sem er hálfgerð setustofa og salerni með aðgengi fyrir fatlaða og sturta. Það eru 3 herbergi (föndur-, spila- og flokkaherbergi). Skátafélagið á töluvert magn af dýnum sem er velkomið að nota. Það er góð eldhúsaðstaða, tvö salerni eru við forstofu og lítið þvottahús. Skátaheimilið er staðsett í fjölbýli og þarf að taka tillit til nágranna okkar varðandi hávaða og ónæði. Lágmarka þarf hávaða eftir kl. 22:00. Ef fólk frá Grindavík vill einhverjar frekari upplýsingar um Skátaheimilið Garðbúa má hafa samband við Aldísi Líf í síma 848-6167 og netfangið gardbuar@gardbuar.com .

Lækjarbotnar

Lækjarbotnar, skátaskálinn er mjög rúmgóður og hann er á tveimur hæðum með anddyri, matsal og eldhús á neðri hæðinni. Í eldhúsinu er eldavél og bakaraofn svo er einnig gasgrill á staðnum. Á efri hæðinni er síðan svefnloft með rúmgóðum tveggja manna kojum þar sem 30 manns (fullorðnir) geta gist. Inn fyrir svefnloftið er síðan lítið “foringja”herbergi þar sem fjórir fullorðnir geta gist í kojum. Ef fólk frá Grindavík vill frekari upplýsingar um Lækjarbotna má hafa samband við Svavar í síma 896-6056 og netfangið svavar321@gmail.com .

Fyrirvari um neyslu áfengis/vímuefna og tóbaks

Í skátaheimilinu og Lækjarbotnum er neysla áfengis/vímuefna og tóbaks bönnuð.

SKÁTAFÉLAGIÐ HEIÐABÚAR

Skátaheimili Heiðabúa er staðsett á Hringbraut 101, 230 Reykjanesbæ

Nauðsynjasöfnun

Skátafélagið Heiðabúar opnaði skátafélagið sitt fyrir nauðsynjasöfnun fyrir Grindvíkinga. Hægt er að fylgjast með facebook síðu Heiðabúa fyrir nánari upplýsingar um hvar og hvenær er hægt að nálgast munina sem hafa safnast.

Frítt á skátafundi

Skátafélagið Heiðabúar bjóða Grindvíkingum frítt á skátafundi fram að jólafríi að minnsta kosti. Heiðabúar halda úti starfi fyrir börn frá 8-19 ára aldri. Fundartímanna má finna einnig finna á facebooksíðu félagsins hér .

SKÁTAFÉLAGIÐ HRAUNBÚAR

Frítt á skátafundi

Skátafélagið Hraunbúar í Hafnarfirði bjóða Grindvíkingum að mæta frítt á skátafundi fram að jólafríi skátastarfs í félaginu sem hefst 20. desember. Fundartíma má finna á www.hraunbuar.is/sveitirnar .

Lán á húsnæði til hýbílis

Hraunbúar opnuðu gistiheimilið sem við höfum í rekstri á sumrin fyrir Grindvíkinga. 5 herbergi eru til staðar sem verið er að nýta þessa stundina. Salurinn hefur verið innréttaður sem setustofu og matsalur fyrir þau sem dvelja á gistiheimilinu og tjaldsvæðinu.

Kostnaðarlaus dvöl fyrir húsbíla og hjólhýsi með aðgang að eldhúsi, sal og salerni.

Tjaldsvæðið á Víðistaðatúni er opið fyrir Grindvíkinga sem vilja dvelja í húsbílnum eða hjólhýsinu sínu sér að kostnaðarlausu. Þeir sem dvelja á tjaldsvæðinu hafa aðgang að eldhúsi, salnum og salerni í skátaheimlinu okkar.

Samverustund fyrir Grindvíkinga

Hraunbúar og St. Georgs gildið ætla að opna salinn fyrir Grindvíkingar þann 17 nóvember klukkan 16-20 og allir Grindvíkingar eru velkomnir að nýta sér það, til að koma saman og spjallað, fengið sér kaffi og með því. Börnin leikið sér í ótalmörgum spilum og dóti sem er í boði eða horft á sjónvarpið. Ef áhugi er fyrir því verður félagið með fleiri slíka viðburði.

Hafa samband við Hraunbúa

Ef fólk frá Grindavík vill einhverjar frekari upplýsingar má hafa samband við brynjar@hraunbuar.is og í síma 895-0906 .

SKÁTAFÉLAGIÐ LANDNEMAR

Skátaheimili Landnema í Háuhlíð 9

Frítt á skátafundi fyrir unglinga

Skátafélagið Landnemar bjóða Grindvíkingum á aldrinum 13-15 ára að mæta frítt á skátafundi fram að jólafríi skátastarfs í félaginu sem hefst 13. desember. Fundartímar eru á fimmtudögum frá 17:45-19:45 í Háuhlíð 9. Því miður er fullt og ekki mannskapur til að taka á móti fleirum á öðrum aldursbilum.

Afnot af húsnæði fyrir einstaklinga eða skipulagða starfsemi

Þeim sem vantar enn húsaskjól geta fengið afnot af húsnæði félagsins en í húsinu eru dýnur til afnota. Í húsnæðinu eru fimm lítil herbergi, salur, fjögur baðherbergi og eldhús. Í garðinum er frábært útisvæði og hefur húsið verið nýtt í fortíð sem frístundaheimili. Húsið er tilvalið til að nýta í samkomur eða aðra skipulagða starfsemi á dagtíma.

Ef fólk frá Grindavík vill einhverjar frekari upplýsingar má hafa samband með tölvupósti í landnemi@landnemi.is .

SKÁTAFÉLAGIÐ KÓPAR

Skátaheimili Kópa á Digranesvegi

Frítt á skátafundi

Skátafélagið Kópar bjóða Grindvíkingum frítt á skátafundi fram að jólafríi að minnstakosti sem hefst 19.desember með kvöldvöku það kvöld. Kópar halda úti starfi fyrir börn frá 8-19 ára aldri. Fundartímanna má finna á kopar.is

Afnot yfir daginn af húsnæði fyrir barnastarf eða aðra starfsemi

Skátafélagið Kópar tilbúið að bjóða fram húsnæðið sitt til afnota fyrir starfsemi á daginn svo sem leik- og grunnskóla eða aðra starfsemi sem er á daginn. Húsnæðið er rúmgott og bjart með mörgum herbergjum, mjög vel útbúnu eldhúsi og veislusal sem rúmar tugi manns í sitjandi borðhaldi. Ef fólk vill frekari upplýsingar þá er hægt að hafa samband við félagsforingjann Heiðu Hrönn með að senda póst á heidahronn@kopar.is eða í síma 693-8042 .

SKÁTAFÉLAGIÐ STRÓKUR

Staðsett í Breiðumörk 22, 810 Hveragerði, Netfang: skatafelagidstrokur@gmail.com

Nauðsynjasöfnun

Skátafélagið Stókur opnaði skátafélagið sitt fyrir nauðsynjasöfnun fyrir Grindvíkinga. Hægt er að fylgjast með facebook aðgangi Stróks hér fyrir frekari upplýsingar um hvernig hægt sé að nálgast söfnunina.

SKÁTAFÉLAGIÐ VÍFLAR

Húsnæði skátafélagsins Vífils og Hjálparsveit skáta í Garðabæ.

Frítt á skátafundi

Vífill býður ungmennum frítt á skátafundi fram að jólafríi, félagið heldur úti starfi fyrir börn og ungmenni 7-19 ára. Hægt er að finna upplýsingar á vifill.is .

SKÁTAFÉLAGIÐ VOGABÚAR

Skátaheimili Vogabúa í Logafoldi

Skátafélagið Vogabúar hefur opnað skátaheimilið sitt fyrir Grindvíkingum og hefur fólki þegar verið komið fyrir í því.

ÚTILÍFSMIÐSTÖÐ SKÁTA Á ÚLFLJÓTSVATNI

Aðstaða skátanna á Úlfljótsvatni

Lán á aðstöðu:

Útilífsmiðstöð skáta býður Grindvíkingum og stjórnvöldum afnot af svæði Skátamiðstöðvarinnar á Úlfljótsvatni. Boðin eru 60 gistirými, sameiginleg eldhúsaðstaða, matssalur og salur ásamt þeirrar náttúru og leiksvæða sem svæðið hefur uppá að bjóða. Útilífsmiðstöðin er staðsett við Úlfljótsvatn og má skoða betur á ulfljotsvatn.is . Taka má fram að einnig er hægt að fullnýta aðstöðuna fyrir leikskóla/skóla árgang. Ef fólk frá Grindavík og/eða stjórnvöld/bæjarfélag Grindavíkur vill frekari upplýsingar má hafa samband við Ragnar í síma 869-7817 og netfangið ragnar@skatarnir.is

Fálkaskátar könnuðu allan Grafarvog á Fálkaskátadegi 2023

Fri, 10 Nov 2023 16:26:00 GMT

Skátafélagið Vogabúar bauð fálkaskátum Íslands í heimsókn til sín í Grafarvoginn að taka þátt í ratleik um allt hverfið. Fálkaskátarnir fengu ýmsar vísbendingar um áhugaverða staði í Grafarvoginum sem þau áttu að finna til að kynna sér staðinn nánar eða leysa einhver verkefni á staðnum. Kalt var í veðri og mikill vindur en fálkarnir létu það ekkert á sig fá og héldu ótrauð áfram að skoða hverfið allt hverfið. Flokkarnir völdu sína eigin leið og fóru hóparnir meðal annars á Geldingarnes, í Hallsteinagarð, í Gufunes og að Korpúlfsstöðum áður en allir hóparnir hittust í skátaheimili Vogabúa.

Þar fengu þau sér verðskuldað heitt kakó að launum og skoðuðu sig um skátaheimili Vogabúa. Myndasýning frá deginum var sýnd á skjávarpa í salnum og skátarnir léku sér fyrir utan á meðan þau gæddu sér á kakói, kexi og kleinum. Að deginum loknum voru nokkrir hreyfisöngvar sungnir og var slitið með stórri hópmynd.

11 öflugir leiðtogar luku Gilwell þjálfun um helgina

Wed, 08 Nov 2023 15:05:00 GMT

Sunnudaginn 5.nóvember síðastliðinn fengu 11 kraftmiklir leiðtogar í skátahreyfingunni afhent Gilwell einkennin sín. Þessi öflugi og samheldni hópur hefur unnið hörðum höndum að þessu takmarki frá því í byrjun árs. Markmið Gilwell þjálfunarinnar er að gera skáta að betri og meðvitaðri leiðtogum, bæði í skátastarfi og í eigin lífi. Vegferðin hófst í janúar þar sem áhersla var lögð á gildi skátahreyfingarinnar og eigin gildi þátttakenda.

Í júní gisti hópurinn í tjöldum á Úlfljótsvatni í 5 daga þar sem þjálfun fór fram bæði úti og inni. Hópurinn sinnti verklegum þáttum sem tengdust tjaldbúð og útivist en einnig voru huglægari þættir eins og lýðræði í barna og ungmennastarfi og leiðir til að leysa ágreining og samskiptareglur í þéttum vinnuhópum.

Nú um helgina var svo lagður lokaásetningur um að bæta heiminn í gegn um skátastarf og að verða betri leiðtogi. Við fengum mjög áhugaverða gesti sem fræddu okkur um áhrif skátastarfs á þeirra líf og leiðtogahæfni og þökkum þeim fyrir innilitið. Það voru stoltir og metnaðarfullir skátaforingjar sem luku námskeiðinu og ekki síður stoltir leiðbeinendur.

Námskeiðaröðinni hefur nú verið lokið og við bíðum spennt eftir næsta hóp sem byrjar í febrúar 2024.

Við óskum þessum flottu Gilwell skátum innilega til hamingju með þennan merka áfanga og bjóðum þau velkomin í stærstu skátasveit í heimi.
Við hlökkum til að sjá afrek þeirra og næstu skref í skátastarfi.

Gilwell 2024

Næsta Gilwell námskeið hefst þann 2. febrúar og er skráning á það hafin.
Áhugasöm mega senda umsókn með lýsingu á þeirra skátastarfi á gilwell@skatarnir.is

15 þátttakendur á skyndihjálparnámskeiði

Thu, 02 Nov 2023 12:09:00 GMT

Skyndihjálparnámskeið var haldið fyrir starfsfólk og sjálfboðaliða Skátanna á 3 kvöldstundum, dagana 23., 26. og 31. október. Námskeiðið var 12 kennslustunda námskeið og var í umsjón hinnar þaulreyndu Laufeyjar Elísabetar Gissurardóttur sem hefur kennt skyndihjálp í þrjá áratugi.

Að þessu sinni voru 15 skátar sem sátu námskeiðið, þar af voru 9 sem sátu allt námskeiðið og 6 sem þurftu aðeins að mæta fyrsta kvöldið í endurnýjun á skyndihjálparskírteininu. Rauði Krossinn mælir með endurmenntun í skyndihjálp annað hvert ár.

Þátttakendur námskeiðsins að þessu sinni sinna öll sjálfboðaliðastörfum fyrir Skátanna, annað hvort sem skátaforingjar eða í stjórn skátafélags, en öll sátu námskeiðið í þeim tilgangi að vera betur búin til að bregðast við ef slys ber að garði. Öryggi er mikilvægur þáttur skátastarfs og er skyndihjálp ein leið til þess að auka öryggi allra sem taka þátt í starfinu.

Er kominn tími fyrir þig að sækja skyndihjálparnámskeið, taktu þá frá dagana 25. og 26. maí 2024 en þá höldum við aftur skyndihjálparnámskeið!

Jólaskógurinn rís í Skátamiðstöðinni

Wed, 01 Nov 2023 12:26:00 GMT

Sígrænu jólatrén eru komin í Skátamiðstöðina, Hraunbæ 123!

Opnunartímarnir fyrir jólatrén verða á hefðbundnum skirfstofutíma í nóvember frá 10-17 alla virka daga og frá 12-17 um helgar.

Í desember lengjast opnunartímarnir í 10-18 alla virka daga og frá 12-18 um helgar.

Verið er að vinna hörðum höndum að gerð nýrrar heimasíðu fyrir sígrænu jólatrén en í millitíðinni er hægt að senda fyrirspurnir á skatabudin@skatarnir.is eða mæta upp í Skátamiðstöð

Tækifæri mánaðarins í alþjóðastarfi #OKTÓBER

Mon, 23 Oct 2023 14:57:00 GMT

ImpactYOUth: measuring youth development together.

Evrópudeild WOSM auglýsir eftir þátttakendum á viðburð sem haldinn verður í Brussel, Belgíu, þann 22. febrúar 2024.

Viðburðurinn miðar að því að deila með skátabandalögum Evrópudeildarinnar kerfi sem hefur verið í uppbyggingu og kallast The MIYO Impact measurement toolkit. Á viðburðinum verður kynning á kerfinu sjálfu og hvernig það virkar ásamt því að prófunarhópur verkefnisins segir frá reynslu sinni af kerfinu. Að lokum verður einnig boðið upp á umræður um framtíð verkefnisins og þátttakendur fá tækifæri á því að styrkja tengslanet sitt við skáta í Evrópu.

Um verkefnið:

Skátahreyfingin og aðrar æskulýðshreyfingar eiga stóran þátt í að móta samfélögin sem þau starfa í með því að efla persónulega færni ungmenna á ýmsum sviðum þar með talið leiðtoga-, samvinnu- og samskiptahæfni. Erfitt er að mæla raunveruleg áhrif æskulýðsstarfs á ungmenni og því þarf að útbúa verkfæri eða tól sem getur mælt áhrif starfsins.

Verkefnið MIYO hefur haft það markmið að skoða hvernig hægt sé að mæla árangur og áhrif æskulýðsstarfs á ungmenni.

Dagsetningar

22. febrúar

Staðsetning

Þingsalur Evrópusambandsins og Thon Hótel Evrópusambandsins í Brussel, Belgíu.

Dagskrá

Dagskráin skiptist í tvennt

Fyrri helmingur dagsins á sér stað í þingsal Evrópusambandsins og er tileinkaður að kynna verkefnið og fá reynslusögur frá sex þátttakenda þjóðum í verkefninu
Seinni hluti dagsins verður á Hótelinu þar sem vinnusmiðjur verða um verkfærið og nánari kynningar á hverju það felst.

Tungumál

Viðburðurinn verður á ensku

Hverjir ættu að sækja um

Viðburðurinn er fyrir unga leiðtoga/leiðbeinendur sem hafa áhuga á að gagnaöflun og að fræðast meira um hvernig við getum mælt árangur skátastarfs. Markmiðið er að læra af því sem fram fer á viðburðinum og geta yfirfært það á skátastarfið á Íslandi.

Kostnaður

Viðburðurinn er styrktur og því þátttakendur að kostnaðarlausu. Við fáum styrk fyrir ferðamáta, gistingu og mat á meðan viðburðinum stendur. Innifalið er matur frá kvöldmat 21.febrúar að morgunmat 23.febrúar ásamt gistingu frá 21. – 23. febrúar á Jacques Brel Youth Hostel.

Skráningarfresturinn er út 30. október.

Skráning fer fram með því að fylla út þetta form hér.

30 dróttskátar skemmtu sér í Lækjarbotnum

Wed, 18 Oct 2023 17:11:00 GMT

Helgina 13.-15. október var DróttKraftur haldinn í skátaskálanum í Lækjarbotnum.

DróttKraftur er leiðtogaþjálfun á vegum Leiðbeinendasveitarinnar og er lögð áhersla á að efla leiðtogafærni og samskiptahæfni þátttakenda. Dagskrá DróttKrafts byggist á leikjum, reynslunámi og samvinnu skátanna í flokkum. Þannig fá skátarnir tækifæri á því að kynnast öðrum dróttskátum á landinu, æfa sig í því að vera leiðtogar á meðal jafningja og taka þátt í lýðræðislegu starfi. Að þessu sinni voru þátttakendur 30 talsins og komu frá ólíkum félögum á landinu.

Þátttakendurnir fengu að velja dagskrá helgarinnar og urðu útieldun, flokkakeppni og kappræður fyrir valinu.

Dróttskátarnir létu veðrið ekki hafa áhrif á sig þegar þau elduðu dýrindis tómatsúpu og grillaðar samlokur í hádegismat.

Á kvöldin var svo að sjálfsögðu haldnar kvöldvökur en á laugardags kvöldvökunni voru allir flokkar með skemmtiatriði og skiptust þeir á að stýra kvöldvökunni.

Takk öll fyrir skemmtilega helgi.

Norðurlandaskátar glímdu við fuglaflensu á Go Global

Fri, 13 Oct 2023 14:12:00 GMT

Helgina 6.-8. október komu saman 20 skátar frá Norðurlöndunum saman á stór- Kaupmannahafnar svæðinu í þeim tilgangi að kynnast þeim tækifærum sem sem standa til boða í alþjóðaskátastarfi á heismvísu.

Dagskrá helgarinnar var því með þeim hætti að auka vitneskju þátttakenda um WAGGGS og WOSM ásamt þeim verkefnum og tækifærum sem samtökin standa fyrir og þá var sérstök áhersla lög á að mynda sterk vinatengsl milli skáta á Norðurlöndunum.

Helgin byrjaði með öflugum póstaleik víðsvegar um Kaupmannahöfn þar sem þátttakendur sem skipt var í flokka og fóru um í leit að bæði dönskum sjálfboðaliða og erlendum frá bæði WOSM og WAGGGS og var reynt á vitneskju þátttakenda um heimsbandalögin.

Þá fóru þátttakendur á kynningu hjá Signe Marie Obel, sem nýlega var kjörin í heimsstjórn WAGGGS, sem kynnti verkefnui WAGGGS og „Speak Out For Her World“ verkfærakistuna um hvernig skuli tala fyrir málstað á alþjóðavísu.

í framhaldi af þessu kom Susanne Kolle fyrir hönd kvenskátaráðs danmerkur og hélt smiðju þar sem hún kynnti félagslegt nýsköpunarverkefni sem þau stýra.

Þegar kom að norræna kvöldinu, þar sem allir komu með besta snarlið frá sínum heimalöndum, komu skátar frá danska viðburðarteyminu KROPT og héldu óvæntan ævintýra-skáta næturleik sem kom öllum rækilega á óvart. Táknræn umgjörð leiksins var að skálinn, þar sem viðburðurinn fór fram, var skyndilega ógnað vegna skæðrar veiru. Þá kom ekki annað til greina en að veita starfsmönnum heilbrigðisstofnunarinnar hjálp við að stöðva útbreiðslu veirunnar og var því haldið út í skóg í leit að bóluefninu. Leikurinn var framkvæmdur þannig að upplifunin væri sem raunverulegust en þátttakendur þurftu m.a. að klæða sig upp í sóttvarnarbúning. Í gegnum leikinn fengu þátttakendur að kynnast þessari ævintýra-skátun sem er hefð hjá dönsku skátahreyfingunum en svo var líka sérstök kynning að leik loknum.

Eftir þennan stórkostlega viðburð eru þátttakendurnir nú spenntir að komast í kynni við ný alþjóðatækifæri og að vonandi þau muni öll hittast á norðurlanda ráðstefnunni í Færeyjum, Roverway eða í ævintýra-skátun í Danmörku.

Myndir í þessari frétt eru teknar af Margrethe Grønvold Friis.

Daði Már úr Árbúum og Signý Ósk frá Skjöldungum tóku þátt fyrir hönd BÍS.

8 Rekkaskátar fengu forsetamerkið

Tue, 10 Oct 2023 13:20:00 GMT

Forsetamerkið var afhent átta ungmennum laugardaginn 7. október 2023 við fallega og skemmtilega athöfn á Bessastöðum.

Forsetamerkið er hvatamerki sem rekkaskátar, 16-18 ára, geta valið sér að vinna að samhliða starfi sínu. Í forsetamerkinu sameinast gildi skátahreyfingunnar um persónulegar framfarir einstaklingsins og þess að gera sitt besta samfélaginu til heilla. Vegferðin að forsetamerkinu er 2-3 ára verkefni sem hvetur skátanna til persónulegs vaxtar með því að skipuleggja, framkvæma og endurmeta 20 minni verkefni sem öll þurfa að falla undir ein fjögurra flokka,:

Heimurinn, ferðalög og alþjóðastarf
Útivist og útilífsáskoranir
Samfélagsþátttaka
Lífið, tilveran og menning

Auk þeirra verkefna þurfa öll sem vinna að forsetamerkinu að sækja 5 daga alþjóðlegt skátamót, ferðast 40 kílómetra á eigin afli, sækja helgarnámskeið í leiðtogaþjálfun og sækja 12 klukkustunda skyndihjálparnámskeið. Að lokum velja skátarnir sér 2 langtímaverkefni sem krefst virkrar þátttöku þeirra yfir 3-12 mánaða tímabil, dæmi um þetta er að vera foringi yngri skáta, taka þátt í skipulagi stórs skátamóts, sitja í stjórn félags, ráði eða vinnuhóp, að taka að sér viðhald skátaheimilis eða skátaheimili og margt fleira sem forsetismerkishafar hafa látið sér detta í hug.

Forsetamerkishafarnir 8 sem luku vegferðinni þetta árið eru úr 5 skátafélögum og bætast þar með í hóp 1446 forsetismerkishafa frá upphafi. Þau voru í röð númers forsetamerkis þeirra:

nr. 1439 – Davíð Þrastarson – Skátafélagið Garðbúar
nr. 1440 – Reynir Tómas Reynisson – Skátafélagið Garðbúar
nr. 1441 – Elías Dýrfjörð – Skátafélagið Klakkur
nr. 1442 – Franz Halldór Eydal – Skátafélagið Klakkur
nr. 1443 – Bengta Kristín Methúsalemsdóttir – Skátafélagið Mosverjar
nr. 1444 – Matthiludur Ósk Guðbjörnsdóttir – Skátafélagið Mosverjar
nr. 1445 – Valur Kári Óskarsson – Skátafélagið Skjöldungar
nr. 1446 – Dagur Sverrisson – Skátafélagið Ægisbúar

Við það tilefni bauð forsetaembættið rekkaskátunum og fjölskyldum þeirra til hátíðlegrar móttöku á Bessastöðum þar sem Guðni Th. Jóhannesson, forseti Íslands, afhenti þeim forsetamerkið. Við afhendinguna var samsöngur, tónlistaratriði flutt og Guðni ávarpaði samkomuna. Að lokum fluttu tvö úr hópi forsetamerkishafa stutta ræðu sem má horfa á í spilaranum hér að neðan:

Að lokinni afhendingu var haldið til Bessastaðastofu þar sem skátahöfðingi sagði nokkur orð áður en boðið var upp á veitingar.

Að lokinni athöfn var mótttaka fyrir forsetamerkishafa og gesti þeirra á Bessastaðastofu, að neðan má sjá myndir frá deginum.

Sjóræningjar tóku yfir Úlfljótsvatn á Skátasumrinu

Thu, 20 Jul 2023 11:57:00 GMT

Mikið líf og fjör var á Úlfljótsvatni um liðna helgi þegar sjóræningjar tóku yfir svæðið.

Tæplega 200 skátar komu saman á Skátasumrinu frá þrettán skátafélögum og settu upp tjaldbúðir á svæðinu.

Þau tóku þátt í fjölbreyttri sjóræningjadagskrá þar sem þau meðal annars lögðu land undir fót og heimsóttu Hengilsvæðið, Þingvelli, Eyrabakka og Knarrarósvita.

Þau tóku einnig þátt í dagskrá á svæðinu í ýmsum þorpum eins og verkstæðinu þar sem skátarnir föndruðu, smíðuðu, og útbjuggi allskyns sjóræningjahluti og reyndu að byggja í skip sem var siglingarhæft.

Þau kynntust alþjóðarstarfi í gegnum WOSM-o g Better world þorpið og heimsóttu Svarta Sjóinn sem var risa þrautabraut sem reyndi á samvinnu til að komast undir storminum sem reið yfir Svarta sjó.

Boðið upp á skátastarf í Guluhlíð

Tue, 20 Jun 2023 11:01:00 GMT

Í þessari viku er skátavika hjá Guluhlíð sem er frístundaheimili fyrir börn með sérþarfir. Frístundaheimilið er fyrir börn úr Klettaskóla í 1.-4. bekk og yfir sumarmánuðina er boðið upp heilsdags þjónustu fyrir börnin. Yfir vetrartímann sinnir Gulahlíð frístundastarfi barnahópsins eftir að hefðbundnum skóladegi líkur. Skátavikan er fyrsti liðurinn í nýju samstarfi milli Skátanna og Guluhlíðar um skátastarf í frístundaheimilinu. Markmið samstarfsins er að börn með ólíkar stuðningsþarfir fái tækifæri til að upplifa skátastarf á eigin forsendum, verja tíma í náttúrunni og takast á við ævintýraleg skátaverkefni við þeirra hæfi. Þórhildur ný verkefnastýra inngildingar hjá Skátunum hefur umsjón með samstarfinu, ásamt Margréti forstöðukonu Guluhlíðar.

Harpa Ósk Valgeirsdóttir skátahöfðingi, Haraldur Sigurðsson framkvæmdarstjóri Kringlumýri frístundamiðstöðvar og Margrét Halldórsdóttir forstöðukona Guluhlíðar skrifuðu undir samtarfsyfirlýsingu þann 15. Júní í Guluhlíð. Hér eru þau ásamt Elvu Dögg Guðbjörnsdóttur, aðstoðarforstöðukonu Guluhlíðar, Þórhildi Elínardóttur Magnúsdóttur, verkefnastýru inngildingar hjá Skátunum og Helgu Þóreyju Júlíudóttur fyrrverandi framkvæmdastjóra Skátanna og núverandi starfsmanns Guluhlíðar.

Fyrsta daginn í skátavikunni var skátafundur þar sem útilega var á dagskrá. Öll settu upp skátaklúta, tjölduðu samann og prufuðu að verja tíma inn í tjöldunum. Svo var boðið upp á kakó og kleinur fyrir nýju skátana í lok fundarins.

Á næstu dögum verður skynjunar- og náttúrubingó í anda skátastarfs þar sem markmiðið er að skátarnir í Guluhlíð kanni og upplifi náttúruna í kringum frístundaheimilið, ásamt útieldun í lok vikunnar þar sem börnin fá að poppa, baka skátabrauð og grilla pylsur yfir opnum eldi með aðstoð starfsfólksins.

Þetta nýja samstarf Skátanna og Guluhlíðar er fyrsta skrefið í verkefninu Skátastarf fyrir alla sem snýr að því að auka aðgengi að skátastarfi fyrir börn í viðkvæmri stöðu, með áherslu á börn af erlendum uppruna og börn með fatlanir. Verkefnið fékk styrk frá mennta- og barnamálaráðuneytinu sem verkefni í þágu farsældar barna. Hluti af verkefninu er að stuðla að innleiðingu skátastarfs í frístundaheimilum svo fleiri börn hafi tækifæri til að upplifa skátastarf í sínu umhverfi.

160 drekaskátar dönsuðu diskó á Úlfljótsvatni

Wed, 07 Jun 2023 10:39:00 GMT

Diskódrekar fylktu liði á Úlfljótsvatn um helgina þegar 160 drekaskátar á aldrinum 8-10 ára reistu tjaldbúð, dönsuðu diskó og skemmtu sér að skáta sið.
Ný mótsstjórn lék listir sínar í fyrsta sinn, með stuðningi 25 starfsmanna mótsins á aldrinum 16-28 ára.

Veðrið lék við hópinn á föstudaginn og var því auðvelt að tjalda og koma sér fyrir. Um 260 skátar tóku þátt í mótinu í heild sinni auk þess voru fjölskyldur drekanna sjáanlegar á tjaldsvæðinu. Laugardagurinn gekk vel, dagskrá fór fram víðsvegar um Úlfljótsvatn, á vatnasvæðinu við KSÚ, í klifurturni og bogfimi auk þess sem mótið gróðursetti skjólbelti við stallaflatirnar undir handleiðslu Skógræktarfélags Íslands. Drekagleðin skein úr andlitum skátanna við heimför á sunnudag og voru öll sammála um að mótið hefði verið afskaplega vel heppnað og hlakka til að koma aftur að ári.

Nýja útgáfan af Forsetamerkisbókinni er loksins komin!

Wed, 07 Jun 2023 10:27:00 GMT

Ný uppfærð útgáfa af Vegabréfi rekkaskáta á leið að Forsetamerkinu er nú loksins komin úr prentun!
Bókin hefur verið uppfærð í samræmi við starfsgrunninn og fengið yfirhalningu til að endast betur.
Nú geta allir rekkaskátar haldið glaðir inn í sumarið og byrjað að skipleggja næstu ævintýri í Vegabréfinu.
Bókin er fáanleg í Skátabúðinni og í vefverslun .

Sumardagurinn fyrsti 2023

Wed, 19 Apr 2023 11:04:00 GMT

Sumardagurinn fyrsti 2023 er haldinn hátíðlegur fimmtudaginn 20. apríl um land allt og hafa skátar skipulagt og standa að glæsilegum og stórskemmtilegum hátíðarhöldum fyrir börn, ungmenni og fjölskyldur þeirra.

Í Reykjavík

Skátafélagið Árbúar í Árbæ

Staðsetning: Árbæjarsafn
Tímasetning: 12:30-16:00

Skátafélagið Árbúar leiðir skrúðgöngu frá Árseli að Árbæjarsafni en þar tekur við póstaleikur, útieldun og fleira. Veitingasala verður á staðnum sem fjáröflun fyrir félagið. Fá frekari upplýsingar á facebook viðburðarsíðu .

Skátafélögin Garðbúar í Fossvogi, Landnemar í Hlíðunum og Skjöldungar í Laugardal

Staðsetning: Fjölskyldu- og húsdýragarðurinn
Tímasetning: 14:00-17:00

Skátafélögin þrjú ætla að sameina krafta sína og standa fyrir miklu sumarfjöri í fjölskyldu og húsdýragarðinum. Dagskráin verður í gangi á milli 14:00 og 17:00 þar sem hoppukastalar, klifurveggur og skátaþrautir verða í boði. Á staðnum verður sölutjald þar sem ýmis góðgæti verður til sölu sem fjáröflun fyrir unga skáta sem stefna á Alheimsmót skáta í Suður-Kóreu 2023. Fá frekari upplýsingar á facebook viðburðarsíðu.

Skátafélagið Vogarbúar í Grafarvogi

Staðsetning: Skátaheimili Vogabúa, Logafold 106
Tímasetning: 13:00-16:00

Skátafélagið Vogabúar munu standa fyrir skemmtidagskrá fyrir alla fjölskylduna við skátaheimilið sitt. Í boði verða leiktæki, hoppukastalar og ýmis skemmtun með skátaívafi. En síðan verða sirkúsatriði og mun trúbadorinn Jón Sigurðsson halda uppi stuðinu. Á staðnum verður veitingasala og candylfoss sem fjáröflun fyrir skátafélagið. Fá frekari upplýsingar á facebook auglýsingu .

Skátafélagið Ægisbúar í Vesturbænum

Staðsetning: Skátaheimili Ægisbúa, Neshaga 3
Tímasetning: 11:00-14:00

Skátafélagið Ægisbúar blæs til sumarhátíðar á sumardeginum fyrsta við skátaheimili sitt. Á staðnum verða hoppukastalar auk annarar skemmtunar. Á staðnum verða sölutjöld með góðgæti og ýmis matarkyns sem fjáröflun fyrir félagið. Fá frekari upplýsingar á facebook viðburðarsíðu.

Í Kópavogi

Skátafélagið Kópar

Staðsetning: Skátaheimili Kópa
Tímasetning: 14:00-17:00

Skátafélagið Kópar bjóða öllum Kópum og fjölskyldum þeirra í skátaheimilið sitt í opið hús. Veitt verða heiðursmerki til sjálfboðaliða kópa og í boði verður ratleikur um dalinn ásamt heitu kakói og vöfflur. Hægt er að sjá frekari upplýsingar hér á facebook viðburðinum.

Í Garðabæ

Skátafélagið Svanir og Skátafélagið Vífill

Staðsetning: Vídalínskirkju og Miðgarði
Tímasetning: 13:00-16:00

Skátafélögin Svanir og Vífill verða með skrúðgöngu frá Hofsstaðaskóla kl. 14 sem gengur að Miðgarði íþróttamiðstöð og þar tekur skemmtidagskrá við stútfull af tónlistarfólki, töframönnum, andlitsmálun, hoppuköstulum, veltibíl og candyfloss.

Frekari upplýsingar má finna á upplýsingasíðu Garðabæjar . Eða á facebook viðburði hátíðarinnar hér .

Í Hafnarfirði

Skátafélagið Hraunbúar

Staðsetning: Víðistaðakirkju og Thorsplani
Tímasetning: 13:30-16:00

Skátafélagið Hraunbúar tekur þátt í hátíðarhöldunum og verður með skemmtilega og fjölbreytta skátadagskrá fyrir alla fjölskylduna á Víðistaðatúni og við skátamiðstöðina Hraunbyrgi. Í boði verður kassaklifur, klifurveggur, útieldun þar sem grillaðir eru sykurpúðar og hike-brauð, hoppukastalar, bátar og risa hengirúm. Í Hraunbyrgi verður kaffisala og á Víðistaðatúni verður söluhús með ullarsykur, krap og popp. Hægt er að skoða frekari upplýsingar á heimasíðu Hafnafjarðar hér eða á facebook viðburði hátíðarinnar hér .

Í Mosfellsbæ

Skátafélagið Mosverjar

Staðsetning: Miðbæjartorgi og Varmá
Tímasetning: 13:00-16:00

Skátafélagið Mosverjar mun leiða skrúðgöngu frá Miðbæjartorgi að Varmá þar sem skólahljómsveit Mosfellsbæjar tekur á móti skrúðgöngunni með sumartónum. Að skrúðgöngu lokinni hefst dagskrá á Varmá með hoppuköstulum, kassaklifri, leikjum, og þrautum. . Frekari upplýsingar má finna á facebook viðburði hátíðarinnar .

Í Reykjanesbæ

Skátafélagið Heiðabúar

Staðsetning: Keflavíkurkirkju og skátaheimili Heiðabúa, Hringbraut 101
Tímasetning: 12:30-17:30

Skátafélagið Heiðabúar mun leiða skrúðgöngu frá skátaheimilinu að Keflavíkurkirkju þar sem skátafélagið kemur að hátíðarmessu þar sem nýjir skátar verða vígðir. Hægt er að fylgjast með Heiðabúum á facebook síðu þeirra hér .

Í Hveragerði

Skátafélag Strókur

Staðsetning: Hveragerðiskirkja
Tímasetning: 11:00

Skátafélagið Strókur verður með skátamessu í Hveragerðiskirkju og að henni lokinni verður Strókur með sumarskemmtun barnanna á planinu fyrir frmaan kirkjuna kl. 13. Þar verður ýmislegt í boði eins og hoppukastalar, tónlist, ullarsykur og fleira. Frekari upplýsingar er að finna á heimasíðu Hveragerðis hér .

Á Selfossi

Skátafélagið Fossbúar

Staðsetning: Skátaheimilinu Glaðheimum, Tryggvagötu 36
Tímasetning: 13:00-16:00

Nóg verður um að vera á Selfossi þar sem skátafélagið Fossbúar taka þátt í hátíðinni Vor í Árborg. Skrúðganga leggur af stað frá miðbæ Selfoss að Glaðheimum, skátaheimili Fossbúa þar sem skátaverkefni að ýmsu tagi verður í boði og er hluti af stimplaleik hátíðarinnar. Frekari upplýsingar um hátíðina má finna á upplýsingasíðu Árborgar . Einnig er hægt að fylgjast með facebook viðburði frá Fossbúum .

Á Akranesi

Skátafélag Akraness

Staðsetning: Skátahúsið og Akraneskirkja
Tímasetning: 10:30

Skátafélagið Akraness verður með skrúðgöngu frá skátahúsinu að Akranesskirkju þar sem við tekur sumarhátíð.

Í Dalabyggð

Skátafélag Stígandi

Staðsetning: Laugar í Sælingsdal
Tímasetning: 13:00 – 15:00

Skátafélagið Stígandi tekur þátt í Jörfahátíð Dalabyggðar og bjóða alla velkomna á Lauga í Sælingsdal þar sem þau verða með leiki og fjör. Frekari upplýsingar er hægt að sjá á heimasíðu Dalabyggðar hér .

Á Akureyri

Skátafélagið Klakkur

Staðsetning: Skátaheimili Klakks, Þórunnarstræti, Glerárkirkja og tjaldsvæðinu á Hömrum
Tímasetning: 10:40-15:00

Skátafélagið Klakkur mun vera með skrúðgöngu frá Giljaskóla kl. 10:40 að Akureyrarkirkju þar sem skátafélagið kemur að messu sem hefst kl. 11:00 en að henni lokinni er öllum boðið að koma í sumarhátíð að tjaldsvæðinu á Hömrum. Frekari upplýsingar er að finna á heimasíðu Klakks .

Metþátttaka ungmenna á Skátaþingi

Wed, 29 Mar 2023 14:57:00 GMT

Það var mikil gleði og góður andi í hópnum sem mætti á Skátaþing um helgina. Flestir skátar bíða eftir skátaþingi með eftirvæntingu þar sem það er helsti vettvangur nýrra hugmynda og skoðanaskipta. Hópurinn sem mætti á föstudagskvöld var með endæmum hress enda höfðu margir tekið þátt í bílabingó og öðrum þrautum á leiðinni norður. Rúmlega 150 skátar tóku þátt í eða stóðu að framkvæmd Skátaþings þetta árið og fór það fram 24.-26. mars í Háskólanum á Akureyri.

Skátaþing er árleg samkomu þar sem skátahreyfingin kemur saman, heldur aðalfund sinn og rýnir í stöðu skáta á Íslandi. Þingið er einnig ákveðin uppskeruhátíð fyrir fastaráðin enda er það oft vettvangur kynninga á nýjum leiðum í skátastarfi. Það sem helst var á döfinni að þessu sinni var útgáfa endurnýjaðs starfsgrunns skáta, ný útivistarmerki sem hvetja til þátttöku í gönguferðum og fjallaferðum og að sjálfsögðu upphitun fyrir Landsmót skáta 2024.

Þingið um helgina var afskaplega vel sótt og þá hefur þátttaka ungs fólks aldrei verið meiri en 47 róverskátar, 29 rekkaskátar og 8 dróttskátar sóttu Skátaþing þetta árið og þannig voru 84 fulltrúa á þinginu á þátttakanda aldri í skátastarfi. Ekki nóg með þessa stórgóðu þátttöku ungmenna í þinginu, heldur voru einnig 53% atkvæða í höndum ungmenna og er það met frá upphafi skátaþings.

Í upphafi þingsins fluttu gestir ávörp, forseti bæjarstjórnar Akureyrarbæjar Heimir Örn Árnason ræddi um mikilvægi samvinnu sveitarfélaga og skátafélaga í uppbyggingu æskulýðsstarfs. Rektor Háskóla Akureyrar Eyjólfur Guðmundsson flutti einnig ávarp og fjallaði um mikilvægi skátastarfs og þá sérstaklega hvað skátar væru á góðri leið með að byggja upp sjálfstæða einstaklinga með nýju markmiðaflokkunum í starfsgrunninum, Leiðtogafærni, Tilveran mín, Heimurinn og umhverfið, og Skapandi hugur og segir Rektor mikinn samhljóm með þessum markmiðaflokkum og endurnýjaðri stefnu háskólans á Akureyri. Að lokum fjallaði Anna Kristjana, skátafélaginu Klakki, um 100 ára afmæli Valkyrjunar á Akureyri og sett var upp sýning um sögu félagsins á göngum háskólans.

Á aðalfundinum tíðkast að veita viðurkenningar og að þessu sinni var m.a. afhentur Hetjuðdáðarmerkið úr gulli sem veitt er þeim sem hefur hætt lífi sínu við að bjarga öðrum úr lífsháska. Handhafi merkisins var Þórhallur Helgason úr skátafélaginu Segli, en árið 1997 bjargaði hann skátaflokk út úr skálanum Vífilsbúð sem brann eftir að gaskútur gaf sig.
Þórhallur kom öllum út úr skálanum heilum og höldnu en slasaðist sjálfur á hendi í brennandi skálanum. Hlaut Þóhallur standandi lófaklapp allra viðstaddra við afhendinguna.

Aðrar viðurkenningar voru afhentar öflugum skátaforingjum sem hlutu þórshamarinn úr bronsi fyrir sín öflugu störf.
Jón Halldór Jónasson var tilnefndur til skátakveðjunar úr bronsi eftir störf sín í stjórn BÍS og Hrefna Hjálmarsdóttir hlaut skátakveðjuna úr gulli fyrir ævistarf sitt fyrir skátahreyfinguna á Akureyri.

Það vakti mikla ánægju meðal þinggesta að ný stofnað skátafélag var tekið inn í Bandalag íslenskra skáta, en skátafélagið Farfuglar var stofnað síðasta vor. Félagið starfar á Breiðdalsvík og Stöðvarfirði og mættu nánast öll börn bæjarfélagsins með félaginu á skátamót síðastliðið sumar. Stofnun félagsins blæs okkur öllum byr undir báða vængi og munu stjórn BÍS og erindrekar setja áherslu á landsbyggðina næstu árin.

Í lok aðalfundar tóku við umræðuhópar og smiðjur. Þátttakendur lögðu meðal annars drög að sóknaráætlun skáta fyrir vor og haustmánuði, rýndu í stöðu húsa á Úlfljótsvatni, kynntu sér nýja þætti í hvatakerfinu og kynntust fjölmörgum möguleikum sem standa ungu fólki til boði í alþjóðastarfi.

Það var þreyttur og glaður hópur sem kvaddist að Hömrum á sunndaginn, með innblástur í farteskinu aftur heim og brennandi sóknaranda í brjósti fyrir uppbyggingu skátastarfs.

Yfir 100 drekaskátar komu saman á drekaskátadegi Svana

Tue, 14 Mar 2023 09:39:00 GMT

Drekaskátadagurinn 2023 var haldinn á laugardaginn seinast liðinn þann 4. mars. Dagurinn var haldinn af Skátafélaginu Svönum og fór dagskráin fram á Álftanesi í stórumhverfinu í kringum skátaheimili þeirra á Bjarnastöðum. Dagurinn gekk frábærlega fyrir sig, og fengu drekarnir ljómandi gott veður, þó það hafi verið örlítið kal, skein sólinn allan daginn og gerði leiki og dagskrá skemmtilega og létta.

Táknræn umgjörð dagsins var „Sjóræningjar og geimverur“ þar sem skátarnir tóku hlutverk sjóræningja sem voru að endurheimta kex og kakó sem geimverurnar höfðu stolið af þeim. Skátarnir gengu á milli pósta sem voru að finna dreift um stóran hluta Álftanes. Á hverjum póst tókust skátarnir á áskorunum geimveranna, í formi leikja og verkefna.

Að lokum, þegar drekarnir náðu að sigra geimverurnar, settust skátarnir niður við Bjarnastaði, skátaheimili Svana, og drukku kakó og kjömsuðu á kexi.

Drekaskátar í leik, mynd eftir Guðna Gíslason, Hraunbúa „Það var einstaklega skemmtilegt að sjá fjörið í krökkunum og foringjum“ segir Halldór Valberg, félagsforingi Svana. „Við vorum heppin með veður, sólin lék við okkur. Þegar við héldum fálkaskátadaginn fyrir nokkrum árum var svo mikið rok að við vorum hrædd um að krakkar gætu farið að fjúka, en núna fengum við þetta dásamlega veður og nýttum það vel.“

Foringjar og sjálfboðaliðar Svana þakka kærlega frábæra þátttöku og einstaklega góðan anda í þátttakendum og foringjum.

Tækifæri mánaðarins í alþjóðastarfi #MARS

Mon, 06 Mar 2023 16:35:00 GMT

Alheimssamtök skáta, WOSM, leitar að ungu talsfólki í að taka þátt í vinnusmiðjum um hvernig á að verða talsfólk málefnis. Vinnusmiðjan fer fram dagana 24.-28. apríl 2023 í Brussel, Belgíu. Þátttakendur læra um hvað það felst í að vera talsfólk skátastarfs, læra um þátttöku á opinberum vettvangi, framsetningu og hvernig þessum málum er háttað í Evrópu.

Þátttakendur þurfa að vera á aldrinum 18-30 ára og með áhuga á samræðum við stjórnmálafólk varðandi málefni sem eru mikilvæg ungu fólki..

Skráninguna má finna hér .

Skráningarfresturinn rennur út 10. Mars.

Skátaflokkurinn Valkyrjur héldu kökubasar

Thu, 23 Feb 2023 12:30:00 GMT

Við í fálkaskátaflokknum Valkyrjum í Landnemum héldum kökubasar þann 12. febrúar í Landnemaheimilinu. Við undirbjuggum okkur með því að plana frá 17. janúar næstu fjóra skátafundi og nýttum þessa fjóra skátafundi til að undirbúa markaðinn. Við skipulögðum til dæmis hvað við ætluðum að selja á kökubasarnum, hver ætti að baka hvað og bjuggum til auglýsingar. Síðan reiknuðum við verðið á hráefnum varanna og seldum allt bakkelsið á útreiknuðu verði.

Við seldum sjónvarpskökur, skinkuhorn, ostaslaufur, bollakökur, smákökur, súkkulaðikökur, brownies, kókoskúlur og kanilsnúða. Allt seldist upp hjá okkur og við söfnuðum rúmlega 50.000 kr fyrir Rauða krossinn. Okkur fannst þetta vera mjög skemmtilegt verkefni.

Valkyrjur eru fálkaskátaflokkur í Landnemum. Flokkinn skipa:

Birna Signý Valdimarsdóttir
Kristín Kolbrún Hákonardóttir
Margrét Álfdís Huldudóttir
Melkorka Björk Iversen
Una Signý Sigurðardóttir
Unnur Álfrún Huldudóttir

Tækifæri mánaðarins í alþjóðastarfi #FEBRÚAR

Tue, 21 Feb 2023 13:38:00 GMT

Agora rekka og róverskátaviburður haldin 12.-16. apríl 2023 í Portúgal .
Vissir þú að Agora er stýrt af hópi rekka og róverskáta?

Ísland á fjögur sæti og opnað verður fyrir skráningu fljótlega!
Ekki láta þetta tækifæri framhjá þér fara!

Skátar fjölmenntu á Útilífsnámskeið Skíðasambands skáta

Thu, 16 Feb 2023 13:51:00 GMT

Síðastliðna helgi tóku 43 skátar þátt í Útilífsnámskeiði Skíðasambands skáta á Laugaborg á Hrafnagili.

Námskeiðið er grunnnámskeið í útilífi fyrir ungmenni, með áherslu á vetrarútivist en markmiðið er að auka áhuga þátttakenda og leggja góðan grunn að frekari færni.

Á námskeiðinu fá þátttakendur margvíslega fræðslu, meðal annars um búnað, ferðahegðun, rötun, skyndihjálp og snjóflóð, en mikilvægasti þáttur námskeiðsins felst í reynslunámi þar sem þátttakendur elda úti og gista í tjaldi að vetrarlagi.

Veðrið setti þó sinn svip á námskeiðið á þessu sinni. Appelsínugul viðvörun var á laugardegi sem gerði það að verkum að ekki var hægt að gista í tjaldi seinni nóttina eins og hefð er fyrir. Þá var einnig lítið um snjó sem setti aðeins strik í reikninginn.

Skátarnir létu það þó ekki á sig fá og tóku virkan þátt í ævintýralegri, skemmtilegri og krefjandi dagskrá.

Skíðasamband skáta hefur staðið fyrir námskeiðinu í áraraðir og við hlökkum til að sjá námskeiðið vaxa og dafna á komandi árum.

Takk fyrir gott námskeið!

Ljósmynd/Árni Már Árnason

Fimmtán öflugir skátar hefja Gilwell leiðtogaþjálfun

Fri, 27 Jan 2023 14:23:00 GMT

Gilwell þjálfunin er æðsta leiðtogaþjálfun skáta og er metnaðarfullt 11 mánaða nám fyrir starfandi foringja, stjórnarfólk og aðra fullorðna skáta sem starfa með BÍS eða í skátafélagi.

Eftir 4 ára hlé hófst hin langþráða Gilwell þjálfun á ný á gamalkunnum slóðum á Úflljótsvatni og var því mikil eftirvænting fyrir helginni. Föstudaginn 20. janúar sátu þó bæði skátar og leiðbeinendur stúrin heima í stofu að horfa á handboltaleik í stað þess að sitja við eldinn í Ólafsbúð, þar sem veðurviðvaranir og færð komu í veg fyrir að námskeiðið færi af stað á réttum tíma.

Eldsnemma á laugardagsmorgun var hópurinn mættur með pússaða gönguskó og vel straujaðar skyrtur og klúta og hóf störf við leik og nám. Mesta spennan á hverju Gilwell námskeið er að sjálfsögðu flokkaskiptingin og fengu Uglur, Gaukar, Dúfur og Spætur nýja meðlimi þessa helgina.

Aðal áhersla á fyrsta hluta Gilwell þjálfunarinnar eru gildi skáta, einstaklingsins og hreyfingarinnar. Fyrir mörgum var þetta nýtt viðfangsefni og öðrum nokkuð kunnuglegt.
Í þetta sinn voru gildin vafin inn í þemað á Njáluslóðum og því stóð Hallgerður langbrók fyrir ástríðu, hörku og orku sem Spætuflokkurinn til dæmis samsamaði sig vel við.

Allir Gilwell ungarnir fóru glöð heim með sín fyrstu gilwell einkenni og hugmyndir að spennandi verkefnum til að vinna skátahreyfingunni til eflingar næstu mánuði.

Einn skáti, Karen Öder úr skátafélaginu Fossbúum, kláraði sinn feril um helgina, og fékk hún því sín einkenni. Við óskum henni innilega til hamingju með áfangan.

Næsti hluti þjálfunarinnar hefst í júní en þá mun hópurinn hafast við í tjöldum og rýna í skátastarfið á allt annan hátt.

Við hlökkum til að hitta hópinn aftur!

Nýtt fyrirkomulag námskeiða Æskulýðsvettvangsins

Tue, 17 Jan 2023 16:59:00 GMT

Æskulýðsvettvangurinn er samstarfsvettvangur Bandalags íslenskra skáta, KFUM og KFUK á Íslandi, Slysavarnafélagsins Landsbjargar og Ungmennafélags Íslands. Æskulýðsvettvangurinn vinnur að sameiginlegum hagsmunamálum barna og ungmenna í íþrótta- og æskulýðsstarfi og stuðlar að heilbrigðum, uppbyggjandi, vönduðum og öruggum aðstæðum í slíku starfi.

Eitt af markmiðum Æskulýðsvettvangsins er að stuðla að aukinni fræðslu og forvörnum í íþrótta- og æskulýðsstarfi á Íslandi í þeim tilgangi að gera umhverfi barna og ungmenna í félagsstarfi öruggara. Námskeið Æskulýðsvettvangsins eru liður í því. Áður hafa aðildarfélög ÆV óskað eftir námskeiðunum inn í sínfélög eftir þörfum en nú verður gerð breyting þar á. Námskeiðin verða sameiginleg fyrir öll aðildarfélögin og fara fram eftir námskeiðaáætlun.

Það er mikilvægt að öll sem starfa með börnum og ungmennum séu meðvituð um skyldur sínar og ábyrgð og viti hvernig á að bregðast við þegar upp koma atvik eða áföll í starfinu. Því hvetjum við sem flest til að sækja námskeiðin en þau eru frí fyrir starfsfólk og sjálfboðaliða Skátanna.

NÁMSKEIÐAÁÆTLUN VOR 2023

8. febrúar Hinsegin fræðsla
8. mars Samskipti og siðareglur
29. mars Inngilding og fjölmenning

Skráning er opin á öll námskeiðin hér

Tækifæri mánaðarins í alþjóðastarfi #JANÚAR

Fri, 13 Jan 2023 15:52:00 GMT

Tækifæri mánaðarins í janúar er kynning á öllum erlendum skátamótum sem íslenskir skátar geta heimsótt árið 2023.

Vasalägret Svíþjóð 30.7 – 5.8 2023

Þátttakendaaldur: 8-18 ára
Þátttakendagjald: 1800 SEK (Preliminary)
Áhugaskráning: 31.1.2023
https://vasa2023.scout.se/international-scouts/

Litháen 8.-16. júní 2023

Þátttakendaaldur: 12-17 ára
Þátttökugjald: 225 – 270 evrur, ódýrara ef skráð er snemma
Skráningarfrestur: 31.05.2023
https://skautai.lt/renginiai/113-jubiliejine-stovykla-tarp-triju-vandenu

Austurríki, 7.-16. ágúst 2023

Þátttakendaaldur: 13 – 21 ára
Þátttökugjald: 320 evrur
Skráningarfrestur: 28.02.2023
https://www.together23.at/home-en/

Norður – Makedónía 12.-21. Júlí 2023

Þátttakendaaldur: 11 – 17 ára
Þátttökugjald: 315 evrur
Þátttökugjald: 266 – 326 evrur ódýrara ef skráð er snemma
Starfsmannagjald: 85-95 evrur ódýrara ef skráð er snemma
Skráningarfrestur: 12.07.2023
https://smotra.izvidnici.mk/

Serbía 22.-31. júlí 2023

Þátttökugjald: 315 evrur

Mikið fjör á Neista 2023

Wed, 11 Jan 2023 17:54:00 GMT

Mikið fjör var á Neista sem var haldinn helgina 6.-8. janúar á Úlfljótsvatni. Þar komu saman hátt í 80 skátar, 16 ára og eldri, til að læra nýja hluti, kynnast öðrum skátum og skemmta sér saman.

Á Neista fá þátttakendur að velja sína eigin dagskrá en boðið er upp á margvíslegar smiðjur sem miða að því að efla margvíslega færni í skátastarfi.

Það var einstaklega gaman að ná að halda Neista á Úlfljótsvatni aftur en fárviðri og síðan heimsfaraldur ollu 4 ára fjarveru viðburðarins og tók Undralandið heldur betur vel á móti okkur!

Þema helgarinnar var Vættir Íslands sem var m.a. nýtt í flokksheiti og kvölddagsrká helgarinnar.

Á föstudagskvöldi var póstaleikur þar sem flokkarnir kynnutst betur, bjuggu til grímu fyrir sinn vætt og lærðu íslenska þjóðdansa.

Smiðjurnar voru keyrðar á laugardag og sunnudag en boðið var upp á alls 22 smiðjur yfir helgina, t.d. klifur og sig, birtingarmyndir ólíkra þarfa og hegðunar, verkstæði skátaforingjans, kvöldvökur og gítar og táknmál. Einnig fengu öll fastaráð BÍS tækifæri á því að kynna sitt starf og nýttu Starfsráð, Alþjóðaráð, Útilífsráð og Ungmennaráð það.

Kvölddagsskrá á laugardegi var að sönnum Neista sið þar sem byrjað var á Eldleikum og eftir flugeldasýningu var haldið inn á kraftmikla kvöldvöku frá þátttakendum á kvöldvökustjórnunar smiðjunni.

Sérstakar þakkir fá sjálfboðaliðar viðburðarins sem aðstoðuðu okkur við það að gera þennan viðburð að veruleika.

Takk öll fyrir góðar stundir!

Bandalag íslenskra skáta fær styrk úr samfélagssjóði Landsbankans

Fri, 30 Dec 2022 16:51:00 GMT

Bandalag íslenskra Skáta fékk styrk frá samfélagssjóði Landsbankans að upphæð 250.000 kr. síðast liðin 20.desember. Styrkurinn er fyrir verkefnið Fjölskylduskátadagur fyrir flóttafólk frá Úkraínu en við buðum fjölskyldum flóttafólks frá Úkraínu í dagsferð á Útilífsmiðstöð skáta á Úlfljótsvatni. Markmiðið með viðburðinum var að bjóða flóttafólki frá Úkraínu jákvæða, heilbrigða og verðmæta upplifun á Úlfljótsvatni. Þar komu fjölskyldur frá Úkraínu saman, kynntust hver annarri og sköpuðu minningar saman með fjölbreyttri og skemmtilegri dagskrá og nutu samverustundar sem fjölskylda.

Samræmd viðbragðsáætlun lítur dagsins ljós

Thu, 10 Nov 2022 15:05:00 GMT

Föstudaginn 5. nóvember kynnti Sigurbjörg Sigurpálsdóttir, samskiptaráðgjafi íþrótta- og æskulýðsstarfs, samræmda viðbragðsáætlun fyrir íþrótta- og æskulýðsstarf . Um er að ræða leiðbeinandi áætlun til að styðja þau sem standa fyrir slíkri starfsemi þegar upp koma atvik eða áföll í félagsstarfinu. Viðbragðsáætlunin tekur við af þeirri sem Æskulýðsvettvangurinn setti sér að fylgja árið 2018 og byggir ofan á þá áætlun.

„Við erum að stuðla að bættu öryggi, erum að vinna gegn ofbeldi og mismunun og erum að sýna ábyrgð okkar gagnvart samfélaginu. Þessi sameiginlega áætlun gerir það að verkum að öll félög geta notið leiðsagnar og stuðnings í glímunni við þau mál sem koma upp,‟ segir Sigurbjörg Sigurpálsdóttir, samskiptaráðgjafi íþrótta- og æskulýðsstarfs.

Viðstödd kynninguna voru fulltrúar þeirra félaga sem komu að gerð viðbragðsáætlunarinnar, Ásmundur Einar Daðason, barna- og menntamálaráðherra, sérfræðingar ráðuneytisins ásamt þeim Lárusi Blöndal, forseta ÍSÍ, skátahöfðingjanum Hörpu Ósk Valgeirsdóttur og Jóhanni Steinari Ingimundarsyni, formanni UMFÍ.

Margsannað mikilvægi viðbragðsáætlunar

Skátarnir hófu vinnu að viðbragðsáætlun árið 2010 og kom fyrsta útgáfa hennar út 2011. Hún var uppfærð tvisvar, 2013 og 2015, en árið 2018 var hún bæði uppfærð og tekin upp á víðari vettvangi Æskulýðsvettvangsins sem sú áætlun sem þau samtök settu sér að fylgja í þeim málum sem hún náði til. Það var á stefnu að sú áætlun yrði endurskoðuð og uppfærð árið 2020 en um sama leiti nálgaðist embætti samskiptaráðgjafa samtökin um að taka þátt í að gera samræmda áætlun og var því átaki tekið fagnandi. Enda hafa skátarnir ásamt samtökunum sem mynda Æskulýðsvettvanginn löngum talað af reynslu fyrir mikilvægi þess að hafa til staðar viðbragðsáætlun sem tryggir fagleg og samkvæm viðbrögð í hinum ýmsu atvikum óháð því hver á í hlut og á hvaða vettvangi atvikið verður.

Viðbragðsáætlunin byggir því ofan á þær góðu áætlanir sem voru til fyrir. Í henni er því að finna hvernig félög bregðist við ofbeldi af nokkru tagi, agabrotum, slysum, sjúkdómum, málum sem ber að tilkynna barnavernd og ýmsu sem áður var að finna í áætluninni en nú af enn meiri nákvæmni. En nú er þar líka að ýmsa nýja kafla um hvernig félög búa til öruggt umhverfi m.t.t. inngildingar, hinseginleika og fjölmenningar ásamt viðbrögðum við fordómum í félagsstarfi. Þá er einnig að finna nýjan kafla um andlega líðan og viðbrögð við atvikum sem geta komið upp tengt því.

„Þessi áætlun telur til flestra þeirra atvika sem við teljum að geti komið upp í íþrótta- og æskulýðsstarfi,‟ sagði Sigurbjörg og taldi upp sem dæmi handleggsbrot á æfingu, barnaverndartilkynningu sem þurfi að senda út, kynferðisbrot eða annað sem getur komið upp í starfi íþrótta- og æskulýðsfélaga.

„Þarna eru leiðbeiningar sem leiða félögin áfram. Stuðningur við það er svo hjá samskiptaráðgjafa,‟ bætti Sigurbjörg við og hvatti forráðafólk í öllum íþrótta og æskulýðsfélögum landsins til að sækja viðbragðsáætlunina, birta hana á heimasíðum sínum eða setja hlekki á miðla.

„Ekki síst þarf að kynna hana fyrir sínu starfsfólki, stjórnum, sjálfboðaliðum, þátttakendum og forsjáraðilum og bara öllum sem þetta við kemur.“

Sögulegt samstarf!

Vinna að viðbragðsáætluninni hefur staðið yfir í tvö ár, en stuttu eftir að embætti samskiptaráðgjafa var sett á fót var leitað til hagaðila á vettvangi íþrótta- og æskulýðsstarfs um að koma að þessari vinnu. Að borðinu komu samtökin sem mynda Æskulýðsvettvanginn þ.e. Bandalag íslenskra skáta, KFUM/KFUK, Landsbjörg, Ungmennafélag Íslands ásamt íþróttabandalagi Reykjavíkur og Íþrótta- og ólympíusamband Íslands. Sigurgeir B. Þórisson erindreki BÍS sat í vinnuhópnum fyrir hönd skátanna.

Innleiðingarstarf framundan og áframhaldandi framþróun

Bandalag íslenskra skáta fer nú af stað með innleiðingu nýrrar áætlunar, það mun fela í sér kynningar á innihaldi nýrrar áætlunar ásamt þjálfunar í notkun hennar á foringjanámskeiðum BÍS og á Skátaþingi 2023.

Reynslan hefur líka sýnt að vinnu sem þessari er aldrei lokið að fullu. Það er mikilvægt að hafa áætlanir og að starfa eftir þeim en síðan þarf að rýna í reynsluna af þeim viðbrögðum og nota hana til að gera verkfærin og ferlana enn betri til framtíðar.

Nálgast viðbragðsáætlun

Sækja: Viðbragðsáætlun Íþrótta- og æskulýðsstarfs

Hátíðarkvöldvaka 2. nóvember

Thu, 10 Nov 2022 09:59:00 GMT

Kröftugar konur Íslandssögunnar þema Fálkaskátadagasinns í ár

Mon, 07 Nov 2022 17:39:00 GMT

Sunnudaginn 6.nóvember tóku um 80 vaskir 10-12 ára skátar þátt í fálkaskátadeginum sem að þessu sinni var tileinkaður 100 ára afmæli kvennskátastarfs. Skátafélagið Mosverjar í Mosfellsbæ voru umsjónarfélag dagsins og settu upp 12 spennandi verkefnapósta þar sem varpað var ljósi á konur sem hafa skarað fram úr á sínu sviði á Íslandi allt frá Hallgerði Langbrók til Vigdísar Finnbogadóttur og Annie Mist.

Dagskráin hófst á miðbæjartorgi Mosfellsbæjar þar sem skátafélög mættu með vel búna skáta enda veðrið nokkuð kalt. Hópurinn fékk kynningu á lífi og störfum Lady Olive Baden-Powell og upphafi skátahreyfingarinnar.

Dagskrárpóstum hafði verið dreift um bæinn og þurfti hver flokkur að velja sér sína leið. Ratleikurinn gekk út á að stofnandi kvennskátastarfs í heiminum Lady Baden-Powell væri að safna saman kröftugum íslensku konunum í skátaflokkinn sinn og þurftu flokkarnir að takast á við áskoranir í nafni þekkra kvenna. Til dæmis þurftu þau að draga einn stærsta björgunarsveitarbíl landsins í nafni Annie Mist og búa til grímu úr náttúrulegum efnum í anda Bjarkar Guðmundsdóttur. Auk þess voru verkefni í ætt við kassaklifur, baka pönnukökur á kókdós og semja skátalag.

Í lok dags hópuðust flokkarnir aftur saman á miðbæjartorginu þar sem heitt kakó beið þeirra og farið varið í nokkra leiki áður en farið var heimleiðis.

100 ára afmælisár kvenskáta á Íslandi

Fri, 21 Oct 2022 15:19:00 GMT

Í tilefni af 100 ára afmæli kvenskátastarfs á Íslandi ætlum við að varpa sérststöku ljósi á sérstöðu kvenskátastarfs í heiminum:

Nóvember – sameiginleg hátíðarkvöldvaka með SSR 2.nóvember í ráðhúsi Reykjavíkur.
Sérstaklega miðuð að skátafélögunum, börnum og ungmennum en allir velkomnir á meðan húsrúm leyfir.

Desember – Vörpum ljósi á Friðarloga verkefnið á vegum st. Georgs gildanna og hvetjum til þátttöku

Janúar – Kynnum sérstaklega leiðtogamódel WAGGGS á Neista og á fyrstu helgi Gilwell.

Febrúar – Thinking day dagskrárpakki WAGGGS verður unninn í öllum skátafélögum. Sérstök hátíðardagskrá tileinkuð sögu kvenskátastarfs og sýning á munum tengdum starfinu verður haldin 19.febrúar

Tíðindi frá félagsforingjafund

Thu, 20 Oct 2022 15:31:00 GMT

Haustfundur félagsforingja BÍS var haldinn í Hraunbæ 123 4. október síðastliðinn.

Þar var farið yfir stöðu mála á skrifstofunni, rætt um samning skátanna við Sportabler, farið yfir niðurstöður ánægjukönnunar BÍS, ný viðbragðsáætlun Æskulýðsvetvangsins var kynnt, og skipun mótsstjóra landsmóts skáta 2024 var tilkynnt.

Af starfsmannamálum skrifstofunnar var það helst að Helga Þórey Júlíudóttir framkvæmdastjóri BÍS hefur látið af störfum og mun Harpa Ósk skátahöfðingi stíga tímabundið í stöðu hennar meðan á ráðningarferli stendur. Auglýst verður eftir nýjum framkvæmdastjóra fljótlega. Önnur starfsmannamál skrifstofunnar haldast óbreytt. Helstu verkefni skrifstofunnar voru kynnt en framundan eru spennandi tímar þar sem endurgerður starfsgrunnur BÍS mun brátt líta dagsins ljós og síðustu mánuði hefur leiðbeinendasveitin hafið námskeiðahald fyrir ungmenni innan skátahreyfingarinnar. Þátttaka í nýju námskeiðunum hefur verið mjög góð.

Rætt var um þann samning sem BÍS hefur með skráningar- og miðilskerfinu Sportabler. Núna er sá prufusamningur sem BÍS gerði við skráningarfyrirtækið að renna út og breytast í hefðbundinn samning. Mun sú breyting hafa í för með sér mánaðarlegan kostnað og ræddir voru möguleikar þess að félögin muni þurfa að greiða árgjald til að bera kostnað af sínum hluta samningsins. Umræða félags- og aðstoðarfélagsforingja um Sportabler var jákvæð, og lýsti fólk yfir ánægju með kerfið í samanburði við fyrra skráningarkerfi. Einnig var lýst yfir ánægju með leiðbeiningar fyrir skráningarkerfið sem erindrekar BÍS hafa útbúið og dreift til félaganna.

Send var út ánægjukönnun á þátttakendur skátastarfs í vor. Þar var forráðafólk beðið um að svara spurningum um upplifun barna sinna í starfinu. Niðurstöður könnunarinnar voru kynntar á fundinum og var þar helst minnst á ánægju forráðafólks með útivist og gildi skátastarfs í lífi barna sinna. Forráðafólk óskaði eftir meiri útivist, fleiri útilegum, og að upplýsingar um starfið bærist bæði í gegnum Sportabler og með tölvupósti.

Ný viðbragðsáætlun Æskulýðsvettvangsins verður birt 8. nóvember og fengu félagsforingjar stutta kynningu á efnistökum. Skátar hafa lengi starfað eftir viðbragðsáætlun ÆV og hafa lagt mikið af mörkum við uppfærslu þeirrar nýju.

Kolbrún Ósk Pétursdóttir hefur verið skipuð mótsstjóri Landsmóts skáta 2024. Mótið verður haldið á Úlfljótsvatni 12-19.júlí 2024. Kolbrún Ósk hefur strax hafist handa við að búa til mótsstjórn og munu nánari upplýsinga vera að vænta fljótlega.

Fleiri en 200 íslenskir skátar tóku þátt í JOTA-JOTI 2022

Thu, 20 Oct 2022 14:11:00 GMT

Alþjóðlega skátamótið JOTA-JOTI fór fram helgina 14.-16. október, skammstöfunin stendur á ensku fyrir alheimsmót skáta í loftinu og alheimsmót skáta á internetinu. Á milli 2 og 3 miljónir skáta um allan heim tóku þátt í mótinu. Íslenskir skátar um land allt tóku líka þátt í viðburðinum en skátar frá Akranesi, Akureyri, Búðardal, Reykjavík og Hafnarfirði voru á meðal þátttakenda.

Það eru ýmsar leiðir færar til að taka þátt í mótinu en skátar geta bæði tekið þátt sem einstaklingar eða tekið þátt í mótinu í stærri hópum. Mótið fer fram á rafrænu mótsvæði sem skiptist upp í dagskrártorg þar sem hvert torg er með ólíka áherslu. Innan hvers torgs er síðan fjölbreytt og spennandi dagskrá yfir helgina þar sem þátttakendur geta tengst skátum um allan heim ýmist á zoom fundum, í tölvuleikjum eða bara með að fást við verkefni í raunheimum á sama tíma og þúsundir annarra.

Flestir íslenskra skáta tóku þátt með sínu skátafélagi en félögin fóru ólíkar leiðir til að taka þátt. Skátafélögin Landnemar og Hraunbúar voru í félagsútilegu umrædda helgi á Úlfljótsvatni og í Lækjabotnum og nýttu mótið fyrir dagskrá í útilegunni hjá sér, þau fengu líka aðstoð radíóskáta sem mættu til þeirra og hjálpuðu þeim að taka þátt í þeim hluta mótsins sem fór fram í loftinu gegnum talstöðvar og annan fjarskiptabúnað. Skátafélag Akraness, Klakkur og Stígandi voru héldu viðburð í sinni heimabyggð vegna tilefnisins þar sem áhugasamir skátar gátu komið að taka þátt í mótinu með sínum skátaforingjum og gist á meðan að á viðburðinum stóð. Árbúar hittust síðan í skátaheimilinu til að taka þátt saman í mótinu meðan sum í hópnum voru heima en tengd við restina af hópnum gegnum sameiginlega spjallrás. Garðbúar skráðu síðan hóp til þátttöku og auglýstu til sinna skáta og foringja sem tóku síðan þátt sitt í hvoru lagi. Þá tóku á milli 10 og 20 íslenskir skátar líka þátt í mótinu án þess að vera í stærri hóp.

Í heildina tóku því fleiri en 200 skátar þátt í mótinu og var skiptingin eftirfarandi samkvæmt skrá mótsins:
Skátafélagið Árbúar – 7 skátar
Dróttskátsveitin Oríón, skátafélagi Akraness – 14 skátar
Radíóskátar – 7 skátar
Skátafélagið Stígandi – 10 skátar
Skátafélagið Klakkur – 14 manns
Skátafélagið Garðbúar – 20 skátar
Skátafélagið Landnemar – 50 skátar
Skátafélagið Hraunbúar – 74 skátar

10 Rekkaskátar fengu forsetamerkið

Wed, 19 Oct 2022 13:52:00 GMT

Hringborð drekaskátaforingja

Tue, 18 Oct 2022 11:54:00 GMT

Drekaskátaforingjar hittust fimmtudaginn 13. október á hringborði drekaskátaforingja. Tilgangur hringborðsins var að skapa vettvang fyrir drekaskátaforingja að hittast og spegla sig við aðra drekaskátaforingja með því að deila reynslum og ræða ákveðin málefni.

Skilaboðakassi fyrir traustan félaga

Skátaforingjar frá Skjöldungum, Sunna Dís og Gunnhildur, deildu reynslu sinni við að nota skilaboðakassa í drekaskátasveitinni sinni til þess að bjóða drekunum upp á möguleikann á að senda þeim skilaboð nafnlaust. Þau höfðu umræðu um kassann með sveitinni þar sem hann var staðsettur frammi á gangi og hvernig skátarnir gátu nýtt sér kassann til að deila með foringjunum bæði hvernig þeim líður á fundunum og að koma með hugmyndir af dagskrá fyrir sveitina. Foringjarnir sögðu reynsluna mjög góða og að mörg gagnleg skilaboð höfðu komið yfir önnina. Þær nýttu kassan til þess að vinna að færnimerkinu traustur félagi.

Hvað geta drekar

Védís frá starfsráði og fyrrum drekaskátaforingi ræddi við foringjana um að drekaskátar geta oft á tíðum mun meira en við höldum. Hún sagði frá reynslu sinni sem drekaskátaforingi hjá Landnemum ásamt Júlíu og hvernig þæt settu sér það markmið að reyna að gera dagskrána eins spennandi og krefjandi og þær gátu. Þær hjálpuðu hvor annarri að muna eftir því að vefja ekki drekaskátana inn í bómulinn heldur að skapa frekar vettvang þar sem drekarnir fá tækifæri til að reyna almennilega á sig. Einnig minnti Védís okkur á að auðvelt er að breyta innifundum í útifundi, að stundum er venjan að gera ákveðin verkefni inni í skátaheimilinu sem auðvelt er að færa út og mögulega virka fundirnir enn betur og verða skemmtilegari úti í nærumhverfinu og náttúrunni.

Hvernig keyrir maður ólíka dagskrá

Egle fyrrum drekaskátaforingi í Garðbúum fór yfir hvernig hún leyfði drekaskátunum að velja sér ,,vinnuhópa/flokka“ eftir áhugasviði þar sem hver hópur var að einblína á ákveðin færnimerki en öll sveitin fór í gegnum dagskráhringinn á sama tíma sem endaði í að öll fengu þau færnimerkin sem unnið var að. Hún fór einnig yfir hvernig hún bjó til spennandi dagskráhringi upp úr hugmyndum skátanna, þar sem engin hugmynd er of stór heldur er hægt að finna leiðir til að vinna allar hugmyndir inn í dagskráhring eða tengja við færnimerki. Það mikilvægasta er að muna að gera dagskrána spennandi og hugsa út fyrir kassann. Hún deildi síðan með okkur sínum eftirminnilegustu fundum eða dagskráhringum eins og útibíó þar sem krakkarnir bjuggu til bíla úr pappakassa, pókemon fund þar sem krakkarnir bjuggu til nýja pókemona og alþjóðlegt þema þar sem krakkarnir völdu lönd og lærðu um menninguna hjá þeim og fóru í stopdans með lögum þeirra landa.

Góðar umræður í lokin

Heilt yfir var hringborðið góður vettvangur fyrir skátaforingjana að hittast og ræða saman um hvernig við gera drekaskátastarfið spennandi og krefjandi. Farið var yfir hvað stendur í starfsgrunni skátanna um drekaskáta og voru skátaforingjar sammála um að gott er að hafa viðmið um hvert þau eiga að stefna með starfinu. Í lokin voru góðar umræður um dagskrá drekaskáta og náðu foringjarnir að spyrja hvort annað um hugmyndir og deila skemmtilegum og eftirminnilegum fundum og dagskráhringjum.

Hringborð fjölskylduskátaforingja

Fri, 14 Oct 2022 13:35:00 GMT

Fimmtudaginn 6.október fór fram hringborð fjölskylduskátaforingja í Skátamiðstöðinni. Þá hittust fjölskylduskátaforingjar frá sex skátafélögum, þar af voru tvö skátafélög sem hafa verið með starfandi fjölskylduskátastarf síðasta árið, tvö skátafélög sem eru farin af stað með fjölskylduskátastarf núna í haust og tvö skátafélög sem vilja byrja með fjölskylduskátastarf.

Gagnlegar umræður

Opnar umræður um ýmiss málefni tengd fjölskylduskátum voru rædd, þar á meðal skráningarmál, verðlag, staðsetningar fundanna, tímasetningar fundanna og dagskráin sjálf á fundum.

Að auki fór erindreki BÍS yfir nýja umgjörð sem skátamiðstöðin er að vinna að sem snýst um að auðvelda nýjum fjölskylduskátaforingjum eða skátafélögum að hefja fjölskylduskátastarf í sínu umhverfi. Í umgjörðinni kemur fram hvers vegna fjölskylduskátastarf er mikilvægt bæði fyrir fjölskylduna en einnig fyrir skátafélagið. En fjölskylduskátastarf er tækifæri til þess að veita börnum undir þátttöku aldri yngsta aldursbils í skátafélaginu möguleikann á því að taka þátt í krefjandi og spennandi dagskrá með fjölskyldunni sinni. Með virkri þátttöku fjölskyldumeðlima nær skátafélagið að stofna jákvætt samband milli síns og fjölskyldanna í hverfinu.

Sameiginlegur drekaskátadagur í vor

Hringborðið var mjög gagnlegt og mynduðust mjög áhugaverðar samræður þar sem foringjar náðu að spegla sig hvert við annað og deila reynslum um fjölskylduskátastarf. Hópnum fannst tilvalið að stefna að sameiginlegum degi fyrir fjölskylduskáta eins og er fyrir önnur aldursbilin og ætla að stefna á að halda svoleiðis dag að vori.

Hringborð rekkaskátaforingja

Thu, 22 Sep 2022 10:36:00 GMT

Hringborð rekkaskátaforingja fór fram í Skátamiðstöðinni þriðjudagskvöldið 21. september. Rekkaskátar og foringjar þeirra mættu frá 5 félögum af þeim 17 sem halda úti starfi fyrir aldursbilið. En þrátt fyrir að mega vera fjölmennara reyndist hringborðið afar góður og fræðandi vettvangur fyrir viðstödd.

Rekkaskátanetið komið af stað

Eitt stærsta málið sem var rætt við hringborðið var Rekkaskátanetið, en fyrir tveimur árum á sama vettvangi var lagður grunnur að áætlunum sem gátu síðan ekki gengið fram sökum heimsfaraldurs, á síðasta starfsári voru síðan opnir fundir fyrir rekkaskáta haldnir í hinum ýmsu skátaheimilum undir sama nafni. Við hringborðið var rykið dustað af þessum tveggja ára gömlu áætlunum, að skátafélög sem stæðu að rekkaskátastarfi myndu taka sig saman um að tryggja þrjá viðburði á komandi ári fyrir rekkaskáta auk þess starfs sem mun eiga sér stað innan þeirra sveita. Þetta samstarf um viðburðarhald muni síðan stuðla að þéttara tengslaneti á milli rekkaskátaforingja og rekkaskátasveita og vonandi nýtast til að tryggja efldara samstarf þvert á félög t.d. svo að rekkaskátar geti boðið rekkaskátum utan sinnum sveitar að taka þátt með sér í flottum verkefnum, til að deila hugmyndum og fleira.

Áframhaldandi þróun á stuðningi vegna forsetamerkis

Védís frá starfsráði kynnti umgjörðina í kringum forsetamerkið og svaraði nokkrum praktískum spurningum um þau efni. Vegabréfið er enn nokkuð nýlegt kerfi og þótt það líkist mjög kerfinu sem var í kringum aldamót upplifðu fæstir foringjar nútímans það kerfi og því hefur verið áskorun að leiðbeina rekkaskátum í því. Þess vegna var kafað ofan í hvaða hindranir skátaforingjar hafa helst rekið sig á í þessum stuðningi og hvernig megi halda áfram að þróa stuðningsnetið. Niðurstaðan var sú að rekkaskátaforingjar vildu áfram geta fengið kynningar- og stöðufundi um forsetamerkið inn til sinna sveita frá Skátamiðstöð. Starfsráð hélt nýlega í fyrsta sinn kvöld þar sem þau sem væru að vinna að forsetamerkinu gætu komið og var óskað eftir því að slíkt væri gert einu sinni á önn. Þá sagði skátaforingi Svana frá yfirlitsskema sem hann þróaði til að hafa betri yfirsýn með stöðu hvers og eins í sveitinni sem ynni að merkinu og var óskað eftir að Skátamiðstöð myndi þróa slíkt skema sem gæti nýst foringjum með sama hætti.

Framfarir einstaklingsins

Davíð Þrastarson sem er á síðasta ári í rekkaskátunum kynnti sína vegferð en Davíð hefur verið afar duglegur að grípa þau ýmsu tækifæri sem bjóðast einstaklingum utan sveitarstarfsins en hann situr m.a. í ungmennaráði, er áheyrnafulltrúi ungmenna í stjórn BÍS og hefur verið í mótstjórn Drekaskátamóts undanfarin ár. Að kynningu lokinni fékk Davíð spurningar frá rekkaskátum, rekkaskátaforingjum og erindrekum um hvaða hvatar hafi drifið hann áfram, hvar hann heyrði af tækifærunum og ýmislegt fleira.

Upplýsingamiðlun til rekkaskáta og rekkaskátaforingja

Í gegnum alla aðra umræðu var mikið rætt um upplýsingamiðlun frá Skátamiðstöð til rekkaskáta og foringja þeirra. Það virtist á umræðum við hringborðið sem að skátaforingjar rekkaskáta hafi lykilhlutverki að gegna í þeirri upplýsingamiðlun en á umræðum virtist ljóst að rekkaskátar væru best meðvituð um tækifæri sem þau fengu fregnir af í gegnum skátaforingja sinn. Því verður áhersla lögð á að sinna góðri upplýsingamiðlun til skátaforingja en það mun fara fram á póstlista og í Sportabler hóp fyrir stærri verkefni og tækifæri, en þegar það kemur að minni tækifærum sem hafa jafnvel forsetamerkis tengsl verður það bara í Sportabler. Síðan er mikilvægt að skátaforingjar láti skátana vita af tækifærum á samfélagsmiðlum fyrir þau til að fylgjast með s.s. á facebook og instagram síðu skátanna.

Annað hringborð fyrir áramót

Heilt yfir var hringborðið var góður vettvangur til að ræða saman, spegla og leita upplýsinga viðstödd óskuðu eftir öðru hringborði fyrir rekkaskátaforingja fyrir áramót og ætlar starfsráð að verða við því.

Breytingar á siðareglum Æskulýðsvettvangsins

Thu, 18 Aug 2022 15:11:00 GMT

Siðareglur Æskulýðsvettvangsins tóku breytingum í júní síðastliðnum en samkvæmt 2. grein laga BÍS eru siðareglur Æskulýðsvettvangsins þær siðareglur sem gilda fyrir allt starfsfólk og sjálfboðaliða Skátanna.

Mikilvægt er fyrir öll sem starfa með börnum og ungmennum að vera meðvituð um skyldur sínar og ábyrgð. Siðareglur þessar snúa annars vegar að samskiptum og hins vegar að rekstri og ábyrgð. Gerist aðili brotlegur við reglurnar er heimilt að vísa honum úr starfi, tímabundið eða að fullu.

Breytingarnar byggja á breytingartillögu sem Skátarnir lögðu fram á aðalfundi Æskulýðsvettvangsins í apríl síðastliðnum og voru í framhaldi unnar af ráðgjafahópi Æskulýðsvettvangsins. Ráðgjafahópinn skipa aðilar frá öllum aðildarfélögunum; Skátarnir, Landsbjörg, KFUM og KFUK og UMFÍ.

Helstu breytingar voru eftirfarandi:

Breytingar sem snúa að samskiptum:

Þessum reglum var bætt við

Starfsfólk, stjórnarfólk, sjálfboðaliðar eða aðrir sem gegna valdastöðum þurfa að vera meðvitaðir um ábyrgð sína og þann aðstöðumun sem staða þeirra skapar þeim.
Hvers kyns kynferðislegt daður, orðbragð eða samneyti aðila í ábyrgðarstöðu gagnvart þátttakanda sem er yngri en 18 ára er með öllu óheimilt.
Forðast skal kynferðislegt daður, orðbragð eða samband við sjálfráða þátttakendur, samstarfsfólk eða aðra aðila sem ábyrgðaraðilar gegna valdastöðu gagnvart. Komi til gagnkvæms ástarsambands er það á ábyrgð þess sem gegnir valdastöðu að gera stjórnendum sínum kunnugt um það.

Regla sem var áður númer 8, og fjallar um skyldu ábyrgðaraðila að fá leyfi fyrir öflun upplýsinga úr sakaskrá, var fjarlægð þar sem hún er í hluta reglanna sem fjalla um rekstur og ábyrgð og á frekar heima þar.

Reglu númer 14 var breytt og er nú:

Starfsfólk og sjálfboðaliðar skulu sýna ábyrgð í rafrænum samskiptum og netnotkun. Ekki skal vera í rafrænum samskiptum við þátttakendur undir 18 ára aldri án vitneskju forsjáraðila þeirra og aðeins í tengslum við þátttöku þeirra í starfi félagsins. Öll samskipti skulu fara fram í gegnum viðurkenndar samskiptaleiðir.

Markmiðið með þessari breytingu er að vekja athygli á því að samskiptaleiðir í félögum sem okkar þurfa að vera skýrar og eiga sér stað með þeim hætti að við getum svarað fyrir þær. Með því að taka fram að samskipti eigi sér stað í gegnum viðurkenndar samskiptaleiðir er einnig betur hægt að stíga inn í þegar samskipti eiga sér stað á samfélagsmiðlum sem við viðurkennum ekki sem samskiptavettvang starfi með börnum.

Breytingar sem snúa að rekstri og ábyrgð

Þessum reglum var bætt við:

Öllu starfi skal sinna með hagsmuni félagsins að leiðarljósi og standa skal vörð um markmið og heiður þess. Stjórnarfólk, starfsfólk og sjálfboðaliðar skulu sýna félaginu, samstarfsfólki, samstarfsaðilum og þátttakendum virðingu, sanngirni og trúnað í samskiptum sínum.
Aldrei skal stefna heilsu eða öryggi starfsfólks og sjálfboðaliða í hættu. Ávallt skal sýna fyllstu aðgát og varkárni í starfi og koma í veg fyrir að starfsfólki og sjálfboðaliðum séu falin verkefni eða þau lendi í aðstæðum sem þau ráða ekki við.
Allt starf skal unnið á opinn, upplýstan, gagnsæjan og lýðræðislegan hátt. Ávallt skal veita faglegar og réttar upplýsingar.
Stjórnarfólk, starfsfólk og sjálfboðaliðar skulu gæta þess að sitja ekki beggja vegna borðs í málum er varða hagsmuni félagsins. Forðast skal að skapa þær aðstæður sem geta dregið óhlutdrægni þeirra í starfi í efa. Það á meðal annars við þegar félagið tilnefnir einstaklinga til að taka þátt í eftirsóttum verkefnum eða þegar samið er við starfsfólk, verktaka eða aðra þjónustuaðila.

Uppfærðar siðareglur má finna hér og á prentvænuformi hér .

Nánari upplýsingar um Æskulýðsvettvanginn og starfsemi hans er hægt að finna hér .

Skátarnir hljóta höfðingjalega gjöf

Thu, 04 Aug 2022 16:16:00 GMT

Lionsklúbburinn Muninn og Lionsklúbburinn Ýr færðu Skátunum að gjöf 114 gerðarleg borð með samanfellanlegum fótum í minningu hjónanna Friðriks Haraldssonar og Steinu Haraldsdóttur. Þessi borð munu koma sér vel víða um land hjá skátafélögunum sem og á Úlfljótsvatni. Skátahreyfingin sendir þeim miklar þakkir fyrir!

Dróttskátar í þúsund metrum

Fri, 08 Jul 2022 14:48:00 GMT

Ds. Fimmvörðuháls hófst með því að hátt í 30 dróttskátar ásamt foringjum lögðu af stað í ævintýri seinnipart föstudagsins 10. júní, full eftirvæntingar með stútfulla bakpoka. Hópur með sameiginlegt markmið: Ganga yfir Fimmvörðuháls á tveimur dögum í hópi skemmtilegra dróttskáta. Við í foringjahópnum settum markið ennþá hærra: að koma öllum alla leið heilum á húfi og brosandi.

Hópurinn lagði af stað um klukkan 16 frá Skógarfossi og tók fyrsti hjallinn á, en því var bjargað með því að stilla vel bæði bakpokann og höfuðið. Hópurinn hélt síðan áfram og var stefnan sett á Baldvinsskála og Fimmvörðuskála þar sem átti að gista eina nótt í 800 eða 1.000 metra hæð. Á leiðinni skoðuðum við þrjátíu og eitthvað fossa sem sannarlega glöddu augað.

Leiðin upp tók á alla bæði líkamlega og andlega en ýmsar leiðir voru nýttar meðal dróttskátanna til að koma sér upp. Einhverjir fóru í hláturjóga, sumir gengu alltaf fyrstir, aðrir sungu og svo tóku nokkrir að sér að vera í peppliðinu.

Þegar klukkan var orðin eitt eftir miðnætti sáum við loksins skálana og hresstust ansi margir við það, en mörgum fannst þetta engan endi ætla að taka, enda allir með þunga bakpoka á bakinu og hækkunin mikil. Tilfinningin að sjá jökultoppana og skálanna þar á milli, í bjartri sumarnótt, er eiginlega ólýsanleg.

Helmingurinn af hópnum renndi sér í átt að Baldvinsskála og hinn helmingurinn í átt að Fimmvörðuskála. Hópurinn í Baldvinsskála var kominn í hús um tvöleytið en Fimmvörðuskálahópurinn um klukkan þrjú. Skálaverðir tóku óvænt á móti hópunum en allir komust loksins í poka og sváfu til morguns.

Hópurinn úr Baldvinsskála lagði af stað fyrr morguninn eftir og hittust hóparnir uppi á hálsinum í þúsund metra hæð. Á laugardeginum var stefnan sett á Bása með viðkomu hjá Magna og Móða, nýjum tindum sem urðu til í eldgosi 2010 og eru því yngri en dróttskátarnir. Ferðin niður gekk hraðar að mörgu leyti. Fjölbreytt umhverfi og að sjá niður í Þórsmörkina hjálpaði öllum að muna eftir markmiðinu.

Brattafönn var hápunktur göngunnar fyrir marga. Mikil lækkun á mjög stuttum tíma. Skálaverðir höfðu útvegað nokkra plastpoka sem voru nýttir í að gera upplifunina ennþá skemmtilegri. Allir renndu sér niður brekkuna á sínum hraða með bros á vör og stundum snjó í andlitinu.

Síðan tók við Heljarkamburinn þar sem einnig var töluvert af snjó. Hópur nýliða í björgunarsveit var aðeins á undan okkur og gerði leiðina greiðari fyrir okkur meðfram hlíðinni þar sem við fikruðum okkur eftir keðjum og klifurlínum. Heppnin alveg með okkur.

Það voru síðan glaðir dróttskátar sem gengu yfir Kattahryggi og alveg niður í Bása. Allir höfðu lagt af stað saman og kláruðu saman. Í Básum voru frábærir foringjar búnir að tjalda flestum tjöldunum og gera klárt á grillið. Tók því á móti okkur kvöldmatur og standandi tjöld sem var kærkomið fyrir göngugarpana. Markmiðum ferðarinnar náð!

Eftir kvöldmat hurfu sumir inn í tjöld, spjölluðu og sáust ekki fyrr en morguninn eftir, á meðan aðrir sungu og töluðu fram eftir nóttu. Á sunnudeginum var öllu pakkað niður og haldið heim með rútunni með viðkomu í Merkurkeri. Þar óðum við upp ánna í gegnum stóran helli og gil og náði vatnið upp á læri og stundum lengra. Frábært ævintýri í stórkostlegri náttúru með góðum skátavinum og skemmtilegur endir á góðri dróttskátahelgi.

Ds. Fimmvörðuháls var svo sannarlega vel heppnuð dróttskátaferð þar sem þátttakendur og foringjar fengu að njóta sín og takast á við krefjandi verkefni. Við hlökkum til að hittast aftur í ágúst á landsmóti dróttskáta á Akureyri.

Ferðin var styrkt af Bandalagi íslenskra skáta í gegnum Styrktarsjóð skáta og má með sanni segja að þar hafi “dósum verið breytt í káta skáta”.

Texti: Sigurður Úlfarsson og Ragnheiður Silja

Drekatemjari fær gullmerki, mótsstjórn Drekaskátamóts kveður og ný tekur við

Mon, 13 Jun 2022 18:44:00 GMT

Landsmót drekaskáta var haldið um síðustu helgi þar sem yfir 240 skátar skemmtu sér við leik og störf. Í lok móts var Dagbjört Vatnsdal Brynjarsdóttir heiðruð fyrir dygg störf sín í þágu ylfinga og nú drekaskáta og var afhentur þórshamarinn úr gulli.

Dagga eins og hún er alltaf kölluð hefur sýnt ótrúlega þrautseigju og eljusemi og mætt sem foringi með skátana sína á aldrinum 8-10 ára á hvert drekaskátamót sem haldið hefur verið síðan 1997. Auk þess að vera einnig starfandi félagsforingi Mosverja hefur hún unnið fjölmörg óeigingjörn störf í þágu skáta og skátahreyfingarinnar og fyrir það ber að þakka.

Unnur Líf Kvaran var einnig heiðruð fyrir ötult starf í þágu drekaskáta og drekaskátamóts síðustu 5 ár. Hún hefur starfað sem sveitarforingi í Skjöldungum, áður var hún aðstoðarfélagforingi Fossbúa og hefur verið í forsvari fyrir mörg verkefni á vegum BÍS. Var henni afhentur þórshamarinn úr bronsi.

Á mótinu kvaddi elsti hópur mótsstjórnar sem hefur starfað saman í 4-6 ár og ný mótsstjórn sem hefur verið í þjálfun síðustu 2 ár tekur nú við. Stjórn BÍS þakkar fráfarandi stjórn fyrir vel unnin störf og einstakan starfsanda og hvetur nýja mótsstjórn til dáða. Var eldri mótsstjórn afhent þjónustumerki BÍS úr gulli, þeim Sölku, Ísaki og Birtu úr Mosverjum, Óla úr Árbúum og Aroni úr Skjöldungum.

Yngri hluti mótsstjórnar fékk þjónustumerki BÍS úr silfri, þeir Davíð og Reynir úr Garðbúum, Ægir úr Faxa, Valur Kári úr Skjöldungum og Andri úr Kópum.

Vífilsbúð – ný útilífsmiðstöð skáta vígð

Mon, 16 May 2022 11:51:00 GMT

Skátafélagið Vífill og Garðabær vígðu nýja stórglæsilega Vífilsbúð í stórglæsilegu umhverfi í Grunnuvötnum. Við óskum þeim innilega til hamingju með þessu nýju útilífs- og ævintýramiðstöð í miðri Heiðmörk.

Sumardagurinn fyrsti 2022

Wed, 20 Apr 2022 15:49:00 GMT

Sumardagurinn fyrsti 2022 er haldinn hátíðlegur fimmtudaginn 21. apríl á höfuðborgarsvæðinu og víðar um landið hafa skátar skipulagt og standa að glæsilegum og stórskemmtilegum hátíðarhöldum fyrir börn, ungmenni og fjölskyldur þeirra.

Í Reykjavík

Skátafélagið Árbúar í Árbæ

Staðsetning: Árbæjarsafn og við Skátaheimilið Hraunbæ 123
Tímasetning: 12:00-15:00

Skátafélagið Árbúar leiðir skrúðgöngu ásamt lúðrasveit Verkalýðsins, gengið verður frá Árbæjarsafni að Árbúaheimilinu en þar tekur við póstaleikur þar sem verða verðlaun í boði, útieldun, hoppukastalar, klifurveggur og fleira. Veitingasala verður á staðnum sem fjáröflun fyrir félagið. Fá frekari upplýsingar á facebook viðburðarsíðu .

Skátafélögin Garðbúar í Fossvogi, Landnemar í Hlíðunum og Skjöldungar í Laugardal

Staðsetning: Fjölskyldu- og húsdýragarðurinn
Tímasetning: 14:00-17:00

Skátafélögin þrjú ætla að sameina krafta sína og standa fyrir miklu sumarfjöri í fjölskyldu og húsdýragarðinum. Dagskráin verður í gangi á milli 14:00 og 17:00 og verður 50% afsláttur á aðgangsverði í garðinn á meðan. Auk alls þess sem er að skoða og gera í garðinum öllu jafna verður klifurturn, hoppukastali, hindrunarbraut, poppað yfir opnum eldi og skátaleikir. Á staðnum verður sölutjald þar sem ýmis góðgæti verður til sölu sem fjáröflun fyrir unga skáta sem stefna á Alheimsmót skáta í Suður-Kóreu 2023. Fá frekari upplýsingar á facebook viðburðarsíðu.

Skátafélagið Vogarbúar í Grafarvogi

Staðsetning: Skátaheimili Vogabúa, Logafold 106
Tímasetning: 13:00-16:00

Skátafélagið Vogabúar munu standa fyrir skemmtidagskrá fyrir alla fjölskylduna við skátaheimilið sitt. Í boði verða leiktæki, hoppukastalar og ýmis skemmtun með skátaívafi. En síðan mæta líka töframaðurinn Daníel Sirkus og trúbadorinn Jón Sigurðsson og halda uppi stuðinu. Á staðnum verða seldar vöfflur, kakó, kaffi og svalar sem fjáröflun fyrir skátafélögin. Fá frekari upplýsingar á facebook viðburðarsíðu .

Skátafélagið Ægisbúar í Vesturbænum

Staðsetning: Skátaheimili Ægisbúa, Neshaga 3
Tímasetning: 12:00-15:00

Skátafélagið Ægisbúar blæs til carnivals á sumardeginum fyrsta við skátaheimili sitt. Á staðnum verða hoppukastalar auk annarar skemmtunar. Á staðnum verða sölutjöld með góðgæti og ýmis matarkyns sem fjáröflun fyrir félagið. Fá frekari upplýsingar á facebook viðburðarsíðu.

Í Hafnarfirði

Skátafélagið Hraunbúar

Staðsetning: Víðistaðakirkju og Thorsplani
Tímasetning: 13:00-16:00

Skátafélagið Hraunbúar tekur þátt í hátíðarhöldunum tengt Björtum dögum og sumardeginum fyrsta í Hafnarfirði. Dagskrá stendur til boða allan daginn víða um bæinn en nánari upplýsingar um heildardagskrána má finna á upplýsingasíðu Hafnarfjarðarbæjar . Skátafélagið mun koma að messu í Víðistaðakirkju en að henni lokinni mun skátafélagið Hraunbúar og Lúðrasveit Tónlistarskóla Hafnarfjarðar standa fyrir skrúðgöngu frá kirkjunni að Thorsplani. Að skrúðgöngu lokinni verður ævintýraleg fjölskyldudagskrá á Thorsplani í umsjón skátafélagsins Hraunbúa, í boði verða hoppukastalar og skemmtidagskrá á sviði. Frekari upplýsingar á facebook viðburðarsíðu .

Í Garðabæ

Skátafélagið Vífill

Staðsetning: Vídalínskirkju og Miðgarði
Tímasetning: 13:00-16:00

Skátafélagið Vífill mun að vana halda uppi hátíðarhöldunum vegna sumardagsins fyrsta í Garðabæ. Skátafélagið mun koma að messu í Vídalínskirkju en að henni lokinni verður skrúðganga frá kirkjunni að íþróttamiðstöðinni Miðgarði þar sem skemmtidagskrá verður í boði fyrir gesti og gangandi. Frekari upplýsingar má finna á upplýsingasíðu Garðabæjar .

Í Mosfellsbæ

Skátafélagið Mosverjar

Staðsetning: Miðbæjartorgi og Varmá
Tímasetning: 13:00-16:00

Skátafélagið Mosverjar mun leiða skrúðgöngu frá Miðbæjartorgi að Varmá þar sem skólahljómsveit Mosfellsbæjar tekur á móti skrúðgöngunni með sumartónum. Að skrúðgöngu lokinni hefst dagskrá á Varmá með hoppuköstulum, leiktækjum, vöfflum, pylsugrilli, svampakasti og almennu skátafjöri. Frekari upplýsingar má finna á upplýsingasíðu Mosfellsbæjar .

Í Reykjanesbæ

Skátafélagið Heiðabúar

Staðsetning: Keflavíkurkirkju og skátaheimili Heiðabúa, Hringbraut 101
Tímasetning: 12:30-17:30

Skátafélagið Heiðabúar mun leiða skrúðgöngu frá skátaheimilinu að Keflavíkurkirkju þar sem skátafélagið kemur að messu en að henni lokinni tekur við fjölskyldudagskrá og ratleikur frá Skátaheimilinu. Á staðnum verður hægt að kaupa aðgang að kaffiveitingum sem er fjáröflun fyrir skáta sem halda á alheimsmót í Suður-Kóreu 2023.

Á Selfossi

Skátafélagið Fossbúar

Staðsetning: Skátaheimilinu Glaðheimum, Tryggvagötu 36
Tímasetning: 14:00-16:00

Nóg verður um að vera á Selfossi þar sem skátafélagið Fossbúar taka þátt í hátíðinni Vor í Árborg en skátafélagið verður með fjölskylduskemmtun þar sem boðið verður upp á andlitsmálningu, hoppukastala og svampakast. Á staðnum verður líka veitingasala sem er fjáröflun fyrir félagið. Frekari upplýsingar má finna á upplýsingasíðu Árborgar .

Á Akureyri

Skátafélagið Klakkur

Staðsetning: Skátaheimili Klakks, Þórunnarstræti, Akureyrarkirkju og tjaldsvæðinu á Hömrum
Tímasetning: 10:40-15:00

Skátafélagið Klakkur mun vera með skrúðgöngu frá skátaheimilinu að Akureyrarkirkju þar sem skátafélagið kemur að messu en að henni lokinni er öllum boðið að koma í fjölskyldudagskrá og súpu að tjaldsvæðinu á Hömrum. Frekari upplýsingar á viðburðarsíðu á facebook .

Á Akranesi

Skátafélag Akraness

Staðsetning: Tónlistarskólanum, Akraneskirkju og Vinaminni
Tímasetning: 10:30-14:30

Skátafélagið Akraness sér um skrúðgöngu frá tónlistarskólanum að Akraneskirkju þar sem skátafélagið kemur að messu, að henni lokinni verður boðið upp á grillaðar pylsur og hoppukastala við Vinaminni.

Skátar setja sér jafnréttisstefnu

Tue, 05 Apr 2022 16:21:00 GMT

Á Skátaþingi sem haldið á Bifröst um liðna helgi samþykktu skátar sér jafnréttisstefnu. Þórhildur Elínardóttir Magnúsardóttir sem leitt hefur vinnuna með góðum hópi skáta kynnti stefnuna, sem var samþykkt samhljóða.

Með stefnunni er verið að skýra hlutverk og leiðir til að tryggja raunverulega inngildingu og aðgengi allra hópa að skátastarfi óháð kynþætti, þjóðerni, kynvitund, kynhneigð, kyntjáningu, trú, stjórnmálaskoðun, aldri, stétt eða stöðu að öðru leyti.

Hlutverk Bandalags íslenskra skáta er að tryggja að allir skátar njóti jafnréttis í skátastarfi og er því settar þær skyldur á herðar að koma í veg fyrir mismunun, ójafnrétti og óréttláta meðferð.

Markmið stefnunnar eru:

Að öll sem sinni sjálfboðaliða- eða forystustörfum fyrir skátana búi yfir greinargóðri þekkingu og vitund um mannréttindi, jafnrétti, inngildingu og fjölbreytileika samfélagsins.
Að ráðstafanir verði teknar til að kynna skátastarf fyrir , og taka sérstaklega á móti í skátastarfi , þeim hópum samfélagsins sem eiga erfiðara með að stunda tómstundir eða æskulýðsstarf, t.a.m. vegna fjárhags, tungumáls, fötlunar, þjóðernis, kynferðis eða stöðu að öðru leyti.
Að hvar sem það er hægt skal skátastarf aðlagað að ólíkum þörfum þeirra sem stunda það, svo lengi sem það stríðir ekki gegn Grunngildum skátahreyfingarinnar, markmiðum hennar eða skátaaðferðinni.
Að öll lög, stefnur og reglugerðir BÍS endurspegli þessa skuldbindingu samtakanna að stuðla að frekari inngildingu og fjölbreytileika í skátahreyfingunni.
Að miðla þessari stefnu út á við til félaga BÍS og víðar.
Að endurmeta og endurbæta þessa stefnu eftir því sem við á svo að BÍS geti haldið áfram að þróast í átt að frekari inngildingu og fjölbreytileika í skátahreyfingunni.

Skoða stefnuna í heild .

Harpa Ósk er nýr skátahöfðingi

Sun, 03 Apr 2022 13:30:00 GMT

Harpa Ósk Valgeirsdóttir hefur tekið við sem skátahöfðingi og var henni vel fagnað á fjölsóttu Skátaþingi sem haldið er á Bifröst nú um helgina.

segir Harpa og þar vísar hún m.a. til verkefna um að gera börnum af erlendum uppruna auðveldara að sækja skátastarf, sem og til fjölgunar skátafélaga á landsbyggðinni. Hún segir að með skýrari dagskrárgrunni sem var kynntur á skátaþingi sé einnig skref stigið til að gera starfið aðgengilegra.

Stærsta breytingin sem var kynnt er nýtt aldursbil í dagskránni, sk. Hrefnuskátar fyrir börn 5 – 7 ára og þar taka skátarnir þátt með foreldrum sínum, samhliða fjölskylduskátastarfi. Harpa Ósk hefur góða reynslu af fjölskylduskátastarfi en hún tekur þátt í slíku með dóttur sinni.

Bjóðum eldri skáta velkomna til verkefna

Harpa Ósk hefur verið virk í skátastarfi frá unga aldri, en hún segir að það sé ekki forsenda fyrir þátttöku fullorðinna í skátastarfi. Margir hafi komið inn í skátastarfið í gegnum starf barna sinna og haldið áfram. Harpa hvetur eldri skáta sem tóku sér hlé frá skátastarfi til að hafa samband við sitt skátafélag því það séu mörg áhugaverð verkefni sem þarfnast eldhuga.

„Við bjóðum allra eldri skáta velkomna til verkefna,” segir Harpa Ósk. Verkefnin eru næg og fjölbreytt hvort heldur hjá Bandalagi íslenskra skáta eða hjá skátafélögunum. „ Áherslur okkar eru að auka gæði skátastarfsins, gefa fleiri börnum kost á þátttöku, efla fræðslu skátaforingjanna og bjóða fleiri velkomna til verkefna. Með þessum áherslum vonumst við til að skátahreyfingin jákvæð áhrif á sitt samfélag og stuðli að bættum heimi,” segir Harpa.

Skátastarfið í forgrunni á skátaþingi

Fri, 01 Apr 2022 12:00:00 GMT

Skátaþing verður haldið á Bifröst um helgina, 1. – 3. apríl, og þar verður í forgrunni að vinna með uppfærðan dagskrárramma skátasstarfsins. Rúmlega hundrað skátar í leiðtogahlutverkum munu mæta og leggja línur fyrir starfið á næstunni.

Uppfærður dagskrárrammi

Á skátaþinginu verður mikil áhersla á samhæfingu og samtal um dagskrárramma skátastarfsins, bæði heildarrammann sem og einstaka aldursbil. Skátarnir leggja áherslur á heildstæða og ævintýralega dagskrá. Í stefnu skátanna sem samþykkt var á síðasta skátaþingi er lögð áhersla á stuðningsefni fyrir skátaforingja, skátaaðferðina, dagskrárhringinn, flokkakerfið og hvatakerfið. Allt eru þetta þættir sem auðvelda skátafélögunum að innleiða ævintýralegt og metnaðarfullt skátastarf.

Harpa Ósk og Marta eru sammála um að mikilvægt sé fyrir skátahreyfinguna að eiga þetta samtal og eru ánægðar með hve margir starfandi skátaforingjar ætla að sækja skátaþingið, auk stjórna skátafélaganna í landinu.

Á þessu skátaþing[ i verður kjörið í fyrsta sinn í nýtt útilífsráð í samræmi við lagabreytingar frá síðasta skátaþingi. Hlutverk ráðsins verður að hvetja til viðburða sem fela í sér útilíf og styðja útivistartengt viðburðarhald.

Róleg endurnýjun og öflugri fagráð

Af sjö skátum í stjórn Bandalags íslenskra skáta (BÍS) halda fimm áfram og tveir bætast í hópinn. Stjórnin er sjálfkjörin eins og áður segir.

Lög BÍS gera ráð fyrir lágmarksfjölda í fagráð en þar sem fleiri framboð bárust og til að tryggja að ekki sitji eingöngu fulltrúar eins kyns í ráðum hefur stjórn BÍS boðað tillögu um að fleiri munu sitja í fagráðum en lágmarksfjöldi segir til um. Þannig verði öflugri fagráð og aukinn stuðningur við skátafélögin.

Drekaskátadagurinn 2022

Tue, 15 Mar 2022 16:47:00 GMT

Drekaskátadagurinn 2022 fór fram sunnudaginn 6.mars þar sem fjöldi drekaskáta kom saman á heimasvæði Skjöldunga í Laugardalnum. Kátir skátar fylltu dalinn og á víð og dreif mátti sjá unga skáta leysa verkefni, þar sem þeir tóku þátt í skemmtilegri og fjölbreyttri dagskrá. Dagurinn einkenndist af frábæru veðri, sólin skein og logn var í lofti, á meðan drekarnir þutu um allan Laugardalinn í ævintýralegum póstaleik með goðsöguþema. Skátarnir þurftu að leysa ýmiss verkefni og þrautir með samvinnu, hjálpsemi og útsjónarsemi að leiðarljósi ásamt því að fá tækifæri til að kynnast hvort öðru betur þvert á skátafélögin. Þegar drekaskátum tókst að leysa öll verkefnin þá sameinuðust þau í skátasöng og gleði ásamt því að ylja sér með heitu kakói og kexi.

segir Aron Gauti Sigurðarson, skátaforingi hjá Skjöldungum og einn skipuleggjenda drekaskátadagsins.

Til hamingju með Þankadaginn í dag!

Tue, 22 Feb 2022 12:06:00 GMT

Kæru skátar, Til hamingju með Þankadaginn í dag! Árlega halda skátar hátíðlega upp á 22. febrúar og minnast bæði stofnenda […]

Hringfarinn veitir fjölskylduskátum veglegan styrk

Mon, 13 Dec 2021 16:39:00 GMT

Forskráning á Alheimsmót 2023 í Kóreu opin

Tue, 07 Dec 2021 17:14:00 GMT

Netnámskeið í barnavernd nú aðgengilegt á ensku

Tue, 09 Nov 2021 10:49:00 GMT

Fálkaskátadeginum frestað

Fri, 05 Nov 2021 11:59:00 GMT

Ungmennaráð heimsmarkmiðanna

Wed, 03 Nov 2021 16:32:00 GMT

Drekaskátar eru öflugir!

Tue, 26 Oct 2021 14:02:00 GMT

Helga Þórey er nýr framkvæmdastjóri skátanna

Fri, 03 Sep 2021 14:23:00 GMT

Fyrsti útivistarskáli Íslands -Væringjaskálinn 100 ára.

Mon, 23 Aug 2021 14:32:00 GMT

Breytingar hjá Skátamiðstöðinni

Fri, 20 Aug 2021 15:12:00 GMT

Hefð að hjóla á skátamót

Fri, 09 Jul 2021 17:19:00 GMT

Skátasumarið er hafið

Fri, 09 Jul 2021 11:06:00 GMT

Lokafærslan: Happdrætti og merki

Mon, 04 May 2020 11:24:00 GMT

Verkefni 46 – Útieldun

Thu, 30 Apr 2020 14:58:00 GMT

Verkefni 45 – Moltutunna

Wed, 29 Apr 2020 11:48:00 GMT

Verkefni 44 – Vinabönd

Tue, 28 Apr 2020 16:12:00 GMT

Verkefni 43 – Hunangsflugur

Mon, 27 Apr 2020 11:58:00 GMT

Verkefni 42 – Heimsmarkmiðin heim

Sun, 26 Apr 2020 12:09:00 GMT

Verkefni 41 – Dagur umhverfisins

Sat, 25 Apr 2020 11:27:00 GMT

Verkefni 40 – Ræktaðu þitt eigið grænmeti

Fri, 24 Apr 2020 16:30:00 GMT

Verkefni 39 – Heimagerður ís í poka

Thu, 23 Apr 2020 13:13:00 GMT

Verkefni 38 – Heimagert kerti úr appelsínu

Wed, 22 Apr 2020 12:02:00 GMT

Verkefni 37 – Kort til að gróðursetja

Tue, 21 Apr 2020 14:20:00 GMT

Verkefni 36 – Endurnota, minnka, endurvinna

Mon, 20 Apr 2020 10:50:00 GMT

Verkefni 35 – Skáti er sjálfstæður

Sun, 19 Apr 2020 11:24:00 GMT

Verkefni 34 – Skáti er réttsýnn

Sat, 18 Apr 2020 12:00:00 GMT

Verkefni 33 – Skáti er nýtinn

Fri, 17 Apr 2020 09:32:00 GMT

Verkefni 32 – Skáti er samvinnufús

Thu, 16 Apr 2020 13:54:00 GMT

Verkefni 31 – Skáti er heiðarlegur

Wed, 15 Apr 2020 10:47:00 GMT

Verkefni 30 – Skáti er tillitssamur

Tue, 14 Apr 2020 14:13:00 GMT

Færsla 29 – Skáti er náttúruvinur

Mon, 13 Apr 2020 12:52:00 GMT

Verkefni 28 – Skáti er traustur

Sun, 12 Apr 2020 12:43:00 GMT

Verkefni 27 – Hláturjóga

Sat, 11 Apr 2020 11:29:00 GMT

Verkefni 27 – Hláturjóga

Skáti er glaðvær svo sannarlega. Til að undirstrika það ætlar Védís Helgadóttir að leiða okkur í gegnum hláturjóga í dag kl 14:00. Viðburðurinn mun eiga sér stað á fundarforritinu Zoom og þar munum við hlæja saman sem er eitthvað sem allir hafa gott af, alltaf.

Verkefni 26 – Skáti er hjálpsamur

Fri, 10 Apr 2020 11:00:00 GMT

SKÁTI ER HJÁLPSAMUR

Vissir þú að skáti er hjálpsamur?
Fyrsta grein skátalaganna er skáti er hjálpsamur. Á næstu dögum munu Stuðkví verkefnin vera með áherslu á skátalögin.

Í dag ætlum við að hjálpa náttúrunni og fara út að plokka!

Plokk gengur út á að fara út að ganga eða skokka með einn (eða fleiri) poka og týna rusl. Þetta er skemmtileg leið til að hreyfa sig og gera góðverk á sama tíma!

P.S. skáti er ekki bara hjálpsamur heldur er hann líka náttúruvinur!

Ef þú kemst ekki út að plokka getur þú gert ýmislegt hjálplegt heima!

Þú getur…

..hjálpað til við að elda matinn heima.

..gert fínt fyrir páskana.

..týnt til föt sem þú notar ekki lengur til að gefa í fatasöfnun Rauða Krossins.

..styrkt gott málefni.

Taktu síðan mynd af þér með öllu ruslinu sem þú týnir og póstaðu henni undir #stuðkví #skátarnir

Verkefni 25 – Fyrstu viðbrögð

Thu, 09 Apr 2020 08:04:00 GMT

FYRSTU VIÐBRÖGÐ

Mikilvægt er að allir séu meðvitaðir um hvernig skal bregðast við í óvæntum aðstæðum. Á flestum heimilum eru til sjúkrakassar eða töskur þar sem er hægt að finna plástra, sárabindi, sjúkrateip, teygjubönd og ýmislegt fleira. Það er gott að undirbúa sjálfan sig og heimilið fyrir jarðskjálftum, eldgosum eða slysum og því erum við með nokkur verkefni fyrir ykkur.

Neyðarnúmer

Gott er að hafa lista á heimilinu með símanúmerum hjá helstu fjölskyldumeðlimum og vinum. Þar geta því allir leitað ef nauðsynlegt er.
Ásamt þeim símanúmerum er gott að minna á Neyðarlínuna 112. Mikilvægt er að allir kunni á heimasímann/farsímann og viti hvernig eigi að hringja. Einnig er sniðugt að skrifa niður heimilsfang á sama lista.

Heimilisfang: Hraunbær 123, 110 Reykjavík

Neyðarlínan 112
Mamma: XXX-XXXX
Pabbi: XXX-XXXX
Kolla systir: XXX-XXXX
Palli bróðir: XXX-XXXX
Sigga frænka: XXX-XXXX

Sjúkrakassi

Við viljum hvetja ykkur til þess að kynna ykkur leiðbeiningar á þessum hlutum, og hvernig skal nota þá á réttan máta. Hægt er að búa til sinn eigin sjúkrakassa til að hafa á heimilinu. Slysavarnafélagið Landsbjörg og Rauði Krossinn selja einnig tilbúna sjúkrakassa, en einnig er hægt að fá hugmyndir að innihaldi kassans frá þeim.

Gott er að hafa kassann í skærum lit
Hann þarf að vera nógu stór
Á stað þar sem allir vita
Búa til lista yfir innihald kassans
Það þarf að athuga innihald reglulega

Almannavarnir

Á heimasíðu Almannavarna er hægt að skoða fræðsluefni sem hjálpar okkur að búa okkur undir óvæntar hættur. Þar er meðal annars hægt að finna upplýsingar um hvernig eigi að bregðast við í jarðskjálfta , hvernig á að útbúa neyðarkassa og hvernig skal undirbúa heimilið fyrir aðrar hamfarir.

Skyndihjálp

Þú getur auk þess náð þér í skyndihjálparappið sem þú finnur inn á skyndihjalp.is . Þar getur þú meðal þess kynnt þér undirstöðuatriði fyrstu hjálpar, tekið frítt vefnámskeið í skyndihjálp og lært skyndihjálparlagið.

Verkefni 24 – Heimsmet í lestri

Wed, 08 Apr 2020 10:50:00 GMT

Verkefni 23 – Alþjóðlegur dagur heilsu

Tue, 07 Apr 2020 11:14:00 GMT

Verkefni 22 – Alvöru gönguferð

Mon, 06 Apr 2020 08:15:00 GMT

Verkefni 22 – Alvöru gönguferð

Nú er tilvalinn tími til þess að finna til bakpoka, nesti og góða skó! Undirbúðu þig fyrir gönguferð og skelltu þér út í náttúruna. Það sem er ýmislegt sem þarf að huga að áður en maður fer í gönguferð, þá sérstaklega á Íslandi þar sem veðrið getur breyst skyndilega. Mundu að klæða þig vel fyrir gönguferðina! Þú getur byrjað á að fara í gönguferð um hverfið þitt, og svo þegar þú ert tilbúinn getur þú farið á fjöll, í villta náttúru eða á þína uppáhaldsstaði.

Verkefni

ALVÖRU GÖNGUFERÐ!
Í dag ætlar þú að fara í 5 km göngu! 5 kílómetrar/5000 metrar eru eins og að synda 100 ferðir í 50 metra sundlaug. Hvað er langt að labba í skólann þinn?
Farðu á kortasjá á netinu, til dæmis www.lmi.is og skoðaði lengdir frá heimili þínu. Nú ætlar þú nefnilega að hanna 5 km gönguferð.

1. Hannaðu gönguferð sem er 5000 metra, t.d. á lmi.is eða öðrum síðum
2. Pakkaðu í góðan bakpoka: Nesti, plástrum, auka fatnaði samkvæmt veðurspá, hleðslubanka ef þú ert með síma.
3. Sýndu fullorðnum leiðina sem þú ætlar að ganga.
4. Farðu út og fylgdu leiðinni nákvæmlega eins og þú hannaðir hana.
5. Komdu heim og segðu öllum ferðasöguna á meðan þú borðar góðan kvöldmat

Útbúnaður

Skór
Mikilvægt er að vera í góðum skóm þegar farið er í langar göngur. Best er að vera í gönguskóm, en stundum kaupir maður ekki svoleiðis fyrr en maður er hættur að stækka. Ef þú átt ekki gönguskó, þá er hægt að finna góða vetrarskó eða íþróttaskó. Hafðu gönguleiðina í huga þegar þú velur þér skó. Ef þú ætlar að labba í gegnum drullusvað, þá eru nýju hvítu íþróttaskórnir kannski ekki góð hugmynd. Yfirleitt er erfitt að ganga lengi í stígvélum, og forðast það flestir, en það má þó alveg. Mikilvægast er að vera í skóm sem þér finnst þæginlegir.

Fatnaður
Það er mjög mikilvægt að þér líði vel þegar þú ert í gönguferðinni! Því er hlýr og góður fatnaður lykilatriði. Gott er að finna til föðurland eða ullarnærföt ef það er kalt úti. Finndu til góðar og hlýjar buxur, t.d. flísbuxur, göngubuxur eða íþróttabuxur. Gott er að vera í ullarbol eða íþróttabol fyrir göngur. Næst getur þú fundið flíspeysu eða ullarpeysu. Finndu til góðan jakka, en athugaðu veðurspána fyrst, verður rigning, sól eða vindur?Reyndu að finna góða sokka, helst göngu- eða ullarsokka. Mikilvægt er að taka með húfu, vettlinga og jafnvel buff/trefil, og ef það verður of heitt, þá fer það bara ofaní tösku.

Bakpoki
Taktu með þér góðan bakpoka í gönguferðina. Í bakpokann getur þú svo pakkað ýmsum hlutum sem gætu verið nytsamlegir.

Vatnsbrúsa
Nesti t.d. samloka, ávextir, grænmeti, hnetur og fl.
Auka sokkapar
Regnjakka og regnbuxur
Skyndihjálpardót, t.d. plástra, teygjubindi og hælsærisplástra.

Þú getur svo bætt við þeim hlutum sem þú vilt taka með í þína gönguferð. Ef þú getur tekið myndir af undirbúningnum og ferðinni ekki gleyma að deila þeim með okkur með myllumerkinu #stuðkví.

Verkefni 21 – Páskakanína

Sun, 05 Apr 2020 10:00:00 GMT

Verkefni 20 – Teikniverkefni

Sat, 04 Apr 2020 08:00:00 GMT

TEIKNIVERKEFNI

1. Verkefni – Teiknað í formin

Efni: Pappír, feitur tússlitur eða litur, fínn penni eða dökkur trélitur.

skref: Taktu feitan tússlit eða annarskonar lit og teiknaðu eitthvað krass á blað! Það má vera með línum, eða fylla alveg inn í alla reitina. Best er að nota ljósa liti!
skref: Skoðaðu krassmyndirnar og athugaði hvort þú getur séð einhverjar myndir inn í krassinu.
skref: Notaðu svartan penna eða dökkan trélit og teiknaði inn í formin það sem þú sérð! Ef þú sért ekkert, prófaði bara að teikna eitthvað inn í formin og sjáðu hvað gerist! Þú mátt fara út fyrir línurnar!
Skref: Þú ert komin/n með listaverk!

https://skatarnir.is/wp-content/uploads/studkvi.video_.mp4

2. Verkefni – Hverfið þitt

Efni: Pappír og hvaða litir sem er.

skref: Taktu þér blað og blýant og teiknaðu upp kort af götunni eða hverfinu þínu! Settu inn alla staði sem þér finnast vera mikilvægir, t.d. skólinn þinn, strætóskýli, vinir þínir, húsið þitt, skemmtilegar leynileiðir o.s.fv.
skref: Litaðu kortið þitt og skrifaðu inn helstu staðarheiti og kennileiti. Einnig getur verið gaman að merkja inn leiðir sem þú labbar t.d. í skólann, eða hvar þú hefur fundið bangsa í gluggum!

3. Verkefni – Útiteiknun

Efni: Pappír og hvaða litir sem er.

skref: Farðu út í garð eða út í göngutúr! Á meðan þú ert úti skaltu safna eða taka eftir 5 hlutum sem þú sérð úti.
skref: Ef þú vilt, þá getur þú tekið blað og blýant með þér og teiknað það sem þú finnur úti! Ef ekki þá getur þú annað hvort tekið með þér eitthvað inn eins og t.d. steina eða munað hvað þú sást úti og teiknað það þegar þú kemur inn.

Deildu endilega með okkur myndunum sem þú teiknar með myllumerkinu #stuðkví!

Verkefni 19 – Alheimsmót á internetinu

Fri, 03 Apr 2020 12:00:00 GMT

Verkefni 18 – HreyfiTETRIS

Thu, 02 Apr 2020 14:01:00 GMT

Verkefni 7 – Gátur og þrautir

Sun, 22 Mar 2020 11:10:00 GMT

Skemmtu þér vel og ekki gleyma að deila með okkur þegar þið finnið lausnirnar –> #skátarnir #stuðkví

Fyrsta þrautin er orðarugl! Getur þú fundið öll týndu orðin? Þegar þú ert búin getur þú prófað að búa til þitt eigið orðarugl og leyft öðrum að prófa:)

Önnur þrautin er peningaröðin! Hér sérðu mynd af peningum þar sem fjöldi peninga í annarri röðinni eru 4 og í hinni röðinni eru 5. Getur þú, með því að færa EINN pening, haft raðirnar þannig að BÁÐAR raðirnar séu með 5 peningum?

Þriðja þrautin er skátadulmál. Skátadulmál er vinsælt meðal skáta og hefur meðal annars verið notað í leikjum, bréfaskriftum og dagbókarfærslum. Nærð þú að finna út úr því? Notaðu fyrri myndina til að leysa skátadulmálið.

Verkefni 6 – Eldfjall

Sat, 21 Mar 2020 07:00:00 GMT

ELDFJALL

Hefur þig alltaf langað til að gera þitt eigið eldfjall? Íslendingar þekkja mörg eldfjöll og kannast við sögur af eldgosum. Prófaðu að búa til þitt eigið eldfjall, og láttu það gjósa!

Hér að neðan eru grunn upplýsingar fyrir verkefnið, en þú getur farið á þessa vefsíðu og skoðað þetta myndband til þess að sjá hvernig skal búa til eldfjall skref fyrir skref.

Það sem þú þarft:

Tóma plastaflösku, helst 500 ml
Dagblöð
Límband
Box til að setja eldfjallið í
Hveiti og vatn (fyrir pappírsmassann, sjá hér að neðan)
Málningu, til dæmis akrílmálningu
Vatnshelt lakk ef þú vilt nota eldfjallið aftur og aftur

Pappírsmassi:

Kíktu á þessa vefsíðu til að sjá frekari leiðbeiningar.

Blandaðu einum hluta af hveiti við tvo hluta af vatni í gamalt ílát, til dæmis 1/2 bolla hveiti og 1 bolla af vatni.
Settu blönduna í örbylgjuofn og hitaðu vel.
Örbylgjuofnar eru með mismunandi stillingar, svo þetta gæti tekið 30 sek – 3 mín. Hrærðu í blöndunni inn á milli og fylgstu vel með.
Blandan mun vera mjög heit, svo þú vilt kæla hana smá. Það er hægt að geyma blönduna í lokuðu íláti í ísskáp í 1-2 daga.

Fyrir eldgosið:

Rauðan matarlit
Heitt vatn
Matarsóda
Edik

#stuðkví

Skemmtu þér vel! Sýndu okkur eldfjallið þitt með því að setja mynd eða myndband á samfélagsmiðla undir myllumerkinu #skátarnir og #stuðkví. Hlökkum til að sjá!

Verkefni 5 – Gólfið er hraun

Fri, 20 Mar 2020 13:45:00 GMT

GÓLFIÐ ER HRAUN

Prófaðu þennan leik! Ferðastu á milli staða, án þess að snerta gólfið. Passaðu þig að nota einungis hluti sem má stíga eða sitja á!

Hér má sjá útfærslu af þessum leik! Taktu myndband af þér í leiknum og deildu með okkur.

#stuðkví

Skemmtu þér vel! Sýndu okkur hvernig þín þrautabraut er með því að setja myndband á samfélagsmiðla undir myllumerkinu #skátarnir og #stuðkví.

Verkefni 4 – Klósettpappírleikarnir

Thu, 19 Mar 2020 15:50:00 GMT

KLÓSETTPAPPÍRLEIKARNIR

Klósettpappírleikarnir eru safn frábærra leikja þar sem þátttakendur keppast á ýmsan máta og nota til þess klósettpappírsbirgðir heimilisins. Hér geta ungir sem aldnir keppt við jafnaldra sína eða á milli kynslóða. Allir leikirnir eru hannaðir með það í huga að klósettpappírinn skemmist ekki hann geti áfram sinnt mikilvægu hlutverki sínu. Þau sem taka þátt geta deilt myndum eða myndböndum af þátttöku sinni á samfélagsmiðlum ásamt leiknum sem þau búa til undir myllumerkjunum #stuðkví og #klósettpappírleikarnir og þá eigið þið möguleika á að vinna 32 klósettpappírrúllur en dregið verður úr þátttakendum á síðasta degi samkomubanns.

Það er starfsfólk Skátamiðstöðvarinnar og sambýlisfólkið Javier Paniagua og Hulda María Valgeirsdóttir sem sýna hvernig skuli leika hvern leik og leyfa þau sér því að hafa minna en 2 metra fjarlægð á milli sín en ekki er mælst til þess að aðrir en fólk sem deilir sama heimili leiki þessa leiki saman á meðan samkomubann ríkir.

Leikur 1 – Körfupappír

Þátttakendur liggja á bakinu með kassa eða annað heppilegt ílát við höfuð sér og með jafn margar klósettpappírsrúllur við fætur sér. Markmið leiksins er að koma öllum rúllunum í ílátið en til þess má bara nota fætur, ekki hendur. Ef þátttakandi hittir ekki ofan í ílátið má sækja klósettpappírsrúllurnar og setja þær aftur við fætur sér og síðan halda áfram að reyna að koma þeim ofan í ílátið. Það vinnur sem er fyrst að koma öllum klósettpappírsrúllunum ofan í ílátið.

Leikur 2 – Þrautabrautin

Þáttakendur nota klósettpappírsrúllur til að marka þrautir í þrautabraut. Hægt er að gera tvær eða fleiri samskonar þrautabrautir hlið við hlið og keppast um hvert sé fyrst að ljúka brautinni eða hafa bara eina þrautabraut og keppa í henni til skiptis um hvert lýkur þrautabrautinni á bestum tíma.

Leikur 3 – Rúllukast

Þátttakendur standa andspænis hvort öðru með gott bil á milli sín og hafa við fætur sér ílát og sama fjölda af klósettpappírsrúllum. Markmið leiksins er að kasta eins mörgum klósettpappírsrúllum og maður getur frá sínum enda vallarins í ílát andstæðingsins á 60 sekúndum. Ef að klósettpappírsrúllurnar lenda á milli ílátana mega báðir þátttakendur hlaupa og sækja rúlluna og kasta henni aftur frá sínum enda vallarins. Ef þær rúlla hins vegar fyrir aftan ílát andstæðings má sá aðili eingöngu kasta klósettpappírsrúllunni aftur. Það vinnur sem nær fleiri klósettpappírsrúllum í ílát andstæðingsins.

Leikur 4 – Slá upp turn

Í þessum leik keppast þátttakendur um að slá undir klósettpappírsrúllur þannig að þær lendi samsíða ofan á annarri klósettpappírrúllu og myndi þannig klósettpappírsrúllu turn. Þessi leikur reynir á þolinmæði og fínhreyfingar en gleður verulega þegar þátttakendum tekst sett markmið. Útfæra má leikinn á ýmis máta t.d. má reyna að slá þriðju klósettpappírsrúllunni upp á hinar tvær og ýmislegt fleira skemmtilegt.

Leikur 5 – Sundur, saman

Þátttakendur fá eina klósettpappírsrúllu hvort og keppast um að rúlla allri rúllunni í sundur og síðan aftur saman. Hér þurfa þátttakendur að gæta þess að slíta ekki klósettpappírsrúlluna en þeim refsast það þegar þau rúlla henni aftur saman.

Leikur 6 – Rúlla sér í hring

Í þessum leik liggja þátttakendur á bakinu og setja klósettpappírsrúllu á il sína. Markmið leiksins er að rúlla sér í hring og halda jafnvægi á klósettpappírsrúllunni á sama tíma. Hægt er að keppast um að ná þessu fyrst eða mæla tíma. Eins og sjá má í myndbandinu sem fylgir skiptir öllu máli að gefa sér gott pláss til að leika þetta eftir.

Leikur 7 – Klósettpappírs keila

Við núverandi ástand má vera að margir séu ekki tilbúnir að stinga fingrum sínum í lánskúlu og fæstir landsmenn sem eiga sína eigin keilukúlu. Í þessum leik getur þú sett upp þína eigin keilubraut heima hjá þér! Stillið upp 10 klósettpappírs keilupinnum með því að stafla saman tveimur og tveimur klósettpappírsrúllum. Rúllið út tveimur klósettpappírsrúllum til vibótar til að marka braut sitthvorum megin við klósettpappírskeilupinnana. Því næst grípið þið eina klósettpappírsrúllu til viðbótar og notið hana í stað keilukúlu. Síðan gilda bara sömu reglur og í keilu, að fella alla 10 pinnana í einu tilraun telst til fellu og til feykju ef maður nær því í tveimur. Útfæra má leikinn þannig að bolti, appelsína eða keilukúla sé notuð til að fella klósettpappírs keilupinnana en hvetjum við þátttakendur þá að gæta innanhúsmuna, gólfefnis og veggja.

Leikur 8 – Búðu til þinn eigin leik!

Hér viljum við hvetja þátttakendur til að búa til sinn eigin leik! Við viljum þar að auki að þú hlaðir myndbandi, skýringarmyndum og leiðbeiningum leiksins upp á samfélagsmiðla og merkir með myllumerkjunum #stuðkví og #klósettpappírsleikarnir og þá gætir þú unnið 32 rúllur af klósettpappír!

Verkefni 3 – Ljósmyndamaraþon

Wed, 18 Mar 2020 10:01:00 GMT

LJÓSMYNDAMARAÞON

Það þarf smá hugmyndaflug í þetta verkefni og verður spennandi að sjá afraksturinn. Tilvalið að skella sér í smá göngutúr um hverfið og vinna saman að því að taka skapandi myndir af hlutunum á þessum lista, sérstaklega gaman ef að þau yngstu í hópnum fá að spreyta sig á myndavélinni!

#stuðkví

Skemmtu þér vel! Sýndu okkur hvað þú gerir með því að setja mynd á samfélagsmiðla undir myllumerkinu #skátarnir og #stuðkví. Hlökkum til að sjá myndir.

Verkefni 2 – Pokagerð

Tue, 17 Mar 2020 14:38:00 GMT

POKAGERÐ

Hefur þú einhvern tímann velt því fyrir þér hvað þú ættir að gera við gamla stuttermabolinn sem er orðinn aðeins of lítill, eða er með málningarslettum? Hér er hin fullkomna hugmynd, búðu til poka úr stuttermabolnum! Með því að endurnýta stuttermabolinn getur þú búið til flottan poka, sem hægt er að nota fyrir dót, nesti, mat, bækur eða hvað sem þér dettur í hug. Það eina sem þú þarft í þetta verkefni er stuttermabolur og skæri. Hægt er að fylgja leiðbeiningunum hér að neðan eða skoða myndbönd af þessu verkefni sem aðrir hafa gert, til dæmis þetta hér .

Skref fyrir skref

Finndu til stuttermabol og góð skæri.
Leggðu bolinn á borð/gólf og breiddu úr honum.
Brjóttu bolinn saman í tvennt.

4. Byrjaðu á að klippa ermarnar af, með því að fylgja saumunum á bolnum.
5. Breiddu aftur úr bolnum, en nú ætti hann að líta út eins og hlýrabolur.

6. Klipptu í kringum hálsmálið. Það má ná eins langt niður og þú vilt, en það fer eftir því hversu langt handfang þú vilt.
7. Snúðu bolnum við og breiddu úr honum.

8. Næst þarf að klippa botninn á bolnum í nokkra búta.
Klipptu um það bil 10 cm lengjur frá botninum á bolnum upp að miðju – en aðeins um ca. 3 cm breiðar lengjur – ath myndir fyrir betri útskýringar.

9. Þegar það er búið, þarf að hnýta saman lengjurnar.
Byrjið á því að gera einfaldan hnút á allar lengjurnar (tvær lengjur bindast saman, framaná og aftaná bolnum).

10. Næst þarf að taka efri lengjuna sem er hnýtt saman, og neðri lengjuna á næstu lengju, og hnýta þær saman. Þetta þarf að gera til að koma í veg fyrir göt á milli.
11. Svo endar þetta á því að þú hnýtir tvöfaldan hnút á allar lengjurnar svo þær séu alveg örugglega þéttar og fastar.

12. Snúðu pokanum við og hann ætti þá að vera tilbúinn!
13. Nú er hægt að fínpússa og til dæmis skreyta pokann með litum, glimmeri, hnoðrum eða því sem þér dettur í hug!

Hægt er að nota afgangana sem eru klipptir í burtu til þess að nota í til dæmis tuskur eða búninga.

#stuðkví

Skemmtu þér vel! Sýndu okkur hvað þú gerir með því að setja mynd á samfélagsmiðla undir myllumerkinu #skátarnir og #stuðkví. Hlökkum til að sjá myndir.

Verkefni 1 – Innilega í stofunni!

Mon, 16 Mar 2020 14:16:00 GMT

skatarnir

Stefnan tekin á Skátaþingi

Skátaþing sett í gærkvöldi

Skátaþing sett á Akureyri

Sólskin, sjóstökk og skátagleði

Dróttskátadagurinn var hreinasta veisla!

Skátaþingi frestað

Skátaþing 2026 - frestun

Hulda og Ragnar bætast í hóp starfsmanna

Nýr alþjóðarfulltrú BÍS hjá WOSM

Nýr alþjóðarfulltrúi bís hjá wosm

Fararstjórar undirbúa sig

Útkall: Agora

Agora er:

Hvar og hvenær:

Hverjir geta sótt um:

Verð:

Umsóknarfrestur er til 8. mars 2026.

Umsókn á Agora 2026

We got it.

That didn’t work.

Nýjir Gilwell skátar

Ungmennaþing

Afmælisþing

Aðalfundur Útilífsmiðstöðvar skáta Úlfljótsvatni

Vetrarmót Reykjavíkurskáta 2026

Umsókn sjálfboðaliða (IST) á alheimsmót skáta í Póllandi 2027

Virk þátttaka

Stuðningur

Viðurkenning

Umsókn þátttakenda á Alheimsmót skáta í Póllandi 2027

Útkall: Alþjóðafulltrúi WOSM

Stjórn Bís leitar nú að nýjum alþjóðafulltrúa WOSM til tveggja ára

Nordic Adventure Race 2026

Houens Odde Spejdercenter – Danmörku

KISC – Sviss

Kusafiri – Afríku

Nuestra Cabaña – Mexico

Our Chalet – Svissnesku Alparnir

Pax Lodge – London

Sangam – Indlandi

ung i norden

What is Ung I Norden?

Basic Info

Price

Price is 48.000 ISK per participant.

Location

JOTA-JOTI 2025

Hvað er JOTA-JOTI?:

﻿

Fyrir hverja er JOTA-JOTI:

﻿

Hvar fer JOTA-JOTI fram?:

﻿

Hvernig tekur þú þátt?:

1. skref – Heimsækja heimasíðu mótsins

2. skref – Stofnaðu aðgang eða skráðu þig inn

3. skref – Persónulegar upplýsingar

4. skref – Bæta við skáta 12 ára eða yngri

Alþjóðatækifæri: Euro Mini Jam 2026

Hvað?

Hverjir?

Umsóknarferlið

Um myndbandið og verkefnin:

Umsóknarfrestur er 5. nóvember 2025

Foringi / foringjar

Vässarö – Svíþjóð

Gamli fær nýja kamínu

Þankadagspakki 2026 – okkar vinátta

Þankadagspakki 2026 – okkar vinátta

Klípusögur kveiktu í umræðunum

Fálkaskátaflokkur Árbúa Fálkakempur 2025

Skátaskírteinið snýr aftur

Skátaskírteinið snýr aftur

26 sæmd forsetamerkinu á 60 ára afmæli þess

Umsókn þátttakanda á alheimsmóti 2027 - biðlisti

LANGAR ÞIG AÐ KOMA MEÐ Á ALHEIMSMÓT SKÁTA Í PÓLLANDI SEM ÞÁTTTAKANDI?

Hvað felst í því að vera þátttakandi á Alheimsmóti ?

Hvað kostar ?

Skilyrði fyrir þátttakendur